೧೮೮. ಆದಾಯಸತ್ತಕಕಥಾ

೩೧೧. ನ ಪಚ್ಚೇಸ್ಸನ್ತಿ ಏತ್ಥ ಪತೀತ್ಯೂಪಸಗ್ಗಸ್ಸ ಪುನತ್ಥಂ, ಇಧಾತುಯಾ ಚ ಗತ್ಯತ್ಥಂ ದಸ್ಸೇನ್ತೋ ಆಹ ‘‘ನ ಪುನ ಆಗಮಿಸ್ಸ’’ನ್ತಿ. ಏವಂ ಪಕ್ಕಮತೋ ಛಿಜ್ಜತೀತಿ ಸಮ್ಬನ್ಧೋ.

ಏತಞ್ಚಾತಿ ಪಕ್ಕಮನನ್ತಿಕಂ, ಕಥಿನುದ್ಧಾರಞ್ಚ. ತಾಹನ್ತಿ ತೇ ಅಹಂ. ತೇತಿ ತುಯ್ಹಂ.

ಅಞ್ಞನ್ತಿ ಅತ್ತನೋ ವಿಹಾರತೋ ಅಞ್ಞಂ. ಏವಂ ಹೋತೀತಿ ಏಸೋ ಪರಿವಿತಕ್ಕೋ ಹೋತಿ. ಸೋತಿ ಆವಾಸಪಲಿಬೋಧೋ. ಆದಿಚ್ಚಬನ್ಧುನಾ ವುತ್ತೋತಿ ಯೋಜನಾ.

ದ್ವೇ ಪಲಿಬೋಧಾ ಏಕತೋ ಛಿಜ್ಜನ್ತೀತಿ ಸಮ್ಬನ್ಧೋ. ಅಪುಬ್ಬಂ ಅಚರಿಮನ್ತಿ ಏಕಪಹಾರೇನೇವ. ಸೋ ಪಲಿಬೋಧೂಪಚ್ಛೇದೋ ಕಸ್ಮಾ ವಿತ್ಥಾರತೋ ನ ವುತ್ತೋತಿ ಆಹ ‘‘ಸೋ ಪನಾ’’ತಿಆದಿ. ಸೋ ಪನಾತಿ ಪಲಿಬೋಧೂಪಚ್ಛೇದೋ ಪನ. ನ ವುತ್ತೋತಿ ಸಮ್ಬನ್ಧೋ. ಏತ್ಥಾತಿ ಇಮಸ್ಮಿಂ ಕಥಿನುಬ್ಭಾರೇ. ಕಸ್ಮಾ ಅಯಂ ಕಥಿನುದ್ಧಾರೋ ‘‘ನಾಸನನ್ತಿಕೋ’’ತಿ ವುತ್ತೋತಿ ಆಹ ‘‘ಯಸ್ಮಾ’’ತಿಆದಿ. ತಸ್ಸಾತಿ ಭಿಕ್ಖುನೋ.

ಆಸಾವಚ್ಛೇದಿಕೇ ಛಿಜ್ಜತೀತಿ ಸಮ್ಬನ್ಧೋ. ಅಯಂ ಪನಾತಿ ಆಸಾವಚ್ಛೇದಿಕೋ ಕಥಿನುದ್ಧಾರೋ ಪನ. ಅನೇಕಪಭೇದೋ ಹೋತೀತಿ ಸಮ್ಬನ್ಧೋ. ತಸ್ಸಾತಿ ಭಿಕ್ಖುಸ್ಸ. ವುತ್ತೋತಿ ಅಯಂ ಆಸಾವಚ್ಛೇದಿಕೋ ಕಥಿನುದ್ಧಾರೋ ವುತ್ತೋತಿ ಯೋಜನಾ. ಏತ್ಥ ಪನಾತಿ ಇಮಸ್ಮಿಂ ಪನ ಠಾನೇ. ತತ್ಥಾತಿ ಸೀಮಾತಿಕ್ಕನ್ತಿಕೇ.

೩೧೨-೩೨೫. ಏವನ್ತಿಆದಿ ನಿಗಮನಂ. ಸತ್ತಕೇತಿ ಅಟ್ಠಸು ಮಾತಿಕಾಸು ಆಸಾವಚ್ಛೇದತೋ ಸೇಸೇ ಸತ್ತಪಮಾಣೇ, ಸತ್ತಸಮೂಹೇ ವಾ. ತೇಯೇವಾತಿ ಸತ್ತಕೇ ಏವ. ತತೋತಿ ವಾರತೋ. ಯೇ ಯೇತಿ ಕಥಿನುದ್ಧಾರಾ. ಇತರೇಹೀತಿ ಆಸಾವಚ್ಛೇದತೋ ಅಞ್ಞೇಹಿ. ಯೇ ಪಲಿಬೋಧಾ ವುತ್ತಾತಿ ಸಮ್ಬನ್ಧೋ. ಆವಾಸೋ ಚಜೀಯತಿ ಅನೇನಾತಿ ಚತ್ತನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಯೇನ ಚಿತ್ತೇನಾ’’ತಿಆದಿ. ತನ್ತಿ ಚಿತ್ತಂ. ‘‘ಏಸೇವ ನಯೋ’’ತಿ ಇಮಿನಾ ಆವಾಸೋ ವಮೀಯತಿ ಅನೇನಾತಿ ವನ್ತಂ. ಆವಾಸತೋ ಮುಚ್ಚತಿ ಅನೇನಾತಿ ಮುತ್ತನ್ತಿ ವಚನತ್ಥಂ ಅತಿದಿಸತಿ. ಸಬ್ಬತ್ಥಾತಿ ಸಬ್ಬಸ್ಮಿಂ ಕಥಿನಕ್ಖನ್ಧಕೇ.

ಇತಿ ಕಥಿನಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ.