೯. ರತನವಗ್ಗೋ

೧. ಅನ್ತೇಪುರಸಿಕ್ಖಾಪದ-ಅತ್ಥಯೋಜನಾ

೪೯೪. ರಾಜವಗ್ಗಸ್ಸ ಪಠಮೇ ಪರಿತ್ತಕೋತಿ ಗುಣೇನ ಖುದ್ದಕೋ. ಪಾಸಾದವರಸದ್ದಸ್ಸ ಉಪರಿಸದ್ದೇನ ಸಮ್ಬನ್ಧಿತಬ್ಬಭಾವಂ ದಸ್ಸೇತುಂ ವುತ್ತಂ ‘‘ಪಾಸಾದವರಸ್ಸ ಉಪರಿ ಗತೋ’’ತಿ. ಇಮಿನಾ ಪಾಸಾದವರಸ್ಸ ಉಪರಿ ಉಪರಿಪಾಸಾದವರಂ, ತಂ ಗತೋ ಉಪಗತೋತಿ ಉಪರಿಪಾಸಾದವರಗತೋತಿ ವಚನತ್ಥಂ ದಸ್ಸೇತಿ. ಅಯ್ಯಾನನ್ತಿ ಭಿಕ್ಖೂನಂ. ‘‘ಕಾರಣಾ’’ತಿ ಇಮಿನಾ ‘‘ವಾಹಸಾ’’ತಿ ಪದಸ್ಸತ್ಥಂ ದಸ್ಸೇತಿ. ತೇಹೀತಿ ಅಯ್ಯೇಹಿ.

೪೯೭. ಅನ್ತರನ್ತಿ ಖಣಂ, ಓಕಾಸಂ ವಾ ವಿವರಂ ವಾ. ಘಾತೇತುನ್ತಿ ಹನಿತುಂ. ಇಚ್ಛತೀತಿ ಇಮಿನಾ ಪತ್ಥಧಾತುಯಾ ಯಾಚನತ್ಥಂ ದಸ್ಸೇತಿ. ‘‘ರಾಜನ್ತೇಪುರಂ ಹತ್ಥಿಸಮ್ಮದ್ದ’’ನ್ತಿಆದೀಸು ವಚನತ್ಥೋ ಏವಂ ವೇದಿತಬ್ಬೋತಿ ಯೋಜನಾ. ಹತ್ಥಿಸಮ್ಮದ್ದನ್ತಿ ಹತ್ಥಿಸಮ್ಬಾಧಟ್ಠಾನಂ. ಅಸ್ಸೇಹಿ ಸಮ್ಮದ್ದೋ ಏತ್ಥಾತಿ ಅಸ್ಸಸಮ್ಮದ್ದೋ. ರಥೇಹಿ ಸಮ್ಮದ್ದೋ ಏತ್ಥಾತಿ ರಥಸಮ್ಮದ್ದೋತಿ ವಚನತ್ಥಂ ಅತಿದಿಸನ್ತೋ ಆಹ ‘‘ಏಸೇವ ನಯೋ’’ತಿ. ‘‘ಸಮ್ಮತ್ತ’’ನ್ತಿ ಪಠಮಕ್ಖರೇನ ಪಾಠಸ್ಸ ಸಮ್ಬಾಧಸ್ಸ ಅವಾಚಕತ್ತಾ ವುತ್ತಂ ‘‘ತಂ ನ ಗಹೇತಬ್ಬ’’ನ್ತಿ. ತತ್ಥಾತಿ ಪಾಠೇ. ‘‘ಹತ್ಥೀನಂ ಸಮ್ಮದ್ದ’’ನ್ತಿ ಇಮಿನಾ ಉತ್ತರಪದಸ್ಸ ಸಮ್ಮದ್ದನಂ ಸಮ್ಮದ್ದನ್ತಿ ಭಾವತ್ಥಂ ದಸ್ಸೇತಿ, ಪುರಿಮಪದೇನ ಛಟ್ಠೀಸಮಾಸಞ್ಚ. ಪುರಿಮಪಾಠೇ ಪನ ಉತ್ತರಪದಸ್ಸ ಅಧಿಕರಣತ್ಥಞ್ಚ ಪುಬ್ಬಪದೇನ ತತಿಯಾಸಮಾಸಞ್ಚ ದಸ್ಸೇತಿ. ಬಾಹಿರತ್ಥಸಮಾಸೋತಿಪಿ ವುಚ್ಚತಿ. ಪಚ್ಛಿಮಪಾಠೇ ‘‘ಹತ್ಥಿಸಮ್ಮದ್ದ’’ನ್ತಿಆದಿಪದಸ್ಸ ಲಿಙ್ಗವಿಪಲ್ಲಾಸಞ್ಚ ‘‘ಅತ್ಥೀ’’ತಿ ಪಾಠಸೇಸೇನ ಯೋಜೇತಬ್ಬತಞ್ಚ ದಸ್ಸೇತುಂ ವುತ್ತಂ ‘‘ಹತ್ಥಿಸಮ್ಮದ್ದೋ ಅತ್ಥೀ’’ತಿ. ರಜಿತಬ್ಬಾನೀತಿ ರಜನೀಯಾನಿ, ರಜಿತುಂ ಅರಹಾನೀತಿ ಅತ್ಥೋ. ಇಮಿನಾ ಸಮ್ಬನ್ಧಕಾಲೇ ಪುರಿಮಪಾಠೇ ರಞ್ಞೋ ಅನ್ತೇಪುರೇತಿ ವಿಭತ್ತಿವಿಪಲ್ಲಾಸೋ ಕಾತಬ್ಬೋತಿ. ಪಚ್ಛಿಮಪಾಠೇ ಪನ ಮುಖ್ಯತೋವ ಯುಜ್ಜತಿ. ತೇನ ವುತ್ತಂ ‘‘ತಸ್ಮಿಂ ಅನ್ತೇಪುರೇ’’ತಿ.

