೧. ಸಮ್ಬಹುಲಸುತ್ತವಣ್ಣನಾ

೧೫೭. ಜಟಾಚುಮ್ಬಟಕೇನಾತಿ ಸೀಸೇ ಪಟಿಮುಕ್ಕೇನ ಜಟಾಕಲಾಪೇನ. ಅಪರಿಗ್ಗಹಬ್ರಾಹ್ಮಣಪಬ್ಬಜಿತಾ ಹಿ ಜಟಾಯ ಉಞ್ಛಾಚರಿಯಂ ಚರನ್ತಿ. ಉದುಮ್ಬರದಣ್ಡಞ್ಹಿ ಅತ್ತಗುತ್ತತ್ಥಾಯ ಗಹಿತಂ ತೇಸಂ ಅಪ್ಪಿಚ್ಛಭಾವಪ್ಪಕಾಸನಂ. ತೇನಾಹ ‘‘ಅಪ್ಪಿಚ್ಛಭಾವಪ್ಪಕಾಸನತ್ಥ’’ನ್ತಿ. ಸೀಸಂ ಓಕಮ್ಪೇತ್ವಾತಿ ಏತ್ಥ ಅತಿವಿಯ ಸೀಸಸ್ಸ ಓಕಮ್ಪಿತಭಾವಂ ದಸ್ಸೇತುಂ ‘‘ಹನುಕೇನ ಉರಂ ಪಹರನ್ತೋ ಅಧೋನತಂ ಕತ್ವಾ’’ತಿ ವುತ್ತಂ. ಜಿವ್ಹಂ ನೀಹರಿತ್ವಾತಿ ಲಮ್ಬನಚಾಲನವಸೇನ ಮುಖತೋ ನಿಕ್ಖಾಮೇತ್ವಾ. ತೇನಾಹ ‘‘ಉದ್ಧ’’ನ್ತಿಆದಿ. ತಿಸಾಖನ್ತಿ ತಿಭಙ್ಗಭಕುಟಿ ವಿಯ ನಲಾಟೇ ಜಾತತ್ತಾ ನಲಾಟಿಕಂ. ತೇನಾಹ ‘‘ನಲಾಟೇ ಉಟ್ಠಿತಂ ವಲಿತ್ತಯ’’ನ್ತಿ, ತಿಭಙ್ಗವಲಿಕಂ ನಲಾಟೇ ಕತ್ವಾತಿ ಅತ್ಥೋ. ಅತ್ತನೋವ ತೇಲೇತಿ ಅತ್ತನೋವ ಪಾಪಕಮ್ಮನಿಬ್ಬತ್ತಕೇ ತೇಲೇ, ಪಚಿತಬ್ಬಟ್ಠಾನಗೇಹೇತಿ ಅಧಿಪ್ಪಾಯೋ.

ಸಮ್ಬಹುಲಸುತ್ತವಣ್ಣನಾ ನಿಟ್ಠಿತಾ.