೭. ಪಬ್ಬಜ್ಜಾಕಥಾ

೩೧. ಪೋರಾಣಾನುಪೋರಾಣಾನನ್ತಿ ಪುರಾಣೇ ಚ ಅನುಪುರಾಣೇ ಚ ಭವಾನಂ. ಏಕಸಟ್ಠೀತಿ ಏಕೋ ಚ ಸಟ್ಠಿ ಚ, ಏಕೇನ ವಾ ಅಧಿಕಾ ಸಟ್ಠಿ ಏಕಸಟ್ಠಿ.

ತತ್ರಾತಿ ತೇಸು ಏಕಸಟ್ಠಿಮನುಸ್ಸಅರಹನ್ತೇಸು. ಪುಬ್ಬಯೋಗೋತಿ ಪುಬ್ಬೇ ಕತೋ ಉಪಾಯೋ, ಪುಬ್ಬೂಪನಿಸ್ಸಯೋತಿ ಅತ್ಥೋ. ವಗ್ಗಬನ್ಧೇನಾತಿ ಸಮೂಹಂ ಕತ್ವಾ ಬನ್ಧೇನ. ತೇತಿ ಪಞ್ಚಪಞ್ಞಾಸ ಜನಾ. ಝಾಪೇಸ್ಸಾಮಾತಿ ಡಯ್ಹಿಸ್ಸಾಮ. ನೀಹರಿಂಸೂತಿ ಗಾಮತೋ ನೀಹರಿಂಸು. ತೇಸೂತಿ ಪಞ್ಚಪಞ್ಞಾಸಜನೇಸು. ಪಞ್ಚ ಜನೇ ಠಪೇತ್ವಾತಿ ಸಮ್ಬನ್ಧೋ. ಸೇಸಾತಿ ಪಞ್ಚಹಿ ಜನೇಹಿ ಅವಸೇಸಾ. ಸೋತಿ ಯಸೋ ದಾರಕೋ. ತೇಪೀತಿ ಚತ್ತಾರೋಪಿ ಜನಾ. ತತ್ಥಾತಿ ಸರೀರೇ. ತೇ ಸಬ್ಬೇಪೀತಿ ಯಸಸ್ಸ ಮಾತಾಪಿತುಭರಿಯಾಹಿ ಸದ್ಧಿಂ ಸಬ್ಬೇಪಿ ತೇ ಸಹಾಯಕಾ. ತೇನಾತಿ ಪುಬ್ಬಯೋಗೇನ.

ಆಮನ್ತೇಸೀತಿ ಕಥೇಸಿ.

೩೨. ದಿಬ್ಬೇಸು ವಿಸಯೇಸು ಭವಾ ದಿಬ್ಬಾ ಲೋಭಪಾಸಾತಿ ದಸ್ಸೇನ್ತೋ ಆಹ ‘‘ದಿಬ್ಬಾ ನಾಮಾ’’ತಿಆದಿ. ಲೋಭಪಾಸಾತಿ ಲೋಭಸಙ್ಖಾತಾ ಬನ್ಧನಾ. ಅಸವನತಾತಿ ಏತ್ಥ ಕರಣತ್ಥೇ ಪಚ್ಚತ್ತವಚನನ್ತಿ ಆಹ ‘‘ಅಸವನತಾಯಾ’’ತಿ. ಪರಿಹಾಯನ್ತೀತಿ ಏತ್ಥ ಕೇನ ಪರಿಹಾಯನ್ತೀತಿ ಆಹ ‘‘ವಿಸೇಸಾಧಿಗಮತೋ’’ತಿ. ವಿಸೇಸಾಧಿಗಮತೋತಿ ಮಗ್ಗಫಲಸಙ್ಖಾತಸ್ಸ ವಿಸೇಸಸ್ಸ ಅಧಿಗಮತೋ.

೩೩. ಅನ್ತಂ ಲಾಮಕಂ ಕರೋತೀತಿ ಅನ್ತಕೋತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಲಾಮಕಾ’’ತಿ. ‘‘ಹೀನಸತ್ತಾ’’ತಿ ಇಮಿನಾ ಅನ್ತಕಸ್ಸ ಸರೂಪಂ ದಸ್ಸೇತಿ. ಆಮನ್ತನಪದಮೇತಂ. ತನ್ತಿ ರಾಗಪಾಸಂ. ಹೀತಿ ಸಚ್ಚಂ. ಸೋತಿ ಮಾರೋ ಪಾಪಿಮಾ. ಅನ್ತಲಿಕ್ಖೇ ಚರನ್ತಾನಂ ಪಞ್ಚಾಭಿಞ್ಞಾನಮ್ಪಿ ಬನ್ಧನತ್ತಾ ಅನ್ತಲಿಕ್ಖೇ ಚರತಿ ಪವತ್ತತೀತಿ ಅನ್ತಲಿಕ್ಖಚರೋತಿ ವಚನತ್ಥೇನ ರಾಗಪಾಸೋ ‘‘ಅನ್ತಲಿಕ್ಖಚರೋ’’ತಿ ಮಾರೇನ ಪಾಪಿಮತಾ ವುತ್ತೋ.

