೮. ಚೀವರಕ್ಖನ್ಧಕಂ

೨೦೨. ಜೀವಕವತ್ಥುಕಥಾ

೩೨೬. ಚೀವರಕ್ಖನ್ಧಕೇ ಪದಕ್ಖಿಣಸದ್ದಸ್ಸ ಅಪಸಬ್ಯತ್ಥಂ ಪಟಿಕ್ಖಿಪನ್ತೋ ಆಹ ‘‘ಛೇಕಾ ಕುಸಲಾ’’ತಿ. ಅಭಿಸಟಾತಿ ಏತ್ಥ ಸರಧಾತುಯಾ ಗತಿಚಿನ್ತಾಸು ಇಧ ಗತ್ಯತ್ಥೇತಿ ದಸ್ಸೇನ್ತೋ ಆಹ ‘‘ಅಭಿಗತಾ’’ತಿ. ಅಭಿಗತಾತಿ ಅಭಿಮುಖಂ ಗನ್ತಬ್ಬಾ. ನನು ಪಾಳಿಯಂ ‘‘ಅತ್ಥಿಕಾನಂ ಅತ್ಥಿಕಾನಂ ಮನುಸ್ಸಾನ’’ನ್ತಿ ವುತ್ತಂ, ಕಸ್ಮಾ ಪನ ‘‘ಅತ್ಥಿಕೇಹಿ ಅತ್ಥಿಕೇಹಿ ಮನುಸ್ಸೇಹೀ’’ತಿ ವುತ್ತನ್ತಿ ಆಹ ‘‘ಕರಣತ್ಥೇ ಪನಾ’’ತಿಆದಿ. ಇಮಿನಾ ಛಟ್ಠೀಕತ್ತಾ ನಾಮ ತತಿಯಾಕತ್ತುನಾ ಸಮಾನೋಯೇವಾತಿ ದಸ್ಸೇತಿ. ನಿಗಮೇ ವಸತೀತಿ ನೇಗಮೋತಿ ವುತ್ತೇ ಕುಟುಮ್ಬಿಯಗಣೋ ನೇಗಮೋ ನಾಮಾತಿ ಆಹ ‘‘ಕುಟುಮ್ಬಿಯಗಣೋ’’ತಿ.

೩೨೭. ನಗರೇ ನಿವಸನ್ತೀತಿ ನಾಗರಾ. ದತ್ವಾ, ವುಟ್ಠಾಪೇಸುನ್ತಿ ಸಮ್ಬನ್ಧೋ. ಆರಾಮುಯ್ಯಾನವಾಹನಾದೀತಿ ಏತ್ಥ ಆದಿಸದ್ದೇನ ಅಞ್ಞಾನಿ ಉಪಭೋಗಪರಿಭೋಗಾನಿ ಸಙ್ಗಣ್ಹಾತಿ. ಗಣಿಕಟ್ಠಾನೇತಿ ಗಣಿಕಾಯ ಠಾನೇ. ಗಣಿಕಾತಿ ಚ ನಗರಸೋಭಿನೀ. ಸಾ ಹಿ ಅತ್ಥಿಕೇನ ಜನಗಣೇನ ಅಭಿಗನ್ತಬ್ಬಾತಿ ಗಣಿಕಾತಿ ವುಚ್ಚತಿ. ಪಟಿಸತೇನ ಚಾತಿ ಏತ್ಥ ಚಸದ್ದೋ ಅವಧಾರಣತ್ಥೋ. ರತ್ತಿಂ ಗಮನಸ್ಸ ಪಟಿನಿಧಿಸಙ್ಖಾತೇನ ಸತೇನ ಏವಾತಿ ಹಿ ಅತ್ಥೋ. ಗಿಲಾನನ್ತಿ ಏತ್ಥ ಭಾವಪಚ್ಚಯೇನ ವಿನಾಪಿ ಭಾವತ್ಥೋ ಞಾತಬ್ಬೋತಿ ಆಹ ‘‘ಗಿಲಾನಭಾವ’’ನ್ತಿ. ‘‘ಜಾನಾಪೇಯ್ಯ’’ನ್ತಿ ಇಮಿನಾ ಪಟಿವೇದೇಯ್ಯನ್ತಿ ಏತ್ಥ ವಿದಧಾತುಯಾ ಞಾಣತ್ಥಂ ದಸ್ಸೇತಿ. ಕತ್ತರಸುಪ್ಪೇತಿ ಏತ್ಥ ಕತ್ತರಸದ್ದೋ ಜಿಣ್ಣಪರಿಯಾಯೋತಿ ಆಹ ‘‘ಜಿಣ್ಣಸುಪ್ಪೇ’’ತಿ. ಸುಪನ್ತಿ ಸುನಖಾದಯೋ ಏತ್ಥಾತಿ ಸುಪ್ಪಂ, ಕತ್ತರಂ ಸುಪ್ಪಂ ಕತ್ತರಸುಪ್ಪಂ.

೩೨೮. ತನ್ತಿ ಜೀವಕಂ. ಅಞ್ಞೇ ರಾಜದಾರಕಾ ವದನ್ತಿ ಕಿರಾತಿ ಸಮ್ಬನ್ಧೋ. ನತ್ಥಿ ಮಾತಾ ಏತಸ್ಸಾತಿ ನಿಮ್ಮಾತಿಕೋ. ಯಥಾ ಚಾತಿಆದೀಸು ಯಥಾ ಪೇಸನ್ತಿ, ತಥಾತಿ ಯೋಜನಾ. ಚಸದ್ದೋ ಸಮ್ಪಿಣ್ಡನತ್ಥೋ. ನ ಕೇವಲಂ ವದನ್ತಿಯೇವ, ಅಥ ಖೋ ನ ಕೋಚಿ ಕಿಞ್ಚಿ ಪೇಸೇತೀತಿ ಹಿ ಅತ್ಥೋ. ಅಞ್ಞೇಸನ್ತಿ ಜೀವಕತೋ ಅಞ್ಞೇಸಂ. ತಸ್ಸಾತಿ ಜೀವಕಸ್ಸ. ಇತೀತಿ ಏವಂ. ಸೋತಿ ಜೀವಕೋ. ತಂ ಸಬ್ಬನ್ತಿ ‘‘ನಿಮ್ಮಾತಿಕೋ ನಿಪ್ಪಿತಿಕೋ’’ತಿ ವದನಞ್ಚ ಪಣ್ಣಾಕಾರಸ್ಸ ಅಪೇಸನಞ್ಚಾತಿ ತಂ ಸಬ್ಬಂ.

ಯಂನೂನಾತಿ ಸಾಧು ವತ. ಅಹಂ ವಜ್ಜಸಿಪ್ಪಂ ಸಿಕ್ಖೇಯ್ಯಂ ಸಾಧು ವತಾತಿ ಯೋಜನಾ. ತಸ್ಸಾತಿ ಜೀವಕಸ್ಸ. ಏತದಹೋಸೀತಿ ಏತಂ ಅಹೋಸಿ, ಪರಿವಿತಕ್ಕೋ ಅಹೂತಿ ಅತ್ಥೋ. ಪರೂಪಘಾತಪಟಿಸಂಯುತ್ತಾನೀತಿ ಪರಂ ಉಪಗನ್ತ್ವಾ, ಉಪ ಭುಸೇನ ವಾ ಹನನೇನ ಪಟಿಸಂಯುತ್ತಾನಿ. ಮೇತ್ತಾಪುಬ್ಬಭಾಗನ್ತಿ ಸಿಪ್ಪಸ್ಸ ಪುಬ್ಬಭಾಗೇ ಪವತ್ತಾ ಮೇತ್ತಾ ಏತಸ್ಸಾತಿ ಮೇತ್ತಾಪುಬ್ಬಭಾಗಂ. ಇತಿ ಅಹೋಸೀತಿ ಯೋಜನಾ. ಪುರಿಮಚಿನ್ತಾಯ ಅನೇಕನ್ತಭಾವತೋ ಏಕನ್ತಭಾವಂ ದಸ್ಸೇನ್ತೋ ಆಹ ‘‘ಅಪಿ ಚಾ’’ತಿಆದಿ. ಅಪಿ ಚಾತಿ ಏಕನ್ತೇನ. ಅಯನ್ತಿ ಜೀವಕೋ. ಇತೋತಿ ಭದ್ದಕಪ್ಪತೋ. ಅಯನ್ತಿ ಉಪಾಸಕೋ. ಚತುಪರಿಸನ್ತರೇತಿ ಚತುಪರಿಸಮಜ್ಝೇ. ಪತ್ಥತಗುಣನ್ತಿ ಪತ್ಥರಿತಗುಣಂ. ಠಾನನ್ತರನ್ತಿ ಠಾನಭೇದಂ, ಅಹಮ್ಪೀತಿ ನ ಅಯಂ ಉಪಾಸಕೋಯೇವ, ಅಹಮ್ಪೀತಿ ಅತ್ಥೋ. ಭಗವಾತಿ ಆಲಪನಪದಮೇತಂ. ಪತ್ಥನನ್ತಿ ಇಚ್ಛಿತವರಂ. ಚೋದಿಯಮಾನೋಪೀತಿ ಉಯ್ಯೋಜಿಯಮಾನೋಪಿ. ಪಿಸದ್ದೇನ ಪುರಿಮಚಿನ್ತನಮಪೇಕ್ಖತಿ. ಏಸಾತಿ ಏಸೋ ಜೀವಕೋ.

೩೨೯. ದಿಸಾಪಾಮೋಕ್ಖೋತಿ ಪದಸ್ಸ ದಿಸಾಸು ಪಾಮೋಕ್ಖೋ ದಿಸಾಪಾಮೋಕ್ಖೋತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಸಬ್ಬದಿಸಾಸೂ’’ತಿಆದಿ. ತಸ್ಮಿಞ್ಚ ಸಮಯೇತಿ ಜೀವಕಸ್ಸ ತಸ್ಮಿಂ ಚಿನ್ತನಸಮಯೇ ಚ, ಆಗಮಂಸೂತಿ ಸಮ್ಬನ್ಧೋ. ತೇತಿ ವಾಣಿಜೇ, ಪುಚ್ಛೀತಿ ಸಮ್ಬನ್ಧೋ. ಕುತೋತಿ ನಗರತೋ. ತಕ್ಕಸೀಲತೋತಿ ತಕ್ಕಸೀಲನಗರತೋ. ತತ್ಥಾತಿ ತಕ್ಕಸೀಲೇ. ಆಮಾತಿ ಸಮ್ಪಟಿಚ್ಛನತ್ಥೇ ನಿಪಾತೋ, ಆಮ ಅತ್ಥೀತಿ ಹಿ ಅತ್ಥೋ. ತೇತಿ ವಾಣಿಜಾ. ತಥಾತಿ ಯಥಾ ಜೀವಕೋ ಆಹ, ತಥಾ ಅಕಂಸೂತಿ ಅತ್ಥೋ. ಸೋತಿ ಜೀವಕೋ. ಪಿತರನ್ತಿ ಅಭಯರಾಜಕುಮಾರಂ. ತೇಹೀತಿ ವಾಣಿಜೇಹಿ.

ತನ್ತಿ ಜೀವಕಂ, ಪುಚ್ಛೀತಿ ಸಮ್ಬನ್ಧೋ. ಸೋತಿ ಜೀವಕೋ. ಕಸ್ಮಾ ತಾತ ತ್ವಂ ಇಧಾಗತೋ ಅಸಿ ಪನಾತಿ ಪುಚ್ಛೀತಿ ಯೋಜನಾ. ತತೋತಿ ಪುಚ್ಛತೋ. ಸೋತಿ ಜೀವಕೋ. ಸಿಕ್ಖಿತುಂ ಆಗತೋ ಅಮ್ಹೀತಿ ಯೋಜನಾ. ಬಹುಞ್ಚ ಗಣ್ಹಾತೀತಿಆದೀಸು ಸೋ ಕಿಞ್ಚಿ ಕಮ್ಮಂ ಅಕತ್ವಾ ಸಿಪ್ಪಸ್ಸೇವ ಸಿಕ್ಖಿತತ್ತಾ ಬಹುಞ್ಚ ಗಣ್ಹಾತೀತಿ ಆಹ ‘‘ಯಥಾ’’ತಿಆದಿ. ತತ್ಥ ಯಥಾ ಸಿಕ್ಖನ್ತಿಯೇವ, ಏವಂ ತಥಾ ಸೋ ನ ಸಿಕ್ಖತೀತಿ ಯೋಜನಾ. ಸೋ ಪನಾತಿ ಜೀವಕೋ ಪನ, ಕರೋತಿ ಸಿಕ್ಖತೀತಿ ಸಮ್ಬನ್ಧೋ. ಏಕಂ ಕಾಲನ್ತಿ ಏಕಸ್ಮಿಂ ಕಾಲೇ. ಏವಂ ಸನ್ತೇ ಕಸ್ಮಾ ಸೋ ಬಹುಞ್ಚ ಗಣ್ಹಾತೀತಿ ಆಹ ‘‘ಏವಂ ಸನ್ತೇಪೀ’’ತಿಆದಿ. ಮೇಧಾವಿತಾಯಾತಿ ಖಿಪ್ಪಂ ಗಹಣಧಾರಣಪಞ್ಞತಾಯ, ಬಹುಞ್ಚ ಸಿಪ್ಪನ್ತಿ ಸಮ್ಬನ್ಧೋ. ಅಸ್ಸ ಜೀವಕಸ್ಸ ಗಹಿತಞ್ಚ ಸಿಪ್ಪಂ ನ ಸಮ್ಮುಸ್ಸತೀತಿ ಯೋಜನಾ.

ಯತ್ತಕಂ ಸಿಪ್ಪಂ ಆಚರಿಯೋ ಜಾನಾತಿ, ತತ್ತಕಂ ಅಯಂ ಜೀವಕೋ ಜಾನಾತೀತಿ ಯೋಜನಾ. ಯನ್ತಿ ಸಿಪ್ಪಂ. ಅಯನ್ತಿ ಜೀವಕೋ, ಭವಿಸ್ಸತೀತಿ ಸಮ್ಬನ್ಧೋ. ನನ್ತಿ ಜೀವಕಂ. ಯಥಾತಿ ಯೇನಾಕಾರೇನ. ಕಮ್ಮವಿಪಾಕನ್ತಿ ಕಮ್ಮವಿಪಾಕಜಂ ರೋಗಂ. ‘‘ನ’’ನ್ತಿ ಪದಂ ‘‘ಸಿಕ್ಖಾಪೇಸೀ’’ತಿ ಪದೇ ಕಾರಿತಕಮ್ಮಂ, ‘‘ಭೇಸಜ್ಜಯೋಜನ’’ನ್ತಿ ಪದಂ ಧಾತುಕಮ್ಮಂ. ಭೇಸಜ್ಜಯೋಜನನ್ತಿ ಭೇಸಜ್ಜೇನ ರೋಗಸ್ಸ ಯೋಜನಂ. ಸೋ ಪನಾತಿ ಜೀವಕೋ ಪನ. ಇಮಿನಾತಿ ಜೀವಕೇನ ನ ಉಗ್ಗಹಿತಂ, ಉಗ್ಗಹಿತನ್ತಿ ಸಮ್ಬನ್ಧೋ. ಏಕೇನ ದ್ವಾರೇನಾತಿ ಚತೂಸು ದ್ವಾರೇಸು ಏಕೇನ ದ್ವಾರೇನ. ಆಹಿಣ್ಡನ್ತೋತಿ ವಿಚರನ್ತೋ. ಪರಿತ್ತಂ ಪಾಥೇಯ್ಯನ್ತಿ ಏತ್ಥ ಪರಿತ್ತಸದ್ದಸ್ಸ ಆರಕ್ಖನತ್ಥೇಪಿ ಪವತ್ತನತೋ ಇಧ ಅಪ್ಪತ್ಥೇ ಪವತ್ತತೀತಿ ದಸ್ಸೇನ್ತೋ ಆಹ ‘‘ಅಪ್ಪಮತ್ತಕ’’ನ್ತಿ. ಕಸ್ಮಾ ಅಪ್ಪಮತ್ತಕಂ ಪಾಥೇಯ್ಯಂ ಅದಾಸೀತಿ ಯೋಜನಾ. ತಸ್ಸಾತಿ ದಿಸಾಪಾಮೋಕ್ಖಸ್ಸ. ಅಯನ್ತಿ ಜೀವಕೋ, ಲಭಿಸ್ಸತೀತಿ ಸಮ್ಬನ್ಧೋ. ತತೋತಿ ಲಭನತೋ. ಖೀಣೇ ಪಾಥೇಯ್ಯೇತಿ ಪಾಥೇಯ್ಯೇ ಖೀಣೇ ಸತೀತಿ ಯೋಜನಾ.

೨೦೩. ಸೇಟ್ಠಿಭರಿಯಾದಿವತ್ಥುಕಥಾ

೩೩೦. ಯಾ ನಾಮಾತಿ ಯಾ ನಾಮ ಘರಣೀ. ಕಿಮ್ಪಿ ಮಾಯನ್ತಿ ಏತ್ಥ ಏಕಾರಲೋಪಸನ್ಧೀತಿ ಆಹ ‘‘ಕಿಮ್ಪಿ ಮೇ ಅಯ’’ನ್ತಿ. ಇಮಿನಾ ಯಕಾರಾದೇಸಸನ್ಧಿಂ ನಿವತ್ತೇತಿ, ‘‘ಮ್ಯಾಯ’’ನ್ತಿಪಿ ಪಾಠೋ, ಏವಂ ಸತಿ ಆದೇಸಸನ್ಧಿಯೇವ, ನ ಲೋಪಸನ್ಧಿ. ಅಯಂ ಘರಣೀ ಮೇ ಕಿಞ್ಚಿ ದೇಯ್ಯಧಮ್ಮಂ ಕಿಮ್ಪಿ ದಸ್ಸತೀತಿ ಯೋಜನಾ. ತಸ್ಸ ಚಾತಿ ಸಬ್ಬಿಸ್ಸ ಚ, ಕತಸ್ಸಾತಿಪಿ ಪಾಠೋ. ರೋಗೂಪಸಮಸ್ಸ ಚಾತಿ ಮಮ ರೋಗಸ್ಸ ಉಪಸಮಸ್ಸ ಚ, ಇಮೇಹಿ ಪದೇಹಿ ಸಂಯಮಸ್ಸಾತಿ ಪದಸ್ಸ ಅತ್ಥಂ ದಸ್ಸೇತಿ. ‘‘ಉಪಕಾರ’’ನ್ತಿ ಇಮಿನಾ ಉಪಜಾನಾಮೀತಿ ಏತ್ಥ ಉಪಸದ್ದಸ್ಸ ಅತ್ಥಂ ದಸ್ಸೇತಿ. ಅಧಿಪ್ಪಾಯೋತಿ ಘರಣಿಯಾ ಆಸಯೋ.

೩೩೧. ‘‘ಸಬ್ಬಾಲಙ್ಕಾರಂ ತುಯ್ಹಂ ಹೋತೂ’’ತಿ ಇದಂ ವಚನಂ ರಾಜಾ ಸಭಾವತೋ ಆಹ, ಉದಾಹು ಕಿಞ್ಚಿ ಚಿನ್ತೇತ್ವಾತಿ ಆಹ ‘‘ರಾಜಾ’’ತಿಆದಿ. ತತ್ಥ ಇಮನ್ತಿ ಅಲಙ್ಕಾರಂ. ಪಮಾಣಯುತ್ತೇತಿ ಕಾರಣಾನುರೂಪೇ. ನನ್ತಿ ಜೀವಕಂ. ನಾಟಕಾನಮ್ಪೀತಿ ಪಞ್ಚಸತಿಕಾನಂ ನಾಟಕಾನಮ್ಪಿ. ಸೋಪೀತಿ ಜೀವಕೋಪಿ. ತೇಸನ್ತಿ ಅಭಯಕುಮಾರನಾಟಕಾನಂ. ಮೇತಿ ಮಯ್ಹಂ, ನ ಪತಿರೂಪನ್ತಿ ಸಮ್ಬನ್ಧೋ. ಅಯ್ಯಿಕಾನನ್ತಿ ಮಾತಾಮಹೀನಂ. ಕತಸ್ಸ ಮೇ ಉಪಕಾರನ್ತಿ ಯೋಜನಾ. ಇಮಿನಾ ಅಧಿಕಾರೋ ಚ ಉಪಕಾರೋ ಚ ಅತ್ಥತೋ ಸದಿಸನ್ತಿ ದಸ್ಸೇತಿ. ರಾಜಾ ಪಸನ್ನೋ ದತ್ವಾ ಆಹಾತಿ ಸಮ್ಬನ್ಧೋ.

