೬. ಛಟ್ಠನಿಸ್ಸಗ್ಗಿಯಪಾಚಿತ್ತಿಯಸಿಕ್ಖಾಪದಂ

೭೫೮. ಛಟ್ಠೇ ಛನ್ದಂ ಉಪ್ಪಾದೇತ್ವಾ ಗಹಿತಂ ಛನ್ದಕನ್ತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಛನ್ದಕ’’ನ್ತಿಆದಿ. ಧಮ್ಮಕಿಚ್ಚನ್ತಿ ಪುಞ್ಞಕರಣೀಯಂ. ಧಮ್ಮಸದ್ದೋ ಹೇತ್ಥ ಪುಞ್ಞವಾಚಕೋ. ಯನ್ತಿ ವತ್ಥುಂ. ಪರೇಸನ್ತಿ ಅತ್ತನಾ ಅಞ್ಞೇಸಂ. ‘‘ಏತ’’ನ್ತಿ ‘‘ಛನ್ದಕ’’ನ್ತಿ ಏತಂ ನಾಮಂ. ‘‘ಅಞ್ಞಸ್ಸತ್ಥಾಯ ದಿನ್ನೇನಾ’’ತಿಇಮಿನಾ ಅಞ್ಞಸ್ಸ ಅತ್ಥೋ ಅಞ್ಞದತ್ಥೋ, ದಕಾರೋ ಪದಸನ್ಧಿಕರೋ, ತದತ್ಥಾಯ ದಿನ್ನೋ ಅಞ್ಞದತ್ಥಿಕೋತಿ ವಚನತ್ಥಂ ದಸ್ಸೇತಿ. ‘‘ಅಞ್ಞಂ ಉದ್ದಿಸಿತ್ವಾ ದಿನ್ನೇನಾ’’ತಿಇಮಿನಾ ಅಞ್ಞಂ ಉದ್ದಿಸಿತ್ವಾ ದಿನ್ನಂ ಅಞ್ಞುದ್ದಿಸಿಕನ್ತಿ ವಚನತ್ಥಂ ದಸ್ಸೇತಿ. ‘‘ಸಙ್ಘಸ್ಸ ಪರಿಚ್ಚತ್ತೇನಾ’’ತಿ ಇಮಿನಾ ಸಙ್ಘಸ್ಸ ಪರಿಚ್ಚತ್ತೋ ಸಙ್ಘಿಕೋತಿ ವಚನತ್ಥಂ ದಸ್ಸೇತಿ.

೭೬೨. ಯದತ್ಥಾಯಾತಿ ಯೇಸಂ ಚೀವರಾದೀನಂ ಅತ್ಥಾಯ. ಯಸದ್ದೇನ ಸಮಾಸಭಾವತೋ ಪುಬ್ಬೇ ನಿಗ್ಗಹಿತಾಗಮೋ ಹೋತಿ. ತನ್ತಿ ಚೀವರಾದಿಕಂ. ತುಮ್ಹೇಹೀತಿ ದಾಯಕೇ ಸನ್ಧಾಯ ವುತ್ತಂ. ಉಪದ್ದವೇಸೂತಿ ದುಬ್ಭಿಕ್ಖಾದಿಉಪಸಗ್ಗೇಸು. ಯಂ ವಾ ತಂ ವಾತಿ ಚೀವರಂ ವಾ ಅಞ್ಞೇ ವಾ ಪಿಣ್ಡಪಾತಾದಿಕೇತಿ ಯಂ ವಾ ತಂ ವಾತಿ. ಛಟ್ಠಂ.