೩೪. ನಾನಾಜನಪದತೋತಿ ಏಕಿಸ್ಸಾಪಿ ದಿಸಾಯ ನಾನಾಜನಪದತೋ. ‘‘ಅನುಜಾನಾಮಿ…ಪೇ… ಪಬ್ಬಾಜೇಥಾ’’ತಿಆದಿಮ್ಹಿ ವಿನಿಚ್ಛಯೋ ಏವಂ ವೇದಿತಬ್ಬೋತಿ ಯೋಜನಾ. ಪಬ್ಬಾಜೇನ್ತೇನ ಭಿಕ್ಖುನಾ ಪಬ್ಬಾಜೇತಬ್ಬೋತಿ ಸಮ್ಬನ್ಧೋ. ಯೇ ಪಟಿಕ್ಖಿತ್ತಾ ಪುಗ್ಗಲಾತಿ ಯೋಜನಾ. ಪರತೋತಿ ಪರಸ್ಮಿಂ. ‘‘ನ ಭಿಕ್ಖವೇ…ಪೇ… ಪಬ್ಬಾಜೇತಬ್ಬೋ’’ತಿ ಪಾಳಿಂ (ಮಹಾವ. ೮೯) ಆದಿಂ ಕತ್ವಾತಿ ಯೋಜನಾ. ತೇತಿ ಪಟಿಕ್ಖಿತ್ತಪುಗ್ಗಲೇ. ಸೋಪಿ ಚಾತಿ ಸೋಪಿ ಚ ಪುಗ್ಗಲೋ. ಅನುಞ್ಞಾತೋಯೇವ ಪಬ್ಬಾಜೇತಬ್ಬೋತಿ ಸಮ್ಬನ್ಧೋ. ತಸ್ಸ ಚಾತಿ ಪುಗ್ಗಲಸ್ಸ ಚ, ಅಥ ವಾ ತೇಸಞ್ಚ ಮಾತಾಪಿತೂನಂ. ವಚನವಿಪಲ್ಲಾಸೋ ಹೇಸ. ಅನುಜಾನನಲಕ್ಖಣಂ ವಣ್ಣಯಿಸ್ಸಾಮಾತಿ ಸಮ್ಬನ್ಧೋ.

ಏವನ್ತಿ ಇಮಿನಾ ವುತ್ತನಯೇನ. ಚಸದ್ದೋ ವಾಕ್ಯಸಮ್ಪಿಣ್ಡನತ್ಥೋ. ಸಚೇ ಅಚ್ಛಿನ್ನಕೇಸೋ ಹೋತಿ ಚ, ಸಚೇ ಏಕಸೀಮಾಯ ಅಞ್ಞೇಪಿ ಭಿಕ್ಖೂ ಅತ್ಥಿ ಚಾತಿ ಅತ್ಥೋ. ಅಞ್ಞೇಪೀತಿ ಅತ್ತನಾ ಅಪರೇಪಿ. ಭಣ್ಡೂತಿ ಮುಣ್ಡೋ, ಸೋಯೇವ ಕಮ್ಮಂ ಭಣ್ಡುಕಮ್ಮಂ. ತಸ್ಸಾತಿ ಭಣ್ಡುಕಮ್ಮಸ್ಸ. ಓಕಾಸೋತಿ ಪಬ್ಬಜ್ಜಾಯ ಖಣೋ. ‘‘ಓಕಾಸಂ ನ ಲಭತೀ’’ತಿ ವತ್ವಾ ತಸ್ಸ ಕಾರಣಂ ದಸ್ಸೇತುಂ ವುತ್ತಂ ‘‘ಸಚೇ’’ತಿಆದಿ.

