೪. ಪಠಮಸಙ್ಗಾಮಸುತ್ತವಣ್ಣನಾ

೧೨೫. ವೇದೇನ ಞಾಣೇನ ಈಹತಿ ಇರಿಯತೀತಿ ವೇದೇಹೀ, ಕೋಸಲರಾಜಭಗಿನೀ ಅಜಾತಸತ್ತುನೋ ಮಾತಾ, ಸಾ ಕಿರ ಸಮ್ಪಜಞ್ಞಜಾತಿಕಾ. ತೇನಾಹ ‘‘ಪಣ್ಡಿತಾಧಿವಚನ’’ನ್ತಿ, ಚತ್ತಾರಿ ಅಙ್ಗಾನಿ ಏತಿಸ್ಸನ್ತಿ ಚತುರಙ್ಗಿನೀ. ದ್ವಿನ್ನಂ ರಜ್ಜಾನನ್ತಿ ಕಾಸಿಕರಜ್ಜಮಗಧರಜ್ಜಾನಂ ಅನ್ತರೇ, ಸೋ ಪನ ಗಾಮೋ ಕಾಸಿಕರಜ್ಜೋ.

ಪಾಪಾತಿ ಲಾಮಕಾ ನಿಹೀನಾಚಾರಾ. ಮೇಜ್ಜತಿ ಸಿನಿಯ್ಹತೀತಿ ಮೇತ್ತಿ, ಸಾ ಏತೇಸು ಅತ್ಥೀತಿ ಮಿತ್ತಾ. ಸಹ ಅಯನ್ತಿ ಪವತ್ತನ್ತೀತಿ ಸಹಾಯಾ. ಸಮ್ಪವಙ್ಕನ್ತಿ ಸುಟ್ಠು ಓನತಂ. ಜಯಕಾರಣಂ ದಿಸ್ವಾ ಆಹ, ತಥಾ ಹಿ ‘‘ಅಜ್ಜ ಇಮಂ ರತ್ತಿಂ ದುಕ್ಖಂ ಸೇತೀ’’ತಿ ಕಾಲಪರಿಚ್ಛೇದವಸೇನ ವುತ್ತಂ. ವೇರಿಘಾತೋ ನಾಮ ವೇರಿಪುಗ್ಗಲೇ ಸತೀತಿ ಆಹ ‘‘ವೇರಿಪುಗ್ಗಲಂ ಲಭತೀ’’ತಿ.

ಪಠಮಸಙ್ಗಾಮಸುತ್ತವಣ್ಣನಾ ನಿಟ್ಠಿತಾ.