೨೭. ರಾಜಭಟವತ್ಥುಕಥಾ

೯೦. ಉಚ್ಚಿನಥಾತಿ ಏತ್ಥ ಚಿಧಾತುಯಾ ವಡ್ಢನತ್ಥಂ ದಸ್ಸೇನ್ತೋ ಆಹ ‘‘ವಡ್ಢೇಥಾ’’ತಿ. ಸೋತಾಪನ್ನತ್ತಾತಿ ಬಿಮ್ಬಿಸಾರರಞ್ಞೋ =೦೮ ಸೋತಾಪನ್ನಭಾವತೋ. ಘಾತೇಥಾತಿ ಜೀವಿತಾ ವೋರೋಪೇಥ. ಹನಥಾತಿ ಪಹರಥ. ತತೋತಿ ಉಪಜ್ಝಾಯತೋ. ಆಚರಿಯೋ ಸೇಟ್ಠೋತಿ ಸಮ್ಬನ್ಧೋ. ತತೋತಿ ಆಚರಿಯತೋ. ಇದನ್ತಿ ವಚನಂ, ಆಗತನ್ತಿ ಸಮ್ಬನ್ಧೋ. ಆಹಂಸು ವೋಹಾರಿಕಾ ಮಹಾಮತ್ತಾ ಮುಸಾವಾದೇನಾತಿ ಯೋಜನಾ. ಅಮಚ್ಚೋತಿ ಸಬ್ಬರಾಜಕಿಚ್ಚೇಸು ಅಮಾ ಸಹ ರಞ್ಞಾ ಭವತೀತಿ ಅಮಚ್ಚೋ. ಅಮಾಸದ್ದೋ ಸಹತ್ಥೇ ನಿಪಾತೋ. ‘‘ಅಮಾ’’ತಿ ನಿಪಾತತೋ ಭವತ್ಥೇ ಅಚ್ಚಪಚ್ಚಯೋ (ಮೋಗ್ಗಲ್ಲಾನೇ ೪.೨೩ ಸುತ್ತೇ). ಮಹಾಮತ್ತೋತಿ ಮಹನ್ತೋ ಮತ್ತಾ ಇಸ್ಸರಿಯಾ ಏತಸ್ಸಾತಿ ಮಹಾಮತ್ತೋ. ಮತ್ತಾಸದ್ದೋ ಹೇತ್ಥ ಇಸ್ಸರಿಯವಾಚಕೋ. ಸೇವಕೋತಿ ರಾಜಾನಂ ಸೇವತಿ ಭಜತೀತಿ ಸೇವಕೋ. ಭತ್ತವೇತನಭಟೋತಿ ಭತ್ತವೇತನಾನಮತ್ಥಾಯ ಭಟೋ. ತಸ್ಸಾತಿ ರಾಜಭಟಸ್ಸ. ಪುತ್ತನತ್ತಭಾತುಕಾದಯೋತಿಆದಿಸದ್ದೇನ ಭಾಗಿನೇಯ್ಯಾದಯೋ ಸಙ್ಗಣ್ಹಾತಿ. ಯೋ ಪನಾತಿ ರಾಜಭಟೋ ಪನ. ನಿಯ್ಯಾತೇತೀತಿ ಅಪ್ಪೇತಿ. ತಂ ಠಾನನ್ತಿ ತಂ ರಾಜಭಟಟ್ಠಾನಂ. ಯೇನ ವಾತಿ ಕಮ್ಮಕಾರೇನ ವಾ. ಯಂಕಮ್ಮಕಾರಣಾತಿ ಯಸ್ಸ ಕಮ್ಮಸ್ಸ ಕಾರಣಾ. ಯೋ ವಾತಿ ರಾಜಭಟೋ ವಾ. ಪಬ್ಬಜಸ್ಸೂತಿ ಪಬ್ಬಾಜೇಹಿ.