ಅವುತ್ತೋಪೀತಿ ಏತ್ಥ ಪಿಸದ್ದೋ ವುತ್ತೋ ಪನ ಕಾ ನಾಮ ಕಥಾತಿ ದಸ್ಸೇತಿ. ಉಪಜ್ಝಾಯಂ ಉದ್ದಿಸ್ಸ ಪಬ್ಬಾಜೇತೀತಿ ಏತ್ಥ ಪಬ್ಬಜ್ಜಾ ಚತುಬ್ಬಿಧಾ ತಾಪಸಪಬ್ಬಜ್ಜಾ ಪರಿಬ್ಬಾಜಕಪಬ್ಬಜ್ಜಾ ಸಾಮಣೇರಪಬ್ಬಜ್ಜಾ ಉಪಸಮ್ಪದಪಬ್ಬಜ್ಜಾತಿ. ತತ್ಥ ಕೇಸಮಸ್ಸುಹರಣಂ ತಾಪಸಪಬ್ಬಜ್ಜಾ ನಾಮ ವಕ್ಕಲಾದಿಗಹಣತೋ ಪಠಮಮೇವ ವಜಿತಬ್ಬತ್ತಾ. ಇಸಿಪಬ್ಬಜ್ಜಾತಿಪಿ ತಸ್ಸಾಯೇವ ನಾಮಂ. ಕೇಸಮಸ್ಸುಹರಣಮೇವ ಪರಿಬ್ಬಾಜಕಪಬ್ಬಜ್ಜಾ ನಾಮ ಕಾಸಾಯಾದಿಗಹಣತೋ ಪಠಮಮೇವ ವಜಿತಬ್ಬತ್ತಾ. ಕೇಸಮಸ್ಸುಹರಣಞ್ಚ ಕಾಸಾಯಚ್ಛಾದನಞ್ಚ ಸಾಮಣೇರಪಬ್ಬಜ್ಜಾ ನಾಮ ಸರಣಗಹಣತೋ ಪಠಮಮೇವ ವಜಿತಬ್ಬತ್ತಾ. ಉಪಸಮ್ಪದಪಬ್ಬಜ್ಜಾ ತಿವಿಧಾ ಏಹಿಭಿಕ್ಖುಉಪಸಮ್ಪದಪಬ್ಬಜ್ಜಾ ಸರಣಗಹಣೂಪಸಮ್ಪದಪಬ್ಬಜ್ಜಾ ಞತ್ತಿಚತುತ್ಥವಾಚಿಕೂಪಸಮ್ಪದಪಬ್ಬಜ್ಜಾತಿ. ತತ್ಥ ಏಹಿಭಿಕ್ಖೂಪಸಮ್ಪದಪಬ್ಬಜ್ಜಾಯಂ ಕೇಸಮಸ್ಸುಹರಣಾದಿ ಸಬ್ಬಂ ಏಕತೋವ ಸಮ್ಪಜ್ಜತಿ ‘‘ಏಹಿ ಭಿಕ್ಖೂ’’ತಿ ಭಗವತೋ ವಚನೇನ ಅಭಿನಿಪ್ಫನ್ನತ್ತಾ. ಸರಣಗಹಣೂಪಸಮ್ಪದಪಬ್ಬಜ್ಜಾ ಸಾಮಣೇರಪಬ್ಬಜ್ಜಸದಿಸಾಯೇವ. ಕೇಸಮಸ್ಸುಹರಣಞ್ಚ ಕಾಸಾಯಚ್ಛಾದನಞ್ಚ ಸರಣಗಹಣಞ್ಚ ಞತ್ತಿಚತುತ್ಥವಾಚಿಕೂಪಸಮ್ಪದಪಬ್ಬಜ್ಜಾ ನಾಮ ಕಮ್ಮವಾಚಾಗಹಣತೋ ಪಠಮಮೇವ ವಜಿತಬ್ಬತ್ತಾ. ತತ್ಥ ಸಾಮಣೇರಪಬ್ಬಜ್ಜಂ ಸನ್ಧಾಯ ವುತ್ತಂ ‘‘ಉಪಜ್ಝಾಯಂ ಉದ್ದಿಸ್ಸ ಪಬ್ಬಾಜೇತೀ’’ತಿ. ಉಪಜ್ಝಾಯಂ ಉದ್ದಿಸ್ಸಾತಿ ಉಪಜ್ಝಾಯಸ್ಸ ವೇಯ್ಯಾವಚ್ಚಕರಟ್ಠಾನನಿಯಮಂ ಕತ್ವಾ. ಪಬ್ಬಜ್ಜಾಕಮ್ಮೇ ಅತ್ತನೋ ಇಸ್ಸರಿಯಮಕತ್ವಾತಿ ಅತ್ಥೋ. ದಹರೇನ ಭಿಕ್ಖುನಾ ಕೇಸಚ್ಛೇದನಂ ಕಾಸಾಯಚ್ಛಾದನಂ ಸರಣದಾನನ್ತಿ ತೀಣಿ ಕಿಚ್ಚಾನಿ ಕಾತಬ್ಬಾನಿಯೇವ. ಕೇಚಿ ‘‘ಸರಣಾನಿ ಪನ ಸಯಂ ದಾತಬ್ಬಾನೀ’’ತಿ ಪಾಠಂ ಇಧಾನೇತ್ವಾ ದಹರೇನ ಭಿಕ್ಖುನಾ ಸರಣಾನಿ ನ ದಾತಬ್ಬಾನೀತಿ ವದನ್ತಿ, ತಂ ನ ಗಹೇತಬ್ಬಂ ದಹರಸ್ಸ ಭಿಕ್ಖುತ್ತಾ, ಭಿಕ್ಖೂನಂ ಪಬ್ಬಾಜೇತುಂ ಲಭನತ್ತಾ ಚ. ಉಪಜ್ಝಾಯೋ ಚೇ ಕೇಸಚ್ಛೇದನಞ್ಚ ಕಾಸಾಯಚ್ಛಾದನಞ್ಚ ಅಕತ್ವಾ ಪಬ್ಬಜ್ಜತ್ಥಂ ಸರಣಾನಿಯೇವ ದೇತಿ, ನ ರುಹತಿ ಪಬ್ಬಜ್ಜಾ ಪಬ್ಬಜ್ಜಾಯ ಅಕತ್ತಬ್ಬತ್ತಾ. ಕಮ್ಮವಾಚಂ ಸಾವೇತ್ವಾ ಉಪಸಮ್ಪಾದೇತಿ, ರುಹತಿ ಉಪಸಮ್ಪದಾ ಅಪತ್ತಚೀವರಾನಂ ಉಪಸಮ್ಪದಸಿದ್ಧಿತೋ, ಕಮ್ಮವಿಪತ್ತಿಯಾ ಅಭಾವತೋ ಚ. ಖಣ್ಡಸೀಮನ್ತಿ ಉಪಚಾರಸೀಮಟ್ಠಂ ಬದ್ಧಸೀಮಂ. ಪಬ್ಬಾಜೇತ್ವಾತಿ ಕೇಸಚ್ಛೇದನಂ ಸನ್ಧಾಯ ವುತ್ತಂ ‘‘ಕಾಸಾಯಾನಿ ಅಚ್ಛಾದೇತ್ವಾ’’ತಿ ಕಾಸಾಯಚ್ಛಾದನಸ್ಸ ವಿಸುಂ ವುತ್ತತ್ತಾ. ಸಾಮಣೇರಸ್ಸ ಸರಣದಾನಸ್ಸ ಅರುಹತ್ತಾ ‘‘ಸರಣಾನಿ ಪನ ಸಯಂ ದಾತಬ್ಬಾನೀ’’ತಿ ವುತ್ತಂ. ಪುರಿಸಂ ಪಬ್ಬಾಜೇತುನ್ತಿ ಸಮ್ಬನ್ಧೋ. ಹೀತಿ ಸಚ್ಚಂ. ಆಣತ್ತಿಯಾತಿ ಭಿಕ್ಖೂನಂ ಆಣತ್ತಿಯಾ. ಯೇನ ಕೇನಚೀತಿ ಗಹಟ್ಠಪಬ್ಬಜಿತೇಸು ಯೇನ ಕೇನಚಿ.