೪೯೮. ಅವಸಿತ್ತಸ್ಸಾತಿ ಖತ್ತಿಯಾಭಿಸೇಕೇನ ಅಭಿಸಿತ್ತಸ್ಸ. ಇತೋತಿ ಸಯನಿಘರತೋ. ಇಮಿನಾ ಪಞ್ಚಮೀಬಾಹಿರಸಮಾಸಂ ದಸ್ಸೇತಿ. ರಞ್ಞೋ ರತಿಜನನಟ್ಠೇನ ರತನಂ ವುಚ್ಚತಿ ಮಹೇಸೀ. ಮಹೇಸೀತಿ ಚ ಸಾಭಿಸೇಕಾ ದೇವೀ. ನಿಪುಬ್ಬ ಗಮುಧಾತುಸ್ಸ ನಿಪುಬ್ಬಕಮುಧಾತುಯಾ ಪರಿಯಾಯಭಾವಂ ದಸ್ಸೇತುಂ ವುತ್ತಂ ‘‘ನಿಗ್ಗತನ್ತಿ ನಿಕ್ಖನ್ತ’’ನ್ತಿ. ಪಠಮಂ.

೨. ರತನಸಿಕ್ಖಾಪದಂ

೫೦೨. ದುತಿಯೇ ಪಮುಸ್ಸಿತ್ವಾತಿ ಸತಿವಿಪ್ಪವಾಸೇನ ಪಮುಸ್ಸಿತ್ವಾ. ಪುಣ್ಣಪತ್ತನ್ತಿ ತುಟ್ಠಿದಾಯಂ. ತಞ್ಹಿ ಮನೋರಥಪುಣ್ಣೇನ ಪತ್ತಬ್ಬಭಾಗತ್ತಾ ‘‘ಪುಣ್ಣಪತ್ತ’’ನ್ತಿ ವುಚ್ಚತಿ. ತಸ್ಸ ಸರೂಪಂ ದಸ್ಸೇತುಂ ವುತ್ತಂ ‘‘ಸತತೋ ಪಞ್ಚ ಕಹಾಪಣಾ’’ತಿ. ಇಧ ಪನ ಕಹಾಪಣಾನಂ ಪಞ್ಚಸತತ್ತಾ ಪಞ್ಚವೀಸಕಹಾಪಣಾ ಅಧಿಪ್ಪೇತಾ. ಆಭರಣಸದ್ದಸ್ಸ ಅಲಙ್ಕಾರಸದ್ದೇನ ಪರಿಯಾಯಭಾವಂ ದಸ್ಸೇತುಂ ವುತ್ತಂ ‘‘ಅಲಙ್ಕಾರ’’ನ್ತಿ. ‘‘ಮಹಾಲತಂ ನಾಮಾ’’ತಿ ಇಮಿನಾ ನ ಯೋ ವಾ ಸೋ ವಾ ಅಲಙ್ಕಾರೋ, ಅಥ ಖೋ ವಿಸೇಸಾಲಙ್ಕಾರೋತಿ ದಸ್ಸೇತಿ. ಮಹನ್ತಾನಿ ಮಾಲಾಕಮ್ಮಲತಾಕಮ್ಮಾನಿ ಏತ್ಥಾತಿ ಮಹಾಲತಾ. ಲತಾಗಹಣೇನ ಹಿ ಮಾಲಾಪಿ ಗಹಿತಾ. ನವಹಿ ಕೋಟೀಹಿ ಅಗ್ಘಂ ಇಮಸ್ಸಾತಿ ನವಕೋಟಿಅಗ್ಘನಕಂ, ನವಕೋಟಿಸಙ್ಖಾತಂ ಅಗ್ಘಂ ಅರಹತೀತಿ ವಾ ನವಕೋಟಿಅಗ್ಘನಕಂ.

೫೦೪. ಅನ್ತೇ ಸಮೀಪೇ ವಸನಸೀಲತ್ತಾ ಪರಿಚಾರಿಕೋ ‘‘ಅನ್ತೇವಾಸೀ’’ತಿ ವುಚ್ಚತೀತಿ ಆಹ ‘‘ಪರಿಚಾರಿಕೋ’’ತಿ.

೫೦೬. ದ್ವೇ ಲೇಡ್ಡುಪಾತಾತಿ ಥಾಮಮಜ್ಝಿಮಸ್ಸ ಪುರಿಸಸ್ಸ ದ್ವೇ ಲೇಡ್ಡುಪಾತಾ. ಸಙ್ಘ…ಪೇ… ನವಕಮ್ಮಾನಂ ಅತ್ಥಾಯ ಉಗ್ಗಣ್ಹನ್ತಸ್ಸ ವಾ ಉಗ್ಗಣ್ಹಾಪೇನ್ತಸ್ಸ ವಾ ದುಕ್ಕಟನ್ತಿ ಯೋಜನಾ. ಅವಸೇಸನ್ತಿ ಜಾತರೂಪರಜತತೋ ಅವಸೇಸಂ. ಮಾತುಕಣ್ಣಪಿಳನ್ಧನತಾಲಪಣ್ಣಮ್ಪೀತಿ ಮಾತುಯಾ ಕಣ್ಣೇ ಪಿಳನ್ಧಿತತಾಲಪಣ್ಣಮ್ಪಿ, ಪಟಿಸಾಮೇನ್ತಸ್ಸಾತಿ ಸಮ್ಬನ್ಧೋ.

