೩. ಓವಾದವಗ್ಗೋ

೧. ಓವಾದಸಿಕ್ಖಾಪದ-ಅತ್ಥಯೋಜನಾ

೧೪೪. ಭಿಕ್ಖುನಿವಗ್ಗಸ್ಸ ಪಠಮೇ ತೇಸನ್ತಿ ಥೇರಾನಂ. ಮಹಾಕುಲೇಹಿ ನಿಕ್ಖಮಿತ್ವಾ ಪಬ್ಬಜಿತಾತಿ ಯೋಜನಾ. ಕುಲಧೀತರೋ ವಿಜ್ಜಮಾನಗುಣಂ ಕಥಯನ್ತೀತಿ ಸಮ್ಬನ್ಧೋ. ‘‘ಞಾತಿಮನುಸ್ಸಾನ’’ನ್ತಿಪದಂ ‘‘ಕಥಯನ್ತೀ’’ತಿಪದೇ ಸಮ್ಪದಾನಂ. ಕುತೋತಿ ಕಸ್ಸ ಥೇರಸ್ಸ ಸನ್ತಿಕಾತಿ ಅತ್ಥೋ. ತೇಸನ್ತಿ ಥೇರಾನಂ ಗುಣನ್ತಿ ಸಮ್ಬನ್ಧೋ. ‘‘ಕಥೇತು’’ನ್ತಿಪದಮಪೇಕ್ಖಿತ್ವಾ ‘‘ವಿಜ್ಜಮಾನಗುಣೇ’’ತಿ ವತ್ತಬ್ಬೇ ಅವತ್ವಾ ‘‘ವಟ್ಟನ್ತೀ’’ತಿಪದಮಪೇಕ್ಖಿಯ ‘‘ವಿಜ್ಜಮಾನಗುಣಾ’’ತಿ ವುತ್ತಂ. ಹೀತಿ ಸಚ್ಚಂ, ಯಸ್ಮಾ ವಾ. ತತೋತಿ ಕಥನಕಾರಣಾ ಅಭಿಹರಿಂಸೂತಿ ಸಮ್ಬನ್ಧೋ. ತೇನಾತಿ ಅಭಿಹರಣಹೇತುನಾ.

ತೇಸನ್ತಿ ಛಬ್ಬಗ್ಗಿಯಾನಂ. ತಾಸೂತಿ ಭಿಕ್ಖುನೀಸು. ‘‘ಭಿಕ್ಖುನಿಯೋ’’ತಿಪದಂ ‘‘ಉಪಸಙ್ಕಮಿತ್ವಾ’’ತಿಪದೇ ಕಮ್ಮಂ. ಛಬ್ಬಗ್ಗಿಯಾನಂ ಭಿಕ್ಖುನೀಸು ಉಪಸಙ್ಕಮನಂ ಲಾಭತಣ್ಹಾಯ ಹೋತಿ, ಭಿಕ್ಖುನೀನಂ ಛಬ್ಬಗ್ಗೀಸು ಉಪಸಙ್ಕಮನಂ ಚಲಚಿತ್ತತಾಯ ಹೋತೀತಿ ಅಞ್ಞಮಞ್ಞೂಪಸಙ್ಕಮನ್ತಾನಂ ವಿಸೇಸೋ. ತಿರಚ್ಛಾನಭೂತಾ ಕಥಾ ತಿರಚ್ಛಾನಕಥಾ ನಿರತ್ಥಕಕಥಾತಿ ದಸ್ಸೇನ್ತೋ ಆಹ ‘‘ತಿರಚ್ಛಾನಕಥನ್ತೀ’’ತಿ. ಸಗ್ಗಮಗ್ಗಗಮನೇಪೀತಿ ಪಿಸದ್ದೋ ಮೋಕ್ಖಗಮನೇ ಪನ ಕಾ ನಾಮ ಕಥಾತಿ ದಸ್ಸೇತಿ. ರಾಜಾನೋ ಆರಬ್ಭ ಪವತ್ತಾ ಕಥಾ ರಾಜಕಥಾ. ಆದಿಸದ್ದೇನ ಚೋರಕಥಾದಯೋ ಸಙ್ಗಣ್ಹಾತಿ.

೧೪೭. ತೇ ಭಿಕ್ಖೂತಿ ಛಬ್ಬಗ್ಗಿಯಾ ಭಿಕ್ಖೂ ಭವೇಯ್ಯುನ್ತಿ ಸಮ್ಬನ್ಧೋ. ಅದಿಟ್ಠಂ ಸಚ್ಚಂ ಯೇಹೀತಿ ಅದಿಟ್ಠಸಚ್ಚಾ, ತೇಸಂ ಭಾವೋ ಅದಿಟ್ಠಸಚ್ಚತ್ತಂ, ತಸ್ಮಾ ಅದಿಟ್ಠಸಚ್ಚತ್ತಾ ಬನ್ಧಿತ್ವಾತಿ ಯೋಜನಾ. ನೇಸನ್ತಿ ಛಬ್ಬಗ್ಗಿಯಾನಂ. ಅಞ್ಞೇನೇವ ಉಪಾಯೇನಾತಿ ಅಲದ್ಧಸಮ್ಮುತಿತೋ ಅಞ್ಞೇನೇವ ಲದ್ಧಸಮ್ಮುತಿಸಙ್ಖಾತೇನ ಕಾರಣೇನ ಕತ್ತುಕಾಮೋತಿ ಸಮ್ಬನ್ಧೋ. ಪರತೋತಿ ಪರಸ್ಮಿಂ ಪಚ್ಛಾ, ಉಪರೀತಿ ಅತ್ಥೋ. ಕರೋನ್ತೋ ವಾತಿ ಪರಿಬಾಹಿರೇ ಕರೋನ್ತೋ ಏವ ಹುತ್ವಾ ಆಹಾತಿ ಯೋಜನಾ. ಹೀತಿ ಸಚ್ಚಂ, ಯಸ್ಮಾ ವಾ. ಯಸ್ಮಾ ನ ಭೂತಪುಬ್ಬಾನಿ, ಇತಿ ತಸ್ಮಾ ಪರಿಬಾಹಿರಂ ಕರೋನ್ತೋ ವಾತಿ ಅತ್ಥೋ.

ತತ್ಥಾತಿ ‘‘ಅನುಜಾನಾಮೀ’’ತಿಆದಿವಚನೇ. ಸೀಲವಾತಿ ಏತ್ಥ ವನ್ತುಸದ್ದೋ ಪಸಂಸತ್ಥೇ ಚ ಅತಿಸಯತ್ಥೇ ಚ ನಿಚ್ಚಯೋಗತ್ಥೇ ಚ ಹೋತಿ. ತಸ್ಸಾತಿ ಲದ್ಧಸಮ್ಮುತಿಕಸ್ಸ. ತನ್ತಿ ಸೀಲಂ. ಪಾತಿಮೋಕ್ಖಸಂವರಸದ್ದಾನಂ ಕಮ್ಮಧಾರಯಭಾವಂ, ತೇಹಿ ಚ ಸಂವುತಸದ್ದಸ್ಸ ತಪ್ಪುರಿಸಭಾವಂ ದಸ್ಸೇತುಂ ವುತ್ತಂ ‘‘ಪಾತಿಮೋಕ್ಖೋವಾ’’ತಿಆದಿ. ತತ್ಥ ಏವಸದ್ದೇನ ಕಮ್ಮಧಾರಯಭಾವಂ, ಏನಸದ್ದೇನ ಚ ತಪ್ಪುರಿಸಭಾವಂ ದಸ್ಸೇತೀತಿ ದಟ್ಠಬ್ಬಂ.

ವತ್ತತೀತಿ ಅತ್ತಭಾವಂ ಪವತ್ತೇತಿ. ಕಾರಿತಪಚ್ಚಯೋ ಹಿ ಅದಸ್ಸನಂ ಗತೋ. ಇಮಿನಾ ಇರಿಯಾಪಥವಿಹಾರ ದಿಬ್ಬವಿಹಾರ ಬ್ರಹ್ಮವಿಹಾರ ಅರಿಯವಿಹಾರೇಸು ಚತೂಸು ವಿಹಾರೇಸು ಅತ್ತಭಾವವತ್ತನಂ ಇರಿಯಾಪಥವಿಹಾರಂ ದಸ್ಸೇತಿ. ಹೀತಿ ಸಚ್ಚಂ. ಏತನ್ತಿ ‘‘ಪಾತಿಮೋಕ್ಖಸಂವರಸಂವುತೋ ವಿಹರತೀ’’ತಿವಚನಂ. ವಿಭಙ್ಗೇತಿ ಝಾನವಿಭಙ್ಗೇ.

‘‘ಸೀಲ’’ನ್ತಿಆದೀನಿ ಅಟ್ಠ ಪದಾನಿ ತುಲ್ಯಾಧಿಕರಣಾನಿ. ಅಯಂ ಪನೇತ್ಥ ಸಮ್ಬನ್ಧೋ – ಸೀಲಂ ಕುಸಲಾನಂ ಧಮ್ಮಾನಂ ಸಮಾಪತ್ತಿಯಾ ಪತಿಟ್ಠಾ ಆದಿ ಚರಣಂ ಸಂಯಮೋ ಸಂವರೋ ಮೋಕ್ಖಂ ಪಮೋಕ್ಖನ್ತಿ. ಸಮಾಪತ್ತಿಯಾತಿ ಸಮಾಪತ್ತತ್ಥಾಯ. ‘‘ಉಪೇತೋ’’ತಿಆದೀನಿ ಸತ್ತ ಪದಾನಿ ಅಞ್ಞಮಞ್ಞವೇವಚನಾನಿ. ತತ್ಥ ಉಪಪನ್ನೋತಿ ಯುತ್ತೋ ಅನುಯುತ್ತೋ. ಸಮನ್ನಾಗತೋತಿ ಸಮನ್ತತೋ ಅನು ಪುನಪ್ಪುನಂ ಆಗತೋತಿ ಸಮನ್ನಾಗತೋ, ಸಮಙ್ಗೀಭೂತೋತಿ ಅತ್ಥೋ. ಏತ್ಥ ಹಿ ಸಂಸದ್ದೋ ಸಮನ್ತತ್ಥವಾಚಕೋ, ಅನುಸದ್ದೋ ನಉಪಚ್ಛಿನ್ನತ್ಥವಾಚಕೋ. ತೇನಾತಿ ತೇನ ಕಾರಣೇನ. ಪಾಲೇತೀತಿ ಅತ್ತಭಾವಂ ಬಾಧನತೋ ರಕ್ಖತಿ. ಯಪೇತೀತಿ ಅತ್ತಭಾವೋ ಪವತ್ತತಿ. ಯಾಪೇತೀತಿ ಅತ್ತಭಾವಂ ಪವತ್ತಾಪೇತಿ. ಯಪ ಯಾಪನೇ. ಯಾಪನಂ ಪವತ್ತನನ್ತಿ ಹಿ ಧಾತುಪಾಠೇಸು ವುತ್ತಂ (ಸದ್ದನೀತಿಧಾತುಮಾಲಾಯಂ ೧೮ ಪಕಾರನ್ತಧಾತು). ವಿಹರತೀತಿ ಏತ್ಥ ಏಕೋ ಆಕಾರತ್ಥವಾಚಕೋ ಇತಿಸದ್ದೋ ಲುತ್ತನಿದ್ದಿಟ್ಠೋ, ಇತಿ ವುಚ್ಚತಿ, ಇತಿ ವುತ್ತನ್ತಿ ವಾ ಯೋಜನಾ.