‘‘ಭಬ್ಬರೂಪೋ’’ತಿ ವತ್ವಾ ತಸ್ಸ ಅತ್ಥಂ ದಸ್ಸೇತುಂ ವುತ್ತಂ ‘‘ಸಹೇತುಕೋ’’ತಿ. ಸಹೇತುಕೋತಿ ಮಗ್ಗಫಲಾನಂ ಉಪನಿಸ್ಸಯೇಹಿ ಸಹ ಪವತ್ತೋ. ಯಸಸ್ಸೀತಿ ಪರಿವಾರಯಸೇನ ಚ ಕಿತ್ತಿಯಸೇನ ಚ ಸಮನ್ನಾಗತೋ. ಓಕಾಸಂ ಕತ್ವಾಪೀತಿ ಓಕಾಸಂ ಕತ್ವಾ ಏವ. ಸಯಮೇವಾತಿ ನ ಅಞ್ಞೋ ಆಣಾಪೇತಬ್ಬೋ. ಏತ್ತೋಯೇವಾತಿ ದಸ್ಸನಟ್ಠಾನತೋಯೇವ. ಅಸ್ಸಾತಿ ಪಬ್ಬಜ್ಜಾಪೇಕ್ಖಸ್ಸ. ಖಜ್ಜು ವಾತಿ ಕಣ್ಡುವನಂ ವಾ. ‘‘ಕಚ್ಛು ವಾ’’ತಿಪಿ ಪಾಠೋ, ಪಾಮಂ ವಾತಿ ಅತ್ಥೋ. ಪಿಳಕಾ ವಾತಿ ಫೋಟಾ ವಾ. ಏತ್ತಕೇನಾತಿ ಏತಪಮಾಣೇನ ಘಂಸಿತ್ವಾ ನ್ಹಾಪನಮತ್ತೇನ. ಅನಿವತ್ತಿಧಮ್ಮಾತಿ ಗಿಹಿಭಾವಂ ಅನಿವತ್ತನಸಭಾವಾ. ಕತಞ್ಞೂತಿ ಕತಸ್ಸೂಪಕಾರಸ್ಸ ಜಾನನಸೀಲಾ. ಕತವೇದಿನೋತಿ ಕತಞ್ಞೂಪಕಾರಸ್ಸ ವೇದಂ ಪಾಕಟಂ ಕರೋನ್ತೋ.

