೭. ಸರಸುತ್ತವಣ್ಣನಾ

೨೭. ಸರಣತೋ ಅವಿಚ್ಛೇದವಸೇನ ಪವತ್ತನತೋ ಖನ್ಧಾದೀನಂ ಪಟಿಪಾಟಿ ಸರಾ. ತೇನಾಹ ‘‘ಇಮೇ ಸಂಸಾರಸರಾ’’ತಿ. ಕುತೋತಿ ಕೇನ ಕಾರಣೇನ, ಕಿಮ್ಹಿ ವಾ? ತೇನಾಹ ‘‘ಕಿಂ ಆಗಮ್ಮಾ’’ತಿ? ನ ಪತಿಟ್ಠಾತಿ ಪಚ್ಚಯಾಭಾವತೋ. ಆಪೋತಿಆದಿನಾ ಪಾಳಿಯಂ ಚತುನ್ನಂ ಮಹಾಭೂತಾನಂ ಅಪ್ಪತಿಟ್ಠಾನಾಪದೇಸೇನ ತತ್ಥ ಕಾಮರೂಪಭವಾನಂ ಅಭಾವೋ ದಸ್ಸಿತೋ. ತದುಭಯಾಭಾವದಸ್ಸನೇನ ಹೇಟ್ಠಾ ವುತ್ತನಯೇನೇವ ಅರೂಪಭವಸ್ಸಪಿ ಅಭಾವೋ ದಸ್ಸಿತೋವ ಹೋತಿ, ಯಥಾರುತವಸೇನ ವಾ ಏತ್ಥ ಅತ್ಥೋ ವೇದಿತಬ್ಬೋ. ಯಸ್ಮಾ ಪುರಿಮಾ ದ್ವೇ ಗಹಿತಾ, ಗಹಿತಞ್ಚ ಅತ್ಥಂ ಪರಿಗ್ಗಹೇತ್ವಾವ ಪಚ್ಛಿಮತ್ಥೋ ಪವತ್ತೋತಿ.

ಸರಸುತ್ತವಣ್ಣನಾ ನಿಟ್ಠಿತಾ.