ಆಚಾರಗೋಚರಸದ್ದಾನಂ ದ್ವನ್ದಭಾವಂ, ತೇಹಿ ಚ ಸಮ್ಪನ್ನಸದ್ದಸ್ಸ ತಪ್ಪುರಿಸಭಾವಂ ದಸ್ಸೇನ್ತೋ ಆಹ ‘‘ಆಚಾರಗೋಚರಸಮ್ಪನ್ನೋ’’ತಿಆದಿ. ತತ್ಥ ಚಸದ್ದೇನ ದ್ವನ್ದಭಾವಂ, ಏನಸದ್ದೇನ ಚ ತಪ್ಪುರಿಸಭಾವಂ ದಸ್ಸೇತಿ. ಅಣುಸದ್ದೋ ಅಪ್ಪತ್ಥೋ, ಮತ್ತಸದ್ದೋ ಪಮಾಣತ್ಥೋತಿ ಆಹ ‘‘ಅಪ್ಪಮತ್ತಕೇಸೂ’’ತಿ. ‘‘ದಸ್ಸನಸೀಲೋ’’ತಿಇಮಿನಾ ‘‘ದಸ್ಸಾವೀ’’ತಿಏತ್ಥ ಆವೀಸದ್ದಸ್ಸ ತಸ್ಸೀಲತ್ಥಭಾವಂ ದಸ್ಸೇತಿ. ‘‘ಸಮಾದಾಯಾ’’ತಿ ಏತ್ಥ ಸಂಪುಬ್ಬಆಪುಬ್ಬಸ್ಸ ದಾಸದ್ದಸ್ಸ ಕಮ್ಮಾಪೇಕ್ಖತ್ತಾ ತಸ್ಸ ಕಮ್ಮಂ ದಸ್ಸೇತುಂ ವುತ್ತಂ ‘‘ತಂ ತಂ ಸಿಕ್ಖಾಪದ’’ನ್ತಿ. ಇಮಿನಾ ‘‘ಸಿಕ್ಖಾಪದೇಸೂ’’ತಿ ಉಪಯೋಗತ್ಥೇ ಭುಮ್ಮವಚನನ್ತಿ ದಸ್ಸೇತಿ. ಅಥ ವಾ ಸಿಕ್ಖಾಪದೇಸೂತಿ ನಿದ್ಧಾರಣತ್ಥೇ ಭುಮ್ಮವಚನಮೇತಂ. ‘‘ತಂ ತಂ ಸಿಕ್ಖಾಪದ’’ನ್ತಿ ಕಮ್ಮಂ ಪನ ಅಜ್ಝಾಹರಿತಬ್ಬನ್ತಿ ದಸ್ಸೇತಿ. ‘‘ಸಮಾದಾಯಾ’’ತಿ ಏತ್ಥ ಸಂಸದ್ದಸ್ಸ ಚ ಆಪುಬ್ಬಸ್ಸ ದಾಸದ್ದಸ್ಸ ಚ ಯಕಾರಸ್ಸ ಚ ಅತ್ಥಂ ದಸ್ಸೇತುಂ ‘‘ಸಾಧುಕಂ ಗಹೇತ್ವಾ’’ತಿ ವುತ್ತಂ. ಏತ್ಥಾತಿ ಇಮಿಸ್ಸಂ ಅಟ್ಠಕಥಾಯಂ. ವಿತ್ಥಾರೋ ಪನ ಗಹೇತಬ್ಬೋತಿ ಯೋಜನಾ. ಯೋತಿ ಕುಲಪುತ್ತೋ.

ಅಸ್ಸಾತಿ ಲದ್ಧಸಮ್ಮುತಿಕಸ್ಸ. ಯಂ ತಂ ಬಹು ಸುತಂ ನಾಮ ಅತ್ಥಿ, ತಂ ನ ಸುತಮತ್ತಮೇವಾತಿ ಯೋಜನಾ. ಮಞ್ಜೂಸಾಯನ್ತಿ ಪೇಳಾಯಂ. ಸಾ ಹಿ ಸಾಮಿಕಸ್ಸ ಸಧನತ್ತಂ ಮಞ್ಞತೇ ಇಮಾಯಾತಿ ‘‘ಮಞ್ಜೂಸಾ’’ತಿ ವುಚ್ಚತಿ. ಮಞ್ಜೂಸಾಯಂ ರತನಂ ಸನ್ನಿಚಿತಂ ವಿಯ ಸುತಂ ಸನ್ನಿಚಿತಂ ಅಸ್ಮಿಂ ಪುಗ್ಗಲೇತಿ ಯೋಜನಾ, ಏತೇನಾತಿ ‘‘ಸನ್ನಿಚಿತ’’ನ್ತಿಪದೇನ, ದಸ್ಸೇತೀತಿ ಸಮ್ಬನ್ಧೋ. ಸೋತಿ ಲದ್ಧಸಮ್ಮುತಿಕೋ ಭಿಕ್ಖು. ಸನ್ನಿಚಿತರತನಸ್ಸೇವಾತಿ ಸನ್ನಿಚಿತರತನಸ್ಸ ಇವ. ತನ್ತಿ ‘‘ಯೇ ತೇ ಧಮ್ಮಾ’’ತಿಆದಿವಚನಂ. ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ. ಅಸ್ಸಾತಿ ಲದ್ಧಸಮ್ಮುತಿಕಸ್ಸ ಭಿಕ್ಖುನೋ. ತತ್ಥಾತಿ ‘‘ವಚಸಾ ಪರಿಚಿತಾ’’ತಿಆದಿವಚನೇ. ಏವಮತ್ಥೋ ವೇದಿತಬ್ಬೋತಿ ಯೋಜನಾ. ಪಗುಣಾತಿ ಉಜುಕಾ. ಉಜುಕೋ ಹಿ ಅಜಿಮ್ಹತ್ತಾ ಪಕಟ್ಠೋ ಉತ್ತಮೋ ಗುಣೋತಿ ಅತ್ಥೇನ ‘‘ಪಗುಣೋ’’ತಿ ವುಚ್ಚತಿ. ಅನುಪೇಕ್ಖಿತಾತಿ ಪುನಪ್ಪುನಂ ಉಪಗನ್ತ್ವಾ ಇಕ್ಖಿತಾ, ಪಸ್ಸಿತಾ ದಸ್ಸಿತಾತಿ ಅತ್ಥೋ. ಅತ್ಥತೋತಿ ಅಭಿಧೇಯ್ಯತ್ಥತೋ, ಅಟ್ಠಕಥಾತೋತಿ ಅತ್ಥೋ. ಕಾರಣತೋತಿ ಧಮ್ಮತೋ, ಪಾಳಿತೋತಿ ಅತ್ಥೋ. ದಿಟ್ಠಿಸದ್ದಸ್ಸ ಪಞ್ಞಾಸದ್ದವೇವಚನತ್ತಾ ‘‘ಪಞ್ಞಾಯಾ’’ತಿ ವುತ್ತಂ. ಸುಪಚ್ಚಕ್ಖಕತಾತಿ ಸುಟ್ಠು ಅಕ್ಖಾನಂ ಇನ್ದ್ರಿಯಾನಂ ಪಟಿಮುಖಂ ಕತಾ.