ಅನಿಯ್ಯಾನಿಕಕಥಾತಿ ಯಾವದತ್ಥಂ ಸುಪಿತ್ವಾ ಯಾವದತ್ಥಂ ಭುಞ್ಜೀತ್ವಾ ಚಿತ್ತಕೇಳಿಂ ಕರೋನ್ತೋ ಅನುಕ್ಕಣ್ಠಿತೋ ವಿಹರಾಹೀತಿಆದಿಕಾ ಕಥಾ. ನಕಥೇತಬ್ಬಂ ದಸ್ಸೇತ್ವಾ ಕಥೇತಬ್ಬಂ ದಸ್ಸೇನ್ತೋ ಆಹ ‘‘ಅಥಖ್ವಸ್ಸಾ’’ತಿ. ಅಸ್ಸಾತಿ ಪಬ್ಬಜ್ಜಾಪೇಕ್ಖಸ್ಸ. ಆಚಿಕ್ಖನಾಕಾರಂ ದಸ್ಸೇನ್ತೋ ಆಹ ‘‘ಆಚಿಕ್ಖನ್ತೇನ ಚಾ’’ತಿಆದಿ. ವಣ್ಣ…ಪೇ… ವಸೇನಾತಿ ವಣ್ಣೋ ಚ ಸಣ್ಠಾನಞ್ಚ ಗನ್ಧೋ ಚ ಆಸಯೋ ಚ ಓಕಾಸೋ ಚ, ತೇಸಂ ವಸೇನ, ಆಚಿಕ್ಖಿತಬ್ಬನ್ತಿ ಸಮ್ಬನ್ಧೋ. ಹೀತಿ ಫಲಜೋತಕೋ, ಆಚಿಕ್ಖನಸ್ಸ ಫಲಂ ವಕ್ಖಾಮೀತಿ ಅತ್ಥೋ. ಸೋತಿ ಪಬ್ಬಜ್ಜಾಪೇಕ್ಖೋ. ಪುಬ್ಬೇತಿ ಪುಬ್ಬಭವೇ, ಪಬ್ಬಜನತೋ ಪುಬ್ಬೇ ವಾ. ಕಣ್ಟಕವೇಧಾಪೇಕ್ಖೋ ಪರಿಪಕ್ಕಗಣ್ಡೋ ವಿಯ ಞಾಣಂ ಪವತ್ತತೀತಿ ಯೋಜನಾ. ಅಸ್ಸಾತಿ ಪಬ್ಬಜ್ಜಾಪೇಕ್ಖಸ್ಸ. ಇನ್ದಾಸನೀತಿ ಸಕ್ಕಸ್ಸ ವಜಿರಾವುಧೋ. ಸೋ ಹಿ ಇನ್ದೇನ ಅಸೀಯತಿ ಖಿಪೀಯತೀತಿ ಇನ್ದಾಸನೀತಿ ವುಚ್ಚತಿ. ಇನ್ದಾಸನಿ ಪಬ್ಬತೇ ಚುಣ್ಣಯಮಾನಾ ವಿಯ ಸಬ್ಬೇ ಕಿಲೇಸೇ ಚುಣ್ಣಯಮಾನಂಯೇವಾತಿ ಯೋಜನಾ. ಖುರಗ್ಗೇಯೇವಾತಿ ಖುರಸ್ಸ ಕೋಟಿಯಮೇವ. ಖುರಕಮ್ಮಪರಿಯೋಸಾನೇಯೇವಾತಿ ಅತ್ಥೋ. ಹೀತಿ ಸಚ್ಚಂ. ತಸ್ಮಾತಿ ಯಸ್ಮಾ ಪತ್ತಾ, ತಸ್ಮಾ. ಅಸ್ಸಾತಿ ಪಬ್ಬಜ್ಜಾಪೇಕ್ಖಸ್ಸ.

