೪. ಚತುತ್ಥಸಿಕ್ಖಾಪದಂ

೮೦೬. ಚತುತ್ಥೇ ರಞ್ಞೋ ಓರೋಧಾ ರಾಜೋರೋಧಾ, ಪುರಾಣೇ ರಾಜೋರೋಧಾ ಪುರಾಣರಾಜೋರೋಧಾತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಪುರಾಣೇ’’ತಿಆದಿ. ‘‘ಗಿಹಿಭಾವೇ’’ತಿ ಇಮಿನಾ ಪುರಾಣೇತಿ ಏತ್ಥ ಣಪಚ್ಚಯಸ್ಸ ಸರೂಪಂ ದಸ್ಸೇತಿ. ಚಿರಾಚಿರನ್ತಿ ನಿಪಾತಪಟಿರೂಪಕಂ. ತೇನ ವುತ್ತಂ ‘‘ಚಿರೇನ ಚಿರೇನಾ’’ತಿ. ‘‘ಸಕ್ಕೋಥಾ’’ತಿ ಇಮಿನಾ ಕಥಂ ತುಮ್ಹೇ ರಾಗಚಿತ್ತಂ ಪಟಿಹನಿತ್ವಾ ಅತ್ತಾನಂ ಧಾರೇಥ ಧಾರೇತುಂ ಸಕ್ಕೋಥಾತಿ ಅತ್ಥಂ ದಸ್ಸೇತಿ. ಅನಾರೋಚಿತೇಪೀತಿ ಭೂತತೋ ಅನಾರೋಚಿತೇಪಿ.

೮೦೭. ಜತುನಾತಿ ಲಾಖಾಯ. ಪಟ್ಠದಣ್ಡಕೇತಿ ಪಟುಭಾವೇನ ಠಾತಿ ಪವತ್ತತೀತಿ ಪಟ್ಠೋ, ಸೋಯೇವ ದಣ್ಡೋ ಪಟ್ಠದಣ್ಡೋ, ತಸ್ಸ ಪವೇಸನಂ ಪಟ್ಠದಣ್ಡಕಂ, ತಸ್ಮಿಂ ನಿಮಿತ್ತಭೂತೇ. ಏತನ್ತಿ ‘‘ಜತುಮಟ್ಠಕೇ’’ತಿ ಏತಂ ವಚನನ್ತಿ. ಚತುತ್ಥಂ.