೪. ಏಕಮೂಲಸುತ್ತವಣ್ಣನಾ

೪೪. ಪತಿಟ್ಠಟ್ಠೇನ ಅವಿಜ್ಜಾಸಙ್ಖಾತಂ ಏಕಂ ಮೂಲಂ ಏತಿಸ್ಸಾತಿ ಏಕಮೂಲಾ. ತಂ ಏಕಮೂಲಂ. ಯಥಾ ಸಂಯೋಜನೀಯೇಸು ಅಸ್ಸಾದಾನುಪಸ್ಸನಾವಸೇನ ತಣ್ಹಾಸಮುಪ್ಪಾದೋ, ಏವಂ ತಣ್ಹಾಭಿಭವವಸೇನ ಅನವಬೋಧೋತಿ ಅವಿಜ್ಜಾ ತಣ್ಹಾಯ ಮೂಲಂ, ತಣ್ಹಾ ಚ ಅವಿಜ್ಜಾಯ ಮೂಲಂ. ಅಯಞ್ಹಿ ನಯೋ ಉಪನಿಸ್ಸಯತಾವಸೇನ ವುತ್ತೋ, ಸಹಜಾತವಸೇನ ಚಾಯಂ ಅಞ್ಞಮಞ್ಞಂ ಮೂಲಭಾವೋ ಪಾಕಟೋಯೇವ. ಇಧ ಪನ ಇಮಿಸ್ಸಂ ಗಾಥಾಯಂ ಅಧಿಪ್ಪೇತಾ ‘‘ಏಕಮೂಲ’’ನ್ತಿ ಸಾ ತಣ್ಹಾ. ತತ್ಥ ಯಾ ಭವತಣ್ಹಾ, ಸಾ ಸಸ್ಸತದಿಟ್ಠಿವಸೇನ ಆವಟ್ಟತಿ ಪರಿವತ್ತತಿ, ವಿಭವತಣ್ಹಾ ಉಚ್ಛೇದದಿಟ್ಠಿವಸೇನ, ಏವಂ ದ್ವಿರಾವಟ್ಟಂ. ಸಹಜಾತಕೋಟಿಯಾತಿ ಸಹಜಾತಕೋಟಿಯಾಪಿ, ಪಗೇವ ಸಮ್ಮುಯ್ಹಂ ಆಪನ್ನಸ್ಸ ಪನ ವತ್ತಮಾನಾಯ ತಣ್ಹಾಯ ಬಲವಭಾವೇನ ಮಲೀನತಾ ಸಿಯಾ. ಉಪನಿಸ್ಸಯಕೋಟಿಯಾತಿ ಉಪನಿಸ್ಸಯಕೋಟಿಯಾವ ಸಹಜಾತಕೋಟಿಯಾ ಅಸಮ್ಭವತೋ. ಪತ್ಥರಣಟ್ಠಾನಾತಿ ವಿತ್ಥತಾ ಹುತ್ವಾ ಪವತ್ತಿಟ್ಠಾನಭೂಮಿ. ತೇನಾಹ ‘‘ತೇಸು ಸಾ ಪತ್ಥರತೀ’’ತಿ. ಸಮುದ್ದನಟ್ಠೇನ ಸಮುದ್ದೋ. ಉತ್ತರಿತುಂ ಅಸಕ್ಕುಣೇಯ್ಯತಾಯ ಪತಾಯ ಅಲಂ ಪರಿಯತ್ತೋತಿ ಪಾತಾಲೋ, ಅಯಂ ಪನ ಪಾತಾಲೋ ವಿಯಾತಿ ಪಾತಾಲೋ. ತೇನಾಹ ‘‘ಅಪ್ಪತಿಟ್ಠಟ್ಠೇನಾ’’ತಿ. ಅಗಾಧಗಮ್ಭೀರತಾಯಾತಿ ಅತ್ಥೋ.

ಏಕಮೂಲಸುತ್ತವಣ್ಣನಾ ನಿಟ್ಠಿತಾ.