೪೮. ತಿತ್ಥಿಯಪಕ್ಕನ್ತಕಕಥಾ

೧೧೦. ಪಕ್ಕಮತೀತಿ ಪಕ್ಕನ್ತೋ, ‘‘ಪವಿಟ್ಠೋ’’ತಿ ಇಮಿನಾ ಕಮುಧಾತುಯಾ ಪದವಿಕ್ಖೇಪತ್ಥಂ ದಸ್ಸೇತಿ, ಇಚ್ಛಾಕನ್ತಿಅತ್ಥೇ ನಿವತ್ತೇತಿ. ಸೋತಿ ತಿತ್ಥಿಯಪಕ್ಕನ್ತಕೋ. ತತ್ರಾತಿ ತಿತ್ಥಿಯಪಕ್ಕನ್ತಕೇ. ಉಪಸಮ್ಪನ್ನೋ ಭಿಕ್ಖು ಗಚ್ಛತೀತಿ ಸಮ್ಬನ್ಧೋ. ತೇಸನ್ತಿ ತಿತ್ಥಿಯಾನಂ. ‘‘ತಿತ್ಥಿಯೋ ಭವಿಸ್ಸಾಮೀ’’ತಿ ಪುಬ್ಬೇವ ಲದ್ಧಿಗಹಿತತ್ತಾ ವುತ್ತಂ ‘‘ಲಿಙ್ಗೇ ಆದಿನ್ನಮತ್ತೇ’’ತಿ. ಕುಸಚೀರಾದೀನೀತಿ ಏತ್ಥ ಕುಸೋ ವುಚ್ಚತಿ ಸಲಾಕಾ. ಚೀರೋತಿ ಪನ್ತಿ, ಆವಲೀತಿ ಅತ್ಥೋ. ಕುಸೇ ರಜ್ಜುನಾ ಆವುನಿತ್ವಾ ಕತೋ ಚೀರೋ ಕುಸಚೀರೋ, ಸೋ ಆದಿ ಯೇಸಂ ತಾನೀತಿ ಕುಸಚೀರಾದೀನಿ. ಆದಿಸದ್ದೇನ ಫಲಕಚೀರಾದಯೋ ಸಙ್ಗಣ್ಹಾತಿ. ಕುಸತಿಣೇಹಿ ಕತೋ ಚೀರೋ ಕುಸಚೀರೋತಿಪಿ ವದನ್ತಿ. ನಗ್ಗೋತಿ ಅಚೇಲಕೋ. ಆಜೀವಕೋತಿ ಅಚೇಲಕವತಮಾದಾಯ ಜೀವತೀತಿ ಆಜೀವಕೋ. ತೇಸನ್ತಿ ಆಜೀವಕಾನಂ. ಓವದಿತೋ ಹುತ್ವಾತಿ ಸಮ್ಬನ್ಧೋ.

ಕಿನ್ತಿ ಕಿಂ ವತಂ. ಲುಞ್ಚಾಪೇತೀತಿ ಅಪನಯಾಪೇತಿ. ಮೋರಪಿಞ್ಛಾದೀನೀತಿ ಏತ್ಥ ಪಿಞ್ಛಂ ವುಚ್ಚತಿ ಪಕ್ಖೋ. ಸೋ ಹಿ ಪಿಞ್ಛತಿ ಆಕಾಸೇ ಗಚ್ಛತಿ ಅನೇನಾತಿ ಪಿಞ್ಛನ್ತಿ ವುಚ್ಚತಿ. ಪಿಛಿ ಗತಿಯನ್ತಿ ಧಾತುಪಾಠೋ. ಮೋರಸ್ಸ ಪಿಞ್ಛಂ ಮೋರಪಿಞ್ಛಂ, ತಂ ಆದಿ ಯೇಸಂ ತಾನೀತಿ ಮೋರಪಿಞ್ಛಾದೀನಿ. ಆದಿಸದ್ದೇನ ಉಲೂಕಪಿಞ್ಛಾದಯೋ ಸಙ್ಗಣ್ಹಾತಿ. ಯಾವ ನ ಸಮ್ಪಟಿಚ್ಛತೀತಿ ಯಾವ ಲದ್ಧಿಂ ನ ಸಮ್ಪಟಿಚ್ಛತಿ. ನನ್ತಿ ವೀಮಂಸಮಾನಂ ಭಿಕ್ಖುಂ. ಲದ್ಧೀತಿ ತಿತ್ಥಿಯಲದ್ಧಿ. ರಕ್ಖತೀತಿ ತಿತ್ಥಿಯಪಕ್ಕನ್ತಕತೋ ರಕ್ಖತಿ. ಲದ್ಧಿಯಾ ಅಭಾವೇನ ತಿತ್ಥಿಯಪಕ್ಕನ್ತಕೋ ನ ಹೋತೀತಿ ಅಧಿಪ್ಪಾಯೋ. ಅಚ್ಛಿದ್ದಚೀವರೋತಿ ಏತ್ಥ ಆಕಾರೋ ಕೋಧತ್ಥೋ, ಅಡ್ಡತ್ಥೋ ವಾ ಹೋತಿ, ಛಿದ್ದಸದ್ದೋ ದೂಸನತ್ಥೋ ಹೋತಿ. ತಸ್ಮಾ ಆಕೋಧೇನ ಅಡ್ಡೇನ ವಾ ಛಿದ್ದೋ ದೂಸಿತೋತಿ ಅಚ್ಛಿದ್ದೋತಿ ಅತ್ಥೋ ದಟ್ಠಬ್ಬೋ. ‘‘ಅಚ್ಛಿನ್ನೋ’’ತಿಪಿ ಪಾಠೋ. ಅಚ್ಛಿದ್ದಂ ಚೀವರಮೇತಸ್ಸಾತಿ ಅಚ್ಛಿದ್ದಚೀವರೋ. ತಿತ್ಥಾಯತನನ್ತಿ ತಿತ್ಥೀನಂ ನಿವಾಸಟ್ಠಾನಂ, ತಿತ್ಥಿಯಾನಂ ಉಪಸ್ಸಯನ್ತಿ ಅತ್ಥೋ.