‘‘ಕಪ್ಪಿಯಭಣ್ಡಂ ಹೋತೀ’’ತಿ ಇಮಿನಾ ಅಕಪ್ಪಿಯಭಣ್ಡಂ ನ ವಟ್ಟತೀತಿ ದಸ್ಸೇತಿ. ಇದನ್ತಿ ಭಣ್ಡಂ. ಪಲಿಬೋಧೋ ನಾಮಾತಿ ಅತ್ತನೋ ಪಲಿಬೋಧೋ ನಾಮ. ಛನ್ದೇನಪೀತಿ ವಡ್ಢಕೀಆದೀನಂ ಛನ್ದಹೇತುನಾಪಿ. ಭಯೇನಪೀತಿ ರಾಜವಲ್ಲಭಾನಂ ಭಯಹೇತುನಾಪಿ. ಬಲಕ್ಕಾರೇನಾತಿ ಕರಣಂ ಕಾರೋ, ಬಲೇನ ಕಾರೋ ಬಲಕ್ಕಾರೋ, ತೇನ, ಬಲಕ್ಕಾರೋ ಹುತ್ವಾ ಪಾತೇತ್ವಾತಿ ಅತ್ಥೋ.

ತತ್ಥಾತಿ ಮಹಾರಾಮೇ. ಯತ್ಥಾತಿ ಯಸ್ಮಿಂ ಠಾನೇ, ಸಙ್ಕಾ ಉಪ್ಪಜ್ಜತೀತಿ ಸಮ್ಬನ್ಧೋ. ಮಹಾಜನಸಞ್ಚರಣಟ್ಠಾನೇಸೂತಿ ಬಹೂನಂ ಜನಾನಂ ಸಞ್ಚರಣಸಙ್ಖಾತೇಸು ಠಾನೇಸು. ನಗಹೇತಬ್ಬಸ್ಸ ಹೇತುಂ ದಸ್ಸೇತುಂ ವುತ್ತಂ ‘‘ಪಲಿಬೋಧೋ ನ ಹೋತೀ’’ತಿ. ಯಸ್ಮಾ ಪಲಿಬೋಧೋ ನ ಹೋತಿ, ತಸ್ಮಾ ನ ಗಹೇತಬ್ಬನ್ತಿ ಅಧಿಪ್ಪಾಯೋ. ಏಕೋತಿ ಏಕೋ ಭಿಕ್ಖು ಪಸ್ಸತೀತಿ ಸಮ್ಬನ್ಧೋ. ಓಕ್ಕಮ್ಮಾತಿ ಓಕ್ಕಮಿತ್ವಾ.

ರೂಪಸದ್ದೋ ಭಣ್ಡಪರಿಯಾಯೋತಿ ಆಹ ‘‘ಭಣ್ಡ’’ನ್ತಿ. ಭಣ್ಡಂ ರೂಪಂ ನಾಮಾತಿ ಯೋಜನಾ. ಭಣ್ಡಿಕನ್ತಿ ಭಣ್ಡೇನ ನಿಯುತ್ತಂ ಪುಟಕಂ. ಗಣೇತ್ವಾತಿ ಗಣನಂ ಕತ್ವಾ. ನಿಮಿತ್ತನ್ತೀತಿ ಏತ್ಥ ಇತಿಸದ್ದೋ ನಾಮಪರಿಯಾಯೋ. ಲಞ್ಛನಾದಿ ನಿಮಿತ್ತಂ ನಾಮಾತಿ ಹಿ ಯೋಜನಾ. ಲಞ್ಛನಾದೀತಿ ಆದಿಸದ್ದೇನ ನೀಲಪಿಲೋತಿಕಾದಯೋ ಸಙ್ಗಣ್ಹಾತಿ. ಲಾಖಾಯಾತಿ ಜತುನಾ.

