೪೩. ಅನಾಪುಚ್ಛಾವರಣವತ್ಥುಆದಿಕಥಾ

೧೦೮. ಉಪಜ್ಝಾಯಂ ಅನಾಪುಚ್ಛಾತಿ ಏತ್ಥ ಉಪಜ್ಝಾಯಂ ಅನಾಪುಚ್ಛಿತ್ವಾ. ಸಬ್ಬಥಾ ಕಿಂ ನ ಕಾತಬ್ಬನ್ತಿ ಆಹ ‘‘ತುಮ್ಹಾಕ’’ನ್ತಿಆದಿ. ದಣ್ಡಕಮ್ಮಮಸ್ಸಾತಿ ದಣ್ಡಕಮ್ಮಂ ಅಸ್ಸ. ಅಸ್ಸಾತಿ ಸಾಮಣೇರಸ್ಸ. ಸದ್ಧಿಂ ಉಪಜ್ಝಾಯೇನ ವಿಹರನ್ತೀತಿ ಸದ್ಧಿವಿಹಾರಿಕಾ. ನಿಸ್ಸಯಾಚರಿಯಾದೀನಂ ಅನ್ತೇ ಸಮೀಪೇ ವಸನ್ತೀತಿ ಅನ್ತೇವಾಸಿಕಾ, ಉಪಸಮ್ಪನ್ನಾಯೇವ.

ಅಪಲಾಳೇನ್ತೀತಿ ಏತ್ಥ ಲಳ ಉಪಸೇವಾಯನ್ತಿ ಧಾತುಪಾಠೇಸು ವುತ್ತತ್ತಾ (ಸದ್ದನೀತಿಧಾತುಮಾಲಾಯಂ ೧೮ ಳಕಾರನ್ತಧಾತು) ಥೇರೇ ಲಳತೋ ಉಪಸೇವತೋ ಅಪಗಮೇನ್ತೀತಿ ಅತ್ಥೋ ದಟ್ಠಬ್ಬೋ. ಇಧ ಪನ ಅಧಿಪ್ಪಾಯತ್ಥಂ ದಸ್ಸೇನ್ತೋ ಆಹ ‘‘ತುಮ್ಹಾಕ’’ನ್ತಿಆದಿ. ಅಪಲಾಳೇತಬ್ಬಾತಿ ಅಞ್ಞಂ ಲಳತೋ ಉಪಸೇವತೋ ಅಪಗಮೇತಬ್ಬಾ. ಪರಿಸಭೂತೇ ಸಾಮಣೇರೂಪಸಮ್ಪನ್ನೇತಿ ಯೋಜನಾ. ಆದೀನವನ್ತಿ ದುಸ್ಸೀಲಂ ನಿಸ್ಸಾಯ ವಸನಸ್ಸ ದೋಸಂ. ನ್ಹಾಯಿತುಂ ಆಗತೇನ ತಯಾ ಗೂಥಮಕ್ಖನಂ ಕತಂ ವಿಯ ದುಸ್ಸೀಲಂ ನಿಸ್ಸಾಯ ವಿಹರನ್ತೇನ ದುಸ್ಸೀಲಂ ಕತನ್ತಿ ಯೋಜನಾ. ‘‘ದುಸ್ಸೀಲ’’ನ್ತಿ ಪದಂ ಪುರಿಮಪಚ್ಛಿಮಪದಾಪೇಕ್ಖಂ, ತಸ್ಮಾ ದ್ವಿನ್ನಂ ಪದಾನಂ ಮಜ್ಝೇ ವುತ್ತಂ. ತತ್ಥ ಪುರಿಮಪದಾಪೇಕ್ಖಕಾಲೇ ವುತ್ತಕಮ್ಮಂ, ಪಚ್ಛಿಮಪದಾಪೇಕ್ಖಕಾಲೇ ಅವುತ್ತಕಮ್ಮಂ. ಸೋತಿ ಸಾಮಣೇರೂಪಸಮ್ಪನ್ನೋ. ಉಪಜ್ಝಾಯಂ ವಾತಿ ಸಾಮಣೇರಂ ಸನ್ಧಾಯ ವುತ್ತಂ. ನಿಸ್ಸಯಂ ವಾತಿ ಉಪಸಮ್ಪನ್ನಂ ಸನ್ಧಾಯ ವುತ್ತಂ.

