೮. ಕಾಮಸುತ್ತವಣ್ಣನಾ

೭೮. ‘‘ಅತ್ತಕಾಮೋ’’ತಿ ಪಾಳಿಯಂ ವುತ್ತತ್ತಾ ಆಹ ‘‘ಠಪೇತ್ವಾ ಸಬ್ಬಬೋಧಿಸತ್ತೇ’’ತಿ. ತೇ ಹಿ ಸಬ್ಬಸೋ ಪರತ್ಥಾಯ ಏವ ಪಟಿಪಜ್ಜಮಾನಾ ಮಹಾಕಾರುಣಿಕಾ ಪರತ್ಥಕಾಮಾ, ಅತ್ಥಕಾಮಾ ನಾಮ ನ ಹೋನ್ತಿ, ಯಾ ಚ ತೇಸಂ ಅತ್ತತ್ಥಾವಹಾ ಪಟಿಪತ್ತಿ, ಸಾಪಿ ಯಾವದೇವ ಪರತ್ಥಾ ಏವಾತಿ. ವುತ್ತಂ ಪೋರಾಣಟ್ಠಕಥಾಯಂ. ಯಸ್ಮಾ ಬೋಧಿಸತ್ತಾ ಪರಹಿತಪಟಿಪತ್ತಿಯಾ ಪಾರಮಿಯೋ ಪೂರೇನ್ತಾ ತಥಾರೂಪಂ ಕಾರಣಂ ಪತ್ವಾ ಅತ್ತಾನಂ ಪರೇಸಂ ಪರಿಚ್ಚಜನ್ತಿ ಪಞ್ಞಾಪಾರಮಿಯಾ ಪರಿಪೂರಣತೋ, ತಸ್ಮಾ ಇಧಾಪಿ ‘‘ಸಬ್ಬಬೋಧಿಸತ್ತೇ ಠಪೇತ್ವಾಯೇವಾತಿ ವುತ್ತ’’ನ್ತಿ ಆಹ. ಕಲ್ಯಾಣನ್ತಿ ಭದ್ದಕಂ. ವಾಚಾಯ ಅಧಿಪ್ಪೇತತ್ತಾ ಆಹ ‘‘ಸಣ್ಹಂ ಮುದುಕ’’ನ್ತಿ. ಪಾಪಿಕನ್ತಿ ಲಾಮಕಂ ನಿಹೀನಂ. ತಂ ಪನ ಫರುಸಂ ವಾಚನ್ತಿ ಸರೂಪತೋ ದಸ್ಸೇತಿ.

ಕಾಮಸುತ್ತವಣ್ಣನಾ ನಿಟ್ಠಿತಾ.