ಪತಿರೂಪಾ ನಾಮ ಇಧ ಲಜ್ಜಿಕುಕ್ಕುಚ್ಚಕಾತಿ ಆಹ ‘‘ಲಜ್ಜಿನೋ ಕುಕ್ಕುಚ್ಚಕಾ’’ತಿ. ಥಾವರನ್ತಿ ಜಙ್ಗಮಾ ಅಞ್ಞಂ ಥಾವರಂ. ಅದ್ಧುನೋತಿ ಕಾಲಸ್ಸ. ಸಮಾದಪೇತ್ವಾತಿ ಅಞ್ಞೇ ಸಮಾದಪೇತ್ವಾ. ಉದ್ದಿಸ್ಸ ಅರಿಯಾ ತಿಟ್ಠನ್ತಿ, ಏಸಾ ಅರಿಯಾನ ಯಾಚನಾ’’ತಿ (ಜಾ. ೧.೭.೫೯) ವುತ್ತನಯೇನ ಯಾಚಿತ್ವಾತಿ ಅತ್ಥೋ.

೫೦೭. ರತನಸಮ್ಮತನ್ತಿ ಮನುಸ್ಸಾನಂ ಉಪಭೋಗಪರಿಭೋಗನ್ತಿ. ದುತಿಯಂ.

೩. ವಿಕಾಲಗಾಮಪ್ಪವಿಸನಸಿಕ್ಖಾಪದಂ

೫೦೮. ತತಿಯೇ ‘‘ತಿರಚ್ಛಾನಭೂತಂ ಕಥ’’ನ್ತಿ ಇಮಿನಾ ‘‘ತಿರಚ್ಛಾನಕಥ’’ನ್ತಿ ಪದಸ್ಸ ತುಲ್ಯನಿಸ್ಸಿತಸಮಾಸಂ ದಸ್ಸೇತಿ. ರಾಜಪಟಿಸಂಯುತ್ತನ್ತಿ ರಾಜೂಹಿ ಪಟಿಸಂಯುತ್ತಂ.

೫೧೨. ಸಮ್ಬಹುಲಾ ಭಿಕ್ಖೂತಿ ಸಮ್ಬನ್ಧೋ. ತಸ್ಮಿಂ ಗಾಮೇತಿ ತಸ್ಮಿಂ ಪಠಮಪವಿಸನಗಾಮೇ. ತಂ ಕಮ್ಮನ್ತಿ ತಂ ಇಚ್ಛಿತಕಮ್ಮಂ. ಅನ್ತರಾತಿ ಗಾಮವಿಹಾರಾನಮನ್ತರೇ. ಭುಮ್ಮತ್ಥೇ ಚೇತಂ ನಿಸ್ಸಕ್ಕವಚನಂ.

ಕುಲಘರೇ ವಾತಿ ಞಾತಿಕುಲಉಪಟ್ಠಾಕಕುಲಘರೇ ವಾ. ತೇಲಭಿಕ್ಖಾಯ ವಾತಿ ತೇಲಯಾಚನತ್ಥಾಯ ವಾ. ಪಸ್ಸೇತಿ ಅತ್ತನೋ ಪಸ್ಸೇ ಸಮೀಪೇತಿ ವುತ್ತಂ ಹೋತಿ. ತೇನಾತಿ ಗಾಮಮಜ್ಝಮಗ್ಗೇನ. ಅನೋಕ್ಕಮ್ಮಾತಿ ಅನೋಕ್ಕಮಿತ್ವಾ, ಅಪಕ್ಕಮಿತ್ವಾತಿ ಅತ್ಥೋತಿ. ತತಿಯಂ.