ಗಿಹಿಗನ್ಧನ್ತಿ ಗೇಹೇ ಠಿತಸ್ಸ ಜನಸ್ಸ ಗನ್ಧಂ. ಅಥಾಪೀತಿ ಯದಿಪಿ ಅಚ್ಛಾದೇತೀತಿ ಸಮ್ಬನ್ಧೋ. ಅಸ್ಸಾತಿ ಪಬ್ಬಜ್ಜಾಪೇಕ್ಖಸ್ಸ. ಆಚರಿಯೋ ವಾತಿ ಸರಣದಾನಾಚರಿಯೋ ವಾ ಕಮ್ಮವಾಚಾಚರಿಯೋ ವಾ ಓವಾದಾಚರಿಯೋ ವಾ. ತಂಯೇವ ವಾತಿ ಪಬ್ಬಜ್ಜಾಪೇಕ್ಖಮೇವ ವಾ. ತೇನ ಭಿಕ್ಖುನಾವಾತಿ ಆಚರಿಯುಪಜ್ಝಾಯಭಿಕ್ಖುನಾ ಏವ.

ಅನಾಣತ್ತಿಯಾತಿ ಆಚರಿಯುಪಜ್ಝಾಯೇಹಿ ಅನಾಣತ್ತಿಯಾ. ಇಮಿನಾ ಆಚರಿಯುಪಜ್ಝಾಯೇಹಿ ಅನಾಣತ್ತೇನ ಯೇನ ಕೇನಚಿ ನಿವಾಸನಾದೀನಿ ನ ಕಾತಬ್ಬಾನೀತಿ ದಸ್ಸೇತಿ. ಭಿಕ್ಖುನಾತಿ ಆಚರಿಯುಪಜ್ಝಾಯಭಿಕ್ಖುನಾ. ತಸ್ಸೇವಾತಿ ಪಬ್ಬಜ್ಜಾಪೇಕ್ಖಸ್ಸೇವ. ಉಪಜ್ಝಾಯಮೂಲಕೇತಿ ಉಪಜ್ಝಾಯಮೂಲಕೇ ನಿವಾಸನಪಾರುಪನೇ. ಅಯನ್ತಿ ವಿನಿಚ್ಛಯೋ.

ತತ್ಥಾತಿ ಪಬ್ಬಜ್ಜೂಪಸಮ್ಪದಟ್ಠಾನೇ. ತೇಸನ್ತಿ ಭಿಕ್ಖೂನಂ. ಅಥಾತಿ ವನ್ದಾಪನತೋ ಪಚ್ಛಾ, ವನ್ದಾಪನಸ್ಸ ಅನನ್ತರಾ ವಾ. ‘‘ಏವಂ ವದೇಹೀ’’ತಿ ಪಾಳಿನಯನಿದಸ್ಸನಮುಖೇನ ‘‘ಯಮಹಂ ವದಾಮಿ, ತಂ ವದೇಹೀ’’ತಿ ಅಟ್ಠಕಥಾನಯಂ ನಿದಸ್ಸೇತಿ. ಅಥಾತಿ ತದನನ್ತರಂ. ಅಸ್ಸಾತಿ ಪಬ್ಬಜ್ಜಾಪೇಕ್ಖಸ್ಸ, ದಾತಬ್ಬಾನೀತಿ ಸಮ್ಬನ್ಧೋ. ಏಕಪದಮ್ಪೀತಿ ತೀಸು ವಾಕ್ಯಪದೇಸು ಏಕಂ ವಾಕ್ಯಪದಮ್ಪಿ, ನವಸು ವಾ ವಿಭತ್ಯನ್ತಪದೇಸು ಏಕಪದಮ್ಪಿ. ಏಕಕ್ಖರಮ್ಪೀತಿ ಚತುವೀಸತಕ್ಖರೇಸು ಏಕಕ್ಖರಮ್ಪಿ.

ಏಕತೋ ಸುದ್ಧಿಯಾತಿ ಏಕಸ್ಸೇವ ಕಮ್ಮವಾಚಾಚರಿಯಸ್ಸ ಠಾನಕರಣಸಮ್ಪತ್ತಿಯಾ ಸುಜ್ಝನೇನ. ಉಭತೋ ಸುದ್ಧಿಯಾವಾತಿ ಉಭಯೇಸಂ ಸರಣದಾನಾಚರಿಯಸಾಮಣೇರಾನಂ ಸುಜ್ಝನೇನ ಏವ. ಠಾನಕರಣಸಮ್ಪದನ್ತಿ ಉರಆದಿಟ್ಠಾನಾನಞ್ಚ ಸಂವುತಾದಿಕರಣಾನಞ್ಚ ಸಮ್ಪದಂ. ವತ್ತುನ್ತಿ ಠಾನಕರಣಸಮ್ಪದಂ ವತ್ತುಂ. ನ ಸಕ್ಕೋತೀತಿ ವತ್ತುಂ ನ ಸಕ್ಕೋತೀತಿ ಯೋಜನಾ.

