೨೧೦. ವರಯಾಚನಕಥಾ

೩೩೭. ಕತಂ ಭತ್ತಕಿಚ್ಚಂ ಯೇನಾತಿ ಕತಭತ್ತಕಿಚ್ಚೋ, ತಸ್ಮಿಂ ಸತೀತಿ ಸಮ್ಬನ್ಧೋ. ವುತ್ತನಯೇನೇವಾತಿ ರಾಹುಲವತ್ಥುಮ್ಹಿ (ಮಹಾವ. ಅಟ್ಠ. ೧೦೫) ವುತ್ತನಯೇನೇವ. ಇದಂ ವತ್ಥನ್ತಿ ಇದಂ ಸಿವೇಯ್ಯಕಂ ವತ್ಥಂ, ಉಪ್ಪನ್ನನ್ತಿ ಸಮ್ಬನ್ಧೋ. ‘‘ತಾವಾ’’ತಿ ಅಜ್ಝಾಹರಿತಬ್ಬೋ. ಏತ್ಥನ್ತರೇತಿ ಏತಸ್ಮಿಂ ವತ್ಥುಪ್ಪನ್ನಕಾಲಮಜ್ಝೇ. ಕೋಚಿ ಭಿಕ್ಖೂತಿ ಸಮ್ಬನ್ಧೋ. ತೇನಾತಿ ಪಂಸುಕೂಲಿಕಹೇತುನಾ. ಅಯನ್ತಿ ಜೀವಕೋ. ಗಹಪತಿಚೀವರನ್ತಿ ಏತ್ಥ ಗಹಪತೀನಂ ಚೀವರನ್ತಿ ಅತ್ಥಂ ಪಟಿಕ್ಖಿಪನ್ತೋ ಆಹ ‘‘ಗಹಪತೀಹಿ ದಿನ್ನಂ ಚೀವರ’’ನ್ತಿ. ವತ್ಥದಾನಾನಿಸಂಸಪಟಿಸಂಯುತ್ತಾಯಾತಿ ‘‘ವತ್ಥದೋ ಹೋತಿ ವಣ್ಣದೋ’’ತಿಆದಿಕಾಯ (ಸಂ. ನಿ. ೧.೪೨) ವತ್ಥದಾನಸ್ಸ ಆನಿಸಂಸೇನ ಪಟಿಸಂಯುತ್ತಾಯ. ವಿಚ್ಛಾವಸೇನ ವುತ್ತೋ ‘‘ಇತರೀತರೇನಾ’’ತಿ ಸಬ್ಬನಾಮಸದ್ದೋ ಅನಿಯಮತ್ಥೋತಿ ಆಹ ‘‘ಅಪ್ಪಗ್ಘೇನಪಿ ಮಹಗ್ಘೇನಪಿ ಯೇನ ಕೇನಚೀ’’ತಿ. ಪಾವಾರೋತಿ ಉತ್ತರಾಸಙ್ಗೋ. ಸೋ ಹಿ ಪಾರುಪನತ್ಥಾಯ ವರಿಯತಿ ಇಚ್ಛಿಯತೀತಿ ಪಾವಾರೋತಿ ವುಚ್ಚತಿ. ‘‘ಕಪ್ಪಾಸಾದಿಭೇದೋ’’ತಿ ಇಮಿನಾ ತಸ್ಸ ಸರೂಪಂ ದಸ್ಸೇತಿ. ಪಕತಿಕೋಜವಮೇವಾತಿ ಪಕತಿಯಾ ಭಿಕ್ಖೂನಂ ಸಾರುಪ್ಪಂ ಕೋಜವಮೇವ. ಸೋಳಸನಾಟಕಿತ್ಥೀನಂ ಠತ್ವಾ ನಚ್ಚಯೋಗ್ಯತ್ತಾ ಮಹತೀ ಪಿಟ್ಠಿ ಏತಸ್ಸಾತಿ ಮಹಾಪಿಟ್ಠಿಯಂ, ತಮೇವ ಕೋಜವಂ ಮಹಾಪಿಟ್ಠಿಯಕೋಜವಂ. ತಸ್ಸ ಕಿರ ಲೋಮಾನಿ ಚತುರಙ್ಗುಲಾಧಿಕಾನಿ ಹೋನ್ತಿ.