೬. ಛಟ್ಠಸಿಕ್ಖಾಪದಂ

೮೧೫. ಛಟ್ಠೇ ಭತ್ತಸ್ಸ ವಿಸ್ಸಜ್ಜನಂ ಭತ್ತವಿಸ್ಸಗ್ಗೋತಿ ವುತ್ತೇ ಭತ್ತಕಿಚ್ಚನ್ತಿ ದಸ್ಸೇನ್ತೋ ಆಹ ‘‘ಭತ್ತಕಿಚ್ಚ’’ನ್ತಿ. ಪಾನೀಯಸದ್ದೇನ ಪಾನೀಯಥಾಲಕಂ ಗಹೇತಬ್ಬಂ, ವಿಧೂಪನಸದ್ದೇನ ಬೀಜನೀ ಗಹೇತಬ್ಬಾ, ಉಪಸದ್ದೋ ಸಮೀಪತ್ಥೋತಿ ಸಬ್ಬಂ ದಸ್ಸೇನ್ತೋ ಆಹ ‘‘ಏಕೇನ ಹತ್ಥೇನಾ’’ತಿಆದಿ. ‘‘ಅಚ್ಚಾವದತೀ’’ತಿಪದಸ್ಸ ಅತಿಕ್ಕಮಿತ್ವಾ ವದನಾಕಾರಂ ದಸ್ಸೇತಿ ‘‘ಪುಬ್ಬೇಪೀ’’ತಿಆದಿನಾ.

೮೧೭. ‘‘ಸುದ್ಧಉದಕಂ ವಾ ಹೋತೂ’’ತಿಆದಿನಾ ‘‘ಪಾನೀಯೇನಾ’’ತಿ ವಚನಂ ಉಪಲಕ್ಖಣಂ ನಾಮಾತಿ ದಸ್ಸೇತಿ. ದಧಿಮತ್ಥೂತಿ ದಧಿಮಣ್ಡಂ ದಧಿನೋ ಸಾರೋ, ದಧಿಮ್ಹಿ ಪಸನ್ನೋದಕನ್ತಿ ವುತ್ತಂ ಹೋತಿ. ರಸೋತಿ ಮಚ್ಛರಸೋ ಮಂಸರಸೋ. ‘‘ಅನ್ತಮಸೋ ಚೀವರಕಣ್ಣೋಪೀ’’ತಿ ಇಮಿನಾ ‘‘ವಿಧೂಪನೇನಾ’’ತಿ ವಚನಂ ನಿದಸ್ಸನಂ ನಾಮಾತಿ ದಸ್ಸೇತಿ.

೮೧೯. ದೇತೀತಿ ಸಯಂ ದೇತಿ. ದಾಪೇತೀತಿ ಅಞ್ಞೇನ ದಾಪೇತಿ. ಉಭಯಮ್ಪೀತಿ ಪಾನೀಯವಿಧೂಪನದ್ವಯಮ್ಪೀತಿ. ಛಟ್ಠಂ.