೨೦೫. ರಾಜಗಹಸೇಟ್ಠಿವತ್ಥುಕಥಾ

೩೩೨. ಇರಿಯಾಪಥಸಮ್ಪರಿವತ್ತನೇನಾತಿ ಇರಿಯಾಪಥಸ್ಸ ಪುನಪ್ಪುನಂ ಪರಿವತ್ತನೇನ. ತೀಹಿ ಸತ್ತಾಹೇಹಿ ನಿಚ್ಚಲಸ್ಸ ನಿಪನ್ನಸ್ಸ ಅಸ್ಸ ಸೇಟ್ಠಿಸ್ಸ ಮತ್ಥಲುಙ್ಗನ್ತಿ ಯೋಜನಾ. ಅಪ್ಪೇವ ನಿಪಜ್ಜೇಯ್ಯಾತಿ ಯೋಜನಾ. ನನ್ತಿ ಸೇಟ್ಠಿಂ. ತೇನೇವಾತಿ ತೇನೇವ ಕಾರಣೇನ. ಸೀಸಂ ಛಾದೇತೀತಿ ಸೀಸಚ್ಛವೀತಿ ವುತ್ತೇ ಸೀಸಪಟಿಚ್ಛಾದನಚಮ್ಮನ್ತಿ ಆಹ ‘‘ಸೀಸಚಮ್ಮ’’ನ್ತಿ. ತಸ್ಸಾತಿ ಸೇಟ್ಠಿಸ್ಸ. ತೀಹಿ ಸತ್ತಾಹೇನಾತಿ ಏತ್ಥ ಪುಬ್ಬಪದೇನ ಪಚ್ಛಿಮಪದಂ ಗುಣಿತ್ವಾ ಗಹೇತಬ್ಬನ್ತಿ ಆಹ ‘‘ತೀಹಿ ಪಸ್ಸೇಹಿ ಏಕೇನೇಕೇನ ಸತ್ತಾಹೇನಾ’’ತಿ.

೩೩೩. ಜನಂ ನೀಹರಾಪೇತ್ವಾತಿ ಜನಂ ಅಪಕ್ಕಮಾಪೇತ್ವಾ.

೨೦೭. ಪಜ್ಜೋತರಾಜವತ್ಥುಕಥಾ

೩೩೪. ವಿಚ್ಛಿಕಸ್ಸ ಜಾತೋತಿ ವಿಚ್ಛಿಕಸ್ಸ ಕಾರಣಾ ಜಾತೋ, ವಿಚ್ಛಿಕಂ ಪಟಿಚ್ಚ ಜಾತೋತಿ ಅತ್ಥೋ. ಸಬ್ಬಿ ಚ ಭೇಸಜ್ಜಂ ವಿಚ್ಛಿಕಾನಂ ಪಟಿಕೂಲಂ ಹೋತೀತಿ ಯೋಜನಾ. ಪಞ್ಞಾಸಯೋಜನಿಕಾತಿ ಏತ್ಥ ಣಿಕಪಚ್ಚಯಸ್ಸ ಗನ್ತುಂ ಸಮತ್ಥತ್ಥೇ ಪವತ್ತಭಾವಂ ದಸ್ಸೇನ್ತೋ ಆಹ ‘‘ಗನ್ತುಂ ಸಮತ್ಥೋ ಹೋತೀ’’ತಿ. ಅಸ್ಸ ರಞ್ಞೋತಿ ಚನ್ದಪಜ್ಜೋತನಾಮಕಸ್ಸ ಅಸ್ಸ ರಞ್ಞೋ. ಹತ್ಥಿನೀಯೇವಾತಿ ಭದ್ದವತಿಕಾ ನಾಮ ಹತ್ಥಿನೀಯೇವ. ವೀಸಯೋಜನಸತನ್ತಿ ವೀಸಾಧಿಕಂ ಯೋಜನಸತಂ.

ಭುಞ್ಜಿತುಂ ನಿಸಿನ್ನಸ್ಸ ಏಕಸ್ಸ ಕುಲಪುತ್ತಸ್ಸ ದ್ವಾರೇತಿ ಯೋಜನಾ. ತಸ್ಸಾತಿ ಕುಲಪುತ್ತಸ್ಸ, ಆರೋಚೇಸೀತಿ ಸಮ್ಬನ್ಧೋ. ಸೋತಿ ಕುಲಪುತ್ತೋ, ‘‘ಆಹರಾ’’ತಿ ಆಣಾಪೇಸೀತಿ ಸಮ್ಬನ್ಧೋ. ಇತರೋತಿ ಪುರಿಸೋ. ತನ್ತಿ ಪತ್ತಂ. ಯತ್ಥ ಯತ್ಥಾತಿ ಯಸ್ಮಿಂ ಯಸ್ಮಿಂ ಭವೇ. ತತ್ಥ ತತ್ಥ ವಾಹನಸಮ್ಪನ್ನೋ ಹೋಮೀತಿ ಯೋಜನಾ. ಸೋತಿ ಪುರಿಸೋ. ಪಜ್ಜೋತೋ ನಾಮ ಅಯಂ ರಾಜಾ ಜಾತೋತಿ ಯೋಜನಾ.

ಸಬ್ಬಿಂ ಪಾಯೇತ್ವಾತಿ ಇದಂ ಉಪಲಕ್ಖಣಮತ್ತನ್ತಿ ದಸ್ಸೇನ್ತೋ ಆಹ ‘‘ಸಬ್ಬಿಞ್ಚ ಪಾಯೇತ್ವಾ’’ತಿಆದಿ. ಸಬ್ಬಿಞ್ಚ ಪಾಯೇತ್ವಾ, ಪರಿಚಾರಕಾನಂ ಆಹಾರಾಚಾರೇ ವಿಧಿಞ್ಚ ಆಚಿಕ್ಖಿತ್ವಾತಿ ಅತ್ಥೋ. ಓಲುಮ್ಪೇತ್ವಾತಿ ಲುಪಿಧಾತು ಓದಹನತ್ಥೋತಿ ಆಹ ‘‘ಓದಹಿತ್ವಾ’’ತಿ. ವಿರೇಚೇಸೀತಿ ಉದ್ಧಞ್ಚ ಅಧೋ ಚ ವಿರೇಚೇಸಿ.

೨೦೮. ಸಿವೇಯ್ಯಕದುಸ್ಸಯುಗಕಥಾ

೩೩೫. ಸಿವಥಿಕನ್ತಿ ಸಿವಾ ಜಮ್ಬುಕಾ ಕುಣಪಖಾದನತ್ಥಾಯ ಆಗನ್ತ್ವಾ ತಿಟ್ಠನ್ತಿ ಏತ್ಥಾತಿ ಸಿವಟ್ಠಂ, ತದೇವ ಸಿವಥಿಕಂ, ಇಮಿನಾ ಸಿವಥಿಕಾಯಂ ಉಪ್ಪನ್ನಂ ಸಿವೇಯ್ಯಕಂ ಥಿಕಸದ್ದಸ್ಸ ಲೋಪಂ ಕತ್ವಾತಿ ದಸ್ಸೇತಿ. ತತ್ಥಾತಿ ಉತ್ತರಕುರೂಸು. ತನ್ತಿ ಮತಂ. ಹತ್ಥಿಸೋಣ್ಡಕಸಕುಣಾತಿ ಹತ್ಥಿಲಿಙ್ಗವಿಹಙ್ಗಮಾ. ತೇ ಹಿ ಹತ್ಥಿನೋ ಸೋಣ್ಡೋ ವಿಯ ಸೋಣ್ಡೋ ಏತೇಸು ಅತ್ಥೀತಿ ಹತ್ಥೀಸೋಣ್ಡಕಾ, ತೇ ಚ ತೇ ಸಕುಣಾ ಚೇತಿ ಹತ್ಥಿಸೋಣ್ಡಕಸಕುಣಾತಿ ವುಚ್ಚನ್ತಿ. ರಞ್ಞೋ ಆಹರನ್ತೀತಿ ರಞ್ಞೋ ಅತ್ಥಾಯ, ಸನ್ತಿಕಂ ವಾ ಆಹರನ್ತಿ. ಇದನ್ತಿ ಸಿವೇಯ್ಯಕಂ ದುಸ್ಸಯುಗಂ. ಸಿವಿರಟ್ಠೇ ವಾಯಿತಂ ಸಿವೇಯ್ಯಕನ್ತಿ ಚ ದಸ್ಸೇನ್ತೋ ಆಹ ‘‘ಅಥವಾ’’ತಿಆದಿ. ತೇನಾತಿ ಕಾರಣೇನ. ‘‘ಸಿವೇಯ್ಯಕನ್ತಿ…ಪೇ… ವದನ್ತೀ’’ತಿ ಪೋರಾಣಾ ಆಹೂತಿ ಯೋಜನಾ.

೨೦೯. ಸಮತ್ತಿಂಸವಿರೇಚನಕಥಾ

೩೩೬. ಕಿಂಪನಾತಿ ಏತ್ಥ ಕಿಂಸದ್ದೋ ಅನಿಯಮತ್ಥೋ. ಲೂಖೋ ಕಿಂ, ನ ಲೂಖೋ ಕಿನ್ತಿ ಹಿ ಅತ್ಥೋ. ‘‘ಸಿನೇಹಪಾನಂ ಪನ ತೇಮೇತೀ’’ತಿ ಚ ‘‘ಕರೋತೀ’’ತಿ ಚ ಸಮ್ಬನ್ಧೋ. ಸಬ್ಬತ್ಥಾತಿ ಸಕಲಕಾಯೇ. ಸಿರಾತಿ ಕಣ್ಡರಾ. ಅಯನ್ತಿ ಜೀವಕೋ. ಓಳಾರಿಕದೋಸಹರಣತ್ಥನ್ತಿ ಓಳಾರಿಕಸ್ಸ ದೋಸಸ್ಸ ಅಪನಯನತ್ಥಂ. ಪಕತತ್ತೇತಿ ಪಕತಿಸಙ್ಖಾತೇ ಸಭಾವೇ ಸತೀತಿ ಸಮ್ಬನ್ಧೋ. ಭಗವಾ ಭನ್ತೇತಿ ಯೋಜನಾ. ಕುತೋತಿ ಕಸ್ಸ ಸನ್ತಿಕಾ. ವಟ್ಟತಿ ನು ಖೋತಿ ಚಿನ್ತೇಸೀತಿ ಯೋಜನಾ. ತತೋತಿ ಚಿನ್ತನತೋ. ಸೋಣೋತಿ ಕೋಳಿವೀಸಸೋಣೋ, ಭುಞ್ಜತೀತಿ ಸಮ್ಬನ್ಧೋ. ತತೋತಿ ಸೋಣಸ್ಸ ಸನ್ತಿಕಾ. ತಸ್ಸಾತಿ ಸೋಣಸ್ಸ. ಸೋತಿ ಸೋಣೋ. ಥೇರಸ್ಸಾತಿ ಮೋಗ್ಗಲ್ಲಾನತ್ಥೇರಸ್ಸ. ಇದಂ ‘‘ಪತ್ತ’’ನ್ತಿಪದೇ ಸಾಮೀ, ‘‘ಅದಾಸೀ’’ತಿ ಪದೇ ಸಮ್ಪದಾನಂ. ಅಞ್ಞಂ ಪಿಣ್ಡಪಾತನ್ತಿ ಸಮ್ಬನ್ಧೋ.

ರಾಜಾಪಿ ಖೋ ಭುಞ್ಜಿತುಕಾಮೋ ಅಹೋಸೀತಿ ಸಮ್ಬನ್ಧೋ. ಯಞ್ಚ ಸುಜಾತಾ ಅದಾಸಿ, ಯಞ್ಚ ಪರಿನಿಬ್ಬಾನಕಾಲೇ ಚುನ್ದೋ ಕಮ್ಮಾರಪುತ್ತೋ, ಭಾಜನಗತೇಸು ದ್ವೀಸುಯೇವ ತೇಸು ಪಿಣ್ಡಪಾತೇಸು ದೇವತಾ ಓಜಂ ಪಕ್ಖಿಪನ್ತೀತಿ ಯೋಜನಾ. ಅಞ್ಞೇಸೂತಿ ದ್ವೀಹಿ ಪಿಣ್ಡಪಾತೇಹಿ ಅಞ್ಞೇಸು. ಇಚ್ಛನ್ತಿ ರುಚಿಂ. ಸೋತಿ ಬಿಮ್ಬಿಸಾರೋ ರಾಜಾ. ತವೇವಾತಿ ತುಯ್ಹಮೇವ. ತನ್ತಿ ಭಗವತೋ ವಚನಂ. ರಾಜಾ ಅಕಾಸೀತಿ ಸಮ್ಬನ್ಧೋ. ತೇತಿ ಅಸೀತಿಕುಲಪುತ್ತಸಹಸ್ಸಾ. ಏತದತ್ಥಮೇವಾತಿ ಸೋಣಸ್ಸ ಅರಹತ್ತೇ ಪತಿಟ್ಠಾಪನತ್ಥಮೇವ, ನ ರಞ್ಞೋ ಅನುಗ್ಗಹತ್ಥನ್ತಿ ಅಧಿಪ್ಪಾಯೋ.

೨೧೦. ವರಯಾಚನಕಥಾ

೩೩೭. ಕತಂ ಭತ್ತಕಿಚ್ಚಂ ಯೇನಾತಿ ಕತಭತ್ತಕಿಚ್ಚೋ, ತಸ್ಮಿಂ ಸತೀತಿ ಸಮ್ಬನ್ಧೋ. ವುತ್ತನಯೇನೇವಾತಿ ರಾಹುಲವತ್ಥುಮ್ಹಿ (ಮಹಾವ. ಅಟ್ಠ. ೧೦೫) ವುತ್ತನಯೇನೇವ. ಇದಂ ವತ್ಥನ್ತಿ ಇದಂ ಸಿವೇಯ್ಯಕಂ ವತ್ಥಂ, ಉಪ್ಪನ್ನನ್ತಿ ಸಮ್ಬನ್ಧೋ. ‘‘ತಾವಾ’’ತಿ ಅಜ್ಝಾಹರಿತಬ್ಬೋ. ಏತ್ಥನ್ತರೇತಿ ಏತಸ್ಮಿಂ ವತ್ಥುಪ್ಪನ್ನಕಾಲಮಜ್ಝೇ. ಕೋಚಿ ಭಿಕ್ಖೂತಿ ಸಮ್ಬನ್ಧೋ. ತೇನಾತಿ ಪಂಸುಕೂಲಿಕಹೇತುನಾ. ಅಯನ್ತಿ ಜೀವಕೋ. ಗಹಪತಿಚೀವರನ್ತಿ ಏತ್ಥ ಗಹಪತೀನಂ ಚೀವರನ್ತಿ ಅತ್ಥಂ ಪಟಿಕ್ಖಿಪನ್ತೋ ಆಹ ‘‘ಗಹಪತೀಹಿ ದಿನ್ನಂ ಚೀವರ’’ನ್ತಿ. ವತ್ಥದಾನಾನಿಸಂಸಪಟಿಸಂಯುತ್ತಾಯಾತಿ ‘‘ವತ್ಥದೋ ಹೋತಿ ವಣ್ಣದೋ’’ತಿಆದಿಕಾಯ (ಸಂ. ನಿ. ೧.೪೨) ವತ್ಥದಾನಸ್ಸ ಆನಿಸಂಸೇನ ಪಟಿಸಂಯುತ್ತಾಯ. ವಿಚ್ಛಾವಸೇನ ವುತ್ತೋ ‘‘ಇತರೀತರೇನಾ’’ತಿ ಸಬ್ಬನಾಮಸದ್ದೋ ಅನಿಯಮತ್ಥೋತಿ ಆಹ ‘‘ಅಪ್ಪಗ್ಘೇನಪಿ ಮಹಗ್ಘೇನಪಿ ಯೇನ ಕೇನಚೀ’’ತಿ. ಪಾವಾರೋತಿ ಉತ್ತರಾಸಙ್ಗೋ. ಸೋ ಹಿ ಪಾರುಪನತ್ಥಾಯ ವರಿಯತಿ ಇಚ್ಛಿಯತೀತಿ ಪಾವಾರೋತಿ ವುಚ್ಚತಿ. ‘‘ಕಪ್ಪಾಸಾದಿಭೇದೋ’’ತಿ ಇಮಿನಾ ತಸ್ಸ ಸರೂಪಂ ದಸ್ಸೇತಿ. ಪಕತಿಕೋಜವಮೇವಾತಿ ಪಕತಿಯಾ ಭಿಕ್ಖೂನಂ ಸಾರುಪ್ಪಂ ಕೋಜವಮೇವ. ಸೋಳಸನಾಟಕಿತ್ಥೀನಂ ಠತ್ವಾ ನಚ್ಚಯೋಗ್ಯತ್ತಾ ಮಹತೀ ಪಿಟ್ಠಿ ಏತಸ್ಸಾತಿ ಮಹಾಪಿಟ್ಠಿಯಂ, ತಮೇವ ಕೋಜವಂ ಮಹಾಪಿಟ್ಠಿಯಕೋಜವಂ. ತಸ್ಸ ಕಿರ ಲೋಮಾನಿ ಚತುರಙ್ಗುಲಾಧಿಕಾನಿ ಹೋನ್ತಿ.

೨೧೧. ಕಮ್ಬಲಾನುಜಾನನಾದಿಕಥಾ

೩೩೮. ಕಾಸೀನನ್ತಿ ಕಾಸೀನಂ ಜನಪದಾನಂ, ಕಾಸಿರಟ್ಠೇ ನಿವಾಸೀನಂ ಜನಾನಂ ವಾ. ಪಸೇನದಿಸ್ಸಾತಿ ಪಚ್ಚುಟ್ಠಂ, ಪಟಿಪಕ್ಖಂ ವಾ ಸೇನಂ ಜಿನಾತೀತಿ ಪಸೇನದಿ ಜಕಾರಸ್ಸ ದಕಾರಂ ಕತ್ವಾ. ಏಸಾತಿ ಏಸೋ ಕಾಸಿರಾಜಾ. ‘‘ಸಹಸ್ಸ’’ನ್ತಿ ಇಮಿನಾ ಕಾಸಿಸದ್ದಸ್ಸ ಸಙ್ಕೇತಸಙ್ಖ್ಯಂ ದಸ್ಸೇತಿ. ತಂಅಗ್ಘನಕೋತಿ ತೇನ ಕಾಸಿನಾ ಅಗ್ಘನಕೋ. ಕಸ್ಮಾ ಅಡ್ಢಕಾಸೀತಿ (ಥೇರೀಗಾ. ಅಟ್ಠ. ೨೫) ವುತ್ತೋತಿ ಆಹ ‘‘ಅಯಂ ಪನಾ’’ತಿಆದಿ. ಅಯನ್ತಿ ಕಮ್ಬಲೋ. ಪನಾತಿ ಕಾರಣತ್ಥಜೋತಕೋ. ಯಸ್ಮಾತಿ ಹಿ ಅತ್ಥೋ.

೩೩೯. ಭಞ್ಜಿತಬ್ಬಂ ಖೋಮಾದೀನಿ ಪಞ್ಚ ಸುತ್ತಾನಿ ಮಿಸ್ಸಿತ್ವಾ ಅವಮದ್ದಿತಬ್ಬನ್ತಿ ಭಙ್ಗನ್ತಿ ದಸ್ಸೇನ್ತೋ ಆಹ ‘‘ಭಙ್ಗಂ ನಾಮಾ’’ತಿಆದಿ. ವಾಕಮಯಮೇವಾತಿ ಭಙ್ಗನಾಮಕೇನ ವಾಕೇನ ನಿಬ್ಬತ್ತಮೇವ.

