೩. ಬ್ರಹ್ಮದೇವಸುತ್ತವಣ್ಣನಾ

೧೭೪. ಏಕಕೋತಿ ವಿವೇಕಟ್ಠಿತತಾಯ ನಿಸ್ಸಟೋ. ಗಣಸಙ್ಗಣಿಕಾಭಾವೋ ತಸ್ಸಾನೇನ ದೀಪಿತೋ, ಕಿಲೇಸಸಙ್ಗಣಿಕಾಭಾವೋ ಪನ ‘‘ಅಪ್ಪಮತ್ತೋ’’ತಿಆದೀಹಿ ಪಕಾಸಿತೋ. ಪೇಸಿತತ್ತೋತಿ ನಿಬ್ಬಾನಂ ಪತಿ ಪೇಸಿತಚಿತ್ತೋ. ಸಮ್ಮದೇವಾತಿ ಞಾಯೇನೇವ. ಸೋ ಪನ ಯದಿ ಆಗಮನತೋ ಪಟ್ಠಾಯ ಲಬ್ಭತಿ, ವತ್ತಬ್ಬಮೇವ ನತ್ಥಿ, ಅಥ ಪಟಿಪದಾರಮ್ಭತೋ ಪಟ್ಠಾಯ ಲಬ್ಭತಿ, ಏವಮ್ಪಿ ವಟ್ಟತೇವಾತಿ ದಸ್ಸೇತುಂ ‘‘ಯಥಾ ವಾ ತಥಾ ವಾ’’ತಿಆದಿ ವುತ್ತಂ. ಅಗ್ಗಮಗ್ಗಾಧಿಗಮೇನ ಅಸಮ್ಮೋಹಪಟಿವೇಧಸ್ಸ ಸಿಖಾಪ್ಪತ್ತತ್ತಾ ಮಗ್ಗಧಮ್ಮೇಸು ವಿಯ ಫಲಧಮ್ಮೇಸುಪಿ ಸಾತಿಸಯೋ ಅಸಮ್ಮೋಹೋತಿ ‘‘ಸಯಂ ಅಭಿಞ್ಞಾ’’ತಿ ವುತ್ತನ್ತಿ ಆಹ ‘‘ಸಾಮಂ ಜಾನಿತ್ವಾ’’ತಿ. ಯಥಾ ಜಾನನಾ ಪನಸ್ಸ ಸಚ್ಛಿಕರಣಂ ಅತ್ತಪಚ್ಚಕ್ಖಕಿರಿಯಾತಿ ‘‘ಸಚ್ಛಿಕತ್ವಾ’’ತಿ ವುತ್ತನ್ತಿ ಆಹ ‘‘ಪಚ್ಚಕ್ಖಂ ಕತ್ವಾ’’ತಿ. ತಥಾ ಸಚ್ಛಿಕಿರಿಯಾ ಚಸ್ಸ ವಿಪಸ್ಸನಾಪಟಿಲಾಭೋತಿ ‘‘ಉಪಸಮ್ಪಜ್ಜಾ’’ತಿ ವುತ್ತನ್ತಿ ಆಹ ‘‘ಪಟಿಲಭಿತ್ವಾ’’ತಿ. ಏತೇನಾತಿ ‘‘ಖೀಣಾ ಜಾತೀ’’ತಿಆದಿವಚನೇನ.