ಇಮಾನೀತಿ ಸರಣಾನಿ. ಚಸದ್ದೋ ಉಪನ್ಯಾಸೋ, ಪನಸದ್ದೋ ಪದಾಲಙ್ಕಾರೋ. ಏಕಸಮ್ಬನ್ಧಾನೀತಿ ಏಕತೋ ಸಮ್ಬನ್ಧಾನಿ. ಅನುನಾಸಿಕನ್ತಂ ಕತ್ವಾ ದಾನಕಾಲೇ ‘‘ಬುದ್ಧಂ’’ಇತಿ ‘‘ಸರಣಂ’’ಇತಿ ಪದಾನಞ್ಚ ‘‘ಸರಣಂ’’ಇತಿ ‘‘ಗಚ್ಛಾಮಿ’’ಇತಿ ಪದಾನಞ್ಚ ಅನ್ತರಾ ವಿಚ್ಛೇದಮಕತ್ವಾ ಏಕಸಮ್ಬನ್ಧಮೇವ ಕತ್ವಾ ದಾತಬ್ಬಾನೀತಿ ವುತ್ತಂ ಹೋತಿ. ಕಸ್ಮಾ ತಿಣ್ಣಂ ಪದಾನಮನ್ತರಾ ಬ್ಯವಧಾನಸ್ಸ ಕಸ್ಸಚಿ ಅಕ್ಖರಸ್ಸ ಅಭಾವತೋ. ವಿಚ್ಛಿನ್ದಿತ್ವಾತಿ ವಿಚ್ಛೇದಂ ಕತ್ವಾ. ಮಕಾರನ್ತಂ ಕತ್ವಾ ದಾನಕಾಲೇ ತಿಣ್ಣಂ ಪದಾನಮನ್ತರಾ ಏಕಸಮ್ಬನ್ಧಮಕತ್ವಾ ವಿಚ್ಛಿನ್ದಿತ್ವಾ ಏವ ಕತ್ವಾ ದಾತಬ್ಬಾನೀತಿ ವುತ್ತಂ ಹೋತಿ. ಕಸ್ಮಾ? ತಿಣ್ಣಂ ಪದಾನಮನ್ತರಾ ಬ್ಯವಧಾನಸ್ಸ ನಿಸ್ಸರಸ್ಸ ಮಕಾರಸ್ಸ ಅತ್ಥಿಭಾವತೋ. ಅನ್ಧಕಟ್ಠಕಥಾಯಂ ವುತ್ತನ್ತಿ ಸಮ್ಬನ್ಧೋ. ತನ್ತಿ ವಚನಂ, ‘‘ನತ್ಥೀ’’ತಿಪದೇ ಕತ್ತಾ, ‘‘ನ ವುತ್ತ’’ನ್ತಿಪದೇ ಕಮ್ಮಂ. ತಥಾತಿ ‘‘ಅಹಂ ಭನ್ತೇ ಬುದ್ಧರಕ್ಖಿತೋ’’ತಿಆದಿನಾ ಆಕಾರೇನ, ಅವದನ್ತಸ್ಸ ಸರಣಂ ನ ಕುಪ್ಪತಿ, ಬುಕಾರದಕಾರಾದೀನಂ ಬ್ಯಞ್ಜನಾನಂ ಠಾನಕರಣಸಮ್ಪದಂ ಹಾಪೇನ್ತಸ್ಸೇವ ಸರಣಂ ಕುಪ್ಪತೀತಿ ಅಧಿಪ್ಪಾಯೋ.

‘‘ತಿಕ್ಖತ್ತು’’ನ್ತಿ ಇಮಿನಾ ಸಕಿಂ ವಾ ದ್ವಿಕ್ಖತ್ತುಂ ವಾ ನ ವಟ್ಟತೀತಿ ದೀಪೇತಿ. ತಿಕ್ಖತ್ತುತೋ ಅಧಿಕಂ ಪನ ಸಹಸ್ಸಕ್ಖತ್ತುಮ್ಪಿ ವಟ್ಟತಿಯೇವ. ತತ್ಥಾತಿ ತಾಸು ಪಬ್ಬಜ್ಜಾಉಪಸಮ್ಪದಾಸು. ಪರತೋತಿ ಪರಸ್ಮಿಂ. ಸಾತಿ ಉಪಸಮ್ಪದಾ. ಪಬ್ಬಜ್ಜಾ ಪನ ಅನುಞ್ಞಾತಾ ಏವಾತಿ ಸಮ್ಬನ್ಧೋ. ಪರತೋಪೀತಿ ಪಿಸದ್ದೋ ಪುಬ್ಬಾಪೇಕ್ಖೋ. ಸಾತಿ ಪಬ್ಬಜ್ಜಾ. ಏತ್ತಾವತಾತಿ ಏತ್ತಕೇನ ಕೇಸಚ್ಛೇದನಕಾಸಾಯಚ್ಛಾದನಸರಣದಾನೇನ. ಹೀತಿ ಫಲಜೋತಕೋ.