೩೪೦. ತೇತಿ ಭಿಕ್ಖೂ, ಸಲ್ಲಕ್ಖಿಂಸು ಕಿರಾತಿ ಸಮ್ಬನ್ಧೋ. ಏತಸ್ಸಾತಿ ಪದಸ್ಸ, ಅತ್ಥನ್ತಿ ಸಮ್ಬನ್ಧೋ. ನ ಅಚ್ಛಿಂಸೂತಿ ನ ಆಸಿಂಸು, ನ ವಸಿಂಸೂತಿ ಅತ್ಥೋ. ನಾಕಾಮಾತಿ ಏತ್ಥ ಕಮುಧಾತು ಇಚ್ಛತ್ಥೋ ಯಕಾರಲೋಪೋತಿ ಆಹ ‘‘ನ ಅನಿಚ್ಛಾಯಾ’’ತಿ. ದಾತಬ್ಬೋತಿ ಭಾಗೋ ದಾತಬ್ಬೋ. ಉಪಚಾರೇತಿ ಸುಸಾನಸ್ಸ ಸಮೀಪೇ. ‘‘ಅಕಾಮಾ ಭಾಗಂ ದಾತು’’ನ್ತಿ ವಚನಸ್ಸ ಅನೇಕನ್ತಭಾವಂ ದಸ್ಸೇತುಂ ವುತ್ತಂ ‘‘ಯದಿ ಪನಾ’’ತಿಆದಿ. ಇಧಾತಿ ಇಮಂ ಸುಸಾನಂ. ‘‘ಸಮ್ಪತ್ತಾ ಗಣ್ಹನ್ತೂ’’ತಿ ದೇನ್ತೀತಿ ಯೋಜನಾ. ಯೇನಾತಿ ಭಿಕ್ಖುನಾ. ಸದಿಸಾ ಓಕ್ಕಮಿಂಸೂತಿ ಏತ್ಥ ಸದಿಸಸದ್ದೋ ಸಮಪರಿಯಾಯೋತಿ ಆಹ ‘‘ಸಮಂ ಓಕ್ಕಮಿಂಸೂ’’ತಿ. ಸಮನ್ತಿ ಭಾವನಪುಂಸಕೋ. ಸಮಾನದಿಸಾಯಾತಿ ವಾ ದಸ್ಸೇನ್ತೋ ಆಹ ‘‘ಏಕದಿಸಾಯ ವಾ’’ತಿ. ಏತ್ಥ ಪನ ಯಕಾರಲೋಪೋ ದಟ್ಠಬ್ಬೋ. ಬಹಿಮೇವಾತಿ ಸುಸಾನತೋ ಬಹಿ ಏವ. ಕತಿಕನ್ತಿ ಕತೇನ ಪವತ್ತಂ ಸಙ್ಗರಂ.

೨೧೩. ಚೀವರಪಟಿಗ್ಗಾಹಕಸಮ್ಮುತಿಕಥಾ

೩೪೨. ‘‘ಯೋ ನ ಛನ್ದಾಗತಿಂ ಗಚ್ಛತೀ’’ತಿಆದೀಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ಞಾತಕಾದೀನಂ ಚೀವರನ್ತಿ ಸಮ್ಬನ್ಧೋ. ಏಕಚ್ಚಸ್ಮಿನ್ತಿ ಜನೇ. ವಾಸದ್ದೋ ವಿಕಪ್ಪತ್ಥೋ. ಏತೇಸು ತೀಸು ಅಞ್ಞತರೇನ ಕಾರಣೇನ ಛನ್ದಾಗತಿಂ ಗಚ್ಛತಿ ನಾಮಾತಿ ಹಿ ಅತ್ಥೋ. ಆಗತಸ್ಸಾಪಿ ಚೀವರನ್ತಿ ಸಮ್ಬನ್ಧೋ ಪಿಸದ್ದೋ ಗರಹತ್ಥೋ. ಪಗೇವ ಪಚ್ಛಾ ಆಗತಸ್ಸಾತಿ ಹಿ ಅತ್ಥೋ. ಅವಮಞ್ಞನ್ತಿ ಉಞ್ಞಾತಂ. ವೋತಿ ತುಮ್ಹಾಕಂ. ನತ್ಥಿ ಕಿನ್ತಿ ಯೋಜನಾ. ಮುಟ್ಠಾ ಸತಿ ಏತಸ್ಸಾತಿ ಮುಟ್ಠಸ್ಸತಿ. ಆಗತಾನಮ್ಪಿ ಚೀವರನ್ತಿ ಸಮ್ಬನ್ಧೋ. ಪಿಸದ್ದೋ ಸಮ್ಭಾವನತ್ಥೋ. ಪಗೇವ ಪಠಮಂ ಆಗತಾನನ್ತಿ ಹಿ ಅತ್ಥೋ. ಏತಂ ಚೀವರಪಟಿಗ್ಗಾಹಕಟ್ಠಾನಂ ನಾಮಾತಿ ಯೋಜನಾ. ಸನ್ತಸನ್ತೋ ವಾತಿ ಖೇದಖೇದೋ ವಾ. ಇದಞ್ಚಿದಞ್ಚಾತಿ ಇದಞ್ಚ ಇದಞ್ಚ ಚೀವರಂ. ತಸ್ಮಾತಿ ಯಸ್ಮಾ ಚ ಗಚ್ಛತಿ, ಯಸ್ಮಾ ಚ ಜಾನಾತಿ, ತಸ್ಮಾ. ಯೋತಿ ಭಿಕ್ಖು. ಸಕ್ಕೋತೀತಿ ಸಮ್ಬನ್ಧೋ. ಏವರೂಪೋ ಭಿಕ್ಖು ಸಮ್ಮನಿತಬ್ಬೋತಿ ಯೋಜನಾ.

ಅಪಲೋಕನೇನಪೀತಿ ‘‘ಇತ್ಥನ್ನಾಮಂ ಭಿಕ್ಖುಂ ಚೀವರಪಟಿಗ್ಗಾಹಕಂ ಕಾತುಂ ಸಙ್ಘಂ ಅಪಲೋಕೇಮೀ’’ತಿ ಅಪಲೋಕನೇನಪಿ, ಸಮ್ಮನಿತುನ್ತಿ ಸಮ್ಬನ್ಧೋ. ಯತ್ಥ ಪನಾತಿ ಯಸ್ಮಿಂ ಪನ ಧುರವಿಹಾರೇ.

‘‘ಗಹಿತಟ್ಠಾನೇಯೇವಾ’’ತಿ ಇಮಿನಾ ತತ್ಥೇವಾತಿ ಏತ್ಥ ತಸದ್ದಸ್ಸ ವಿಸಯಂ ದಸ್ಸೇತಿ. ‘‘ಛಡ್ಡೇತ್ವಾ’’ತಿ ಇಮಿನಾ ಉಜ್ಝಿತ್ವಾತಿ ಏತ್ಥ ಉಧಧಾತುಯಾ ವಿಸ್ಸಜ್ಜನತ್ಥಂ ದಸ್ಸೇತಿ. ಚೀವರಪಟಿಗ್ಗಾಹಕನ್ತಿ ಪದಸ್ಸ ಚೀವರಂ ಪಟಿಗ್ಗಣ್ಹಾತೀತಿ ಚೀವರಪಟಿಗ್ಗಾಹಕೋತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಯೋ’’ತಿಆದಿ. ತತ್ಥ ಯೋ ಪಟಿಗ್ಗಣ್ಹಾತಿ, ಸೋ ಚೀವರಪಟಿಗ್ಗಾಹಕೋ ನಾಮಾತಿ ಯೋಜನಾ. ‘‘ಚೀವರಪಟಿಸಾಮಕ’’ನ್ತಿ ಇಮಿನಾ ಚೀವರಂ ಗಹಿತಟ್ಠಾನತೋ ನೀಹರಿತ್ವಾ ಭಣ್ಡಾಗಾರೇ ದಹತಿ ಠಪೇತೀತಿ ಚೀವರನಿದಹಕೋತಿ ಅತ್ಥಂ ದಸ್ಸೇತಿ. ಯೋ ನ ಛನ್ದಾತಿಂ ಗಚ್ಛತೀತಿಆದೀಸು ಏತ್ಥ ಏತೇಸು ಚ ಇತೋ ಪರಞ್ಚಾತಿ ಯೋಜನಾ.

೨೧೪. ಭಣ್ಡಾಗಾರಸಮ್ಮುತಿಆದಿಕಥಾ

೩೪೩. ಯೋ ವಿಹಾರೋ ವಾ ಯೋ ಅಡ್ಢಯೋಗೋ ವಾ ಹೋತಿ, ಸೋ ವಿಹಾರಾದಿಕೋ ಸಮ್ಮನಿತಬ್ಬೋತಿ ಯೋಜನಾ. ‘‘ಆರಾಮಿಕಸಾಮಣೇರಾದೀಹೀ’’ತಿ ಪದಂ ವಿವಿತ್ತತ್ಥೇ ಅಪಾದಾನಂ, ಕರಣಮ್ಪಿ ಯುಜ್ಜತಿ. ಪಚ್ಚನ್ತಸೇನಾಸನಂ ಪನ ನ ಸಮ್ಮನಿತಬ್ಬಂ ಚೋರಾದಿಉಪದ್ದವತ್ತಾ. ವಿಹಾರಮಜ್ಝೇಯೇವಾತಿ ಭಣ್ಡಾಗಾರವಿಹಾರಮಜ್ಝೇಯೇವ.

ಯಸ್ಸಾತಿ ಭಣ್ಡಾಗಾರಸ್ಸ. ಇದಂ ಪದಂ ‘‘ಛದನಾದೀಸೂ’’ತಿ ಪದೇ ಸಾಮೀ, ‘‘ನತ್ಥೀ’’ತಿ ಪದೇ ಸಮ್ಪದಾನಂ. ಯಸ್ಸ ಪನಾತಿ ಭಣ್ಡಾಗಾರಸ್ಸ ಪನ. ಯತ್ಥ ಕತ್ಥಚೀತಿ ಯಸ್ಮಿಂ ಕಸ್ಮಿಂಚಿ ಠಾನೇ. ಯೇನಾತಿ ಪತಿತಹೇತುನಾ. ಮೂಸಿತ್ವಾ ಖಾದತೀತಿ ಮೂಸಿಕೋ. ಆದಿಸದ್ದೇನ ಗೋಧಾಮಙ್ಗುಸಾದಯೋ ಸಙ್ಗಣ್ಹಾತಿ. ಉಪ ಭುಸಂ, ಉಪಗುಹಿತ್ವಾ ವಾ ಚಿನನ್ತೀತಿ ಉಪಚಿಕಾ. ತನ್ತಿ ಓವಸ್ಸನಾದಿಂ. ಹೀತಿ ಸಚ್ಚಂ, ಯಸ್ಮಾ ವಾ. ಏವನ್ತಿಆದಿ ನಿಗಮನಂ.

ಚೀವರಪಟಿಗ್ಗಾಹಕಾದೀಹೀತಿ ಆದಿಸದ್ದೇನ ಚೀವರನಿದಹಕಭಣ್ಡಾಗಾರಿಕೇ ಸಙ್ಗಣ್ಹಾತಿ. ತತ್ಥಾತಿ ತೇಸು. ಚೀವರಪಟಿಗ್ಗಾಹಕೇನ ನ ಗಣ್ಹಿತಬ್ಬನ್ತಿ ಸಮ್ಬನ್ಧೋ. ತಾವಾತಿ ಚೀವರನಿದಹಕಭಣ್ಡಾಗಾರಿಕಾನಂ, ತೇಹಿ ವಾ ಪಠಮಂ. ಯಂ ಯನ್ತಿ ಚೀವರಂ. ತಥೇವಾತಿ ಯಥಾ ವಿಸುಂ ವಿಸುಂ ಕತ್ವಾ ಗಣ್ಹತಿ, ತಥೇವ. ಚೀವರನಿದಹಕೇನಾಪೀತಿ ಪಿಸದ್ದೋ ನ ಕೇವಲಂ ಪಟಿಗ್ಗಾಹಕೇನೇವ, ಅಥ ಖೋ ನಿದಹಕೇನಪೀತಿ ಸಮ್ಪಿಣ್ಡೇತಿ. ತಥೇವಾತಿ ಯಥಾ ನಿದಹಕೋ ಆಚಿಕ್ಖತಿ, ತಥೇವ. ತತೋತಿ ತೇಹಿ ಚೀವರೇಹಿ, ವಿಭತ್ತಅಪಾದಾನಂ, ತೇಸು ಚೀವರೇಸು ವಾ ನಿದ್ಧಾರಣಂ. ತದೇವಾತಿ ಸಙ್ಘೇನ ವುತ್ತಚೀವರಮೇವ.

ಇತೀತಿಆದಿ ನಿಗಮನಂ. ಭಗವತಾ ಅನುಞ್ಞಾತೋತಿ ಸಮ್ಬನ್ಧೋ. ಭಣ್ಡಾಗಾರನ್ತಿ ಭಣ್ಡಸ್ಸ ಠಪನೋಕಾಸಂ ಅಗಾರಂ. ಭಣ್ಡಾಗಾರಿಕೋತಿ ಭಣ್ಡಾಗಾರೇ ನಿಯುತ್ತೋ. ಬಾಹುಲ್ಲಿಕತಾಯಾತಿ ಪಚ್ಚಯಬಾಹುಲ್ಲೇನ ನಿಯುತ್ತಭಾವತ್ಥಂ. ಏವಂ ಸನ್ತೇ ಕಿಮತ್ಥಾಯ ಅನುಞ್ಞಾತೋತಿ ಆಹ ‘‘ಅಪಿ ಚಾ’’ತಿಆದಿ. ಅನುಗ್ಗಹಾಯ ಅನುಞ್ಞಾತೋತಿ ಸಮ್ಬನ್ಧೋ. ಹೀತಿ ವಿತ್ಥಾರೋ. ನೇವ ಜಾನೇಯ್ಯುನ್ತಿ ಯೋಜನಾ. ದ್ವೇ ದ್ವೇ ವಾ ಚೀವರೇತಿ ಸಮ್ಬನ್ಧೋ. ಸಙ್ಗಹಂ ಕಾತುನ್ತಿ ಸಙ್ಘೇನ ಸಙ್ಗಹಂ ಕಾತುಂ.

ನ ವುಟ್ಠಾಪೇತಬ್ಬೋತಿ ಏತ್ಥ ಅತ್ಥುದ್ಧಾರವಸೇನ ಅಞ್ಞೇಪಿ ಅವುಟ್ಠಾಪನೀಯೇ ದಸ್ಸೇನ್ತೋ ಆಹ ‘‘ಅಞ್ಞೇಪೀ’’ತಿಆದಿ. ಹೀತಿ ವಿತ್ಥಾರೋ. ತತ್ಥಾತಿ ಚತೂಸು. ಸಙ್ಘೋ ಪನ ದೇತೀತಿ ಸಮ್ಬನ್ಧೋ. ಉಪಕಾರತಾಯ ಚಾತಿ ಸಙ್ಘಸ್ಸ ಉಪಕಾರತಾಯ ಚ. ಏತ್ಥ ಚ ಪುರಿಮೇಸು ತೀಸು ಏಕೋಯೇವ ಹೇತು, ಪಚ್ಛಿಮೇ ಪನ ದ್ವೇ ಹೇತವೋತಿ ದಟ್ಠಬ್ಬಂ.

ಸಮ್ಮುಖೀಭೂತೇನಾತಿ ಅಞ್ಞಮಞ್ಞಸ್ಸ ಮುಖೇ ಸಂವಿಜ್ಜಮಾನೋ, ಸನ್ನಿಪತಿತೋ ವಾ ಸಮ್ಮುಖೋ, ಸಮ್ಮುಖೋ ಹುತ್ವಾ ಭೂತೋ ಸಮ್ಮುಖೀಭೂತೋ. ಭೂಸದ್ದಯೋಗತ್ತಾ ಅಕಾರಸ್ಸೀಕಾರೋ ಹೋತಿ, ಅನ್ತೋಉಪಚಾರಸೀಮಾಯಂ ಠಿತೋ ಸಙ್ಘೋ. ತಮತ್ಥಂ ದಸ್ಸೇನ್ತೋ ಆಹ ‘‘ಅನ್ತೋಉಪಚಾರಸೀಮಾಯಂ ಠಿತೇನಾ’’ತಿ. ಕೋಲಾಹಲನ್ತಿ ಬಹುಜನೇಹಿ ಸನ್ನಿಪತಿತ್ವಾ ಏಕತೋ ಕತಂ ಅಬ್ಯತ್ತಸದ್ದಂ. ತದಾಕಾರಂ ದಸ್ಸೇನ್ತೋ ಆಹ ‘‘ಅಮ್ಹಾಕ’’ನ್ತಿಆದಿ. ‘‘ಚೀವರಭಾಜಕೇಸೂ’’ತಿಆದಿನಾ ಅಗತಿಗಮನಾಕಾರಂ ದಸ್ಸೇತಿ, ತಂ ಸುವಿಞ್ಞೇಯ್ಯಮೇವ. ತುಲಾಭೂತೋತಿ ತುಲಾಯ ಸದಿಸೋ ಹುತ್ವಾ ಭೂತೋ, ತುಲಾಯ ಸದಿಸಭಾವಂ ಪತ್ತೋ ವಾ. ಮಜ್ಝತ್ತೋತಿ ಮಜ್ಝೇ ಠಿತೋ ಅತ್ತಾ ಸಭಾವೋ ಏತಸ್ಸಾತಿ ಮಜ್ಝತ್ತೋ.

ಇದನ್ತಿ ಚೀವರಂ. ಘನನ್ತಿ ನಿರನ್ತರಂ. ತನುಕನ್ತಿ ವಿರಳಂ. ಏತ್ಥ ‘‘ಉಚ್ಚಿನಿತ್ವಾ’’ತಿ ಇಮಿನಾ ವತ್ಥಸ್ಸ ಪಮಾಣೇನ ಉಚ್ಚಿನನಂ ದಸ್ಸೇತಿ. ‘‘ತುಲಯಿತ್ವಾ’’ತಿ ಇಮಿನಾ ಅಗ್ಘೇನ ತುಲನಂ ದಸ್ಸೇತಿ. ವಣ್ಣಾವಣ್ಣಂ ಕತ್ವಾತಿ ವಣ್ಣಞ್ಚ ಅವಣ್ಣಞ್ಚ ಖುದ್ದಕಞ್ಚ ಪಮಾಣಂ, ಮಹನ್ತಞ್ಚ ಪಮಾಣಂ ಕತ್ವಾತಿ ಅತ್ಥೋ. ಏಕಚ್ಚಾನಿ ಚೀವರಾನಿ ಅಪ್ಪಗ್ಘಾನಿ ಹೋನ್ತಿ, ಏಕಚ್ಚಾನಿ ಮಹಗ್ಘಾನೀತಿ ವುತ್ತಂ ಹೋತಿ. ದಸದಸಅಗ್ಘನಕನ್ತಿ ದಸಹಿ ದಸಹಿ ಕಹಾಪಣೇಹಿ ಅಗ್ಘನಕಂ. ಯನ್ತಿ ಚೀವರಂ, ಬನ್ಧಿತ್ವಾತಿ ನವಗ್ಘನಕಂ ಏಕಗ್ಘನಕೇನ, ಅಟ್ಠಗ್ಘನಕಞ್ಚ ದ್ವಿಅಗ್ಘನಕೇನ ಬನ್ಧಿತ್ವಾತಿ ಅತ್ಥೋ. ಸಮೇ ಪಟಿವೀಸೇತಿ ಸಮಪಮಾಣೇ ಪಟಿವೀಸೇ ಠಪೇತ್ವಾ, ಇಮಿನಾ ‘‘ವಣ್ಣಾವಣ್ಣ’’ನ್ತಿ ಏತ್ಥ ವಣ್ಣಸದ್ದೋ ಪಮಾಣತ್ಥೋತಿ ದೀಪೇತಿ. ದಸ ದಸ ಭಿಕ್ಖೂತಿ ಇದಂ ಉಪಲಕ್ಖಣವಸೇನ ವುತ್ತಂ ಅಞ್ಞೇನಾಕಾರೇನಾಪಿ ಗಣೇತುಂ ಸಕ್ಕುಣೇಯ್ಯತ್ತಾ. ಭಣ್ಡಿಕನ್ತಿ ಚೀವರಭಣ್ಡೇನ ನಿಯುತ್ತಂ ಪುಟಂ. ಕುಸೋತಿ ಸಲಾಕದಣ್ಡೋ.