‘‘ಬಹುಸ್ಸುತೋ’’ತಿ ಏತ್ಥ ಬಹುಸ್ಸುತಸ್ಸ ತಿವಿಧಭಾವಂ ದಸ್ಸೇನ್ತೋ ಆಹ ‘‘ಅಯಂ ಪನಾ’’ತಿಆದಿ. ನಿಸ್ಸಯತೋ ಮುಚ್ಚತೀತಿ ನಿಸ್ಸಯಮುಚ್ಚನಕೋ. ಪರಿಸಂ ಉಪಟ್ಠಾಪೇತೀತಿ ಪರಿಸುಪಟ್ಠಾಕೋ. ಭಿಕ್ಖುನಿಯೋ ಓವದತೀತಿ ಭಿಕ್ಖುನೋವಾದಕೋ. ತತ್ಥಾತಿ ತಿವಿಧೇಸು ಬಹುಸ್ಸುತೇಸು. ನಿಸ್ಸಯಮುಚ್ಚನಕೇನ ಏತ್ತಕಂ ಉಗ್ಗಹೇತಬ್ಬನ್ತಿ ಸಮ್ಬನ್ಧೋ. ಉಪಸಮ್ಪದಾಯಾತಿ ಉಪಸಮ್ಪಾದೇತ್ವಾ. ಪಞ್ಚ ವಸ್ಸಾನಿ ಏತಸ್ಸಾತಿ ಪಞ್ಚವಸ್ಸೋ. ತೇನ ಉಗ್ಗಹೇತಬ್ಬನ್ತಿ ಯೋಜನಾ. ಸಬ್ಬನ್ತಿಮೇನಾತಿ ಸಬ್ಬೇಸಂ ಪರಿಚ್ಛೇದಾನಂ ಅನ್ತೇ ಲಾಮಕೇ ಪವತ್ತೇನ. ಪಗುಣಾತಿ ಅಜಿಮ್ಹಾ ಉಜುಕಾ. ವಾಚುಗ್ಗತಾತಿ ತಸ್ಸೇವ ವೇವಚನಂ. ಯಸ್ಸ ಹಿ ಪಾಳಿಪಾಠಾ ಸಜ್ಝಾಯನಕಾಲೇ ಪಗುಣಾ ಹೋನ್ತಿ, ತಸ್ಸ ವಾಚುಗ್ಗತಾ. ಯಸ್ಸ ವಾ ಪನ ವಾಚುಗ್ಗತಾ ಹೋನ್ತಿ, ತಸ್ಸ ಪಗುಣಾ. ತಸ್ಮಾ ತಾನಿ ಪದಾನಿ ಅಞ್ಞಮಞ್ಞಕಾರಣವೇವಚನಾನಿ. ಪಕ್ಖದಿವಸೇಸೂತಿ ಜುಣ್ಹಪಕ್ಖಕಾಳಪಕ್ಖಪರಿಯಾಪನ್ನೇಸು ದಿವಸೇಸು. ಧಮ್ಮಸಾವನತ್ಥಾಯಾತಿ ಸಮ್ಪತ್ತಾನಂ ಪರಿಸಾನಂ ಧಮ್ಮಸ್ಸ ಸಾವನತ್ಥಾಯ ಸುಣಾಪನತ್ಥಾಯಾತಿ ಅಧಿಪ್ಪಾಯೋ. ಸಾವನತ್ಥಾಯಾತಿ ಏತ್ಥ ಯುಪಚ್ಚಯಪರತ್ತಾ ಕಾರಿತಪಚ್ಚಯೋ ಲೋಪೋ ಹೋತೀತಿ ದಟ್ಠಬ್ಬಂ. ತಸ್ಮಾ ಸಾವೀಯತೇ ಸುಣಾಪೀಯತೇ ಸಾವನನ್ತಿ ವಚನತ್ಥೋ ಕಾತಬ್ಬೋ. ಭಾಣವಾರಾ ಉಗ್ಗಹೇತಬ್ಬಾತಿ ಸಮ್ಬನ್ಧೋ. ಸಮ್ಪತ್ತಾನನ್ತಿ ಅತ್ತನೋ ಸನ್ತಿಕಂ ಸಮ್ಪತ್ತಾನಂ. ಪರಿಕಥನತ್ಥಾಯಾತಿ ಪರಿಸ್ಸಙ್ಗೇನ ಆಲಿಙ್ಗನೇನ ಕಥನತ್ಥಂ, ಅಪ್ಪಸದ್ದಸಙ್ಖಾತಾಯ ವಾಚಾಯ ಕಥನತ್ಥನ್ತಿ ಅತ್ಥೋ. ‘‘ಕಥಾಮಗ್ಗೋ’’ತಿ ವುತ್ತತ್ತಾ ವತ್ಥುಕಥಾಯೇವ ಅಧಿಪ್ಪೇತಾ, ನ ಸುತ್ತಸಙ್ಖಾತೋ ಪಾಳಿಪಾಠೋ. ಅನು ಪಚ್ಛಾ, ಪುನಪ್ಪುನಂ ವಾ ದಾಯಕಾ ಮೋದನ್ತಿ ಏತಾಯಾತಿ ಅನುಮೋದನಾ. ಝಾನಂ ವಾ ಮಗ್ಗೋ ವಾ ಫಲಂ ವಾ ಸಮಣಧಮ್ಮೋ ನಾಮ. ತಸ್ಸ ಕರಣತ್ಥಂ ಉಗ್ಗಹೇತಬ್ಬನ್ತಿ ಯೋಜನಾ. ಹೀತಿ ಸಚ್ಚಂ, ಯಸ್ಮಾ ವಾ. ಚತೂಸು ದಿಸಾಸು ಅಪಟಿಹತೋತಿ ಚಾತುದ್ದಿಸೋ, ಅಪಟಿಹತತ್ಥೇ ಣಪಚ್ಚಯೋ.

