೧೧೬. ವಸ್ಸಂ ಅನುಪಗನ್ತಬ್ಬಟ್ಠಾನಕಥಾ

೨೦೪. ರುಕ್ಖಸುಸೀರೇಯೇವಾತಿ ರುಕ್ಖಸ್ಸ ವಿವರೇ ಏವ. ವಿವರಞ್ಹಿ ಸು ಸಂ ಇರತಿ ಗಚ್ಛತೀತಿ ಸುಸೀರೋತಿ ವುಚ್ಚತಿ. ಪದರಚ್ಛದನನ್ತಿ ಫಲಕೇಹಿ ಛಾದಿತಂ. ಪವಿಸನದ್ವಾರನ್ತಿ ಪವಿಸನನಿಕ್ಖಮನದ್ವಾರಂ. ಪವಿಸನಞ್ಚ ನಿಕ್ಖಮನಞ್ಚ ಪವಿಸನನ್ತಿ ವಿರೂಪೇಕಸೇಸೇನ ಕಾತಬ್ಬಂ. ಖಾಣುಮತ್ಥಕೇತಿ ಖಾಣುನೋ ಉಪರಿ. ವಿಟಭೀತಿ ವಿಟಂ ಅಞ್ಞಮಞ್ಞವೇಧನಂ ಅಪತಿ ಗಚ್ಛತೀತಿ ವಿಟಪೋ, ಪಕಾರಸ್ಸ ಭಕಾರಂ, ಇತ್ಥಿಲಿಙ್ಗಜೋತಕಈಪಚ್ಚಯಞ್ಚ ಕತ್ವಾ ವಿಟಭೀತಿ ವುಚ್ಚತಿ. ತತ್ಥಾತಿ ಅಟ್ಟಕೇ. ಯಸ್ಸಾತಿ ಭಿಕ್ಖುನೋ, ನತ್ಥೀತಿ ಸಮ್ಬನ್ಧೋ. ಪಞ್ಚನ್ನಂ ಛದನಾನನ್ತಿ ತಿಣಪಣ್ಣಇಟ್ಠಕಾಸಿಲಾಸುಧಾಸಙ್ಖಾತಾನಂ (ಚೂಳವ. ೩೦೩) ಪಞ್ಚನ್ನಂ ಛದನಾನಂ. ಇದಞ್ಚ ಯೇಭುಯ್ಯವಸೇನ ವುತ್ತಂ ಪದರಚ್ಛದನಾದೀನಮ್ಪಿ ಗಹಿತತ್ತಾ. ದ್ವಾರಬನ್ಧನನ್ತಿ ದ್ವಾರೇನ ಬನ್ಧಿತಬ್ಬಂ. ಛವಕುಟಿಕಾತಿ ಛವಾನಂ ಸಯನಟ್ಠಾನೇ ಸುಸಾನೇ ಕತಾ ಕುಟಿಕಾ ಛವಕುಟಿಕಾತಿ ವುಚ್ಚತಿ. ಟಙ್ಕಿತಮಞ್ಚಾದೀತಿಆದಿಸದ್ದೇನ ಟಙ್ಕಿತಪೀಠಂ ಸಙ್ಗಣ್ಹಾತಿ. ತತ್ಥಾತಿ ಛವಕುಟಿಯಂ. ಅಞ್ಞಂ ಕುಟಿಕನ್ತಿ ಛವಕುಟಿತೋ ಅಞ್ಞಂ ಕುಟಿಕಂ. ಆವರಣನ್ತಿ ಭಿತ್ತಿಂ. ದ್ವಾರನ್ತಿ ಪವಿಸನನಿಕ್ಖಮನದ್ವಾರಂ. ಛತ್ತಕುಟಿಕಾ ನಾಮೇಸಾತಿ ಏಸಾ ಛತ್ತೇನ ಕತಾ ಕುಟಿಕಾ ನಾಮ. ಮಹನ್ತೇನ ಕಪಲ್ಲೇನ ಕುಟಿಕಂ ಕತ್ವಾತಿ ಸಮ್ಬನ್ಧೋ.