ಅತ್ತಿಸ್ಸರಾತಿ ಅತ್ತನಾವ ಅತ್ತಾನಂ ಇಸ್ಸರಾ. ಅಞ್ಞೇಸಂ ವತ್ತಪಟಿಪತ್ತಿನ್ತಿ ಸಮ್ಬನ್ಧೋ. ಉಪಡ್ಢಭಾಗೋತಿ ಭಿಕ್ಖೂನಂ ಲದ್ಧಭಾಗತೋ ಉಪಡ್ಢೋ ಭಾಗೋ. ಯೇ ಪನಾತಿ ಸಾಮಣೇರಾ ಪನ. ಸಮಭಾಗೋತಿ ಭಿಕ್ಖೂನಂ ಭಾಗೇನ ಸಮೋ ಭಾಗೋ. ಇದಞ್ಚಾತಿ ‘‘ಉಪಡ್ಢಪಟಿವೀಸ’’ನ್ತಿ ವಚನಞ್ಚ, ಕಥಿತನ್ತಿ ಸಮ್ಬನ್ಧೋ. ಸಮಕಮೇವಾತಿ ಭಿಕ್ಖುಸಾಮಣೇರಾನಂ ಸಮಪಮಾಣಮೇವ. ತತ್ರುಪ್ಪಾದವಸ್ಸಾವಾಸಿಕನ್ತಿ ತಸ್ಮಿಂ ವಿಹಾರೇ ಉಪ್ಪಾದೇನ ಮೂಲೇನ ಉಪ್ಪಾದಿತಂ ವಸ್ಸಾವಾಸಿಕಂ. ಫಾತಿಕಮ್ಮನ್ತಿ ವಡ್ಢನಕಮ್ಮಂ ‘‘ಯತ್ತಕೇನ ವಿನಯಾಗತೇನ ಸಮ್ಮುಞ್ಜನಿಬನ್ಧನಾದಿನಾ ಹತ್ಥಕಮ್ಮೇನ ವಿಹಾರಸ್ಸ ಊನತಾ ನ ಹೋತಿ, ತತ್ತಕಂ ಕತ್ವಾತಿ ಅತ್ಥೋ. ಏತನ್ತಿ ಫಾತಿಕಮ್ಮಂ ಕತ್ವಾ ಗಹಣಂ. ಹೀತಿ ಸಚ್ಚಂ. ಏತ್ಥಾತಿ ತತ್ರುಪ್ಪಾದವಸ್ಸಾವಾಸಿಕಗಹಣೇ. ಸಬ್ಬೇಸನ್ತಿ ಅಖಿಲಾನಂ ಭಿಕ್ಖುಸಾಮಣೇರಾನಂ. ಭಣ್ಡಾಗಾರಿಕಚೀವರೇಪೀತಿ ಭಣ್ಡಾಗಾರೇ ಠಪಿತೇ ಅಕಾಲಚೀವರೇಪಿ. ಪಿಸದ್ದೇನ ತತ್ರುಪ್ಪಾದವಸ್ಸಾವಾಸಿಕಮಪೇಕ್ಖತಿ. ಸಾಮಣೇರಾ ಉಕ್ಕುಟ್ಠಿಂ ಕರೋನ್ತೀತಿ ಸಮ್ಬನ್ಧೋ. ಅಪಹರಿತಕನ್ತಿ ಹರಿತವಿರಹಿತಂ. ರಙ್ಗಛಲ್ಲಿನ್ತಿ ರಜನಚ್ಛವಿಂ. ಏತನ್ತಿ ಉಕ್ಕುಟ್ಠಿಕರಣತೋ ಸಮಭಾಗದಾನಂ, ವುತ್ತನ್ತಿ ಸಮ್ಬನ್ಧೋ. ಯೇ ಚಾತಿ ಸಾಮಣೇರಾ ಚ. ವಿರಜ್ಝಿತ್ವಾ ಕರೋನ್ತೀತಿ ಕತ್ತಬ್ಬಕಾಲೇಸು ಅಕತ್ವಾ ಯಥಿಚ್ಛಿತಕ್ಖಣೇ ಕರೋನ್ತಿ. ತೇತಿ ಸಾಮಣೇರೇ. ಸಮಪಟಿವೀಸೋ ದಾತಬ್ಬೋತಿ ‘‘ಕರಿಸ್ಸಾಮಾ’’ತಿ ಪಟಿಞ್ಞಾತಮತ್ತೇನ ಸಮೋ ಪಟಿವೀಸೋ ದಾತಬ್ಬೋ.

‘‘ಸಕಂ ಭಾಗಂ ದಾತು’’ನ್ತಿ ಇದಂ ವುತ್ತನ್ತಿ ಸಮ್ಬನ್ಧೋ. ಕಿಂ ಸನ್ಧಾಯ ವುತ್ತನ್ತಿ ಆಹ ‘‘ಭಣ್ಡಾಗಾರತೋ…ಪೇ… ಸನ್ಧಾಯಾ’’ತಿ. ಪಹತಾಯಾತಿ ಪಹರಿತಬ್ಬಾಯ, ಪಹನಿತಬ್ಬಾಯ ವಾ. ತಸ್ಮಾತಿ ಯಸ್ಮಾ ಸನ್ಧಾಯ ವುತ್ತಂ, ತಸ್ಮಾ. ಅನೀಹಟೇಸೂತಿ ಭಣ್ಡಾಗಾರತೋ ಅನೀಹರಿತೇಸು. ಇಮಸ್ಸ ಭಿಕ್ಖುನೋತಿ ಉತ್ತರಿತುಕಾಮಸ್ಸ ಇಮಸ್ಸ ಭಿಕ್ಖುನೋ. ತುಲಾಯಾತಿ ಮಾನೇನ.

ತೇಸೂತಿ ಸಾಟಕೇಸು, ಏಕೋ ಸಾಟಕೋತಿ ಯೋಜನಾ. ಸಬ್ಬೇಸು ಪಾತಿತೇಸೂತಿ ಸಮ್ಬನ್ಧೋ. ಏತ್ತಕೇನಾತಿ ದ್ವಾದಸಗ್ಘನಕೇನ. ತಂ ಸುತ್ವಾತಿ ಭಿಕ್ಖೂನಂ ತಂ ವಚನಂ ಸುತ್ವಾ. ಸಬ್ಬತ್ಥಾತಿ ಸಬ್ಬಸ್ಮಿಂ ಸಙ್ಘಗಣಸನ್ತಕೇ. ಅನುಪ್ಪದಾನೇನ ಖಿಪಿಯತಿ ಪಕ್ಖಿಪಿಯತೀತಿ ಅನುಕ್ಖೇಪನ್ತಿ ದಸ್ಸೇನ್ತೋ ಆಹ ‘‘ಅನುಕ್ಖೇಪಂ ನಾಮಾ’’ತಿಆದಿ. ಯತ್ತಕಂ ಅಗ್ಘನ್ತಿ ಸಮ್ಬನ್ಧೋ. ತತ್ತಕೇನ ಅಗ್ಘೇನ ಅಗ್ಘನಕೇತಿ ಯೋಜನಾ. ವಿಕಲ್ಲಕಾತಿ ವಿಕಲಸ್ಸ ಭಾವೋ ವಿಕಲ್ಲಂ, ಚೀವರಪುಗ್ಗಲಾನಂ ಅಪಹೋನಕಭಾವೋ, ತದೇವ ವಿಕಲ್ಲಕಾ. ‘‘ತತ್ಥಾ’’ತಿ ಪಾಠಸೇಸೋ, ತೇಸು ದ್ವೀಸು ವಿಕಲ್ಲಕೇಸೂತಿ ಅತ್ಥೋ. ಅತ್ಥೀತಿ ಸಂವಿಜ್ಜನ್ತಿ, ನಿಪಾತೋಯಂ. ಛಿನ್ದನ್ತೇಹಿ ಚ ದಾತಬ್ಬಾನೀತಿ ಸಮ್ಬನ್ಧೋ. ದಾತಬ್ಬಾನೀತಿ ಚ ಛಿನ್ದಿತಬ್ಬಾನಿ. ದಾಸದ್ದೋ ಹಿ ಅವಖಣ್ಡನತ್ಥೋ. ದಾತುನ್ತಿ ಅವಖಣ್ಡಿತುಂ. ಏವನ್ತಿಆದಿ ನಿಗಮನಂ. ಏತ್ಥಾತಿ ಏತೇಸು ವಿಕಲ್ಲಕೇಸು. ತನ್ತಿ ಚೀವರಂ. ಅಥಾತಿ ತೋಸಿತತೋ ಪರಂ. ತತ್ಥಾತಿ ಏಕಸ್ಸ ಭಿಕ್ಖುನೋ ಕೋಟ್ಠಾಸೇ. ಸಾಮಣಕನ್ತಿ ಸಮಣಸ್ಸ ಅನುರೂಪಂ. ಯೋತಿ ಭಿಕ್ಖು. ತೇನಾತಿ ಪರಿಕ್ಖಾರೇನ. ಇದಮ್ಪೀತಿ ಅಞ್ಞಂ ಸಾಮಣಕಸ್ಸ ಪರಿಕ್ಖಾರಸ್ಸ ಠಪನಮ್ಪಿ. ಪಿಸದ್ದೇನ ಪುರಿಮಂ ವತ್ಥಛಿನ್ದನಮಪೇಕ್ಖತಿ.

ವಗ್ಗನ್ತಿ ಸಮೂಹಂ. ಅಟ್ಠ ವಾ ನವ ವಾ ಭಿಕ್ಖೂ ಹೋನ್ತೀತಿ ಯೋಜನಾ. ತೇಸನ್ತಿ ಅಟ್ಠನ್ನಂ ವಾ ನವನ್ನಂ ವಾ. ಏವನ್ತಿಆದಿ ನಿಗಮನಂ. ಅಯಂ ಅಪಹೋನಕಭಾವೋತಿ ಯೋಜನಾ. ಪುನ ಚೀವರಸ್ಸೇವ ವಿಕಲ್ಲಕಭಾವಂ ದಸ್ಸೇನ್ತೋ ಆಹ ‘‘ಅಥವಾ’’ತಿಆದಿ. ಏತ್ಥ ಪುರಿಮನಯೇ ಚೀವರಸ್ಸ ಚ ಪುಗ್ಗಲಸ್ಸ ಚ ವಿಕಲ್ಲಕಂ ಹೋತಿ, ಪಚ್ಛಿಮೇ ಚೀವರಸ್ಸೇವಾತಿ ಅಯಮೇತೇಸಂ ವಿಸೇಸೋ.

೨೧೫. ಚೀವರರಜನಕಥಾ

೩೪೪. ಗಿಹಿಪರಿಭುತ್ತಂ ಪನಾತಿ ಗಿಹಿನಾ ಪರಿಭುತ್ತಂ ವತ್ಥಂ ಪನ, ಕಿಞ್ಚಿ ಫಲನ್ತಿ ಸಮ್ಬನ್ಧೋ.

ಸೀತುದಕಾತಿ ಸೀತಂ ಉದಕಂ. ಲಿಙ್ಗವಿಪಲ್ಲಾಸೋ ಹಿ ಅಯಂ. ಉತ್ತರಾಳುಮ್ಪನ್ತಿ ಏತ್ಥ ಉತ್ತರ ಉಳುಮ್ಪನ್ತಿ ಪದಚ್ಛೇದಂ ಕತ್ವಾ ಅಕಾರತೋ ಉಕಾರಸ್ಸ ಲೋಪಂ ಕತ್ವಾ, ಪುಬ್ಬಸರಸ್ಸ ಚ ದೀಘಂ ಕತ್ವಾ ‘‘ಉತ್ತರಾಳುಮ್ಪ’’ನ್ತಿ ವುಚ್ಚತಿ. ಉತ್ತರಾಳೂತಿ ಉತ್ತರಉದಕಂ. ಉಳುಸದ್ದೋ ಹಿ ಉದಕವಾಚಕೋ, ತಂ ಪಾತಿ ರಕ್ಖತೀತಿ ಉತ್ತರಾಳುಮ್ಪಂ. ತಸ್ಸ ಸರೂಪಂ ದಸ್ಸೇನ್ತೋ ಆಹ ‘‘ವಟ್ಟಾಧಾರಕ’’ನ್ತಿ. ರಜನನ್ತಿ ರಜನಛಲ್ಲಿಂ. ಹೀತಿ ಫಲಜೋತಕೋ. ರಜನನ್ತಿ ರಜನುದಕಂ. ಹೀತಿ ವಿತ್ಥಾರೋ. ಥೇವೋತಿ ರಜನಬಿನ್ದು. ನ ವಿಸರತೀತಿ ನ ಪಗ್ಘರತಿ. ರಜನಾಳುಙ್ಕನ್ತಿ ಏತ್ಥಾಪಿ ಪುರಿಮನಯೇನೇವ ಪದಸಿದ್ಧಿ ವೇದಿತಬ್ಬಾ. ರಜನಉಳುಙ್ಕನ್ತಿ ರಜನಸಙ್ಖಾತಸ್ಸ ಉದಕಸ್ಸ ಗಹಣತ್ಥಾಯ ಕರಿಯತೀತಿ ರಜನಉಳುಙ್ಕಂ. ದಣ್ಡಕೇನ ನಿಯುತ್ತಂ ಥಾಲಕಂ ದಣ್ಡಕಥಾಲಕನ್ತಿ ದಸ್ಸೇನ್ತೋ ಆಹ ‘‘ತಮೇವ ಸದಣ್ಡಕ’’ನ್ತಿ. ರಜನಕುಣ್ಡನ್ತಿ ರಜನಪಕ್ಖಿಪನಂ ಮಹಾಘಟಂ. ಅಞ್ಞತ್ರಾತಿ ಅಞ್ಞಂ ಠಾನಂ. ಪತ್ಥಿನ್ನಸದ್ದೋ ಥದ್ಧಪರಿಯಾಯೋತಿ ಆಹ ‘‘ಥದ್ಧ’’ನ್ತಿ. ದನ್ತಕಾಸಾವಾನೀತಿ ಏತ್ಥ ದನ್ತಸದ್ದೇನ ತಸ್ಸ ವಣ್ಣೋ ಗಹೇತಬ್ಬೋ, ಸೋ ಏತೇಸಮತ್ಥೀತಿ ದನ್ತಾನಿ, ದನ್ತಾನಿ ಚ ತಾನಿ ಕಾಸಾವಾನಿ ಚೇತಿ ದನ್ತಕಾಸಾವಾನಿ, ತಮತ್ಥಂ ದಸ್ಸೇನ್ತೋ ಆಹ ‘‘ದನ್ತವಣ್ಣಾನೀ’’ತಿ. ದನ್ತವಣ್ಣಾನಿ ಕಾಸಾವಾನಿ ಧಾರೇನ್ತೀತಿ ಸಮ್ಬನ್ಧೋ.

೨೧೬. ಛಿನ್ನಕಚೀವರಾನುಜಾನನಕಥಾ

೩೪೫. ದೀಘಮರಿಯಾದಬದ್ಧನ್ತಿ ದೀಘೇನ ಮರಿಯಾದೇನ ಬದ್ಧಂ. ಚತುಕ್ಕಸಣ್ಠಾನನ್ತಿ ಚತುನ್ನಂ ಮಗ್ಗಾನಂ ಸಮೋಧಾನಸಣ್ಠಾನಂ. ಉಸ್ಸಹಸಿ ತ್ವನ್ತಿ ಏತ್ಥ ಉಪುಬ್ಬೋ ಸಹಧಾತು ಸಮತ್ಥತ್ಥೋತಿ ಆಹ ‘‘ಸಕ್ಕೋಸಿ ತ್ವ’’ನ್ತಿ. ಪಪುಬ್ಬೋ ಪನ ಅಭಿಭವನತ್ಥೋ ಹೋತಿ ‘‘ಪಸಹತೀ’’ತಿಆದೀಸು. ಯೋ ನಾಮಾತಿ ಯೋ ಆನನ್ದೋ ಆಜಾನಿಸ್ಸತಿ ನಾಮ, ಸೋ ಆನನ್ದೋ ಪಣ್ಡಿತೋತಿ ಯೋಜನಾ. ‘‘ಕುಸೀ’’ತಿ ಏತಂ ನಾಮಂ ಅಧಿವಚನನ್ತಿ ಯೋಜನಾ. ಅನುವಾತಾದೀನನ್ತಿ ಆದಿಸದ್ದೇನ ಪರಿಭಣ್ಡಾದೀನಿ ಸಙ್ಗಣ್ಹಾತಿ. ‘‘ಅಡ್ಢಕುಸೀ’’ತಿ ಏತನ್ತಿ ಯೋಜನಾ.

ಗೀವೇಯ್ಯಕನ್ತಿ ಏತ್ಥ ಗೀವಾಯಂ ಸುತ್ತಸಂಸಿಬ್ಬಿತಂ ಗೀವೇಯ್ಯಕನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಗೀವಾವೇಠನಟ್ಠಾನೇ’’ತಿಆದಿ. ‘‘ಆಗನ್ತುಕಪಟ್ಟ’’ನ್ತಿ ಇಮಿನಾ ಏಯ್ಯಕಪಚ್ಚಯಸ್ಸ ಸರೂಪಂ ದಸ್ಸೇತಿ. ಏಸೇವ ನಯೋ ಜಙ್ಘೇಯ್ಯಕನ್ತಿ ಏತ್ಥಾಪಿ. ಏತಂ ನಾಮನ್ತಿ ‘‘ಗೀವೇಯ್ಯಕಂ, ಜಙ್ಘೇಯ್ಯಕ’’ನ್ತಿ ಏತಂ ನಾಮಂ. ಇತೀತಿ ಏವಂ. ಏತನ್ತಿ ‘‘ಅನುವಿವಟ್ಟ’’ನ್ತಿಆದಿ ಏತಂ. ‘‘ಅನುವಿವಟ್ಟ’’ನ್ತಿ ಏತಂ ನಾಮನ್ತಿ ಯೋಜನಾ. ವಿವಟ್ಟಸ್ಸಾತಿ ಮಜ್ಝಿಮಖಣ್ಡಕಸ್ಸ. ಬಾಹನ್ತನ್ತಿ ಏತ್ಥ ಬಾಹಾಯ ಉಪರಿ ಠಪಿತಾ ಅನ್ತಾ ಬಾಹನ್ತಾತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಬಾಹಾಯಾ’’ತಿಆದಿ. ತೇಸನ್ತಿ ಉಭಿನ್ನಮನ್ತಾನಂ. ಏತನ್ತಿ ‘‘ಬಾಹನ್ತ’’ನ್ತಿ ಏತಂ.

೨೧೭. ತಿಚೀವರಾನುಜಾನನಕಥಾ

೩೪೬. ‘‘ಉಕ್ಖಿತ್ತಭಣ್ಡಿಕಭಾವಂ ಆಪಾದಿತೇ’’ತಿ ಇಮಿನಾ ಉಬ್ಭಣ್ಡಿತೇತಿ ಏತ್ಥ ಉಕ್ಖಿತ್ತಂ ಭಣ್ಡಂ ಉಬ್ಭಣ್ಡಂ, ಉಬ್ಭಣ್ಡಭಾವಂ ಇತಾ ಆಪಾದಿತಾತಿ ಉಬ್ಭಣ್ಡಿತಾತಿ ವಚನತ್ಥಂ ದಸ್ಸೇತಿ. ತೇ ಉಬ್ಭಣ್ಡಿತೇ ಭಿಕ್ಖೂ ಅದ್ದಸಾತಿ ಯೋಜನಾ. ಭಿಸಿಸಙ್ಖೇಪೇನಾತಿ ಭಿಸಿಯಂ ಪಕ್ಖೇಪೇನ, ಪವೇಸೇನಾತಿ ಅತ್ಥೋ, ಭಿಸಿಆಕಾರೇನಾತಿ ವುತ್ತಂ ಹೋತಿ. ತತ್ಥಾತಿ ದಕ್ಖಿಣಾಗಿರಿಂ. ಗಚ್ಛನ್ತಾ ತೇ ಭಿಕ್ಖೂತಿ ಯೋಜನಾ. ‘‘ಅಟ್ಠಪಮಾಣಾಸೂ’’ತಿ ಇಮಿನಾ ಅನ್ತರಟ್ಠಕಾಸೂತಿ ಏತ್ಥ ಕಪಚ್ಚಯೋ ಪಮಾಣತ್ಥೇ ಹೋತೀತಿ ದಸ್ಸೇತಿ, ಕೇಸುಚಿ ಪೋತ್ಥಕೇಸು ಪಮಾಣಸದ್ದೋ ನ ದಿಸ್ಸತಿ, ಗಳಿತೋತಿ ದಟ್ಠಬ್ಬೋ. ರತ್ತೀಸೂತಿ ಸಮ್ಬನ್ಧೋ. ಭಗವನ್ತನ್ತಿ ಏತ್ಥ ಸಮ್ಪದಾನತ್ಥೇ ಉಪಯೋಗವಚನನ್ತಿ ಆಹ ‘‘ಭಗವತೋ’’ತಿ. ಸೀತಾಲುಕಾತಿ ಏತ್ಥ ಸೀತಂ ಪಕತಿ ಏತೇಸನ್ತಿ ಸೀತಾಲುನೋ, ತೇಯೇವ ಸೀತಾಲುಕಾತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಸೀತಪಕತಿಕಾ’’ತಿ. ಯೇ ಕುಲಪುತ್ತಾ ಪಕತಿಯಾವ ಸೀತೇನ ಕಿಲಮನ್ತಿ, ತೇ ಸೀತಾಲುಕಾ ನಾಮಾತಿ ಯೋಜನಾ. ಏಕಚ್ಚಿಯನ್ತಿ ಏತ್ಥ ಏಕಚ್ಚಸದ್ದೋ ಏಕಪರಿಯಾಯೋತಿ ಆಹ ‘‘ಏಕಂ ಪಟ್ಟ’’ನ್ತಿ. ಇಮಿನಾ ಏಕೋಯೇವ ಏಕಚ್ಚೋತಿ ಕತ್ವಾ ಸಕತ್ಥೇ ಅಚ್ಚಪಚ್ಚಯೋತಿ ದಸ್ಸೇತಿ. ‘‘ಪಟ್ಟ’’ನ್ತಿ ಇಮಿನಾ ಏಕಚ್ಚೇನ ನಿಯುತ್ತಂ ಏಕಚ್ಚಿಯನ್ತಿ ವಚನತ್ಥಂ ಕತ್ವಾ ನಿಯುತ್ತತ್ಥೇ ಪವತ್ತಸ್ಸ ಇಯಪಚ್ಚಯಸ್ಸ ಸರೂಪಂ ದಸ್ಸೇತಿ. ಇತೀತಿ ಏವಂ. ಭಗವಾ ಅನುಜಾನಾತೀತಿ ಸಮ್ಬನ್ಧೋ. ಇತರೇತಿ ಸಙ್ಘಾಟಿತೋ ಇತರೇ ಉತ್ತರಾಸಙ್ಗಅನ್ತರವಾಸಕೇ.

