೧೦೯. ಸತ್ತಾಹಕರಣೀಯಾನುಜಾನನಕಥಾ

೧೮೭. ಸತ್ತಾಹಕರಣೀಯೇಸು ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ. ‘‘ಸತ್ತಾಹಕರಣೀಯೇನಾ’’ತಿ ಪದಸ್ಸ ಸತ್ತಮೀಸಮಾಸಞ್ಚ ಅನೀಯಸದ್ದಸ್ಸ ಕಮ್ಮತ್ಥಞ್ಚ ದಸ್ಸೇನ್ತೋ ಆಹ ‘‘ಸತ್ತಾಹಬ್ಭನ್ತರೇ ಯಂ ಕತ್ತಬ್ಬ’’ನ್ತಿ. ತತ್ಥ ‘‘ಸತ್ತಾಹಬ್ಭನ್ತರೇ’’ತಿ ಇಮಿನಾ ಸತ್ತಮೀಸಮಾಸಂ ದಸ್ಸೇತಿ, ‘‘ಕತ್ತಬ್ಬ’’ನ್ತಿ ಇಮಿನಾ ಕಮ್ಮತ್ಥಂ. ‘‘ಸತ್ತಾಹಬ್ಭನ್ತರೇ’’ತಿ ಇಮಿನಾ ಸತ್ತಾಹಸ್ಸ ಅಬ್ಭನ್ತರಂ ಸತ್ತಾಹನ್ತಿ ಉತ್ತರಪದಲೋಪಂ ದಸ್ಸೇತಿ. ಪಹಿತೇ ಗನ್ತುನ್ತಿ ಏತ್ಥ ಪಹಿತೇಸದ್ದಸ್ಸ ಕತ್ತುಕಮ್ಮಾನಿ ದಸ್ಸೇತುಂ ವುತ್ತಂ ‘‘ಭಿಕ್ಖುಆದೀಹಿ ದೂತೇ’’ತಿ. ತತ್ಥ ‘‘ಭಿಕ್ಖುಆದೀಹೀ’’ತಿ ಇಮಿನಾ ಕತ್ತಾರಂ ದಸ್ಸೇತಿ, ‘‘ದೂತೇ’’ತಿ ಇಮಿನಾ ಕಮ್ಮಂ. ಸತ್ತಾಹನ್ತಿ ಏತ್ಥ ಉತ್ತರಪದಲೋಪಞ್ಚ ಭುಮ್ಮತ್ಥೇ ಉಪಯೋಗವಚನಞ್ಚ ದಸ್ಸೇನ್ತೋ ಆಹ ‘‘ಅನ್ತೋಸತ್ತಾಹೇಯೇವಾ’’ತಿ. ತತ್ಥೇವಾತಿ ತಸ್ಮಿಂ ಪಹಿತಟ್ಠಾನೇಯೇವ. ‘‘ನ ಉಟ್ಠಾಪೇತಬ್ಬೋ’’ತಿ ಇಮಿನಾ ‘‘ಸತ್ತಾಹೇಯೇವಾ’’ತಿ ಏತ್ಥ ಏವಸದ್ದಸ್ಸ ಫಲಂ ದಸ್ಸೇತಿ.

೧೮೯. ರಸೋ ಏತಸ್ಮಿಂ ಅತ್ಥೀತಿ ರಸವತೀತಿ ವುತ್ತೇ ಭತ್ತಗೇಹಂ ಗಹೇತಬ್ಬನ್ತಿ ಆಹ ‘‘ಭತ್ತಗೇಹಂ ವುಚ್ಚತೀ’’ತಿ. ಭತ್ತಗೇಹನ್ತಿ ಭತ್ತಪಚನಗೇಹಂ. ಪುರಾಯಂ ಸುತ್ತನ್ತೋತಿ ಏತ್ಥ ಪುರಾ ಅಯನ್ತಿ ಪದಚ್ಛೇದಂ ಕತ್ವಾ ಪುರಾಸದ್ದೋ ಯಾವಪರಿಯಾಯೋತಿ ಆಹ ‘‘ಯಾವ ಅಯಂ ಸುತ್ತನ್ತೋ’’ತಿ. ನ ಪಲುಜ್ಜತೀತಿ ಏತ್ಥ ಲುಜಧಾತು ವಿನಾಸತ್ಥೋತಿ ಆಹ ‘‘ನ ವಿನಸ್ಸತೀ’’ತಿ. ಪರಿಸಙ್ಖತನ್ತಿ ಪರಿಸಙ್ಖರಿತಬ್ಬಂ. ಸಬ್ಬತ್ಥಾತಿ ಸಬ್ಬೇಸು ಪಹಿತೇಸು. ಇಮಿನಾವ ಕಪ್ಪಿಯವಚನೇನಾತಿ ಇಮಿನಾ ಏವ ಕಪ್ಪಿಯೇನ ತಿವಾಕ್ಯಸಙ್ಖಾತೇನ ವಚನೇನ. ಏತೇಸನ್ತಿ ಏತೇಸಂ ತಿಣ್ಣಂ ವಾಕ್ಯಾನಂ. ವೇವಚನೇನಾತಿ ‘‘ಯಞ್ಞಞ್ಚ ಯಜಿತುಂ, ಸುತ್ತಞ್ಚ ಉಗ್ಗಣ್ಹಿತುಂ, ಸಮಣೇ ಚ ದಸ್ಸಿತು’’ನ್ತಿ ಪರಿಯಾಯೇನ. ಸತ್ತಸೂತಿ ಉಪಾಸಕ ಉಪಾಸಿಕ ಭಿಕ್ಖುಭಿಕ್ಖುನೀ ಸಿಕ್ಖಮಾನ ಸಾಮಣೇರ ಸಾಮಣೇರೀ ಸಙ್ಖಾತಾಸು ಸತ್ತಸು.