ಏಸಾತಿ ಏಸೋ ಸಾಮಣೇರೋತಿ ಅತ್ಥೋ. ‘‘ಗತಿಮಾ’’ತಿ ವತ್ವಾ ತಸ್ಸತ್ಥಂ ದಸ್ಸೇನ್ತೋ ಆಹ ‘‘ಪಣ್ಡಿತಜಾತಿಕೋ’’ತಿ. ಅಥಾತಿ ಏವಂ ಸತಿ. ಅಸ್ಸಾತಿ ಸಾಮಣೇರಸ್ಸ. ತಸ್ಮಿಂಯೇವ ಠಾನೇತಿ ಸಾಮಣೇರಭೂಮಿಯಂ ಠಿತಟ್ಠಾನೇಯೇವ. ಯಥಾ ಭಗವತಾ ಉದ್ದಿಟ್ಠಾನಿ, ತಥಾ ಉದ್ದಿಸಿತಬ್ಬಾನೀತಿ ಯೋಜನಾ. ಏತನ್ತಿ ‘‘ಅನುಜಾನಾಮಿ…ಪೇ… ಜಾತರೂಪ ರಜತಪಟಿಗ್ಗಹಣಾ ವೇರಮಣೀ’’ತಿ ವಚನಂ.

ತನ್ತಿ ಅನ್ಧಕಟ್ಠಕಥಾಯಂ ವುತ್ತವಚನಂ. ಯಥಾಪಾಳಿಯಾವಾತಿ ಏವಸದ್ದೋ ಸನ್ನಿಟ್ಠಾನತ್ಥೋ, ತೇನ ಯಥಾಪಾಳಿಯಾವ ಉದ್ದಿಸಿತಬ್ಬಾನಿ. ಯಥಾಪಾಳಿಂ ವಿಸಜ್ಜೇತ್ವಾ ಅಞ್ಞಥಾ ಏವ ಉದ್ದಿಸಿತಬ್ಬಾನೀತಿ ವಾದಂ ನಿವಾರೇತಿ. ಯಥಾಪಾಳಿಂ ವಿಸಜ್ಜೇತ್ವಾ ಅಞ್ಞಥಾ ‘‘ಪಾಣಾತಿಪಾತಾ ವೇರಮಣಿಂ ಸಿಕ್ಖಾಪದಂ ಸಮಾದಿಯಾಮೀ’’ತಿ ಉದ್ದಿಸನ್ತೋಪಿ ನಿದ್ದೋಸೋಯೇವ. ಹೀತಿ ಸಚ್ಚಂ, ಯಸ್ಮಾ ವಾ. ತಾನೀತಿ ಸಿಕ್ಖಾಪದಾನಿ. ಯಾವಾತಿ ಯತ್ತಕಂ ಕಾಲಂ ನ ಜಾನಾತಿ, ನ ಕುಸಲೋ ಹೋತೀತಿ ಸಮ್ಬನ್ಧೋ. ಸನ್ತಿಕಾವಚರೋಯೇವಾತಿ ಆಚರಿಯುಪಜ್ಝಾಯಾನಂ ಸಮೀಪೇ ಅವಚಾರೋವ. ಅಸ್ಸಾತಿ ಸಾಮಣೇರಸ್ಸ. ಕಪ್ಪಿಯಾಕಪ್ಪಿಯನ್ತಿ ದಸಸಿಕ್ಖಾಪದವಿನಿಮುತ್ತಂ ಕಪ್ಪಿಯಂ ಪರಾಮಾಸಾದಿಞ್ಚ ಅಕಪ್ಪಿಯಂ ಅಪರಾಮಾಸಾದಿಞ್ಚ. ತೇನಾಪೀತಿ ಸಾಮಣೇರೇನಾಪಿ. ನಾಸನಙ್ಗಾನೀತಿ ಲಿಙ್ಗನಾಸನಅಙ್ಗಾನಿ. ಸಾಧುಕಂ ಸಿಕ್ಖಿತಬ್ಬನ್ತಿ ಸಾಧುಕಂ ಅಸಿಕ್ಖನ್ತಸ್ಸ ಲಿಙ್ಗನಾಸನಞ್ಚ ದಣ್ಡಕಮ್ಮನಾಸನಞ್ಚ ಹೋತೀತಿ ಅಧಿಪ್ಪಾಯೋ.