೧. ಅಚೇಲಕಸಿಕ್ಖಾಪದ-ಅತ್ಥಯೋಜನಾ

೨೬೯. ಅಚೇಲಕವಗ್ಗಸ್ಸ ಪಠಮೇ ಪರಿವಿಸತಿ ಏತ್ಥಾತಿ ಪರಿವೇಸನನ್ತಿ ದಸ್ಸೇನ್ತೋ ಆಹ ‘‘ಪರಿವೇಸನಟ್ಠಾನ’’ನ್ತಿ. ಪರಿಬ್ಬಾಜಕಪಬ್ಬಜಸದ್ದಾ ಸಮಾನಾತಿ ಆಹ ‘‘ಪರಿಬ್ಬಾಜಕಸಮಾಪನ್ನೋತಿ ಪಬ್ಬಜ್ಜಂ ಸಮಾಪನ್ನೋ’’ತಿ. ತಿತ್ಥೇನ ಸಮಂ ಪೂರತೀತಿ ಸಮತಿತ್ಥೀಕಂ, ನದೀಆದೀಸು ಉದಕಂ, ಸಮತಿತ್ಥಿಕಂ ವಿಯಾತಿ ಸಮತಿತ್ಥಿಕಂ, ಪತ್ತಭಾಜನೇಸು ಯಾಗುಭತ್ತಂ. ತೇಸನ್ತಿ ಮಾತಾಪಿತೂನಂ ದೇನ್ತಸ್ಸಾತಿ ಸಮ್ಬನ್ಧೋ. ‘‘ದಾಪೇತೀ’’ತಿ ಏತ್ಥ ದಾಧಾತುಯಾ ಸಮ್ಪದಾನಸ್ಸ ಸುವಿಜಾನಿತತ್ತಾ ತಂ ಅದಸ್ಸೇತ್ವಾ ಕಾರಿತಕಮ್ಮಮೇವ ದಸ್ಸೇನ್ತೋ ಆಹ ‘‘ಅನುಪಸಮ್ಪನ್ನೇನಾ’’ತಿ.

೨೭೩. ‘‘ಸನ್ತಿಕೇ’’ತಿಇಮಿನಾ ‘‘ಉಪನಿಕ್ಖಿಪಿತ್ವಾ’’ತಿ ಏತ್ಥ ಉಪಸದ್ದಸ್ಸ ಸಮೀಪತ್ಥಂ ದಸ್ಸೇತಿ. ತೇಸನ್ತಿ ತಿತ್ಥಿಯಾನಂ. ತತ್ಥಾತಿ ಭಾಜನೇ. ಇತೋತಿ ಪತ್ತತೋ. ಇಧಾತಿ ಮಯ್ಹಂ ಭಾಜನೇ. ನನ್ತಿ ಖಾದನೀಯಭೋಜನೀಯಂ. ತಸ್ಸಾತಿ ತಿತ್ಥಿಯಸ್ಸಾತಿ. ಪಠಮಂ.