೨೦. ಪಣಾಮನಾಖಮಾಪನಾಕಥಾ

೮೦. ಯಂ ಲಕ್ಖಣಂ ವುತ್ತನ್ತಿ ಸಮ್ಬನ್ಧೋ. ನಿಸ್ಸಯನ್ತೇವಾಸಿಕೇನ ಕಾತಬ್ಬನ್ತಿ ಯೋಜನಾ. ಪಬ್ಬಜ್ಜಾಉಪಸಮ್ಪದಾಧಮ್ಮನ್ತೇವಾಸಿಕೇಹೀತಿ ಪಬ್ಬಜ್ಜನ್ತೇವಾಸಿಕೇನ ಚ ಉಪಸಮ್ಪದನ್ತೇವಾಸಿಕೇನ ಚ ಧಮ್ಮನ್ತೇವಾಸಿಕೇನ ಚ. ಏತೇಸನ್ತಿ ಪಬ್ಬಜ್ಜಾಉಪಸಮ್ಪದಾಧಮ್ಮನ್ತೇವಾಸಿಕಾನಂ. ಏತೇಸೂತಿ ಏತೇಸು ತೀಸು ಅನ್ತೇವಾಸಿಕೇಸು. ಆಚರಿಯಸ್ಸಾತಿ ಪಬ್ಬಜ್ಜನ್ತೇವಾಸಿಕೋ ಪಬ್ಬಜ್ಜಾಚರಿಯಸ್ಸ, ಉಪಸಮ್ಪದನ್ತೇವಾಸಿಕೋ ಉಪಸಮ್ಪದಾಚರಿಯಸ್ಸಾತಿ ಅತ್ಥೋ. ಸಮೀಪೇತಿ ನಿಸ್ಸಯಾಚರಿಯಸ್ಸ ಚ ಧಮ್ಮಾಚರಿಯಸ್ಸ ಚ ಆಸನ್ನೇ. ತಸ್ಮಾತಿ ಯಸ್ಮಾ ಅನ್ತೇವಾಸಿಕೇನ ಆಚರಿಯಮ್ಹಿ ಸಮ್ಮಾ ವತ್ತಿತಬ್ಬಂ, ತಸ್ಮಾ. ಆಚರಿಯೇನಾಪೀತಿ ನಿಸ್ಸಯಪಬ್ಬಜ್ಜಾ ಉಪಸಮ್ಪದಾ ಧಮ್ಮಾಚರಿಯೇನಾಪಿ. ಓವಾದಾಚರಿಯೋ ತೇಸು ಸಙ್ಗಹಂ ಗಚ್ಛತಿ. ತೇಸೂತಿ ಚತೂಸು ಅನ್ತೇವಾಸಿಕೇಸು.