೪. ಮನೋನಿವಾರಣಸುತ್ತವಣ್ಣನಾ

೨೪. ಏವಂಲದ್ಧಿಕಾತಿ ಸಬ್ಬಥಾಪಿ ಚಿತ್ತುಪ್ಪತ್ತಿ ಸದುಕ್ಖಾ, ಸಬ್ಬಥಾಪಿ ಅಚಿತ್ತಕಭಾವೋ ಸೇಯ್ಯೋ, ತಸ್ಮಾ ಯತೋ ಕುತೋಚಿ ಚಿತ್ತಂ ನಿವಾರೇತಬ್ಬನ್ತಿ ಏವಂದಿಟ್ಠಿಕಾ. ಸೋತಿ ಸತ್ತೋ. ಅನಿಯ್ಯಾನಿಕಕಥಂ ಕಥೇತಿ ಅಯೋನಿಸೋ ಚಿತ್ತನಿವಾರಣಂ ವದನ್ತೀ. ಸಂಯತಭಾವಂ ಆಗತನ್ತಿ ರಾಗವಿಸೇವನಾದಿತೋ ಸಮ್ಮದೇವ ಸಂಯತಭಾವಂ ಓತರಭಾವಂ. ಧಮ್ಮಚರಿಯಾವಸೇನ ಹಿ ಪವತ್ತಮಾನೇ ಚಿತ್ತೇ ನತ್ಥಿ ಈಸಕಮ್ಪಿ ರಾಗಾದಿವಿಸೇವನಂ, ನ ತಸ್ಸ ಸಮ್ಪತಿ ಆಯತಿಞ್ಚ ಕೋಚಿ ಅನತ್ಥೋ ಸಿಯಾ, ತಸ್ಮಾ ತಂ ಮನೋ ಸಬ್ಬತೋ ಅನವಜ್ಜವುತ್ತಿತೋ ನ ನಿವಾರೇತಬ್ಬಂ. ತೇನಾಹ ‘‘ದಾನಂ ದಸ್ಸಾಮೀ’’ತಿಆದಿ. ಯತೋ ಯತೋತಿ ಯತೋ ಯತೋ ಸಾವಜ್ಜವುತ್ತಿತೋ ಅಯೋನಿಸೋಮನಸಿಕಾರತೋ. ತನ್ತಿ ಮನೋ ನಿವಾರೇತಬ್ಬಂ ಅನತ್ಥಾವಹತ್ತಾ.

ಮನೋನಿವಾರಣಸುತ್ತವಣ್ಣನಾ ನಿಟ್ಠಿತಾ.