೪. ಸೂಚಿಘರಸಿಕ್ಖಾಪದಂ

೫೧೭. ಚತುತ್ಥೇ ಕಕಾರಸ್ಸ ಪದಪೂರಣಭಾವಂ ದಸ್ಸೇತುಂ ವುತ್ತಂ ‘‘ಭೇದನಮೇವ ಭೇದನಕ’’ನ್ತಿ. ಅಸ್ಸತ್ಥಿಅತ್ಥೇ ಅಪಚ್ಚಯೋತಿ ಆಹ ‘‘ತಂ ಅಸ್ಸ ಅತ್ಥೀ’’ತಿ. ಅಸ್ಸಾತಿ ಪಾಚಿತ್ತಿಯಸ್ಸ. ಪಠಮಂ ಸೂಚಿಘರಂ ಭಿನ್ದಿತ್ವಾ ಪಚ್ಛಾ ಪಾಚಿತ್ತಿಯಂ ದೇಸೇತಬ್ಬನ್ತಿ ಅತ್ಥೋ. ಅರಣಿಧನುಕೇತಿ ಅರಣಿಯಾ ಧನುಕೇ. ವೇಧಕೇತಿ ಕಾಯಬನ್ಧನವೇಧಕೇತಿ. ಚತುತ್ಥಂ.

೫. ಮಞ್ಚಸಿಕ್ಖಾಪದಂ

೫೨೨. ಪಞ್ಚಮೇ ಛೇದನಮೇವ ಛೇದನಕಂ, ತಮಸ್ಸತ್ಥೀತಿ ಛೇದನಕನ್ತಿ ಅತ್ಥಂ ಸನ್ಧಾಯ ವುತ್ತಂ ‘‘ವುತ್ತನಯಮೇವಾ’’ತಿ.

ನಿಖಣಿತ್ವಾತಿ ಪಮಾಣಾತಿರೇಕಂ ನಿಖಣಿತ್ವಾ. ಉತ್ತಾನಂ ವಾ ಕತ್ವಾತಿ ಹೇಟ್ಠುಪರಿ ಪರಿವತ್ತನಂ ವಾ ಕತ್ವಾ. ಠಪೇತ್ವಾತಿ ಲಮ್ಬಣವಸೇನ ಠಪೇತ್ವಾತಿ. ಪಞ್ಚಮಂ.

೬. ತೂಲೋನದ್ಧಸಿಕ್ಖಾಪದಂ

೫೨೬. ಛಟ್ಠೇ ಏತ್ಥಾತಿ ಮಞ್ಚಪೀಠೇ. ಅವನಹಿತಬ್ಬನ್ತಿ ಓನದ್ಧಂ, ತೂಲೇನ ಓನದ್ಧಂ ತೂಲೋನದ್ಧನ್ತಿ ಅತ್ಥೋಪಿ ಯುಜ್ಜತಿ. ತೂಲಂ ಪಕ್ಖಿಪಿತ್ವಾತಿ ಮಞ್ಚಪೀಠೇ ಚಿಮಿಲಿಕಂ ಪತ್ಥರಿತ್ವಾ ತಸ್ಸುಪರಿ ತೂಲಂ ಪಕ್ಖಿಪಿತ್ವಾತಿ ಅತ್ಥೋತಿ. ಛಟ್ಠಂ.