೨೧೮. ಅತಿರೇಕಚೀವರಾದಿಕಥಾ

೩೪೮. ಅಚ್ಛುಪೇಯ್ಯನ್ತಿ ಏತ್ಥ ಅಚ್ಛಿ ವುಚ್ಚತಿ ನೇತ್ತಮಣ್ಡಲಂ, ತಂ ವಿಯಾತಿ ಅಚ್ಛಿ ಛಿದ್ದೋ, ತಸ್ಮಿಂ ಉಪಗನ್ತಬ್ಬಂ ಉಪನೇತಬ್ಬನ್ತಿ ಅಚ್ಛುಪೇಯ್ಯಂ. ‘‘ಲಗ್ಗಾಪೇಯ್ಯ’’ನ್ತಿ ಇಮಿನಾ ಅಧಿಪ್ಪಾಯತ್ಥಂ ದಸ್ಸೇತಿ. ಏತ್ಥಾತಿ ಪಂಸುಕೂಲೇ. ಸಬ್ಬಮಿದನ್ತಿ ‘‘ದಿಗುಣಂ ಸಙ್ಘಾಟಿ’’ನ್ತಿಆದಿಕಂ ಸಬ್ಬಂ ಇದಂ ವಚನಂ. ಉದ್ಧರಿತ್ವಾತಿ ಅಪನೇತ್ವಾ. ಸಂಸಿಬ್ಬಿತನ್ತಿ ಅಞ್ಞಮಞ್ಞಂ ಸಮ್ಬನ್ಧಿತ್ವಾ ಸಿಬ್ಬಿತಂ.

೩೫೧. ಸೋವಗ್ಗಿಕನ್ತಿ ಏತ್ಥ ಸುನ್ದರಾನಿ ಅಗ್ಗಾನಿ ರೂಪಾದೀನಿ ಏತ್ಥಾತಿ ಸಗ್ಗೋ, ಪುಬ್ಬಪದೇ ಉಕಾರಸ್ಸ ಲೋಪೋ, ಉಕಾರಸ್ಸ ಉವಾದೇಸೇ ‘‘ಸುವಗ್ಗೋ’’ತಿ ಸಿಜ್ಝತಿ. ಸುವಗ್ಗಪ್ಪತ್ತಹೇತುಕಂ ಸೋವಗ್ಗಿಕಂ, ದಾನಂ, ತಮತ್ಥಂ ದಸ್ಸೇನ್ತೋ ಆಹ ‘‘ಸಗ್ಗಪ್ಪತ್ತಹೇತುಕ’’ನ್ತಿ. ‘‘ಅಪನೇತೀ’’ತಿ ಇಮಿನಾ ನುದಧಾತುಯಾ ಅಪನಯನತ್ಥಂ ದಸ್ಸೇತಿ. ಅನಾಮಯಾತಿ ಏತ್ಥ ಆಮಯಸದ್ದೋ ರೋಗಪರಿಯಾಯೋತಿ ಆಹ ‘‘ಅರೋಗಾ’’ತಿ. ನತ್ಥಿ ಆಮಯೋ ಏತಿಸ್ಸಾತಿ ಅನಾಮಯಾ.

೩೫೩. ಝಾನಲಾಭಿನೋತಿ ಝಾನಲಾಭೀನಂ ಪುಥುಜ್ಜನಾನಂ ಕಾಮಚ್ಛನ್ದನೀವರಣಸ್ಸ ವಿಕ್ಖಮ್ಭನತ್ತಾ ವುತ್ತಂ.

೩೫೬. ಸಮೋಧಾನವಸೇನ ದಸ್ಸಿಯಿತ್ಥಾತಿ ಸನ್ದಿಟ್ಠೋ. ಸಮೋಧಾನವಸೇನ ಭಜಿಯಿತ್ಥಾತಿ ಸಮ್ಭತ್ತೋ. ಅಭಿಮುಖಂ ಲಪಿತ್ಥಾತಿ ಆಲಪಿತೋ. ಇಮೇಹೀತಿ ಇಮೇಹಿ ದ್ವೀಹಿ.

೨೨೧. ಪಚ್ಛಿಮವಿಕಪ್ಪನುಪಗಚೀವರಾದಿಕಥಾ

೩೫೯. ಕತಪಂಸುಕೂಲೋತಿ ಕತೋ ಪಂಸುಕೂಲೋ. ಇಮಿನಾ ‘‘ಪಂಸುಕೂಲತೋ’’ತಿ ಪದಸ್ಸ ವಿಸೇಸನಪರಪದತ್ತಂ ದಸ್ಸೇತಿ. ಅಗ್ಗಳಾರೋಪನೇನಾತಿ ಅಗ್ಗಳಸ್ಸ ಆರೋಪನೇನ. ‘‘ಸುತ್ತೇನೇವಾ’’ತಿ ಏತ್ಥ ಏವಸದ್ದೇನ ಪಿಲೋತಿಕಂ ನಿವತ್ತೇತಿ. ಅಞ್ಛಿತ್ವಾ ಅಞ್ಛಿತ್ವಾತಿ ಆಕಡ್ಢಿತ್ವಾ ಆಕಡ್ಢಿತ್ವಾ. ಅಭಿಧಾತು ಹಿ ಆಕಡ್ಢನತ್ಥೋ. ‘‘ಸಙ್ಘಾಟಿಕೋಣೋ ದೀಘೋ’’ತಿ ಇಮಿನಾ ವಿಕಣ್ಣೋತಿ ಏತ್ಥ ವಿಸಮೋ ಕಣ್ಣೋ ವಿಕಣ್ಣೋತಿ ಕತ್ವಾ ಕಣ್ಣಸದ್ದಸ್ಸ ಕೋಣತ್ಥಂ ದಸ್ಸೇತಿ. ತತೋತಿ ಗಳನತೋ. ಲುಜ್ಜನ್ತೀತಿ ವಲಿಂ ಗಣ್ಹನ್ತಿ. ಅಟ್ಠಪದಕನ್ತಿ ಪದಸ್ಸ ಅಟ್ಠಪದೇನ ಸಿಬ್ಬಿತಂ ಅಟ್ಠಪದಕನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಅಟ್ಠಪದಕಚ್ಛಿನ್ನೇನ ಪತ್ತಮುಖಂ ಸಿಬ್ಬಿತು’’ನ್ತಿ. ತತ್ಥ ಅಟ್ಠಪದಕಚ್ಛಿನ್ನೇನ ಪತ್ತಮುಖಂ ಸಿಬ್ಬಿತುನ್ತಿ ಅಟ್ಠಪದಲಿಖನೇನ ತತ್ಥ ತತ್ಥ ಗಬ್ಭಂ ದಸ್ಸೇತ್ವಾ ಪತ್ತಮುಖಂ ಸಿಬ್ಬಿತುಂ. ‘‘ಅಟ್ಠಪದಕಚ್ಛನ್ನೇನಾ’’ತಿಪಿ ಪಾಠೋ, ಅಟ್ಠಫಲಕಾಕಾರೇನಾತಿ ಅತ್ಥೋ.

೩೬೦. ‘‘ಆಗನ್ತುಕಪತ್ತಮ್ಪಿ ದಾತು’’ನ್ತಿ ಇಮಿನಾ ಅನ್ವಾದಿಕನ್ತಿ ಪದಸ್ಸ ಅನುಪಚ್ಛಾ ಆಗನ್ತುಕಭಾವೇನ ದೀಯತೀತಿ ಅನ್ವಾದಿಕನ್ತಿ ವಚನತ್ಥಂ ದಸ್ಸೇತಿ. ಚತುತ್ಥಕ್ಖರೇನಪಿ ಪಾಠೋ, ಅನುಪಚ್ಛಾ ಆಗನ್ತುಕಭಾವೇನ ಧೀಯತಿ ಠಪೀಯತೀತಿ ಅನ್ವಾಧಿಕನ್ತಿ ಕಾತಬ್ಬೋ. ಇದಂ ಪನಾತಿ ಅನ್ವಾಧಿಕಂ ಪನ.

೩೬೧. ಸೇಸಞಾತೀನನ್ತಿ ಮಾತಾಪಿತೂಹಿ ಸೇಸಞಾತೀನಂ. ವಿನಿಪಾತೇತಿಯೇವಾತಿ ವಿನಸ್ಸನ್ತೋ ನಿಪಾತೇತಿಯೇವ.

೩೬೨. ‘‘ವಸ್ಸಿಕೋ’’ತಿ ಸಙ್ಕೇತೀಯತಿ ಗಣ್ಹೀಯತೀತಿ ವಸ್ಸಿಕಸಙ್ಕೇತನ್ತಿ ವುತ್ತೇ ಚತ್ತಾರೋ ಮಾಸಾತಿ ಆಹ ‘‘ಚತ್ತಾರೋ ಮಾಸೇ’’ತಿ. ಹೀತಿ ಸಚ್ಚಂ, ಯಸ್ಮಾ ವಾ. ಆರಞ್ಞಕಸ್ಸ ಭಿಕ್ಖುನೋತಿ ಸಮ್ಬನ್ಧೋ. ತೇನಾತಿ ಆರಞ್ಞಕೇನ ಭಿಕ್ಖುನಾ.

೨೨೨. ಸಙ್ಘಿಕಚೀವರುಪ್ಪಾದಕಥಾ

೩೬೩. ಅಞ್ಞತ್ಥಾತಿ ದಿನ್ನಟ್ಠಾನತೋ ಅಞ್ಞತ್ಥ. ಹಟಾನಿಪಿ ಚೀವರಾನಿ ತುಯ್ಹೇವ ಸನ್ತಕಾನೀತಿ ಯೋಜನಾ. ತೇಸನ್ತಿ ಚೀವರಾನಂ. ಅಞ್ಞೋತಿ ಏಕಕವಸ್ಸಾವಾಸಿಕತೋ ಅಞ್ಞೋ. ಪಞ್ಚಮಾಸೇ ತಂ ಸಬ್ಬಂ ತಸ್ಸೇವ ಭಿಕ್ಖುನೋ ಹೋತೀತಿ ಸಮ್ಬನ್ಧೋ. ಯನ್ತಿ ಚೀವರಂ, ತಂ ಸಬ್ಬಂ ಚೀವರನ್ತಿ ಸಮ್ಬನ್ಧೋ. ಯಮ್ಪೀತಿ ಚೀವರಮ್ಪಿ. ಸೋತಿ ಭಿಕ್ಖು, ಗಣ್ಹಾತೀತಿ ಸಮ್ಬನ್ಧೋ. ವಸ್ಸಾವಾಸತ್ಥಾಯಾತಿ ವಸ್ಸಂ ಆವಾಸಸ್ಸ ಭಿಕ್ಖುನೋ ಅತ್ಥಾಯ. ಠಪಿತಉಪನಿಕ್ಖೇಪತೋತಿ ವೇಯ್ಯಾವಚ್ಚಕರೇಹಿ ವಡ್ಢಿಂ ಪಯೋಜೇತ್ವಾ ಠಪಿತಉಪನಿಕ್ಖೇಪತೋ. ತತ್ರುಪ್ಪಾದತೋತಿ ತಸ್ಮಿಂ ವಿಹಾರೇ ಉಪ್ಪಾದತೋ ನಾಳಿಕೇರಆರಾಮಾದಿತೋ. ಇದನ್ತಿ ವಕ್ಖಮಾನಂ. ಏತ್ಥಾತಿ ‘‘ತಸ್ಸೇವ ತಾನಿ ಚೀವರಾನಿ ಯಾವ ಕಥಿನಸ್ಸ ಉಬ್ಭಾರಾಯಾ’’ತಿ ವಚನೇ. ಯನ್ತಿ ಚೀವರಂ. ಪನ ಸದ್ದೋ ವಿಸೇಸತ್ಥಜೋತಕೋ. ಇದನ್ತಿ ಪದಾಲಙ್ಕಾರಮತ್ತಂ. ಇಧಾತಿ ಇಮಸ್ಮಿಂ ವಿಹಾರೇ. ಅಭಿಲಾಪಮತ್ತನ್ತಿಪಿ ವದನ್ತಿ. ಅನತ್ಥತಕಥಿನಸ್ಸಾಪೀತಿ ಪಿಸದ್ದೋ ಪಗೇವ ಅತ್ಥತಕಥಿನಸ್ಸಾತಿ ದಸ್ಸೇತಿ. ಪಞ್ಚಮಾಸೇತಿ ಅಚ್ಚನ್ತಸಂಯೋಗತ್ಥೇ ಉಪಯೋಗವಚನಂ. ತತೋತಿ ಪಞ್ಚಮಾಸತೋ. ಅತೀತವಸ್ಸೇ ವಸ್ಸಂವುತ್ಥಸಙ್ಘಸ್ಸ ಇದಂ ವಸ್ಸಾವಾಸಿಕಂ ದೇತಿ ಕಿಂ? ಉದಾಹು ಅನಾಗತವಸ್ಸೇತಿ ಯೋಜನಾ. ಪಿಟ್ಠಿಸಮಯೇತಿ ಗಿಮ್ಹಾನಂ ಪಠಮದಿವಸತೋ ಪಟ್ಠಾಯ ಯಾವ ಅಸ್ಸಯುಜಪುಣ್ಣಮೀ, ತಾವ ಪಿಟ್ಠಿಸಮಯೇ.

ವಸ್ಸಾನತೋತಿ ವಸ್ಸಾನಮಾಸತೋ. ಏತ್ಥಾತಿ ಏತೇಸು ಚೀವರೇಸು. ಕೇಚಿ ಭಿಕ್ಖೂತಿ ಸಮ್ಬನ್ಧೋ. ತಮತ್ಥನ್ತಿ ತಸ್ಸ ಸಙ್ಘಿಕಚೀವರಸ್ಸ ಕಾರಣಂ. ತತ್ಥೇವಾತಿ ಗತಟ್ಠಾನೇ ಏವ. ಏಸಾತಿ ಸಙ್ಘಿಕಚೀವರಹಾರಕೋ ಭಿಕ್ಖು. ತತ್ರಾತಿ ವಿಹಾರಾದೀಸು. ನನ್ತಿ ಚೀವರಹಾರಕಂ ಭಿಕ್ಖುಂ.

ವತ್ತಂ ವಿತ್ಥಾರೇತ್ವಾ ದಸ್ಸೇನ್ತೋ ಆಹ ‘‘ತೇನ ಹೀ’’ತಿಆದಿ. ತೇನ ಭಿಕ್ಖುನಾ ಭಾಜೇತಬ್ಬಾನೀತಿ ಸಮ್ಬನ್ಧೋ. ತಸ್ಸೇವಾತಿ ಅಧಿಟ್ಠಹನ್ತಸ್ಸೇವ.

ಏಕೇಕಂ ಭಾಗನ್ತಿ ಸಮ್ಬನ್ಧೋ. ಏತ್ಥ ಠಾನೇ ಅಹಮೇವ ಅಸ್ಮೀತಿ ಯೋಜನಾ. ದುಗ್ಗಹಿತಾನಿ ಹೋನ್ತೀತಿ ಸಙ್ಘಿಕಾನೇವ ಹೋನ್ತೀತಿ ಅಧಿಪ್ಪಾಯೋ. ಮಯ್ಹಮೇವಿಮಾನಿ ಚೀವರಾನೀತಿ ಇಸ್ಸರವಸೇನ ಗಹಣೇ ದುಗ್ಗಹಿತಾನಿ. ಮಯ್ಹೇತಾನಿ ಪಾಪುಣನ್ತೀತಿ ಅನಿಸ್ಸರವಸೇನ ಗಹಣೇ ಸುಗ್ಗಹಿತಾನೀತಿ ವಿಸೇಸೋ.

ಪಾತಿತೇ ಕುಸೇತಿ ಏತ್ಥ ತಪಚ್ಚಯಸ್ಸ ಪಚ್ಚುಪ್ಪನ್ನಕಾಲಿಕಭಾವಂ ದಸ್ಸೇನ್ತೋ ಆಹ ‘‘ಏಕಕೋಟ್ಠಾಸೇ’’ತಿಆದಿ. ಗಹಿತಮೇವಾತಿ ಏಕಕೋಟ್ಠಾಸೇ ಪಾತಿತಸ್ಸ ಕುಸದಣ್ಡಸ್ಸ ವಸೇನ ‘‘ಇಮಸ್ಸಿದ’’ನ್ತಿ ಏಕಕೋಟ್ಠಾಸೇ ವಿದಿತೇ ಸಬ್ಬೇಸಂ ವಿದಿತತ್ತಾ ಗಹಿತಮೇವಾತಿ ಅಧಿಪ್ಪಾಯೋ.

ಇತೋವಾತಿ ಸಚೀವರಭತ್ತತೋವ. ವಿಸುಂ ಸಜ್ಜಿಯಮಾನೇತಿ ಚೀವರೇ ಚ ಭತ್ತೇ ಚ ವಿಸುಂ ಸಜ್ಜಿಯಮಾನೇ.

ಯಥಾ ಪುರಿಮೇಸು ದ್ವೀಸು ವತ್ಥೂಸು ‘‘ಅದಂಸೂ’’ತಿ ವುತ್ತಂ, ತಥಾ ಅವತ್ವಾ ಕಸ್ಮಾ ಇಧ ‘‘ದೇನ್ತೀ’’ತಿ ವುತ್ತನ್ತಿ ಆಹ ‘‘ಸಣಿಕಂ ಸಣಿಕಂ ದೇನ್ತಿಯೇವಾ’’ತಿ. ಸಣಿಕಂ ಸಣಿಕಂ ದೇನ್ತೇ ದಾನಕಿರಿಯಾಯ ಅನುಪಚ್ಛಿನ್ನತ್ತಾ ‘‘ದೇನ್ತೀ’’ತಿ ಪಚ್ಚುಪ್ಪನ್ನವಸೇನ ವುತ್ತನ್ತಿ ಅಧಿಪ್ಪಾಯೋ. ಪಚ್ಛಿನ್ನದಾನತ್ತಾತಿ ಪಚ್ಛಿನ್ನದಾನಕಿರಿಯಭಾವತೋ. ಇದಂ ಪನ ವತ್ಥು ಉಪ್ಪನ್ನನ್ತಿ ಸಮ್ಬನ್ಧೋ. ಇಮೇ ಚ ಥೇರಾತಿ ನಿಲವಾಸಿಆದಯೋ ವಿನಯಧರಪಾಮೋಕ್ಖಾ ಇಮೇ ಚ ಥೇರಾ.

೨೨೩. ಉಪನನ್ದಸಕ್ಯಪುತ್ತವತ್ಥುಕಥಾ

೩೬೪. ಏತ್ಥಾತಿ ಉಪನನ್ದವತ್ಥುಮ್ಹಿ. ತಸ್ಸಾತಿ ಉಪನನ್ದಸ್ಸ. ಗಾಮಕಾವಾಸಿನೋತಿ ಗಾಮಕೇ ಆವಾಸಿನೋ. ಅಯನ್ತಿ ಉಪನನ್ದೋ. ಮುಖರೋತಿ ಮುಖಂ ಖರಂ ಏತಸ್ಸಾತಿ ಮುಖರೋ ಖಕಾರಲೋಪೋ, ಅಥ ವಾ ಮುಖಂ ಏತಸ್ಸತ್ಥೀತಿ ಮುಖರೋ ಮನ್ತುತ್ಥೇ ಪವತ್ತೋ ರಪಚ್ಚಯೋ ನಿನ್ದತ್ಥವಾಚಕೋ. ಲಹುಕಾಪತ್ತೀತಿ ದುಕ್ಕಟಾಪತ್ತಿ. ತಸ್ಸೇವಾತಿ ಗಹಿತಭಿಕ್ಖುಸ್ಸೇವ. ಧುರನಿಕ್ಖೇಪೇ ಸತೀತಿ ಯೋಜನಾ.