ಪರಿಸುಪಟ್ಠಾಪಕೇನ ಕಾತಬ್ಬಾತಿ ಯೋಜನಾ. ಅಭಿವಿನಯೇತಿ ಅಞ್ಞಮಞ್ಞಪರಿಚ್ಛಿನ್ನೇ ವಿನಯಪಿಟಕೇ. ದ್ವೇ ವಿಭಙ್ಗಾತಿ ಭಿಕ್ಖುವಿಭಙ್ಗೋ ಚ ಭಿಕ್ಖುನಿವಿಭಙ್ಗೋ ಚ. ಅಸಕ್ಕೋನ್ತೇನ ಪರಿಸುಪಟ್ಠಾಪಕೇನ ಭಿಕ್ಖುನಾತಿ ಸಮ್ಬನ್ಧೋ. ಏವಂ ಅತ್ತನೋ ಅತ್ಥಾಯ ಉಗ್ಗಹೇತಬ್ಬಂ ದಸ್ಸೇತ್ವಾ ಇದಾನಿ ಪರಿಸಾಯ ಅತ್ಥಾಯ ಉಗ್ಗಹೇತಬ್ಬಂ ದಸ್ಸೇನ್ತೋ ಆಹ ‘‘ಪರಿಸಾಯ ಪನಾ’’ತಿಆದಿ. ಅಭಿಧಮ್ಮೇತಿ ಅಞ್ಞಮಞ್ಞಪರಿಚ್ಛಿನ್ನೇ ಸುತ್ತನ್ತಪಿಟಕೇ ಏವ, ನ ಅಭಿಧಮ್ಮಪಿಟಕೇ. ತಯೋ ವಗ್ಗಾತಿ ಸಗಾಥಾವಗ್ಗೋ ನಿದಾನವಗ್ಗೋ ಖನ್ಧವಗ್ಗೋತಿ ತಯೋ ವಗ್ಗಾ. ವಾಸದ್ದೋ ಅನಿಯಮವಿಕಪ್ಪತ್ಥೋ. ಏಕನ್ತಿ ಏಕಂ ನಿಪಾತಂ. ತತೋ ತತೋತಿ ನಿಕಾಯತೋ. ಸಮುಚ್ಚಯಂ ಕತ್ವಾತಿ ರಾಸಿಂ ಕತ್ವಾ. ನ ವುತ್ತನ್ತಿ ಅಟ್ಠಕಥಾಸು ನ ಕಥಿತಂ. ಯಸ್ಸ ಪನ ನತ್ಥಿ, ಸೋ ನ ಲಭತೀತಿ ಯೋಜನಾ. ಸುತ್ತನ್ತೇ ಚಾತಿ ಸುತ್ತನ್ತಪಿಟಕೇ ಪನ. ಉಗ್ಗಹಿತೋತಿ ಸರೂಪಕಥನೇನ ಗಹಿತೋ, ಉಚ್ಚಾರಿತೋತಿ ಅತ್ಥೋ. ದಿಸಾಪಾಮೋಕ್ಖೋತಿ ದಿಸಾಸು ಠಿತಾನಂ ಭಿಕ್ಖುಆದೀನಂ ಪಾಮೋಕ್ಖೋ. ಯೇನ ಕಾಮಂ ಗಮೋತಿ ಯಥಾಕಾಮಂ ಗಮೋ.

ಚತೂಸು ನಿಕಾಯೇಸೂತಿ ಖುದ್ದಕನಿಕಾಯತೋ ಅಞ್ಞೇಸು ದೀಘನಿಕಾಯಾದೀಸು. ಏಕಸ್ಸಾತಿ ಅಞ್ಞತರಸ್ಸ ಏಕಸ್ಸ. ಏಕನಿಕಾಯೇನಾತಿ ಏಕಸ್ಮಿಂ ನಿಕಾಯೇ ಲದ್ಧನಯೇನ. ಹೀತಿ ಸಚ್ಚಂ, ಯಸ್ಮಾ ವಾ. ತತ್ಥಾತಿ ಚತುಪ್ಪಕರಣಸ್ಸ ಅಟ್ಠಕಥಾಯಂ. ನಾನತ್ಥನ್ತಿ ನಾನಾಪಯೋಜನಂ. ತನ್ತಿ ವಿನಯಪಿಟಕಂ. ಏತ್ತಾವತಾತಿ ಏತ್ತಕಪಮಾಣೇನ ಪಗುಣೇನ. ಹೋತೀತಿ ಇತಿಸದ್ದೋ ಪರಿಸಮಾಪನತ್ಥೋ. ಇತಿ ಪರಿಸಮಾಪನಂ ವೇದಿತಬ್ಬನ್ತಿ ಯೋಜನಾ.

ಉಭಯಾನಿ ಖೋ ಪನಸ್ಸಾತಿ ಆದಿ ಪನ ವುತ್ತನ್ತಿ ಸಮ್ಬನ್ಧೋ. ಅಞ್ಞಸ್ಮಿನ್ತಿ ವಿನಯಪಿಟಕತೋ ಇತರಸ್ಮಿಂ. ತತ್ಥಾತಿ ‘‘ಉಭಯಾನಿ ಖೋ ಪನಸ್ಸಾ’’ತಿಆದಿವಚನೇ. ಯಥಾ ಯೇನಾಕಾರೇನ ಆಗತಾನಿ, ತಂ ಆಕಾರಂ ದಸ್ಸೇತುನ್ತಿ ಯೋಜನಾ. ಪದಪಚ್ಚಾಭಟ್ಠಸಙ್ಕರದೋಸವಿರಹಿತಾನೀತಿ ಪದಾನಂ ಪಚ್ಚಾಭಟ್ಠಸಙ್ಕರಭೂತೇಹಿ ದೋಸೇಹಿ ವಿರಹಿತಾನಿ. ಏತ್ಥ ಚ ಪದಪಚ್ಚಾಭಟ್ಠನ್ತಿ ಪದಾನಂ ಪಟಿನಿವತ್ತಿತ್ವಾ ಆಭಸ್ಸನಂ ಗಳನಂ, ಚುತನ್ತಿ ಅತ್ಥೋ. ಪದಸಙ್ಕರನ್ತಿ ಪದಾನಂ ವಿಪತ್ತಿ, ವಿನಾಸೋತಿ ಅತ್ಥೋ. ‘‘ಸುತ್ತಸೋ’’ತಿ ಸಾಮಞ್ಞತೋ ವುತ್ತೇಪಿ ಖನ್ಧಕಪರಿವಾರಸುತ್ತಂ ಏವ ಗಹೇತಬ್ಬನ್ತಿ ಆಹ ‘‘ಖನ್ಧಕಪರಿವಾರತೋ’’ತಿ. ಅನುಬ್ಯಞ್ಜನಸೋತಿ ಏತ್ಥ ಬ್ಯಞ್ಜನಸದ್ದೋ ಅಕ್ಖರಸ್ಸ ಚ ಪದಸ್ಸ ಚ ವಾಚಕೋತಿ ಆಹ ‘‘ಅಕ್ಖರಪದಪಾರಿಪೂರಿಯಾ ಚಾ’’ತಿ. ಹೀತಿ ಸಚ್ಚಂ, ಯಸ್ಮಾ ವಾ.

