೨೧೬. ಛಿನ್ನಕಚೀವರಾನುಜಾನನಕಥಾ

೩೪೫. ದೀಘಮರಿಯಾದಬದ್ಧನ್ತಿ ದೀಘೇನ ಮರಿಯಾದೇನ ಬದ್ಧಂ. ಚತುಕ್ಕಸಣ್ಠಾನನ್ತಿ ಚತುನ್ನಂ ಮಗ್ಗಾನಂ ಸಮೋಧಾನಸಣ್ಠಾನಂ. ಉಸ್ಸಹಸಿ ತ್ವನ್ತಿ ಏತ್ಥ ಉಪುಬ್ಬೋ ಸಹಧಾತು ಸಮತ್ಥತ್ಥೋತಿ ಆಹ ‘‘ಸಕ್ಕೋಸಿ ತ್ವ’’ನ್ತಿ. ಪಪುಬ್ಬೋ ಪನ ಅಭಿಭವನತ್ಥೋ ಹೋತಿ ‘‘ಪಸಹತೀ’’ತಿಆದೀಸು. ಯೋ ನಾಮಾತಿ ಯೋ ಆನನ್ದೋ ಆಜಾನಿಸ್ಸತಿ ನಾಮ, ಸೋ ಆನನ್ದೋ ಪಣ್ಡಿತೋತಿ ಯೋಜನಾ. ‘‘ಕುಸೀ’’ತಿ ಏತಂ ನಾಮಂ ಅಧಿವಚನನ್ತಿ ಯೋಜನಾ. ಅನುವಾತಾದೀನನ್ತಿ ಆದಿಸದ್ದೇನ ಪರಿಭಣ್ಡಾದೀನಿ ಸಙ್ಗಣ್ಹಾತಿ. ‘‘ಅಡ್ಢಕುಸೀ’’ತಿ ಏತನ್ತಿ ಯೋಜನಾ.

ಗೀವೇಯ್ಯಕನ್ತಿ ಏತ್ಥ ಗೀವಾಯಂ ಸುತ್ತಸಂಸಿಬ್ಬಿತಂ ಗೀವೇಯ್ಯಕನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಗೀವಾವೇಠನಟ್ಠಾನೇ’’ತಿಆದಿ. ‘‘ಆಗನ್ತುಕಪಟ್ಟ’’ನ್ತಿ ಇಮಿನಾ ಏಯ್ಯಕಪಚ್ಚಯಸ್ಸ ಸರೂಪಂ ದಸ್ಸೇತಿ. ಏಸೇವ ನಯೋ ಜಙ್ಘೇಯ್ಯಕನ್ತಿ ಏತ್ಥಾಪಿ. ಏತಂ ನಾಮನ್ತಿ ‘‘ಗೀವೇಯ್ಯಕಂ, ಜಙ್ಘೇಯ್ಯಕ’’ನ್ತಿ ಏತಂ ನಾಮಂ. ಇತೀತಿ ಏವಂ. ಏತನ್ತಿ ‘‘ಅನುವಿವಟ್ಟ’’ನ್ತಿಆದಿ ಏತಂ. ‘‘ಅನುವಿವಟ್ಟ’’ನ್ತಿ ಏತಂ ನಾಮನ್ತಿ ಯೋಜನಾ. ವಿವಟ್ಟಸ್ಸಾತಿ ಮಜ್ಝಿಮಖಣ್ಡಕಸ್ಸ. ಬಾಹನ್ತನ್ತಿ ಏತ್ಥ ಬಾಹಾಯ ಉಪರಿ ಠಪಿತಾ ಅನ್ತಾ ಬಾಹನ್ತಾತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಬಾಹಾಯಾ’’ತಿಆದಿ. ತೇಸನ್ತಿ ಉಭಿನ್ನಮನ್ತಾನಂ. ಏತನ್ತಿ ‘‘ಬಾಹನ್ತ’’ನ್ತಿ ಏತಂ.