ಏಕಸ್ಸ ಪುಗ್ಗಲಸ್ಸತ್ಥಾಯ ಅಧಿಪ್ಪಿಯತೇ ಇಚ್ಛಿಯತೇತಿ ಏಕಾಧಿಪ್ಪಾಯೋ, ಏಕಪುಗ್ಗಲಪಟಿವೀಸೋ, ತೇನಾಹ ‘‘ಏಕಪುಗ್ಗಲಪಟಿವೀಸಮೇವಾ’’ತಿ. ಯಥಾ ಯಥಾತಿ ಯೇನ ಯೇನಾಕಾರೇನ. ಯೋತಿ ಪಟಿವೀಸೋ. ‘‘ತಥಾ ತಥಾ’’ತಿ ಅಜ್ಝಾಹರಿತಬ್ಬೋ. ತತ್ಥಾತಿ ‘‘ಇಧ ಪನಾ’’ತಿಆದಿವಚನೇ. ಏಕೇಕಸ್ಮಿಂ ಆವಾಸೇತಿ ಸಮ್ಬನ್ಧೋ. ವಾಸದ್ದೋ ಅಞ್ಞೇಪಿ ದ್ವೀಹದ್ವೀಹಾದಿವಾರೇ ಸಙ್ಗಣ್ಹಾತಿ. ಯನ್ತಿ ಪಟಿವೀಸಂ. ಏಕೋ ಪುಗ್ಗಲೋತಿ ಏಕೋ ನಿಚ್ಚಾವಾಸೋ ಪುಗ್ಗಲೋ. ಏವನ್ತಿ ಉಪಡ್ಢೇ ದಿಯ್ಯಮಾನೇ. ಯತ್ಥ ವಾ ಪನಾತಿ ಏತ್ಥ ಯಸದ್ದಸ್ಸ ವಿಸಯಂ ದಸ್ಸೇತುಂ ವುತ್ತಂ ‘‘ಏವಂ ಪುರಿಮಸ್ಮಿ’’ನ್ತಿ. ಪುರಿಮಸ್ಮಿಂ ಆವಾಸೇತಿ ಸಮ್ಬನ್ಧೋ. ತತೋತಿ ಏತ್ಥ ತಸದ್ದಸ್ಸ ವಿಸಯಂ ದಸ್ಸೇನ್ತೋ ಆಹ ‘‘ಬಹುತರಂ ವಸಿತವಿಹಾರತೋ’’ತಿ. ಇದಞ್ಚಾತಿ ‘‘ಅಮುತ್ರ ಉಪಡ್ಢೋ ಚೀವರಪಟಿವೀಸೋ ದಾತಬ್ಬೋ’’ತಿ ವಚನಞ್ಚ. ಏಕಸೀಮವಿಹಾರೇಹೀತಿ ಏಕಿಸ್ಸಂ ಉಪಚಾರಸೀಮಾಯಂ ಠಿತೇಹಿ ವಿಹಾರೇಹಿ. ನಾನಾಸೀಮವಿಹಾರೇತಿ ನಾನಾಉಪಚಾರಸೀಮಾಯಂ ಠಿತೇ ವಿಹಾರೇ. ಸೇನಾಸನಗ್ಗಾಹೋತಿ ಪುರಿಮಉಪಚಾರಸೀಮಾಯಂ ಸೇನಾಸನಗ್ಗಾಹೋ. ತತ್ಥಾತಿ ಪಸ್ಸಮ್ಭನವಿಹಾರೇ. ಸೇಸನ್ತಿ ಚೀವರತೋ ಸೇಸಂ. ಸಬ್ಬತ್ಥಾತಿ ಸಬ್ಬೇಸು ವಿಹಾರೇಸು. ಅನ್ತೋಸೀಮಗತಸ್ಸಾತಿ ಅನ್ತೋಉಪಚಾರಸೀಮಾಯಂ ಗತಸ್ಸ, ಭಿಕ್ಖುನೋತಿ ಸಮ್ಬನ್ಧೋ. ಚೀವರಂ ಸೇನಾಸನಗ್ಗಾಹಸ್ಸೇವ ಪಾಪುಣಾತಿ, ಸೇಸಂ ಪನ ಆಮಿಸಭೇಸಜ್ಜಾದಿಸಬ್ಬಂ ಅಞ್ಞವಿಹಾರತೋ ಆಗನ್ತ್ವಾ ಅನ್ತೋಸೀಮಗತಸ್ಸ ಪಾಪುಣಾತೀತಿ ಅಧಿಪ್ಪಾಯೋ.

೨೨೪. ಗಿಲಾನವತ್ಥುಕಥಾ

೩೬೫. ಮಞ್ಚಕೇ ನಿಪಾತೇಸುನ್ತಿ ಏತ್ಥ ಮಞ್ಚಕೇ ನಿಪಾತನಂ ನಾಮ ಮಞ್ಚಕೇ ನಿಪಜ್ಜಾಪನನ್ತಿ ಆಹ ‘‘ಮಞ್ಚಕೇ ನಿಪಜ್ಜಾಪೇಸು’’ನ್ತಿ. ಮುತ್ತಕರೀಸಕಿಲಿಟ್ಠನ್ತಿ ಮುತ್ತಕರೀಸೇಹಿ ಕಿಲಿಟ್ಠಂ. ಯೋತಿ ಯೋ ಕೋಚಿ. ಮನ್ತಿ ಮಮ. ತಮತ್ಥಂ ದಸ್ಸೇನ್ತೋ ಆಹ ‘‘ಓವಾದಾನುಸಾಸನೀಕರಣೇನಾ’’ತಿ. ಮಮ ಓವಾದಸ್ಸ ಚ ಅನುಸಾಸನಿಯಾ ಚ ಕರಣೇನಾತಿ ಅತ್ಥೋ. ಏತ್ಥಾತಿ ‘‘ಯೋ ಭಿಕ್ಖವೇ ಮಂ ಉಪಟ್ಠಹೇಯ್ಯಾ’’ತಿಆದಿಪಾಠೇ. ಸುತ್ತಸ್ಸ ನೇಯ್ಯತ್ಥತ್ತಾ ಅಗಹೇತಬ್ಬತ್ಥಂ ದಸ್ಸೇನ್ತೋ ಆಹ ‘‘ಭಗವತೋ ಚಾ’’ತಿಆದಿ. ಯಸ್ಸಾತಿ ಗಿಲಾನಸ್ಸ. ಉಪಜ್ಝಾಯಾದಯೋತಿ ಏತ್ಥ ಆದಿಸದ್ದೇನ ಆಚರಿಯಸದ್ಧಿವಿಹಾರಿಕಅನ್ತೇವಾಸಿಕಸಮಾನುಪಜ್ಝಾಯಕಸಮಾನಾಚರಿಯಕಸಙ್ಖಾತೇ ಪಞ್ಚ ಜನೇ ಸಙ್ಗಣ್ಹಾತಿ. ಏಕಚಾರಿಕೋ ವಾ ಹೋತೀತಿ ಸಮ್ಬನ್ಧೋ. ಸಙ್ಘತ್ಥೇರೋಪೀತಿ ಪಿಸದ್ದೋ ಪಗೇವ ಅಞ್ಞೇಸನ್ತಿ ದಸ್ಸೇತಿ.

೩೬೬. ಅಭಿಕ್ಕಮನ್ತಂ ವಾತಿ ಏತ್ಥ ಅಭಿಮುಖಂ ಕಮತೀತಿ ಅಭಿಕ್ಕಮನ್ತೋತಿ ವುತ್ತೇ ವಡ್ಢನತ್ಥೋತಿ ಆಹ ‘‘ವಡ್ಢನ್ತಂ ವಾ’’ತಿ. ಆಬಾಧಂ ನಾವಿಕರೋತೀತಿ ಸಮ್ಬನ್ಧೋ. ಇಮಿನಾ ಅನ್ತಪಚ್ಚಯಸ್ಸ ಸರೂಪಂ ದಸ್ಸೇತಿ. ಇದಂ ನಾಮ ಭೋಜನನ್ತಿ ಸಮ್ಬನ್ಧೋ. ಸಂವಿಧಾತುನ್ತಿ ಏತ್ಥ ಸಂವಿಪುಬ್ಬೋ ಧಾಧಾತು ಕರಧಾತ್ವತ್ಥೋ, ಕರಧಾತು ಚ ಸಬ್ಬಧಾತ್ವತ್ಥೋ, ತಸ್ಮಾ ವುತ್ತಂ ‘‘ಭೇಸಜ್ಜಂ ಯೋಜೇತು’’ನ್ತಿ. ಅಸ್ಸಾತಿ ಗಿಲಾನುಪಟ್ಠಾಕಸ್ಸ. ಅನ್ತರಸದ್ದಸ್ಸ ಮಜ್ಝತ್ಥಾದಯೋ ಪಟಿಕ್ಖಿಪನ್ತೋ ಆಹ ‘‘ಕಾರಣಂ ವುಚ್ಚತೀ’’ತಿ.

೨೨೫. ಮತಸನ್ತಕಕಥಾ

೩೬೭. ಕಾಲಙ್ಕತೇತಿ ಏತ್ಥ ಕರಣಂ ಕತನ್ತಿ ದಸ್ಸೇನ್ತೋ ಆಹ ‘‘ಕಾಲಕಿರಿಯಾಯಾ’’ತಿ. ಅಪಲೋಕೇತ್ವಾತಿ ‘‘ಇತ್ಥನ್ನಾಮೋ ಭನ್ತೇ ಭಿಕ್ಖು ಕಾಲಙ್ಕತೋ, ತಸ್ಸ ತಿಚೀವರಞ್ಚ ಪತ್ತಞ್ಚ ಗಿಲಾನುಪಟ್ಠಾಕಾನಂ ದಾತುಂ ಸಙ್ಘಂ ಅಪಲೋಕೇಮೀ’’ತಿ ಅಪಲೋಕೇತ್ವಾ.

೩೬೯. ಗಿಲಾನುಪಟ್ಠಾಕಲಾಭೇತಿ ಗಿಲಾನುಪಟ್ಠಾಕಾನಂ ಲಭಿತಬ್ಬೇ.

ಸಬ್ಬೇಪಿ ಭಿಕ್ಖೂತಿ ಸಮ್ಬನ್ಧೋ. ತತ್ಥಾತಿ ತಸ್ಮಿಂ ಕಾಲಙ್ಕತೇ. ಕಿಂ ವದನ್ತಿ? ‘‘ಸಬ್ಬೇಪಿ…ಪೇ… ಸಾಮಿನೋ’’ತಿ ವದನ್ತೀತಿ ಯೋಜನಾ. ದ್ವೀಸು ವಾದೇಸು ಪಚ್ಛಿಮವಾದೋ ಅಟ್ಠಕಥಾಚರಿಯೇನ ರುಚ್ಚತೀತಿ ವದನ್ತಿ. ಯನ್ತಿ ಯಂ ವತ್ಥು. ‘‘ಯಂ ಅತ್ಥಿ, ತಂ ದಾತಬ್ಬ’’ನ್ತಿ ವುತ್ತಮೇವತ್ಥಂ ಆವಿಕರೋನ್ತೋ ಆಹ ‘‘ಅಞ್ಞಸ್ಮಿಂ…ಪೇ… ದಾತಬ್ಬ’’ನ್ತಿ. ತನ್ತಿ ಪರಿಕ್ಖಾರಂ.

ಸಮಕೋತಿ ಸಮಂ ಪಮಾಣಮೇತಸ್ಸ ಭಾಗಸ್ಸಾತಿ ಸಮಕೋ. ಸಂವಿದಹನಮತ್ತಮೇವಾತಿ ಇದಞ್ಚಿದಞ್ಚ ಕರೋಹೀತಿ ಸಜ್ಜನಮತ್ತಮೇವ. ಜೇಟ್ಠಕಭಾಗೋತಿ ದಿಗುಣಭಾಗೋ.

ಯೋ ಪನಾತಿ ಭಿಕ್ಖು ಪನ. ಏತ್ಥಾತಿ ಬಹೂಸು ಭಿಕ್ಖೂಸು. ಯೇನಾತಿ ಯೇನ ಕೇನಚಿ, ದಿನ್ನಂ ಪಟಿಯಾದಿತನ್ತಿ ಸಮ್ಬನ್ಧೋ. ಏಕದಿವಸಮ್ಪೀತಿ ಪಿಸದ್ದೋ ಪಗೇವ ದ್ವೀಹಾದಿಕೇತಿ ದಸ್ಸೇತಿ. ಸೋಪೀತಿ ಪಿಸದ್ದೋ ನ ಕೇವಲಂ ಬಹುದಿವಸಂ ಉಪಟ್ಠಾಕೋಯೇವ, ಅಥ ಖೋ ಸೋಪೀತಿ ದಸ್ಸೇತಿ. ಸಮೀಪನ್ತಿ ಗಿಲಾನಸ್ಸ ಸನ್ತಿಕಂ. ಆಗಚ್ಛತೀತಿ ಸಮೀಪಮಾಗಚ್ಛತಿ.

ಪಚ್ಚಾಸೀಸಾಯಾತಿ ಭಾಗಸ್ಸ ಪಚ್ಚಾಸೀಸಾಯ. ‘‘ಪುನ ಆಗನ್ತ್ವಾ ಜಗ್ಗಿಸ್ಸಾಮೀ’’ತಿ ಇಮಿನಾ ‘‘ಪುನ ಆಗನ್ತ್ವಾ ನ ಜಗ್ಗಿಸ್ಸಾಮೀ’’ತಿ ಗಚ್ಛನ್ತಸ್ಸ ನ ದಾತಬ್ಬನ್ತಿ ದಸ್ಸೇತಿ. ಧುರಂ ನಿಕ್ಖಿಪಿತ್ವಾತಿ ಉಪಟ್ಠಹನೇ ಧುರಂ ನಿಕ್ಖಿಪಿತ್ವಾ.

ಮಾತುಗಾಮೋಪಿ ಹೋತೂತಿ ಯೋಜನಾ. ತಸ್ಸ ಭಿಕ್ಖುನೋತಿ ಕಾಲಙ್ಕತಸ್ಸ ತಸ್ಸ ಭಿಕ್ಖುನೋ. ಸಚೇಪಿ ಸಹಸ್ಸಂ ಅಗ್ಘತಿ, ಗಿಲಾನುಪಟ್ಠಾಕಾನಂಯೇವ ದಾತಬ್ಬನ್ತಿ ಯೋಜನಾ. ಅಞ್ಞನ್ತಿ ಪತ್ತಚೀವರತೋ ಅಞ್ಞಂ. ತೇತಿ ಗಿಲಾನುಪಟ್ಠಾಕಾ. ಅವಸೇಸನ್ತಿ ಪತ್ತಚೀವರತೋ ಅವಸೇಸಂ. ತತೋತಿ ಬಹುಕಮಹಗ್ಘತೋ. ತಿಚೀವರಪರಿಕ್ಖಾರೋತಿ ತಿಣ್ಣಂ ಚೀವರಾನಂ ಪರಿವಾರೋ. ಸಬ್ಬಞ್ಚೇತನ್ತಿ ಸಬ್ಬಮೇವ ಏತಂ ಪರಿಕ್ಖಾರಂ. ಲಭತೀತಿ ಗಿಲಾನುಪಟ್ಠಾಕೋ ಲಭತಿ.

ಸೋತಿ ಕಾಲಙ್ಕತೋ. ಕಸ್ಸಚೀತಿ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ. ತಸ್ಸೇವಾತಿ ದಿನ್ನಗಾಹಕಸ್ಸೇವ. ರುಚಿಯಾ ಏವಾತಿ ಕಾಮಾ ಏವ. ತತ್ಥ ತತ್ಥ ಸಙ್ಘಸ್ಸೇವಾತಿ ತಸ್ಮಿಂ ತಸ್ಮಿಂ ವಿಹಾರೇ ಠಿತಸ್ಸ ಸಙ್ಘಸ್ಸೇವ. ಇದಂ ವಿಹಾರೇ ಠಪಿತಪರಿಕ್ಖಾರೇ ಸನ್ಧಾಯ ವುತ್ತಂ. ಸಚೇ ಗಾಮೇ ವಾ ಅರಞ್ಞೇ ವಾ ಠಪಿತಾ ಹೋನ್ತಿ, ಸಕಲೋವ ಸಙ್ಘೋ ಇಸ್ಸರೋ. ಕಸ್ಮಾ? ಸಙ್ಘಸ್ಸೇವ ದಾಯಜ್ಜಭಾವತೋ. ಬಹೂನಮ್ಪೀತಿ ತೀಹಿ ಪಟ್ಠಾಯ ಬಹೂನಮ್ಪಿ. ಈದಿಸವಚನಂ ಉಪನಿಧಾಯ ಸಾಸನೇಪಿ ಏಕೋ ದ್ವೇ ಬಹೂತಿ ತೀಣಿ ವಚನಾನಿ ಅತ್ಥೇ ದಿಸ್ಸನ್ತಿ, ಸದ್ದೇ ಪನ ದ್ವಿವಚನಬಹುವಚನಾನಂ ವಿಸೇಸಾಭಾವತೋ ದ್ವಿವಚನಂ ನತ್ಥೀತಿ ದಟ್ಠಬ್ಬಂ. ಅದಿನ್ನಮೇವಾತಿ ಅತ್ತನೋಯೇವ ಅಸನ್ತಕತ್ತಾ, ಅಞ್ಞೇಸಮ್ಪಿ ಸಾಧಾರಣತ್ತಾ ಚ ಅದಿನ್ನಮೇವ. ಸಚೇ ಸಬ್ಬೇ ಮತಾ ಅನುಮತಿಯಾ ದೇನ್ತಿ, ಸುದಿನ್ನಮೇವ. ತನ್ತಿ ಸನ್ತಕಂ. ತೇಸೂತಿ ತೇಸು ಸಬ್ಬೇಸು.

೨೨೭. ಕುಸಚೀರಾದಿಪಟಿಕ್ಖೇಪಕಥಾ

೩೭೧. ‘‘ಅಕ್ಕನಾಳಮಯ’’ನ್ತಿ ಇಮಿನಾ ಅಕ್ಕನಾಳೇನ ನಿಬ್ಬತ್ತಂ ಅಕ್ಕನಾಳನ್ತಿ ವಚನತ್ಥಂ ದಸ್ಸೇತಿ. ಮಕಚಿಮಯೋತಿ ಏತ್ಥ ಮಕಚಿಸದ್ದೇನ ಪೋತ್ಥಕಸದ್ದಸ್ಸ ಗನ್ಥಾದಯೋ ಅತ್ಥೇ ನಿವತ್ತೇತಿ. ಮಯಸದ್ದೇನ ಪುರಿಮನಯೇನೇವ ನಿಬ್ಬತ್ತತದ್ಧಿತಂ ದಸ್ಸೇತಿ. ಸೇಸಾನೀತಿ ಅಕ್ಕನಾಳಪೋತ್ಥಕೇಹಿ ಸೇಸಾನಿ ಕುಸಚೀರಾದೀನಿ. ತೇಸೂತಿ ಕುಸಚೀರಾದೀಸು.

೩೭೨. ತಿಪಟ್ಟಚೀವರಸ್ಸ ವಾತಿ ಇದಂ ದ್ವಿಪಟ್ಟಚೀವರಸ್ಸ ಮಜ್ಝೇ ದಾನಂ ಸನ್ಧಾಯ ವುತ್ತಂ. ತೇಸನ್ತಿ ಸಬ್ಬನೀಲಕಾದೀನಂ. ಕಞ್ಚುಕನ್ತಿ ವಾರಣಂ. ತಞ್ಹಿ ಕಚಿಯತಿ ಕಾಯೇ ಬನ್ಧಿಯತೀತಿ ಕಞ್ಚುಕೋತಿ ವುಚ್ಚತಿ. ವೇಠನೇಪೀತಿ ಉಣ್ಹೀಸೇಪಿ. ತಞ್ಹಿ ಯಸ್ಮಾ ಯೇನ ಸೀಸೇ ವೇಠಿಯತಿ, ತಸ್ಮಾ ವೇಠನನ್ತಿ ವುಚ್ಚತಿ. ರುಕ್ಖಛಲ್ಲಿಮಯನ್ತಿ ಏತ್ಥ ರುಕ್ಖಛಲ್ಲಿಸದ್ದೇನ ತಿರೀಟಸದ್ದಸ್ಸ ವಕ್ಕಲತ್ಥಂ ದಸ್ಸೇತಿ. ವಕ್ಕಲಞ್ಹಿ ನಿವಸನಾನಂ ಅಙ್ಗಪಚ್ಚಙ್ಗಂ ತಿರೋಭಾವಂ ಪಟಿಚ್ಛನ್ನಭಾವಂ ಏತಿ ಗಚ್ಛತಿ ಅನೇನಾತಿ ವಾ ರುಕ್ಖಂ ತಿರೋಪಟಿಚ್ಛನ್ನಂ ಹುತ್ವಾ ಏತಿ ಪವತ್ತತೀತಿ ವಾ ತಿರೀಟನ್ತಿ ವುಚ್ಚತಿ. ಅಭಿಧಾನೇ (ಅಭಿಧಾನಪ್ಪದೀಪಿಕಾಯಂ ೪೪೨ ಗಾಥಾಯಂ) ಪನ ತರೀಟನ್ತಿ ತಕಾರೇ ಇಕಾರವಿರಹಿತೋ ಪಾಠೋ ಅತ್ಥಿ. ಪಾದಪುಞ್ಜನನ್ತಿ ಪಾದೋ ಪುಜಿಯತಿ ಸೋಧಿಯತಿ ಅನೇನಾತಿ ಪಾದಪುಞ್ಜನಂ, ತಾಲುಜೋ ತತಿಯಕ್ಖರೋ.