‘‘ಸಿಥಿಲಧನಿತಾದೀನ’’ನ್ತಿಪದಂ ‘‘ವಚನೇನಾ’’ತಿಪದೇ ಕಮ್ಮಂ, ‘‘ವಚನೇನಾ’’ತಿಪದಂ ‘‘ಸಮ್ಪನ್ನಾಗತೋ’’ತಿಪದೇ ಹೇತು, ‘‘ವಿಸ್ಸಟ್ಠಾಯ ಅನೇಲಗಳಾಯ ಅತ್ಥಸ್ಸ ವಿಞ್ಞಾಪನಿಯಾ’’ತಿಪದಾನಿ ‘‘ವಾಚಾಯಾ’’ತಿಪದೇ ವಿಸೇಸನಾನಿ. ಸಿಥಿಲಧನಿತಾದೀನನ್ತಿ ಆದಿಸದ್ದೇನ ನಿಗ್ಗಹಿತವಿಮುತ್ತಸಮ್ಬನ್ಧವವತ್ಥಿತದೀಘ ರಸ್ಸ ಗರು ಲಹು ಸಙ್ಖಾತಾ ಅಟ್ಠ ಬ್ಯಞ್ಜನಬುದ್ಧಿಯೋ ಸಙ್ಗಣ್ಹಾತಿ. ಯಥಾವಿಧಾನವಚನೇನಾತಿ ಅಕ್ಖರಚಿನ್ತಕಾನಂ ಯಥಾ ಸಂವಿದಹನವಚನೇನ. ವಾಚಾಯೇವ ಕರೀಯತಿ ಕಥೀಯತಿ ಉಚ್ಚಾರೀಯತಿ ವಾಕ್ಕರಣಂ ಚಕಾರಸ್ಸ ಕಕಾರಂ ಕತ್ವಾ. ಹೀತಿ ತದೇವ ಯುತ್ತಂ. ಮಾತುಗಾಮೋ ಯಸ್ಮಾ ಸರಸಮ್ಪತ್ತಿರತೋ, ತಸ್ಮಾ ಹೀಳೇತೀತಿ ಯೋಜನಾ. ‘‘ಸರಸಮ್ಪತ್ತಿರಹಿತ’’ನ್ತಿಪದಂ ‘‘ವಚನ’’ನ್ತಿಪದೇ ವಿಸೇಸನಭಾವೇನ ವಿಸೇಸಂ ಕತ್ವಾ ‘‘ಹೀಳೇತೀ’’ತಿಪದೇ ಹೇತುಭಾವೇನ ಸಮ್ಪಜ್ಜನತೋ ಹೇತುಅನ್ತೋಗಧವಿಸೇಸನನ್ತಿ ದಟ್ಠಬ್ಬಂ. ಸಬ್ಬಾಸನ್ತಿ ಭಿಕ್ಖುನೀನಂ. ‘‘ಸೀಲಾಚಾರಸಮ್ಪತ್ತಿಯಾ’’ತಿಇಮಿನಾ ಜಾತಿ ಗೋತ್ತ ರೂಪ ಭೋಗಾದಿನಾತಿಅತ್ಥಂ ನಿವತ್ತೇತಿ. ಕಾರಣಞ್ಚಾತಿ ಅಟ್ಠಕಥಞ್ಚ. ತಜ್ಜೇತ್ವಾತಿ ಉಬ್ಬೇಜೇತ್ವಾ. ತಾಸನ್ತಿ ಭಿಕ್ಖುನೀನಂ. ಗಿಹಿಕಾಲೇತಿ ಭಿಕ್ಖುನೋವಾದಕಸ್ಸ ಗಿಹಿಕಾಲೇ ಅನಜ್ಝಾಪನ್ನಪುಬ್ಬೋ ಹೋತೀತಿ ಸಮ್ಬನ್ಧೋ. ಹಿ ತದೇವ ಯುತ್ತಂ. ‘‘ಮಾತುಗಾಮೋ’’ತಿಪದಂ ‘‘ನ ಕರೋತೀ’’ತಿಪದೇ ಸುದ್ಧಕತ್ತಾ, ‘‘ಉಪ್ಪಾದೇತೀ’’ತಿಪದೇ ಹೇತುಕತ್ತಾ. ಠಿತಸ್ಸ ಭಿಕ್ಖುನೋ ಧಮ್ಮದೇಸನಾಯಾಪೀತಿ ಯೋಜನಾ. ಅಪಿಸದ್ದೋ ಗರಹತ್ಥೋ. ವಿಸಭಾಗೇಹೀತಿ ವಿರುದ್ಧೇಹಿ ವತ್ಥಾರಮ್ಮಣೇಹಿ. ಅಯುತ್ತಟ್ಠಾನೇತಿ ಪಬ್ಬಜಿತಾನಂ ಅನನುರೂಪಟ್ಠಾನೇ. ಛನ್ದರಾಗನ್ತಿ ಬಲವತಣ್ಹಂ. ತೇನಾತಿ ತೇನ ಹೇತುನಾ.

‘‘ಏತ್ಥ ಚಾ’’ತಿಆದಿಮ್ಹಿ ಅಯಂ ಪನ ಸಙ್ಗಹೋ –

‘‘ಸೀಲವಾ ಬಹುಸ್ಸುತೋ ಚ, ಸ್ವಾಗತೋ ಚ ಸುವಾಚಕೋ;

ಪಿಯೋ ಪಟಿಬಲೋ ಚಾಪಿ, ನಜ್ಝಾಪನ್ನೋ ಚ ವೀಸತೀ’’ತಿ.