೭. ನಿಸೀದನಸಿಕ್ಖಾಪದಂ

೫೩೧. ಸತ್ತಮೇ ಕತ್ಥಾತಿ ಕಿಸ್ಮಿಂ ಖನ್ಧಕೇ, ಕಿಸ್ಮಿಂ ವತ್ಥುಸ್ಮಿಂ ವಾ. ಹೀತಿ ಸಚ್ಚಂ. ತತ್ಥಾತಿ ಚೀವರಕ್ಖನ್ಧಕೇ, ಪಣೀತಭೋಜನವತ್ಥುಸ್ಮಿಂ ವಾ. ‘‘ಯಥಾ ನಾಮಾ’’ತಿ ಇಮಿನಾ ‘‘ಸೇಯ್ಯಥಾಪೀ’’ತಿ ಪದಸ್ಸ ಅತ್ಥಂ ದಸ್ಸೇತಿ, ‘‘ಪುರಾಣೋ ಚಮ್ಮಕಾರೋ’’ತಿ ಇಮಿನಾ ‘‘ಪುರಾಣಾಸಿಕೋಟ್ಠೋ’’ತಿ ಪದಸ್ಸ. ಚಮ್ಮಕಾರೋ ಹಿ ಅಸಿನಾ ಚಮ್ಮಂ ಕುಟತಿ ಛಿನ್ದತೀತಿ ‘‘ಅಸಿಕೋಟ್ಠೋ’’ತಿ ವುಚ್ಚತಿ. ವತ್ಥುಪ್ಪನ್ನಕಾಲಮುಪನಿಧಾಯ ವುತ್ತಂ ‘‘ಪುರಾಣೋ’’ತಿ. ತಮೇವೂಪಮಂ ಪಾಕಟಂ ಕರೋನ್ತೋ ಆಹ ‘‘ಯಥಾ ಹೀ’’ತಿ. ಹೀತಿ ತಪ್ಪಾಕಟೀಕರಣಂ, ತಂ ಪಾಕಟಂ ಕರಿಸ್ಸಾಮೀತಿ ಹಿ ಅತ್ಥೋ. ಚಮ್ಮಕಾರೋ ಕಡ್ಢತೀತಿ ಸಮ್ಬನ್ಧೋ. ವಿತ್ಥತನ್ತಿ ವಿಸಾಲಂ. ಸೋಪೀತಿ ಉದಾಯೀಪಿ. ತಂ ನಿಸೀದನಂ ಕಡ್ಢತೀತಿ ಯೋಜನಾ. ತೇನಾತಿ ಕಡ್ಢನಹೇತುನಾ. ತನ್ತಿ ಉದಾಯಿಂ. ಸನ್ಥತಸದಿಸನ್ತಿ ಸನ್ಥತೇನ ಸದಿಸಂ. ಏಕಸ್ಮಿಂ ಅನ್ತೇತಿ ಏಕಸ್ಮಿಂ ಕೋಟ್ಠಾಸೇ, ಫಾಲೇತ್ವಾತಿ ಸಮ್ಬನ್ಧೋತಿ. ಸತ್ತಮಂ.

೮. ಕಣ್ಡುಪಟಿಚ್ಛಾದಿಸಿಕ್ಖಾಪದಂ

೫೩೭. ಅಟ್ಠಮೇ ‘‘ಕತ್ಥಾ’’ತಿಆದೀನಿ ವುತ್ತನಯಾನೇವ.

೫೩೯. ‘‘ಯಸ್ಸಾ’’ತಿ ಪದಸ್ಸ ವಿಸಯಂ ದಸ್ಸೇತುಂ ವುತ್ತಂ ‘‘ಭಿಕ್ಖುನೋ’’ತಿ. ‘‘ನಾಭಿಯಾ ಹೇಟ್ಠಾ’’ತಿ ಇಮಿನಾ ನಾಭಿಯಾ ಅಧೋ ಅಧೋನಾಭೀತಿ ವಚನತ್ಥಂ ದಸ್ಸೇತಿ, ‘‘ಜಾಣುಮಣ್ಡಲಾನಂ ಉಪರೀ’’ತಿ ಇಮಿನಾ ಜಾಣುಮಣ್ಡಲಾನಂ ಉಬ್ಭ ಉಬ್ಭಜಾಣುಮಣ್ಡಲನ್ತಿ. ಉಬ್ಭಸದ್ದೋ ಹಿ ಉಪರಿಪರಿಯಾಯೋ ಸತ್ತಮ್ಯನ್ತನಿಪಾತೋ. ಕಣ್ಡುಖಜ್ಜುಸದ್ದಾನಂ ವೇವಚನತ್ತಾ ವುತ್ತಂ ‘‘ಕಣ್ಡೂತಿ ಖಜ್ಜೂ’’ತಿ. ಕಣ್ಡತಿ ಭೇದನಂ ಕರೋತೀತಿ ಕಣ್ಡು. ಖಜ್ಜತಿ ಬ್ಯಧನಂ ಕರೋತೀತಿ ಖಜ್ಜು. ಕೇಸುಚಿ ಪೋತ್ಥಕೇಸು ‘‘ಕಚ್ಛೂ’’ತಿ ಪಾಠೋ ಅತ್ಥಿ, ಸೋ ಅಯುತ್ತೋ.

