೮. ಅಟ್ಠಮಸಿಕ್ಖಾಪದಂ

೮೨೪. ಅಟ್ಠಮೇ ನಿಬ್ಬಿಟ್ಠರಾಜಭಟೋತಿ ಏತ್ಥ ಉತ್ತರಪದಸ್ಸ ಛಟ್ಠೀಸಮಾಸಞ್ಚ ಪುಬ್ಬಪದೇನ ಬಾಹಿರತ್ಥಸಮಾಸಞ್ಚ ದಸ್ಸೇನ್ತೋ ಆಹ ‘‘ನಿಬ್ಬಿಟ್ಠೋ’’ತಿಆದಿ. ತತ್ಥ ‘‘ರಞ್ಞೋ ಭತೀ’’ತಿ ಇಮಿನಾ ರಞ್ಞೋ ಭಟೋ ರಾಜಭಟೋತಿ ಛಟ್ಠೀಸಮಾಸಂ ದಸ್ಸೇತಿ, ‘‘ಏತೇನಾ’’ತಿ ಇಮಿನಾ ಬಾಹಿರತ್ಥಸಮಾಸಂ. ನಿಬ್ಬಿಟ್ಠೋತಿ ನಿವಿಟ್ಠೋ ಪತಿಟ್ಠಾಪಿತೋತಿ ಅತ್ಥೋ. ಕೇಣೀತಿ ರಞ್ಞೋ ದಾತಬ್ಬಸ್ಸ ಆಯಸ್ಸೇತಮಧಿವಚನಂ. ಏತೇನಾತಿ ಬ್ರಾಹ್ಮಣೇನ. ತತೋತಿ ಠಾನನ್ತರತೋ. ಭಟಸಙ್ಖಾತಾಯ ಕೇಣಿಯಾ ಪಥತ್ತಾ ಕಾರಣತ್ತಾ ಠಾನನ್ತರಂ ಭಟಪಥನ್ತಿ ಆಹ ‘‘ತಂಯೇವ ಠಾನನ್ತರ’’ನ್ತಿ.

೮೨೬. ಚತ್ತಾರಿಪಿ ವತ್ಥೂನೀತಿ ಉಚ್ಚಾರಾದೀನಿ. ಪಾಟೇಕ್ಕನ್ತಿ ಪಟಿವಿಸುಂ ಏಕೇಕಮೇವ. ಉಚ್ಚಾರಂ ವಾತಿಆದೀಸು ವಾಸದ್ದೇನ ದನ್ತಕಟ್ಠಾದಯೋಪಿ ಗಹೇತಬ್ಬಾತಿ ಆಹ ‘‘ದನ್ತಕಟ್ಠ…ಪೇ… ಪಾಚಿತ್ತಿಯಮೇವಾ’’ತಿ. ಸಬ್ಬತ್ಥಾತಿ ಸಬ್ಬೇಸು ಉಚ್ಚಾರಾದೀಸೂತಿ. ಅಟ್ಠಮಂ.