ಜಾತಿ ಖೀಣಾತಿ ಏತ್ಥ ಜಾತಿಸೀಸೇನ ತಬ್ಬಿಕಾರವನ್ತೋ ಖನ್ಧಾ ವುತ್ತಾ. ಪುಬ್ಬೇವ ಖೀಣತ್ತಾತಿ ಮಗ್ಗಾಧಿಗಮನತೋ ಪಗೇವ ಅತೀತಭಾವೇನೇವ ಖೀಣತ್ತಾ. ತತ್ಥ ಅನಾಗತೇಸು. ವಾಯಾಮಾಭಾವತೋತಿ ಅವಿಜ್ಜಮಾನತ್ತಾ. ಅನಾಗತಭಾವಸಾಮಞ್ಞಂ ಗಹೇತ್ವಾ ಲೇಸೇನ ವುತ್ತಂ. ನ ಪಚ್ಚುಪ್ಪನ್ನಾ ವಿಜ್ಜಮಾನತ್ತಾತಿ ಸಂಕಿಲಿಟ್ಠಾ ಚ ಮಗ್ಗಭಾವನಾತಿ ಸಿಯಾತಿ ವಚನಸೇಸೋ. ಯಥಾ ಅಜಾತಫಲತರುಣರುಕ್ಖಮೂಲೇ ಛಿನ್ನೇ ಆಯತಿಉಪ್ಪಜ್ಜನಾರಹಾನಿ ಫಲಾನಿ ಛೇದನಪಚ್ಚಯಾ ಅನುಪ್ಪಜ್ಜಮಾನಾನಿ ನಟ್ಠಾನಿ ನಾಮ ಹೋನ್ತಿ, ಏವಮೇವ ಭಾವನಾಯ ಅಸತಿ ಉಪ್ಪಜ್ಜನಾರಹಾ ಕಿಲೇಸಾ ತಪ್ಪಚ್ಚಯಾ ಜಾತಿ ಚ ಮಗ್ಗಭಾವನಾಯ ಸತಿ ನ ಉಪ್ಪಜ್ಜಮಾನಾ ಪಹೀನಾತಿ ವುಚ್ಚನ್ತೀತಿ ಇಮಮತ್ಥಂ ದಸ್ಸೇತಿ ‘‘ಮಗ್ಗಸ್ಸ ಪನಾ’’ತಿಆದಿನಾ. ಅನುಪ್ಪಾದಧಮ್ಮತಂ ಆಪಜ್ಜನೇನ ಞಾಣೇನ ಖೀಣರಾಗವಸೇನ.

ಸೋಳಸಕಿಚ್ಚಭಾವಾಯಾತಿ ಸೋಳಸಕಿಚ್ಚತಾಯ, ಸೋಳಸವಿಧಸ್ಸ ವಾ ಕಿಚ್ಚಸ್ಸ ಭಾವಾಯ ಉಪ್ಪಾದನಾಯ. ಪಾಳಿಯಂ ಸಪದಾನನ್ತಿ ಸಪದಾನಚಾರೋ ವುತ್ತೋ ಭಾವನಪುಂಸಕನಿದ್ದೇಸೇನಾತಿ ಆಹ ‘‘ಸಪದಾನಚಾರ’’ನ್ತಿ. ಅನುಕ್ಕಮ್ಮಾತಿ ಅನತಿಕ್ಕಮಿತ್ವಾ. ಆಹುತಿಪಿಣ್ಡನ್ತಿ ಜುಹಿತಬ್ಬಪಿಣ್ಡಂ, ಜುಹನವಸೇನ ಅಗ್ಗಿಮ್ಹಿ ಪಕ್ಖಿಪಿತಬ್ಬಪಾಯಾಸಪಿಣ್ಡನ್ತಿ ಅಧಿಪ್ಪಾಯೋ. ಭೂತಬಲಿಕಮ್ಮನ್ತಿ ತಥಾ ಪಕ್ಖಿಪಿತ್ವಾ ಬಲಿಕಮ್ಮಕರಣಂ. ಹರಿತುಪಲಿತ್ತನ್ತಿ ಅಲ್ಲಗೋಮಯೇನ ಕತಪರಿಭಣ್ಡಂ. ವನಮಾಲಪರಿಕ್ಖಿತ್ತನ್ತಿ ಮನೋಹರಾಹಿ ವನಪುಪ್ಫಮಾಲಾಹಿ ಪರಿಕ್ಖಿತ್ತಂ. ಧೂಮಕಟಚ್ಛೂತಿ ಧೂಮಪಾನಂ. ಸೀಲಗನ್ಧನ್ತಿ ಸೀಲಂ ಪಟಿಚ್ಚ ಉಪ್ಪನ್ನಕಿತ್ತಿಗನ್ಧಂ. ಘಾಯಮಾನಸ್ಸಾತಿ ಉಪಗತಂ ಗಣ್ಹನ್ತಸ್ಸ.