ತೀಸು ನಾಸನಾಸೂತಿ ಸಂವಾಸಲಿಙ್ಗದಣ್ಡಕಮ್ಮನಾಸನಸಙ್ಖಾತಾಸು ತೀಸು ನಾಸನಾಸು. ಯೋತಿ ಸಾಮಣೇರೋ. ನಾನಾಆಪತ್ತಿಯೋತಿ ಪಾರಾಜಿಕಥುಲ್ಲಚ್ಚಯ ಪಾಚಿತ್ತಿಯಾಪತ್ತಿಯೋ. ಹೀತಿ ಸಚ್ಚಂ, ಯಸ್ಮಾ ವಾ. ಕುನ್ಥಕಿಪಿಲ್ಲಿಕಮ್ಪೀತಿ ಏತ್ಥ ಪಾಣಖಾದಕೇಹಿ ಸತ್ತೇಹಿ ಕುಥಿಯತಿ ಹಿಂಸಿಯತೀತಿ ಕುನ್ಥೋ, ಕುಂ ಪಥವಿಂ ವಾ ಧಾರೇತೀತಿ ಕುನ್ಧೋ.

ಕಿಮಿಯೇವ ಪಿಲ್ಲಿಕಂ ಪೋತಕಂ ಕಿಪಿಲ್ಲಿಕಂ ಮಿಕಾರಸ್ಸ ಲೋಪಂ ಕತ್ವಾ. ಪಿಲ್ಲಿಕಸದ್ದೋ ಹಿ ಪೋತಕಪರಿಯಾಯೋ. ಕಿಮೀನಂ, ಕಿಮೀಸು ವಾ ಪಿಲ್ಲಿಕಂ ಕಿಪಿಲ್ಲಿಕಂ. ನಾಸೇತಬ್ಬತಂಯೇವಾತಿ ಲಿಙ್ಗೇನ ನಾಸೇತಬ್ಬಭಾವಮೇವ. ತಾವದೇವಾತಿ ತಸ್ಮಿಂ ಮಾರಣಭಿನ್ದನಕ್ಖಣೇಯೇವ. ಅಸ್ಸಾತಿ ಸಾಮಣೇರಸ್ಸ. ಸೇನಾಸನಗ್ಗಾಹೋ ಚ ಪಟಿಪ್ಪಸ್ಸಮ್ಭತೀತಿ ವಸ್ಸಚ್ಛೇದೋ ಹೋತೀತಿ ಅಧಿಪ್ಪಾಯೋ. ಆಕಿಣ್ಣದೋಸೋವಾತಿ ಲಿಙ್ಗನಾಸನದೋಸೇನ ಚ ದಣ್ಡಕಮ್ಮನಾಸನದೋಸೇನ ಚ ಆಕುಲದೋಸೋವ. ವಿರಜ್ಝಿತ್ವಾತಿ ವಿರಾಧೇತ್ವಾ. ಯಥಾನಿವತ್ಥಪಾರುತಸ್ಸೇವ ಸಾಮಣೇರಸ್ಸಾತಿ ಸಮ್ಬನ್ಧೋ. ತಸ್ಮಾತಿ ಸರಣಗಮನಉಪಸಮ್ಪದಕಮ್ಮವಾಚಾನಂ ಸದಿಸತ್ತಾ. ಭಿಕ್ಖುನಾ ಸಮಾದಿನ್ನಂ ವಿಯ ಇಮಿನಾಪಿ ಸಮಾದಿನ್ನಾನೇವ ಹೋನ್ತೀತಿ ಯೋಜನಾ. ಏವನ್ತಿ ಏವಮಿಜ್ಝನೇ, ಸಮಾದಿನ್ನೇ ವಾ. ದಳ್ಹೀಕರಣತ್ಥನ್ತಿ ಸಿಕ್ಖಾಪದಾನಂ ದಳ್ಹೀಕರಣತ್ಥಂ. ಪತಿಟ್ಠಾಪನತ್ಥನ್ತಿ ಸಾಮಣೇರಸ್ಸ ಪತಿಟ್ಠಾಪನತ್ಥಂ. ಲಚ್ಛತೀತಿ ಲಭಿಸ್ಸತಿ. ಸಙ್ಘೇನ ದಾತಬ್ಬೋತಿ ಸಮ್ಬನ್ಧೋ. ಅಪಲೋಕೇತ್ವಾತಿ ಸಙ್ಘಂ ಆಪುಚ್ಛಿತ್ವಾ. ಇಮಿನಾ ಛಿನ್ನವಸ್ಸಕಂ ದಸ್ಸೇತಿ.

ಅದಿನ್ನಾದಾನೇ ತಿಣಸಲಾಕಮತ್ತೇನಾಪಿ ವತ್ಥುನಾ ಅಸಮಣೋ ಹೋತೀತಿ ಯೋಜನಾ. ವಿಪ್ಪಟಿಪತ್ತಿಯಾತಿ ವಿಕಾರೇನ ಪಟಿಪಜ್ಜನತೋ. ಭಣಿತೇತಿ ಭಣನೇ. ಜಾನಿತ್ವಾತಿ ಜಾನಿತ್ವಾ ಏವ. ಏವಕಾರೋ ಹೇತ್ಥ ಅಜ್ಝಾಹರಿತಬ್ಬೋ, ತೇನ ವುತ್ತಂ ‘‘ನ ಅಜಾನಿತ್ವಾ’’ತಿ. ಯಾನಿ ಪಞ್ಚ ಸಿಕ್ಖಾಪದಾನೀತಿ ಯೋಜನಾ. ಅಸ್ಸಾತಿ ಸಾಮಣೇರಸ್ಸ. ಠಪನತ್ಥಾಯಾತಿ ಸಿಕ್ಖಾಪದಾನಂ ಠಪನತ್ಥಾಯ. ಅಯನ್ತಿ ಪಾರಾಜಿಕೋ. ವಿಸೇಸೋತಿ ಭಿಕ್ಖೂನಂ ಪಾಚಿತ್ತಿಯತೋ ವಿಸೇಸೋ.

