೧. ಛೇತ್ವಾಸುತ್ತವಣ್ಣನಾ

೭೧. ವಧಿತ್ವಾತಿ ಹನ್ತ್ವಾ ವಿನಾಸೇತ್ವಾ. ಅಪರಿದಯ್ಹಮಾನತ್ತಾತಿ ಅಪೀಳಿಯಮಾನತ್ತಾ. ವಿನಟ್ಠದೋಮನಸ್ಸತ್ತಾ ನ ಸೋಚತಿ ಚೇತೋದುಕ್ಖದುಕ್ಖಾಭಾವತೋ. ವಿಸಂ ನಾಮ ದುಕ್ಖಂ ಅನಿಟ್ಠಭಾವತೋ, ತಸ್ಸ ಮೂಲಕಾರಣಂ ಕೋಧೋ ಅನಿಟ್ಠಫಲತ್ತಾತಿ ಆಹ ‘‘ವಿಸಮೂಲಸ್ಸಾತಿ ದುಕ್ಖವಿಪಾಕಸ್ಸಾ’’ತಿ. ಅಕ್ಕುಟ್ಠಸ್ಸಾತಿ ಅಕ್ಕೋಸಾಪರಾಧಸ್ಸ. ಅಕ್ಕೋಸಪಹಾರತ್ಥಸಮ್ಬನ್ಧೇನ ಹಿ ‘‘ಕುದ್ಧಸ್ಸಾ’’ತಿ ಉಪಯೋಗತ್ಥೇ ಸಮ್ಪದಾನವಚನಂ. ಸುಖಂ ಉಪ್ಪಜ್ಜತಿ ಕೋಧಂ ನಸ್ಸತಿ. ಸುಖುಪ್ಪತ್ತಿಂ ಸನ್ಧಾಯ ಏಸ ಕೋಧೋ ‘‘ಮಧುರಗ್ಗೋ’’ತಿ ವುತ್ತೋ, ಸುಖಾವಸಾನೋತಿ ಅತ್ಥೋ.

ಛೇತ್ವಾಸುತ್ತವಣ್ಣನಾ ನಿಟ್ಠಿತಾ.