ಇಮಮ್ಹಾ ಠಾನಾತಿ ಇಮಸ್ಮಾ ಮನುಸ್ಸಾನಂ ವಸನಟ್ಠಾನಾ, ಮಹಾಪಥವಿತಲತೋತಿ ಅಧಿಪ್ಪಾಯೋ. ಸಬ್ಬಹೇಟ್ಠಿಮೋತಿ ಬ್ರಹ್ಮಪಾರಿಸಜ್ಜಾನಂ ವಾಸಬ್ರಹ್ಮಲೋಕಮಾಹ. ಬ್ರಹ್ಮಪಥೋ ನಾಮ ಚತ್ತಾರಿ ಕುಸಲಜ್ಝಾನಾನಿ ಬ್ರಹ್ಮಲೋಕಮಗ್ಗಭಾವತೋ. ಜೀವಿತಪಥೋ ನಾಮ ಜೀವಿತಪವತ್ತಿಉಪಾಯಭಾವತೋ. ‘‘ಭುಞ್ಜತು ಭವಂ ಮಹಾಬ್ರಹ್ಮಾ’’ತಿ ವಚನಂ ಸನ್ಧಾಯಾಹ ‘‘ಕಿಂ ಜಪ್ಪಸೀ’’ತಿಆದಿ. ತಿಣಬೀಜಾನೀತಿ ಸಾಲಿತಣ್ಡುಲಾದೀನಿ. ಗೋಯೂಸನ್ತಿ ಖೀರಂ ಜಿಗುಚ್ಛನ್ತೋ ವದತಿ. ಅಯಮ್ಪಿ ಅತ್ಥೋ ‘‘ನೇತಾದಿಸೋ ಬ್ರಹ್ಮಭಕ್ಖೋ’’ತಿ ವದನ್ತೇನ ದೀಪಿತೋತಿ.

ಅತಿದೇವಪತ್ತೋಪಿ ಪಞ್ಚಖನ್ಧೂಪಧೀನಂ ಅತ್ಥಿತಾಯ ಕಿಲೇಸೂಪಧಿಆದೀನಂಯೇವ ವಿರಹಿತಭಾವೋ ಗಹಿತೋ. ಅಞ್ಞತ್ರ ಹಿ ಭಾವಪಚ್ಚಯಂ ತದತ್ಥೋ ವಿಞ್ಞಾಯತೀತಿ ಆಹ ‘‘ಅತಿದೇವಭಾವಂ ಪತ್ತೋ’’ತಿ. ಯಸ್ಮಾ ಬ್ರಹ್ಮಾನೋಪಿ ದೇವಗತಿಪರಿಯಾಪನ್ನತ್ತಾ ದೇವಾ ಏವ, ತಸ್ಮಾ ವುತ್ತಂ ‘‘ಅತಿಬ್ರಹ್ಮಭಾವಂ ಪತ್ತೋ’’ತಿ.

ಅತ್ತಾನಂ ಭಾವೇತ್ವಾತಿ ಸೀಲಾದೀಹಿ ಗುಣೇಹಿ ಅತ್ತಾನಂ ವಡ್ಢೇತ್ವಾ ಪರಿಬ್ರೂಹಿತ್ವಾ ಠಿತೋ.

ಪುಥುಜ್ಜನಾ ತಸಾ ತಣ್ಹಾಮಾನದಿಟ್ಠಿಪರಿತ್ತಾಸವಸೇನ ತಾಸನತೋ. ಖೀಣಾಸವಾ ಥಾವರಾ ನಾಮ ಸಬ್ಬಸೋ ಗತೀಸು ಸಞ್ಚರಣಾಭಾವತೋ. ತಥಾ ಹಿ ಚತುನ್ನಂ ಸಚ್ಚಾನಂ ಸಬ್ಬಸೋ ಅದಿಟ್ಠತ್ತಾ ಭವದಾಯಜ್ಜಸ್ಸ ತಣ್ಹಾದಾಸಬ್ಯಸ್ಸ ಭಾವತೋ ಏಕಚ್ಚಾಸು ಗತೀಸು ಸಞ್ಚರಣಸಭಾವತೋ ಸೇಕ್ಖಾ ಥಾವರಾ ನ ಹೋನ್ತಿ. ಭಜಮಾನಾತಿ ಭಜಾಪಿಯಮಾನಾ. ಥಾವರಪಕ್ಖಮೇವ ಭಜನ್ತಿ ಸಬ್ಬಸೇಟ್ಠಪಕ್ಖಂ ಏಕನ್ತಪಸಟ್ಠಂ ಭಜಮಾನಭಾವಂ ಉಪಾದಾಯ.

ಪಹೀನಕಿಲೇಸೋ ಖೀಣಾಸವೋ ವಿಸೇನೋ. ಸುಖಂ ಆಯತಿ ಸುಖಾಯತಿ, ತಸ್ಸ ಕಾರಕಂ ಸುಖಾಯತಿಕಂ.

ಬ್ರಹ್ಮದೇವಸುತ್ತವಣ್ಣನಾ ನಿಟ್ಠಿತಾ.