೩೭೪. ಸನ್ತೇ ಪತಿರೂಪಕೇ ಗಾಹಕೇತಿ ಏತ್ಥ ಪತಿರೂಪಕೋ ನಾಮ ಪಕ್ಕಮನ್ತಸ್ಸ ಭಿಕ್ಖುನೋ ಸನ್ದಿಟ್ಠಸಮ್ಭತ್ತೋ. ಇಮಿನಾ ಪತಿರೂಪಕೇ ಗಾಹಕೇ ಅಸತಿ ಅದತ್ವಾ ಸಙ್ಘೇನ ಭಾಜಿತೇ ಸುಭಾಜಿತಮೇವಾತಿ ದಸ್ಸೇತಿ. ಸತ್ತ ಜನಾತಿ ಪಕ್ಕಮನ್ತಉಮ್ಮತ್ತಕಖಿತ್ತಚಿತ್ತವೇದನಟ್ಟಾ ಚತ್ತಾರೋ, ಉಕ್ಖಿತ್ತಕಾ ತಯೋತಿ ಸತ್ತ ಜನಾ.

೨೩೦. ಸಙ್ಘೇ ಭಿನ್ನೇ ಚೀವರುಪ್ಪಾದಕಥಾ

೩೭೬. ಸಙ್ಘೋ ಭಿಜ್ಜತೀತಿ ಏತ್ಥ ದ್ವಿಕೋಟ್ಠಾಸವಸೇನ ಭಿಜ್ಜನಮೇವಾಧಿಪ್ಪೇತಂ, ನ ಅಞ್ಞನ್ತಿ ಆಹ ‘‘ದ್ವೇ ಕೋಟ್ಠಾಸಾ’’ತಿ. ಏಕಸ್ಮಿಂ ಪಕ್ಖೇ ಚೀವರಾನಿ ದೇನ್ತೀತಿ ಯೋಜನಾ. ದ್ವಿಪಕ್ಖಂ ಸನ್ಧಾಯ ‘‘ಸಕಲಸ್ಸ ಸಙ್ಘಸ್ಸಾ’’ತಿ ವುತ್ತಂ. ಏತನ್ತಿ ಚೀವರಂ. ತಸ್ಸೇವ ಚೀವರನ್ತಿ ತಸ್ಸ ಕೋಟ್ಠಾಸಸ್ಸ ಚೀವರಮೇವ. ಯತ್ಥಾತಿ ಯಸ್ಮಿಂ ದೇಸೇ. ದಕ್ಖಿಣೋದಕಂ ಪಮಾಣನ್ತಿ ದಕ್ಖಿಣೋದಕಮೇವ ಪಮಾಣಂ, ನ ದೇಯ್ಯಧಮ್ಮೋ. ತಸ್ಮಾ ದಕ್ಖಿಣೋದಕಂ ಪಟಿಗ್ಗಣ್ಹನ್ತಾ, ದೇಯ್ಯಧಮ್ಮಸ್ಸ ಸಾಮಿನೋ ಹೋನ್ತೀತಿ ಅಧಿಪ್ಪಾಯೋ. ಉಭೋಹಿಪಿ ಪಕ್ಖೇಹೀತಿ ಯೋಜನಾ. ಪರಸಮುದ್ದೇತಿ ಜಮ್ಬುದೀಪೇ. ಸೋ ಹಿ ಸೀಹಳದೀಪತೋ ಸಮುದ್ದಸ್ಸ ಪಾರತ್ತಾ ಪರಸಮುದ್ದೋತಿ ವುಚ್ಚತಿ. ಇತರೋ ಪಕ್ಖೋತಿ ದಕ್ಖಿಣೋದಕಸ್ಸ ಚ ಚೀವರಸ್ಸ ಚ ಲದ್ಧಪಕ್ಖತೋ ಇತರೋ ಅಲದ್ಧೋ ಪಕ್ಖೋ.

೨೩೨. ಅಟ್ಠಚೀವರಮಾತಿಕಾಕಥಾ

೩೭೯. ಇದಾನಿ ಆಹಾತಿ ಸಮ್ಬನ್ಧೋ. ಪುಗ್ಗಲಾಧಿಟ್ಠಾನನಯೇನಾತಿ ‘‘ಸೀಮಾಯ ದೇತೀ’’ತಿ ಕತ್ತುವಾಚಕೇನ ಕಿರಿಯಾಪದೇನ ದಾಯಕಪುಗ್ಗಲಸಙ್ಖಾತಕತ್ತುನೋ ಅಧಿಟ್ಠಾನವಸೇನ ವುತ್ತತ್ತಾ ಪುಗ್ಗಲಾಧಿಟ್ಠಾನೇನ ನಯೇನ. ಏತ್ಥಾತಿ ಏತಾಸು ಅಟ್ಠಸು ಮಾತಿಕಾಸು. ಅಟ್ಠಮಾ ಮಾತಿಕಾತಿ ಯೋಜನಾ. ತತ್ಥಾತಿ ಅಟ್ಠಸು ಮಾತಿಕಾಸು. ಸಬ್ಬತ್ಥಾತಿ ಸಬ್ಬೇಸು ‘‘ಕತಿಕಾಯ ದೇತೀ’’ತಿಆದೀಸು.

ಸೀಮಾಯ…ಪೇ… ಭಾಜೇತಬ್ಬನ್ತಿಆದಿಮ್ಹಿ ಮಾತಿಕಾನಿದ್ದೇಸೇ ಪನ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ಸೀಮಾಯ ದೇತೀತಿ ಏತ್ಥ ಪನ್ನರಸ ಸೀಮಾ ವೇದಿತಬ್ಬಾತಿ ಸಮ್ಬನ್ಧೋ.

ತತ್ಥಾತಿ ಪನ್ನರಸಸು ಸೀಮಾಸು. ಉಪಚಾರಸೀಮಾ ಪರಿಚ್ಛಿನ್ನಾ ಹೋತೀತಿ ಸಮ್ಬನ್ಧೋ. ಏತ್ತಕಂ ಠಾನನ್ತಿ ಪರಿಕ್ಖೇಪಾರಹಟ್ಠಾನಸ್ಸ ಏಕನ್ತೇನ ಅವುತ್ತತ್ತಾ ಏಕನ್ತೇನ ಪರಿಕ್ಖೇಪಾರಹಟ್ಠಾನಂ ದಸ್ಸೇನ್ತೋ ಆಹ ‘‘ಅಪಿಚಾ’’ತಿಆದಿ. ಧುವಸನ್ನಿಪಾತತೋ ವಾ ಖಿಪಿತಾನನ್ತಿ ಸಮ್ಬನ್ಧೋ. ‘‘ಪರಿಯನ್ತೇ’’ತಿ ಪದಂ ಪುಬ್ಬಾಪರಾಪೇಕ್ಖಂ. ತಸ್ಮಾ ತೀಸು ನಿಸ್ಸಕ್ಕಪದೇಸು ಯೋಜೇತಬ್ಬಂ. ಸಾ ಪನಾತಿ ಉಪಚಾರಸೀಮಾ ಪನ. ಭಿಕ್ಖೂಸು ವಡ್ಢನ್ತೇಸು ಆವಾಸೋಪಿ ವಡ್ಢತೀತಿ ಮನಸಿಕತ್ವಾ ವುತ್ತಂ ‘‘ಭಿಕ್ಖೂಸು ವಡ್ಢನ್ತೇಸೂ’’ತಿ. ಸಬ್ಬೇಸಂ ಭಿಕ್ಖೂನನ್ತಿ ಸಮ್ಬನ್ಧೋ. ವುತ್ತಮೇವಾತಿ ಸೀಮಕಥಾಯಂ (ಮಹಾವ. ಅಟ್ಠ. ೧೩೮, ೧೪೪) ವುತ್ತಮೇವ.

ಅಪಿಚ ಖೋತಿ ಏತ್ಥ ಅಪಿಸದ್ದೋ ಪುಚ್ಛತ್ಥವಾಚಕೋ. ಕೇಹಿ ಠಪಿತಾತಿ ಹಿ ಅತ್ಥೋ. ರಾಜರಾಜಮಹಾಮತ್ತಾ ಠಪೇನ್ತೀತಿ ಸಮ್ಬನ್ಧೋ. ಲಾಭಸೀಮಾತಿ ಲಾಭಸ್ಸ ಮರಿಯಾದೋ. ಯನ್ತಿ ಯೋ ಲಾಭೋ. ಏತ್ಥನ್ತರೇತಿ ಏತಸ್ಮಿಂ ಗಾವುತಾದಿಅನ್ತರೇ. ಲಾಭಸೀಮಾ ನಾಮಾತಿ ಲಾಭೇನ ಪರಿಚ್ಛಿನ್ನಾ ಸೀಮಾ ನಾಮ. ತತ್ಥಾತಿ ಬಹೂಸು ಜನಪದೇಸು. ಅನ್ತರದೀಪಾ ಚಾತಿ ಮಹಾದೀಪತೋ ಅಞ್ಞದೀಪಾ ಚ, ಖುದ್ದಕದೀಪಾತಿ ಅಧಿಪ್ಪಾಯೋ.

ಏತ್ಥೇವ ಸೀಮಾಯಾತಿ ಖಣ್ಡಸೀಮಾಯ ಏವ. ತೇಸಂಯೇವಾತಿ ಖಣ್ಡಸೀಮಗತಾನಂಯೇವ. ಏವತ್ಥಫಲಂ ದಸ್ಸೇನ್ತೋ ಆಹ ‘‘ಅಞ್ಞೇಸ’’ನ್ತಿಆದಿ. ರುಕ್ಖೇ ವಾ ಪಬ್ಬತೇ ವಾ ಠಿತಸ್ಸ ವಾ ಹೇಟ್ಠಾ ಪಥವೀಮಜ್ಝಗತಸ್ಸ ವಾ ಭಿಕ್ಖುಸ್ಸಾತಿ ಯೋಜನಾ. ಇಮಿಸ್ಸಾ ಉಪಚಾರಸೀಮಾಯ ಠಿತಸ್ಸಾತಿ ಸಮ್ಬನ್ಧೋ. ಸಮಾನಸಂವಾಸಸೀಮಾಯಾತಿ ಮಹಾಸೀಮಾಯ. ಖಣ್ಡಸೀಮಸೀಮನ್ತರಿಕಾಸೂತಿ ಖಣ್ಡಸೀಮಾಯಞ್ಚ ದ್ವಿನ್ನಂ ಸೀಮಾನಂ ಸೀಮನ್ತರಿಕಾಯಞ್ಚ. ತತ್ಥ ದ್ವಿನ್ನಂ ಗಾಮಟ್ಠಾನಮ್ಪಿ ಪಾಪುಣಾತಿ. ಅವಿಪ್ಪವಾಸಸೀಮಾಯ ದಿನ್ನಂ ಗಾಮಟ್ಠಾನಂ ನ ಪಾಪುಣಾತಿ ‘‘ಠಪೇತ್ವಾ ಗಾಮಞ್ಚ ಗಾಮೂಪಚಾರಞ್ಚಾ’’ತಿ ವುತ್ತತ್ತಾ.

ಜಮ್ಬುಯಾ ಲಕ್ಖಿತೋ ದೀಪೋ ಜಮ್ಬುದೀಪೋ. ತಮ್ಬೋ ಲೋಹಿತೋ ಪಾಣಿ ಹತ್ಥೋ ಏತೇಸನ್ತಿ ತಮ್ಬಪಾಣಿನೋ. ವಿಜಯಕುಮಾರಾದಯೋ ಸತ್ತಸತಾ ಜನಾ. ತೇಸಂ ನಿವಾಸೋ ತಮ್ಬಪಣ್ಣಿ, ಸೋಯೇವ ದೀಪೋತಿ ತಮ್ಬಪಣ್ಣಿದೀಪೋ, ತಸ್ಮಿಂ. ಸಬ್ಬೇಸಂ ಭಾಗನ್ತಿ ಸಮ್ಬನ್ಧೋ. ತತ್ರೇವಾತಿ ಜಮ್ಬುದೀಪೇಯೇವ. ಏವನ್ತಿಆದಿ ನಿಗಮನಂ.

ಯೋ ಪನ ಭಣತೀತಿ ಸಮ್ಬನ್ಧೋ. ತತೋತಿ ಕಥನತೋ, ಪರನ್ತಿ ಸಮ್ಬನ್ಧೋ. ನನ್ತಿ ಮಹಾಸಿವತ್ಥೇರಂ. ತಿಯೋಜನಾಪೀತಿ ಪಿಸದ್ದೋ ತತೋ ಊನಾಪಿ ಹೋತೀತಿ ದಸ್ಸೇತಿ. ಸಬ್ಬಂಪೇತನ್ತಿ ಸಬ್ಬಂಪಿ ಏತಂ ಲಾಭಗಣ್ಹನಾದಿಂ. ಇತಿ ಆಹಂಸೂತಿ ಯೋಜನಾ.

ಕತಿಕಾನಂ ಯಥಿಚ್ಛಿತಕತೇನ ಪವತ್ತತ್ತಾ ಬಹು ಹೋತಿ, ತಸ್ಮಾ ಇಧ ಇಚ್ಛಿತಕತಿಕಂ ದಸ್ಸೇತುಂ ವುತ್ತಂ ‘‘ಸಮಾನಲಾಭಕತಿಕಾಯಾ’’ತಿ. ತತ್ರಾತಿ ‘‘ಕತಿಕಾಯ ದೇತೀ’’ತಿ ಪಾಠೇ. ಸನ್ನಿಪತಿತೇಹಿ ಭಿಕ್ಖೂಹಿ ಭಾಜೇತಬ್ಬನ್ತಿ ಸಮ್ಬನ್ಧೋ. ತಸ್ಸಾತಿ ವಿಹಾರಸ್ಸ. ಬುದ್ಧಾಧಿವುತ್ಥೋತಿ ಬುದ್ಧೇನ ಅಧಿ ಇಸ್ಸರವಸೇನ ವಸಿಯಿತ್ಥಾತಿ ಬುದ್ಧಾಧಿವುತ್ಥೋ. ಏತ್ತಾವತಾತಿ ಏತ್ತಕೇನ ಸಾವನಮತ್ತೇನ. ನಿಸಿನ್ನೋವಾತಿ ನಿಸಿನ್ನೋ ಏವ ಹೋತಿ, ನಿಸಿನ್ನೋ ಇವ ವಾ. ತಸ್ಮಿಂ ವಿಹಾರೇಪೀತಿ ತಸ್ಮಿಂ ಪೋರಾಣಕಾದಿವಿಹಾರೇಪಿ. ಏವಮೇವಾತಿ ‘‘ಅಯಂ ಪೋರಾಣಕೋ ವಿಹಾರೋ ತೇನ ನವವಿಹಾರೇನ ಸದ್ಧಿಂ ಸಮಾನಲಾಭಂ ಕಾತುಂ ಸಙ್ಘಸ್ಸ ರುಚ್ಚತೀ’’ತಿಆದಿನಾ ಏವಮೇವ. ಇಧಾತಿ ಪೋರಾಣಕವಿಹಾರೇ. ತಸ್ಮಿನ್ತಿ ನವವಿಹಾರೇ. ಏವನ್ತಿ ಯಥಾ ಏಕೇನ ವಿಹಾರೇನ ಸದ್ಧಿಂ ಏಕೋ ವಿಹಾರೋ ಕಾತಬ್ಬೋ, ಏವಂ ತಥಾತಿ ಅತ್ಥೋ.

ಭಿಕ್ಖಾಪಞ್ಞತ್ತಿಯಾತಿ ಏತ್ಥ ಭಿಕ್ಖಾ ಪಞ್ಞಪಿಯತಿ ನಿಚ್ಚವಸೇನ ಠಪಿಯತಿ ಏತ್ಥಾತಿ ಭಿಕ್ಖಾಪಞ್ಞತ್ತೀತಿ ದಸ್ಸೇನ್ತೋ ಆಹ ‘‘ಅತ್ತನೋ ಪರಿಚ್ಚಾಗಪಞ್ಞಾಪನಟ್ಠಾನೇ’’ತಿ. ತಸ್ಸಾತಿ ‘‘ಯತ್ಥ ಸಙ್ಘಸ್ಸ ಧುವಕಾರಾ ಕರಿಯನ್ತೀ’’ತಿಪಾಠಸ್ಸ. ಅತ್ಥೋ ಏವಂ ವೇದಿತಬ್ಬೋತಿ ಯೋಜನಾ. ಯತ್ಥ ವಾತಿ ಯಸ್ಮಿಂ ವಾ ಠಾನೇ. ಅನೇನಾತಿ ಚೀವರದಾಯಕೇನ. ಸಲಾಕಭತ್ತಾದೀನಿ ವಾ ನಿಬದ್ಧಾನಿ ಕಾರಿತಾನೀತಿ ಸಮ್ಬನ್ಧೋ. ಯೇನ ಪನಾತಿ ಚೀವರದಾಯಕೇನ ಪನ. ಸಕಲೋಪಿ ವಿಹಾರೋತಿ ಸಕಲೋಪಿ ಸಆರಾಮೋ ವಿಹಾರೋ. ತತ್ಥಾತಿ ಚೀವರದಾಯಕೇ. ಇಮೇತಿ ಪಾಕವತ್ತಸ್ಸ ವತ್ತನಟ್ಠಾನಾದಯೋ ವಿಹಾರಾ. ಧುವೇನ ಕರಿಯನ್ತೀತಿ ಧುವಕಾರಾ ವಿಹಾರಾ. ಸೋತಿ ಚೀವರದಾಯಕೋ. ಯತ್ಥಾತಿ ಯಸ್ಮಿಂ ಠಾನೇ. ಸಬ್ಬತ್ಥಾತಿ ಸಬ್ಬೇಸು ಬಹೂಸು ವಿಹಾರೇಸು.

ತೇಹೀತಿ ಬಹುತರೇಹಿ ಭಿಕ್ಖೂಹಿ. ಧುವಕಾರೇಸೂತಿ ನಿದ್ಧಾರಣೇ ಭುಮ್ಮಂ. ಏಕತ್ಥಾತಿ ಏಕಸ್ಮಿಂ ಧುವಕಾರೇ. ‘‘ಸಚೇ ಭಿಕ್ಖುಗಣನಾಯ ಗಣ್ಹಥಾತಿ ವದತೀ’’ತಿ ಇಮಿನಾ ಸಚೇ ನ ವದತಿ, ಭಿಕ್ಖುಗಣನಾಯ ಭಾಜೇತ್ವಾ ಗಣ್ಹಿತುಂ ನ ವಟ್ಟತೀತಿ ದಸ್ಸೇತಿ, ವಿಹಾರಗಣನಾಯ ಗಣ್ಹಿತುಂ ವಟ್ಟತೀತಿ ಅಧಿಪ್ಪಾಯೋ. ತಥಾತಿ ಯಥಾ ‘‘ಭಿಕ್ಖುಗಣನಾಯ ಗಣ್ಹಥಾ’’ತಿ ವದತಿ, ತಥಾತಿ ಅತ್ಥೋ. ಏತ್ಥಾತಿ ಭಾಜೇತಬ್ಬವತ್ಥೂಸು. ತನ್ತಿ ಮಞ್ಚಪೀಠಕಂ, ಪುಚ್ಛಿತ್ವಾ ದಾತಬ್ಬನ್ತಿ ಸಮ್ಬನ್ಧೋ. ಪುಚ್ಛಿತ್ವಾತಿ ದಾಯಕಂ ಪುಚ್ಛಿತ್ವಾ, ವದತೀತಿ ದಾಯಕೋ ವದತಿ. ಸಙ್ಘಸ್ಸಾಪೀತಿ ಪಿಸದ್ದೋ ನ ದಾಯಕಸ್ಸೇವಾತಿ ದಸ್ಸೇತಿ.