೧೪೮. ವತ್ಥುಸ್ಮಿನ್ತಿ ಅಟ್ಠುಪ್ಪತ್ತಿಯಂ. ಕಕಾರಲೋಪಂ ಕತ್ವಾ ಗರುಧಮ್ಮಾತಿ ವುಚ್ಚನ್ತೀತಿ ಆಹ ‘‘ಗರುಕೇಹಿ ಧಮ್ಮೇಹೀ’’ತಿ. ತೇತಿ ಗರುಧಮ್ಮಾ. ಹೀತಿ ಯಸ್ಮಾ. ‘‘ಏಕತೋ’’ತಿ ಸಾಮಞ್ಞೇನ ವುತ್ತವಚನಸ್ಸ ವಿಸೇಸೇನ ಗಹೇತಬ್ಬತಂ ದಸ್ಸೇತುಂ ವುತ್ತಂ ‘‘ಭಿಕ್ಖುನೀನಂ ಸನ್ತಿಕೇ’’ತಿ. ಯಥಾವತ್ಥುಕಮೇವಾತಿ ಪಾಚಿತ್ತಿಯಮೇವ. ತಞ್ಹಿ ವತ್ಥುಸ್ಸ ಆಪತ್ತಿಕಾರಣಸ್ಸ ಅನುರೂಪಂ ಪವತ್ತತ್ತಾ ‘‘ಯಥಾವತ್ಥುಕ’’ನ್ತಿ ವುಚ್ಚತಿ.

೧೪೯. ಪಾತೋತಿ ಪಗೇವ, ಪಠಮನ್ತಿ ಅತ್ಥೋ. ಅಸಮ್ಮಟ್ಠಂ ಸಮ್ಮಜ್ಜೀತಬ್ಬನ್ತಿ ಸಮ್ಬನ್ಧೋ. ಅಸಮ್ಮಜ್ಜನೇ ದೋಸಂ ಪಾಕಟಂ ಕರೋನ್ತೋ ಆಹ ‘‘ಅಸಮ್ಮಟ್ಠಂ ಹೀ’’ತಿಆದಿ. ಹೀತಿ ತಪ್ಪಾಕಟೀಕರಣಜೋತಕೋ. ತನ್ತಿ ಪರಿವೇಣಂ. ದಿಸ್ವಾ ಭವೇಯ್ಯುನ್ತಿ ಸಮ್ಬನ್ಧೋ. ತೇನಾತಿ ಅಸೋತುಕಾಮಾನಂ ವಿಯ ಭವನಹೇತುನಾ. ಪರಿವೇಣಸಮ್ಮಜ್ಜನಸ್ಸ ಆನಿಸಂಸಂ ದಸ್ಸೇತ್ವಾ ಪಾನೀಯಪರಿಭೋಜನೀಯಉಪಟ್ಠಾನಸ್ಸ ತಮೇವ ದಸ್ಸೇನ್ತೋ ಆಹ ‘‘ಅನ್ತೋ ಗಾಮತೋ ಪನಾ’’ತಿ ಆದಿ. ತಸ್ಮಿನ್ತಿ ಪಾನೀಯಪರಿಭೋಜನೀಯೇ.

ಸಾಖಾಭಙ್ಗಮ್ಪೀತಿ ಭಞ್ಜಿತಬ್ಬಸಾಖಮ್ಪಿ. ದುತಿಯೋತಿ ವಿಞ್ಞೂ ಪುರಿಸೋ ದುತಿಯೋ. ನಿಸೀದಿತಬ್ಬಟ್ಠಾನಂ ದಸ್ಸೇನ್ತೋ ಆಹ ‘‘ನಿಸೀದಿತಬ್ಬ’’ನ್ತಿಆದಿ. ‘‘ವಿಹಾರಮಜ್ಝೇ’’ತಿ ಸಾಮಞ್ಞತೋ ವತ್ವಾ ವಿಸೇಸತೋ ದಸ್ಸೇತುಂ ವುತ್ತಂ ‘‘ದ್ವಾರೇ’’ತಿ. ಓಸರನ್ತಿ ಅವಸರನ್ತಿ ಏತ್ಥಾತಿ ಓಸರಣಂ, ತಞ್ಚ ತಂ ಠಾನಞ್ಚೇತಿ ಓಸರಣಟ್ಠಾನಂ, ತಸ್ಮಿಂ. ಸಮಗ್ಗತ್ಥಾತಿ ಏತ್ಥ ಸಂಪುಬ್ಬೋ ಚ ಆಪುಬ್ಬೋ ಚ ಗಮುಸದ್ದೋ ಹೋತಿ, ತತೋ ಹಿಯ್ಯತ್ತನೀಸಙ್ಖಾತಂ ತ್ಥವಚನಂ ವಾ ಹೋತಿ, ಪಞ್ಚಮೀಸಙ್ಖಾತಸ್ಸ ಥವಚನಸ್ಸ ತ್ಥತ್ತಂ ವಾ ಹೋತಿ, ಸಂಯೋಗಪರತ್ತಾ ಆ ಉಪಸಗ್ಗೋ ರಸ್ಸೋ ಚ ಹೋತಿ, ಇತಿ ಅತ್ಥಂ ದಸ್ಸೇನ್ತೋ ಆಹ ‘‘ಸಮ್ಮಾ ಆಗತತ್ಥಾ’’ತಿ. ತತ್ಥ ‘‘ಸಮ್ಮಾ’’ತಿಪದೇನ ಸಂಸದ್ದಸ್ಸ ಅತ್ಥಂ ದಸ್ಸೇತಿ, ‘‘ಆ’’ಇತಿಪದೇನ ಆತ್ಯೂಪಸಗ್ಗಂ, ‘‘ಗತ’’ಇತಿಪದೇನ ಗಮುಧಾತುಂ, ‘‘ತ್ಥ’’ಇತಿಪದೇನ ಹಿಯ್ಯತ್ತನೀಸಙ್ಖಾತಂ ತ್ಥವಚನಂ ವಾ, ಪಞ್ಚಮೀಸಙ್ಖಾತಸ್ಸ ಥವಚನಸ್ಸ ತ್ಥತ್ತಂ ವಾ ದಸ್ಸೇತಿ. ಅಯಂ ಪನೇತ್ಥತ್ಥೋ – ಸಮಂ ತುಮ್ಹೇ ಆಗತತ್ಥಾತಿ. ಪಞ್ಚಮೀಸಙ್ಖಾತಸ್ಸ ಥವಚನಸ್ಸ ತ್ಥತ್ತಕಾಲೇ ಸಮಂ ತುಮ್ಹೇ ಆಗಾ ಅತ್ಥ ಭವಥಾತಿ. ‘‘ಆಗಚ್ಛನ್ತೀ’’ತಿಪದೇನ ‘‘ವತ್ತನ್ತೀ’’ತಿ ಏತ್ಥ ವತುಧಾತುಯಾ ಅತ್ಥಂ ದಸ್ಸೇತಿ, ‘‘ಪಗುಣಾ ವಾಚುಗ್ಗತಾ’’ತಿಪದೇಹಿ ಅಧಿಪ್ಪಾಯಂ ದಸ್ಸೇತಿ. ಪಾಳೀತಿ ಗರುಧಮ್ಮಪಾಳಿ.

