೧. ಆದಿತ್ತಸುತ್ತವಣ್ಣನಾ

೪೧. ಸೀಸನ್ತಿ ದೇಸನಾಪದೇಸೋ, ದೇಸನಾಯ ಅಞ್ಞೇಸುಪಿ ವತ್ತಬ್ಬೇಸು ಕಸ್ಸಚಿದೇವ ಸೀಸಭಾಗೇನ ಅಪದಿಸನಂ. ತೇನಾಹ ‘‘ರಾಗಾದೀಹೀ’’ತಿಆದಿ. ದಾನೇನಾತಿ ಅತ್ತನೋ ಸನ್ತಕಸ್ಸ ಪರೇಸಂ ಪರಿಚ್ಚಜನೇನ. ತಂ ಪನ ಪರಿಚ್ಚಜನಂ ಚೇತನಾಯ ಹೋತೀತಿ ಆಹ ‘‘ದಾನಚೇತನಾಯಾ’’ತಿ ದಾನಪುಞ್ಞಚೇತನಾತಿ ದಾನಮಯಾ ಪುಞ್ಞಚೇತನಾ ದಾಯಕಸ್ಸೇವ ಹೋತಿ ತಂಸನ್ತತಿಪರಿಯಾಪನ್ನತ್ತಾ. ನೀಹತಭಣ್ಡಕನ್ತಿ ಆದಿತ್ತಗೇಹತೋ ಬಹಿ ನಿಕ್ಖಾಮಿತಂ ಭಣ್ಡಕಂ. ಏತನ್ತಿ ‘‘ದಿನ್ನಂ ಹೋತೀ’’ತಿಆದಿವಚನಂ. ಅದಿನ್ನೇತಿ ದಾನಮುಖೇ ಅನಿಯುಞ್ಜಿತೇ ಭೋಗೇ. ‘‘ಅನ್ತೇನಾ’’ತಿ ಜೀವಿತಸ್ಸ ಅನ್ತೋ ಅಧಿಪ್ಪೇತೋತಿ ಆಹ ‘‘ಮರಣೇನಾ’’ತಿ. ಮಮಾತಿ ಪರಿಗ್ಗಹಿತತ್ತಾ ಪರಿಗ್ಗಹಾ, ಭೋಗಾ. ತೇಪಿ ಕೇನಚಿ ಆಕಾರೇನ ವಿನಾಸಂ ಅನುಪಗತಾ ಮರಣೇನ ಪಹೀಯನ್ತಿ ನಾಮಾತಿ ವುತ್ತಂ ‘‘ಚೋರಾದೀನಂ ವಸೇನ ಅವಿನಟ್ಠಭೋಗೇ’’ತಿ. ಸೋಭನಾ ಅಗ್ಗಭೂತಾ ರೂಪಾದಯೋ ಏತ್ಥಾತಿ ಸಗ್ಗೋ, ತಂ ಸಗ್ಗಂ.

ಆದಿತ್ತಸುತ್ತವಣ್ಣನಾ ನಿಟ್ಠಿತಾ.