ಉಪಚಾರಸೀಮಾಯಂ ಠಿತೇನ ಸಙ್ಘೇನ ಭಾಜೇತಬ್ಬನ್ತಿ ಸಮ್ಬನ್ಧೋ. ಸೀಮಟ್ಠಸ್ಸಾತಿ ಉಪಚಾರಸೀಮಾಯಂ ಠಿತಸ್ಸ. ಅಸಮ್ಪತ್ತಸ್ಸಾಪೀತಿ ಭಾಜನಟ್ಠಾನಂ ಅಸಮ್ಪತ್ತಸ್ಸಾಪಿ. ಅಲಸಜಾತಿಕಾತಿ ಕೋಸಜ್ಜಜಾತಿಕಾ. ಠಿತಿಕಾತಿ ಪಬನ್ಧವಸೇನ ಠಿಯತೇ ಠಿತಿ, ಸಾಯೇವ ಠಿತಿಕಾ. ಅಥ ವಾ ‘‘ಠಿತಟ್ಠಾನತೋ ಪಟ್ಠಾಯ ದಾತಬ್ಬ’’ನ್ತಿ ಅಟ್ಠಕಥಾಯಂ (ಮಹಾವ. ಅಟ್ಠ. ೩೭೯) ವುತ್ತತ್ತಾ ತಿಟ್ಠತಿ ಪಬನ್ಧವಸೇನ ಏತ್ಥಾತಿ ಠಿತಿ, ಸಾಯೇವ ಠಿತಿಕಾತಿ ವಚನತ್ಥೋ ಕಾತಬ್ಬೋ. ಠಿತಿಕಂ ಠಪೇತ್ವಾತಿ ವೀಸತಿವಸ್ಸಸಙ್ಖಾತಂ ಠಿತಿಕಂ ಠಪೇತ್ವಾ. ತೇಸನ್ತಿ ಥೇರಾನಂ.

ಸಮ್ಪತ್ತಸಮ್ಪತ್ತಾನನ್ತಿ ಭಾಜನಟ್ಠಾನಂ ಸಮ್ಪತ್ತಸಮ್ಪತ್ತಾನಂ. ಅತ್ತನೋ ವಿಹಾರದ್ವಾರೇ ವಾ ಅತ್ತನೋ ಅನ್ತೋವಿಹಾರೇಯೇವ ವಾತಿ ಯೋಜನಾ. ಸೀಮಾತಿ ಉಪಚಾರಸೀಮಾ. ಥೇರಾಸನಂ ಆರೂಳ್ಹೇ ಸತೀತಿ ಯೋಜನಾ. ವಸ್ಸಗ್ಗೇನಾತಿ ವಸ್ಸಗಣನಾಯ.

ಪಾಟೇಕ್ಕನ್ತಿ ಪಚ್ಚೇಕಂ. ಸಬ್ಬಾನೇವ ಚೀವರಾನೀತಿ ಸಮ್ಬನ್ಧೋ. ದುಬ್ಭಾಸಿತದುಗ್ಗಹಿತಾನಮತ್ಥಂ ದಸ್ಸೇನ್ತೋ ಆಹ ‘‘ಗತಗತಟ್ಠಾನೇ ಸಙ್ಘಿಕಾನೇವ ಹೋನ್ತೀ’’ತಿ. ಏಕನ್ತಿ ದಸಸು ವತ್ಥೇಸು ಏಕಂ.

ವತ್ಥಸ್ಸೇವ ಪುಪ್ಫಂ ವಾ ವಲಿ ವಾ ಅತ್ಥೀತಿ ಯೋಜನಾ. ತೇನಾತಿ ಪುಪ್ಫವಲಿನಾ. ಏಕಂ ತನ್ತನ್ತಿ ಏಕಂ ಸುತ್ತಂ. ತತ್ಥಾತಿ ತೇಸು ಠಿತಿಕಾಯ ಠಾನಾಟ್ಠಾನೇಸು. ದ್ವೀಹಿಪಿ ಗಹೇತಬ್ಬಂ ಠಿತಿಕಾಯ ಅಭಾವತೋ.

ಭಿಕ್ಖು ಅತ್ತನೋ ಸನ್ತಕಂ ಯಂ ಚೀವರನ್ತಿ ಯೋಜನಾ. ಪಂಸುಕೂಲಿಕಾನಮ್ಪಿ ವಟ್ಟತೀತಿ ‘‘ಸಙ್ಘಸ್ಸ ದೇಮಾ’’ತಿ ವಾ ‘‘ತುಯ್ಹಂ ದೇಮಾ’’ತಿ ವಾ ಅವತ್ವಾ ‘‘ಭಿಕ್ಖೂನಂ ದೇಮ, ಥೇರಾನಂ ದೇಮಾ’’ತಿ ವುತ್ತತ್ತಾ ಪಂಸುಕೂಲಿಕಾನಮ್ಪಿ ವಟ್ಟತಿ. ಭಿಕ್ಖುಥೇರಾ ನಾಮ ಹಿ ನ ಅತ್ತನಾಯೇವ ಹೋನ್ತಿ, ಅಞ್ಞೇಪಿ ಬಹೂ, ತಸ್ಮಾ ವಟ್ಟತಿ. ‘‘ಸಙ್ಘಸ್ಸಾ’’ತಿ ವುತ್ತೇ ಅತ್ತನಾ ಏಕನ್ತೇನ ಸಙ್ಘೋಯೇವ, ತಸ್ಮಾ ‘‘ಸಙ್ಘಸ್ಸಾ’’ತಿ ವುತ್ತೇಪಿ ನ ವಟ್ಟತಿ, ಪಗೇವ ‘‘ತುಯ್ಹ’’ನ್ತಿ ವುತ್ತೇ.

ತತೋತಿ ಬಹುವತ್ಥತೋ. ಗಹೇತುಂ ನ ವಟ್ಟತೀತಿ ಪಂಸುಕೂಲಿಕಾನಂ ಗಹೇತುಂ ನ ವಟ್ಟತಿ.

ಯನ್ತಿ ವತ್ಥಂ. ತತ್ಥಾತಿ ಪರಿಕ್ಖಾರೇಸು. ಸುತ್ತನ್ತಿ ತನ್ತಂ.

ಏವಂ ಅನ್ತೋಸೀಮಂ ಪವಿಸಿತ್ವಾ ‘‘ಸಙ್ಘಸ್ಸ ದೇಮಾ’’ತಿ ದಿನ್ನೇ ವಿನಿಚ್ಛಯಂ ದಸ್ಸೇತ್ವಾ ಬಹಿಸೀಮಾಯ ದಿನ್ನೇ ತಂ ದಸ್ಸೇನ್ತೋ ಆಹ ‘‘ಸಚೇ ಪನಾ’’ತಿಆದಿ. ಏಕಬದ್ಧಾ ಚಾತಿ ದ್ವಾದಸಹತ್ಥಮನತಿಕ್ಕಮಿತ್ವಾ ಏಕತೋಬದ್ಧಾ ಚ. ಯೇ ಪನಾತಿ ಭಿಕ್ಖೂ ಪನ.

ಉಭತೋಸಙ್ಘಸ್ಸ ದೇತೀತಿ ಏತ್ಥ ಚತುನ್ನಂ ವಾಕ್ಯಾನಂ ವಸೇನ ವುತ್ತೇಪಿ ಉಭತೋಸಙ್ಘಸ್ಸ ದೇತಿಯೇವ ನಾಮಾತಿ ದಸ್ಸೇನ್ತೋ ಆಹ ‘‘ಉಭತೋಸಙ್ಘಸ್ಸ ದಮ್ಮೀತಿ ವುತ್ತೇಪೀ’’ತಿಆದಿ. ಉಭತೋಸಙ್ಘಗ್ಗಹಣೇನ ಗಹಿತತ್ತಾತಿ ಪುಗ್ಗಲಸ್ಸ ಉಭತೋಸಙ್ಘಗ್ಗಹಣೇನ ಗಹಿತತ್ತಾ. ‘‘ಏಸೇವ ನಯೋ’’ತಿ ಇಮಿನಾ ಏಕವೀಸತಿಪಟಿವೀಸೇ ಕತ್ವಾ ಏಕೋ ಚೇತಿಯಸ್ಸ ದಾತಬ್ಬೋತಿ ನಯಂ ಅತಿದಿಸತಿ. ಪಾಪುಣನಕೋಟ್ಠಾಸೋ ನಾಮ ನತ್ಥಿ ಚೇತಿಯಸ್ಸ ಉಭತೋಸಙ್ಘಗ್ಗಹಣೇನ ಅಗಹಿತತ್ತಾ.

ತತ್ಥಾತಿ ಉಭತೋಸಙ್ಘಪುಗ್ಗಲಚೇತಿಯೇಸು. ಸೇಸಂ ಸುವಿಞ್ಞೇಯ್ಯಮೇವ.

ಪುಬ್ಬೇತಿ ಬುದ್ಧಸ್ಸ ಭಗವತೋ ಧರಮಾನಕಾಲೇ. ತದಾತಿ ಯದಾ ಬುದ್ಧೋ ಭಗವಾ ಧರತಿ, ತದಾ. ಪಟಿಮಂ ವಾತಿ ಪಟಿಬಿಮ್ಬಂ ವಾ. ತಞ್ಹಿ ಭಗವತಾ ಪಟಿ ಸದಿಸಂ ಮಾನೀಯತೀತಿ ಪಟಿಮಾತಿ ವುಚ್ಚತಿ. ಚೇತಿಯಂ ವಾತಿ ಥೂಪಂ ವಾ. ಸೋ ಹಿ ದೇವಮನುಸ್ಸೇಹಿ ಚಿತಿತಬ್ಬಂ, ಪೂಜೇತಬ್ಬಂ, ಇಟ್ಠಕಾದೀಹಿ ವಾ ಚಿನಿತಬ್ಬನ್ತಿ ಚೇತಿಯನ್ತಿ ವುಚ್ಚತಿ. ತತ್ಥಾತಿ ದೇಯ್ಯಧಮ್ಮೇಸು. ಯನ್ತಿ ಕಿರಿಯಾಪರಾಮಸನಂ. ಯಂ ದೇನ್ತೀತಿ ಯೋಜನಾ. ತತ್ಥಾತಿ ತಸ್ಮಿಂ ದಾನೇ. ಅನಿಯಮವಾಚಕಸ್ಸ ‘‘ಯೋ’’ತಿ ಸಬ್ಬನಾಮಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಪಬ್ಬಜಿತೋ ವಾ ಗಹಟ್ಠೋ ವಾ’’ತಿ. ವತ್ತಂ ಕತ್ವಾ ಪರಿಭುಞ್ಜಿತುನ್ತಿ ಪುಬ್ಬಕಾಲಅಪರಕಾಲಕಿರಿಯಾನಂ ವಿಕಾರವಸೇನ ಅನಿಯತತ್ತಾ ವುತ್ತಂ ‘‘ಭುಞ್ಜಿತ್ವಾ ಪಚ್ಛಾಪಿ ವತ್ತಂ ಕಾತು’’ನ್ತಿ.

‘‘ದೂರಮ್ಪಿ ಹರಿತ್ವಾ ಪೂಜೇತಬ್ಬ’’ನ್ತಿ ಇಮಿನಾ ಜಙ್ಘಪೇಸನಿಕಕಮ್ಮಂ ನ ಹೋತೀತಿ ದಸ್ಸೇತಿ. ಹರನ್ತಸ್ಸ ಭಿಕ್ಖುನೋತಿ ಸಮ್ಬನ್ಧೋ. ಗಚ್ಛತೋತಿ ಅನಾದರೇ ಸಾಮಿವಚನಂ. ತನ್ತಿ ಸಙ್ಘಸ್ಸ ಆಹಟಭತ್ತಂ.

ವಸ್ಸಂವುತ್ಥಸಙ್ಘಸ್ಸಾತಿ ವಸ್ಸಂ ವಸಿತ್ಥಾತಿ ವಸ್ಸಂವುತ್ಥೋ. ಅಲುತ್ತಕಿತನ್ತಸಮಾಸೋಯಂ, ಸೋಯೇವ ಸಙ್ಘೋ ವಸ್ಸಂವುತ್ಥಸಙ್ಘೋ, ತಸ್ಸ. ಯಾವತಿಕಸದ್ದೋ ಯತ್ತಕಪರಿಯಾಯೋತಿ ಆಹ ‘‘ಯತ್ತಕಾ’’ತಿ. ದಿಸಾಪಕ್ಕನ್ತಸ್ಸಾಪೀತಿ ಅಞ್ಞಂ ದಿಸಂ ಪಕ್ಕನ್ತಸ್ಸಪಿ, ದಾತಬ್ಬನ್ತಿ ಸಮ್ಬನ್ಧೋ. ವದನ್ತೀತಿ ಅಟ್ಠಕಥಾಚರಿಯೇಹಿ ಅಪರೇ ಆಚರಿಯಾ ವದನ್ತಿ. ಏತನ್ತಿ ವಚನಂ.

ಸಮ್ಪತ್ತಾನನ್ತಿ ದಿನ್ನಟ್ಠಾನಂ ಸಮ್ಪತ್ತಾನಂ. ಸಬ್ಬೇಸನ್ತಿ ಯತ್ಥ ಕತ್ಥಚಿ ವುತ್ಥವಸ್ಸಾನಂ ಸಬ್ಬೇಸಂ. ತತ್ರಾತಿ ವಿಹಾರೇ. ತತ್ರಾತಿ ತಸ್ಮಿಂ ವದನೇ ಸತಿ, ತೇಸು ಭಿಕ್ಖೂಸು ವಾ. ವಸ್ಸಂ ವಸನ್ತೀತಿ ವಸ್ಸಂವಸನ್ತಾ, ತೇಸಂ. ಚೀವರಮಾಸೇತಿ ಚೀವರೇನ ಲಕ್ಖಿತೇ ಪಚ್ಛಿಮಕತ್ತಿಕಮಾಸೇ.

ಹೇಮನ್ತಸ್ಸ ಪಚ್ಛಿಮೋ ದಿವಸೋತಿ ಫಗ್ಗುಣಪುಣ್ಣಮೀಸಙ್ಖಾತೋ ಹೇಮನ್ತಸ್ಸ ಪಚ್ಛಿಮೋ ದಿವಸೋ. ವಸ್ಸಾವಾಸಿಕನ್ತಿ ವಸ್ಸಂ ಆವಸನ್ತಾನಂ ದಾತಬ್ಬಂ ಚೀವರಂ. ಆರೋಪೇತಬ್ಬಾಕಾರಂ ದಸ್ಸೇನ್ತೋ ಆಹ ‘‘ಅತೀತವಸ್ಸಾವಾಸಸ್ಸಾ’’ತಿಆದಿ. ತತ್ಥ ಅತೀತವಸ್ಸಾವಾಸಸ್ಸಾತಿ ಅತೀತವಸ್ಸಂ, ಅತೀತವಸ್ಸೇ ವಾ ಆವಾಸಸ್ಸ ಸಙ್ಘಸ್ಸ. ತನ್ತಿ ಚೀವರಂ.

ಠಪೇತ್ವಾತಿ ವಿಹಾರೇ ಠಪೇತ್ವಾ. ಸಮ್ಪತ್ತಾನನ್ತಿ ಇಮಂ ಠಾನಂ ಸಮ್ಪತ್ತಾನಂ. ಇತೋತಿ ಚೀವರದಾನಕಾಲತೋ. ತೇತಿ ಅನ್ತೋವಸ್ಸೇ ವುತ್ಥಭಿಕ್ಖೂ.

ಆದಿಸ್ಸಾತಿ ಪದಸ್ಸ ತ್ವಾಪಚ್ಚಯನ್ತಭಾವಂ ದಸ್ಸೇನ್ತೋ ಆಹ ‘‘ಆದಿಸಿತ್ವಾ’’ತಿ. ಅಯಮತ್ಥೋ ವೇದಿತಬ್ಬೋತಿ ಯೋಜನಾ. ತತ್ರಾತಿ ‘‘ಯಾಗುಯಾ ವಾ’’ತಿಆದಿಪಾಠೇ. ಅಜ್ಜತನಾಯ ವಾತಿ ಅಜ್ಜ ಭವಾನಂ ಪುಞ್ಞಾನಂ ಅತ್ಥಾಯ ವಾ. ತೇಸನ್ತಿ ನಿಮನ್ತಕಾನಂ, ಪವಿಟ್ಠಾನಂ ಭಿಕ್ಖೂನನ್ತಿ ಸಮ್ಬನ್ಧೋ. ಯೇಹಿ ನಿಮನ್ತಿತೇಹೀತಿ ನಿಮನ್ತಿತೇಹಿ ಯೇಹಿ ಭಿಕ್ಖೂಹಿ. ಯೇಸಂ ವಾ ಪತ್ತನ್ತಿ ಸಮ್ಬನ್ಧೋ. ತೇಸಂ ನ ಪಾಪುಣಾತೀತಿ ಸಬ್ಬೇಸಂ ತೇಸಂ ನ ಪಾಪುಣಾತಿ, ಕಸ್ಮಾ? ಅನಿಮನ್ತಿತತ್ತಾ. ತೇಸಂ ನ ಪಾಪುಣನ್ತಿ, ಕಸ್ಮಾ? ನಿಮನ್ತಿತಗೇಹಂ ಅಪವಿಟ್ಠತ್ತಾ. ಸೋತಿ ದಾಯಕೋ.

ಪುಬ್ಬೇಪೀತಿ ಇತೋ ಪುಬ್ಬೇಪಿ. ಅಸ್ಸಾತಿ ದಾಯಕಸ್ಸ. ವಾಸೇತ್ವಾತಿ ವಾಸಾಪೇತ್ವಾ. ಸೋತಿ ದಾಯಕೋ. ಯೋತಿ ಭಿಕ್ಖು, ವಸತೀತಿ ಸಮ್ಬನ್ಧೋ. ತಾನೀತಿ ಭೇಸಜ್ಜಾನಿ. ಇದನ್ತಿ ಚೀವರಂ.

‘‘ಅನ್ತೇವಾಸಿಕಾನಞ್ಚಾ’’ತಿ ಪದೇನ ಸದ್ಧಿವಿಹಾರಿಕಾಪಿ ಗಹೇತಬ್ಬಾ ಉದ್ದೇಸಾದಿವಸೇನ ಅನ್ತೇ ವಸನಸೀಲತ್ತಾ. ಉದ್ದೇಸಂ ಗಹೇತುಂ ಆಗತೋ ಚ ಗಹೇತ್ವಾ ಗಚ್ಛನ್ತೋ ಚಾತಿ ಇಮೇ ಅನ್ತೇ ಅವಸನಸೀಲಾಪಿ ರೂಳ್ಹೀವಸೇನ ಅನ್ತೇವಾಸಿಕಾ ನಾಮ. ಇಮಿನಾ ನಿಸ್ಸಯಂ ಗಹೇತುಂ ಆಗತೋ ಚ ಥೇರಸ್ಸ ಸನ್ತಿಕೇ ನಿಸ್ಸಯಂ ಗಹಿತಪುಬ್ಬೋ ಚ ಅನ್ತೇವಾಸಿಕೋ ನಾಮಾತಿ ದಸ್ಸೇತಿ. ವತ್ತಂ ಕತ್ವಾ ಉದ್ದೇಸಪರಿಪುಚ್ಛಾದೀನಿ ಗಹೇತ್ವಾ ವಿಚರನ್ತಾನಂ ಸಬ್ಬೇಸಂ ಉದ್ದೇಸನ್ತೇವಾಸಿಕಾನಂ ಪಾಪುಣಾತೀತಿ ಯೋಜನಾ. ಇಮಿನಾ ಸದ್ಧಿವಿಹಾರಿಕನಿಸ್ಸಯನ್ತೇವಾಸಿಕಉಪಸಮ್ಪದನ್ತೇವಾಸಿಕಪಬ್ಬಜ್ಜನ್ತೇವಾಸಿಕಾಪಿ ಗಹೇತಬ್ಬಾ ತೇಸಮ್ಪಿ ನಿಬದ್ಧಚಾರಿಕಭಿಕ್ಖುಭಾವತೋ. ಸಬ್ಬತ್ಥಾತಿ ಸಬ್ಬಸ್ಮಿಂ ಚೀವರಕ್ಖನ್ಧಕೇ.

ಇತಿ ಚೀವರಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ.