೯. ನವಮಸಙ್ಘಾದಿಸೇಸಸಿಕ್ಖಾಪದಂ

೭೨೩. ನವಮೇ ಸಂಸಟ್ಠಸದ್ದೋ ಮಿಸ್ಸಪರಿಯಾಯೋತಿ ಆಹ ‘‘ಮಿಸ್ಸೀಭೂತಾ’’ತಿ. ‘‘ಅನನುಲೋಮೇನಾ’’ತಿಇಮಿನಾ ‘‘ಅನನುಲೋಮಿಕೇನಾ’’ತಿ ಏತ್ಥ ಇಕಸದ್ದೋ ಸ್ವತ್ಥೋತಿ ದಸ್ಸೇತಿ. ಕೋಟ್ಟನಞ್ಚ ಪಚನಞ್ಚ ಗನ್ಧಪಿಸನಞ್ಚ ಮಾಲಾಗನ್ಥನಞ್ಚ. ಆದಿಸದ್ದೇನ ಅಞ್ಞೇಪಿ ಅನನುಲೋಮಿಕೇ ಕಾಯಿಕೇ ಸಙ್ಗಣ್ಹಾತಿ. ಸಾಸನಾಹರಣಞ್ಚ ಪಟಿಸಾಸನಹರಣಞ್ಚ ಸಞ್ಚರಿತ್ತಞ್ಚ. ಆದಿಸದ್ದೇನ ಅಞ್ಞೇಪಿ ಅನನುಲೋಮಿಕೇ ವಾಚಸಿಕೇ ಸಙ್ಗಣ್ಹಾತಿ. ಏತಾಸನ್ತಿ ಭಿಕ್ಖುನೀನಂ. ಸಿಲೋಕೋತಿ ಯಸೋತಿ. ನವಮಂ.