ಲೋಹಿತಂ ತುಣ್ಡಂ ಏತಿಸ್ಸಾತಿ ಲೋಹಿತತುಣ್ಡಿಕಾ. ಪಿಳಯತಿ ವಿಬಾಧಯತೀತಿ ಪಿಳಕಾ. ಆ ಭುಸೋ ಅಸುಚಿಂ ಸವತಿ ಪಗ್ಘರಾಪೇತೀತಿ ಅಸ್ಸಾವೋತಿ ವಚನತ್ಥಂ ದಸ್ಸೇನ್ತೋ ಆಹ ‘‘ಅಸುಚಿಪಗ್ಘರಣ’’ನ್ತಿ. ಅರಿಸಞ್ಚ ಭಗನ್ದರಾ ಚ ಮಧುಮೇಹೋ ಚ. ಆದಿಸದ್ದೇನ ದುನ್ನಾಮಕಾದಯೋ ಸಙ್ಗಣ್ಹಾತಿ. ತತ್ಥ ಅರಿ ವಿಯ ಈಸತಿ ಅಭಿಭವತೀತಿ ಅರಿಸಂ. ಭಗಂ ವುಚ್ಚತಿ ವಚ್ಚಮಗ್ಗಂ, ತಂ ದರತಿ ಫಾಲೇತೀತಿ ಭಗನ್ದರಾ, ಗೂಥಸಮೀಪೇ ಜಾತೋ ವಣವಿಸೇಸೋ. ಮಧು ವಿಯ ಮುತ್ತಾದಿಂ ಮಿಹತಿ ಸೇಚತೀತಿ ಮಧುಮೇಹೋ, ಸೋ ಆಬಾಧೋ ಮುತ್ತಮೇಹೋ ಸುಕ್ಕಮೇಹೋ ರತ್ತಮೇಹೋತಿ ಅನೇಕವಿಧೋ. ಥುಲ್ಲಸದ್ದೋ ಮಹನ್ತಪರಿಯಾಯೋತಿ ಆಹ ‘‘ಮಹಾ’’ತಿ. ಅಟ್ಠಮಂ.

೯. ವಸ್ಸಿಕಸಾಟಿಕಸಿಕ್ಖಾಪದಂ

೫೪೨. ನವಮೇ ವಸ್ಸೇ ವಸ್ಸಕಾಲೇ ಅಧಿಟ್ಠಾತಬ್ಬಾತಿ ವಸ್ಸಿಕಾ, ವಸ್ಸಿಕಾ ಚ ಸಾ ಸಾಟಿಕಾ ಚೇತಿ ವಸ್ಸಿಕಸಾಟಿಕಾತಿ. ನವಮಂ.

೧೦. ನನ್ದತ್ಥೇರಸಿಕ್ಖಾಪದಂ

೫೪೭. ದಸಮೇ ‘‘ಚತೂಹಿ ಅಙ್ಗುಲೇಹೀ’’ತಿ ಇಮಿನಾ ಚತುರೋ ಅಙ್ಗುಲಾ ಚತುರಙ್ಗುಲಾತಿ ಅಸಮಾಹಾರದಿಗುಂ ದಸ್ಸೇತಿ. ಊನಕಪ್ಪಮಾಣೋತಿ ಭಗವತೋ ಲಾಮಕಪಮಾಣೋ. ಇಮಿನಾ ಓಮಕಸದ್ದಸ್ಸ ಲಾಮಕತ್ಥಂ ದಸ್ಸೇತೀತಿ ದಟ್ಠಬ್ಬನ್ತಿ. ದಸಮಂ.

ರತನವಗ್ಗೋ ನವಮೋ.

ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ

ಖುದ್ದಕವಣ್ಣನಾಯ ಯೋಜನಾ ಸಮತ್ತಾ.