ಪಟಿಪಕ್ಖವಸೇನಾತಿ ‘‘ಅನರಹಂ ಅಸಮ್ಮಾಸಮ್ಬುದ್ಧೋ’’ತಿಆದಿನಾ ಚ ‘‘ದ್ವಾಕ್ಖಾತೋ’’ತಿಆದಿನಾ ಚ ‘‘ದುಪ್ಪಟಿಪ್ಪನ್ನೋ’’ತಿಆದಿನಾ ಚ ಪಟಿವಿರುದ್ಧವಸೇನ ಗರಹನ್ತೋ ಸಾಮಣೇರೋ ನಿವಾರೇತಬ್ಬೋತಿ ಸಮ್ಬನ್ಧೋ. ಕಣ್ಡಕನಾಸನಾಯಾತಿ ಕಣ್ಡಕನಾಮಕಸ್ಸ ಸಾಮಣೇರಸ್ಸ ದಣ್ಡಕಮ್ಮನಾಸನಾಯ. ತಂ ಲದ್ಧಿನ್ತಿ ಅವಣ್ಣಭಾಸನದಿಟ್ಠಿಂ. ಅಚ್ಚಯನ್ತಿ ಅತಿಕ್ಕಮಂ, ದೋಸಂ ವಾ. ದೇಸಾಪೇತಬ್ಬೋತಿ ‘‘ಅಚ್ಚಯೋ ಮಂ ಭನ್ತೇ ಅಚ್ಚಗಮಾ’’ತಿಆದಿನಾ ದೇಸಾಪೇತಬ್ಬಾ. ತಂ ಯುತ್ತನ್ತಿ ‘‘ಲಿಙ್ಗನಾಸನಾಯ ನಾಸೇತಬ್ಬೋ’’ತಿ ತಂ ವಚನಂ ಪತಿರೂಪಂ. ಹೀತಿ ಸಚ್ಚಂ, ಯಸ್ಮಾ ವಾ. ಇಧಾತಿ ಖನ್ಧಕೇ, ‘‘ಸಾಮಣೇರಂ ನಾಸೇತು’’ನ್ತಿವಚನೇ ವಾ.

‘‘ಏಸೇವ ನಯೋ’’ತಿ ವುತ್ತವಚನಂ ಪಾಕಟಂ ಕರೋನ್ತೋ ಆಹ ‘‘ಸಸ್ಸತುಚ್ಛೇದಾನಞ್ಹೀ’’ತಿಆದಿ. ಅಞ್ಞತರದಿಟ್ಠಿಕೋ ಸಾಮಣೇರೋತಿ ಯೋಜನಾ. ಏತ್ಥಾತಿ ದಸಸು ನಾಸನಙ್ಗೇಸು. ‘‘ಕಾಮ’’ನ್ತಿಪದೇನ ಪುನರುತ್ತಿನಿರತ್ಥಕದೋಸಾರೋಪನೇನ ಗರಹಂ ದಸ್ಸೇತಿ. ‘‘ಪನಾ’’ತಿಪದೇನ ತೇಸಂ ದೋಸಾನಂ ಪಹಾನೇನ ಸಮ್ಭಾವನಂ ದಸ್ಸೇತಿ. ಅಬ್ರಹ್ಮಚಾರಿಂ ಸಾಮಣೇರನ್ತಿ ಸಮ್ಬನ್ಧೋ. ಉಪಸಮ್ಪಾದೇತುಂ ವಟ್ಟತೀತಿ ಉಪಸಮ್ಪಾದನಂ ವಟ್ಟತಿ. ಭಿಕ್ಖುನಿದೂಸಕೋ ಸಾಮಣೇರೋತಿ ಸಮ್ಬನ್ಧೋ. ಪಬ್ಬಜ್ಜಮ್ಪೀತಿ ಏತ್ಥ ಪಿಸದ್ದಸ್ಸ ಗರಹತ್ಥಭಾವಂ ದಸ್ಸೇತುಂ ವುತ್ತಂ ‘‘ಪಗೇವ ಉಪಸಮ್ಪದ’’ನ್ತಿ. ಏತಮತ್ಥನ್ತಿ ಏತಾದಿಸಮತ್ಥಂ.