ತತ್ಥಾತಿ ತಸ್ಸಂ ಪಾಳಿಯಂ, ತೇಸು ವಾ ಅಭಿವಾದನಾದೀಸು ಚತೂಸು. ಮಗ್ಗಸಮ್ಪದಾನನ್ತಿ ಮಗ್ಗಂ ಪರಿಹರಿತ್ವಾ ಭಿಕ್ಖುಸ್ಸ ಓಕಾಸದಾನಂ. ಬೀಜನನ್ತಿ ಬೀಜನಿಯಾ ವಿಧೂಪನಂ. ಪಾನೀಯಾಪುಚ್ಛನನ್ತಿ ಪಾನೀಯಸ್ಸ ಆಪುಚ್ಛನಂ. ಆದಿಸದ್ದೇನ ಪರಿಭೋಜನೀಯಾಪುಚ್ಛನಾದಿಕಂ ಸಙ್ಗಣ್ಹಾತಿ. ಏತ್ಥ ಚಾತಿ ಏತೇಸು ಚತೂಸು ಅಭಿವಾದನಾದೀಸು. ‘‘ಅನ್ತೋ ಗಾಮೇ ವಾ’’ತಿಆದೀನಿ ಛ ಪದಾನಿ ‘‘ಕಾತಬ್ಬಮೇವಾ’’ತಿಪದೇ ಆಧಾರೋ. ರಾಜುಸ್ಸಾರಣಾಯಾತಿ ರಞ್ಞೋ ಆನುಭಾವೇನ ಜನಾನಂ ಉಸ್ಸಾರಣಾಯ. ಮಹಾಭಿಕ್ಖುಸಙ್ಘೋ ಸನ್ನಿಪತತಿ ಏತ್ಥಾತಿ ಮಹಾಸನ್ನಿಪಾತಂ, ತಸ್ಮಿಂ ಮಹಾಸನ್ನಿಪಾತೇ ಠಾನೇ ನಿಸಿನ್ನೇ ಸತೀತಿ ಯೋಜನಾ. ಪಚ್ಚುಟ್ಠಾನನ್ತಿ ಪಟಿಕಚ್ಚೇವ ಉಟ್ಠಾನಂ. ತಂ ತನ್ತಿ ಸಾಮೀಚಿಕಮ್ಮಂ.

ಸಕ್ಕತ್ವಾತಿ ಚಿತ್ತಿಂ ಕತ್ವಾ, ಸಂ ಆದರಂ ಕತ್ವಾತಿ ಅತ್ಥೋ. ತೇನಾಹ ‘‘ಯಥಾ ಕತೋ’’ತಿಆದಿ. ತಿಣ್ಣಂ ಕಿಚ್ಚಾನನ್ತಿ ‘‘ಸಕ್ಕತ್ವಾ ಗರುಂಕತ್ವಾ ಮಾನೇತ್ವಾ’’ತಿಸಙ್ಖಾತಾನಂ ತಿಣ್ಣಂ ಕಿಚ್ಚಾನಂ. ಅನೀಯಸದ್ದೋ ಕಮ್ಮತ್ಥೋತಿ ಆಹ ‘‘ನ ಅತಿಕ್ಕಮಿತಬ್ಬೋ’’ತಿ.

ನತ್ಥಿ ಭಿಕ್ಖು ಏತ್ಥಾತಿ ಅಭಿಕ್ಖುಕೋ ಆವಾಸೋ, ಸೋ ಕಿತ್ತಕೇ ಠಾನೇ ಅಭಿಕ್ಖುಕೋ, ಯೋ ಆವಾಸೋ ಅಭಿಕ್ಖುಕೋ ನಾಮ ಹೋತೀತಿ ಆಹ ‘‘ಸಚೇ’’ತಿ ಆದಿ. ‘‘ಉಪಸ್ಸಯತೋ’’ತಿಪದಂ ‘‘ಅಬ್ಭನ್ತರೇ’’ತಿಪದೇ ಅಪಾದಾನಂ. ಏತ್ಥಾತಿ ಅಭಿಕ್ಖುಕೇ ಆವಾಸೇ. ಹೀತಿ ಸಚ್ಚಂ. ತತೋತಿ ಅಡ್ಢಯೋಜನಬ್ಭನ್ತರೇ ಠಿತಆವಾಸತೋ. ಪರನ್ತಿ ಅಞ್ಞಸ್ಮಿಂ ಆವಾಸೇ, ಭುಮ್ಮತ್ಥೇ ಚೇತಂ ಉಪಯೋಗವಚನಂ. ಪಚ್ಛಾಭತ್ತನ್ತಿ ಭತ್ತತೋ ಪಚ್ಛಾ. ತತ್ಥಾತಿ ಅಭಿಕ್ಖುಕೇ ಆವಾಸೇ. ‘‘ಭಿಕ್ಖುನಿಯೋ’’ತಿಪದಂ ‘‘ವದನ್ತೀ’’ತಿಪದೇ ಕಮ್ಮಂ. ವುತ್ತಪ್ಪಮಾಣೇತಿ ಅಡ್ಢಯೋಜನಬ್ಭನ್ತರಸಙ್ಖಾತೇ ವುತ್ತಪ್ಪಮಾಣೇ. ಸಾಖಾಮಣ್ಡಪೇಪೀತಿ ಸಾಖಾಯ ಛಾದಿತಮಣ್ಡಪೇಪಿ. ಪಿಸದ್ದೇನ ಆವಾಸೇ ಪನ ಕಾ ನಾಮ ಕಥಾತಿ ದಸ್ಸೇತಿ. ವುತ್ತಾತಿ ವಸಿತಾ. ಏತ್ತಾವತಾತಿ ಏಕರತ್ತಂ ವಸಿತಮತ್ತೇನ. ಏತ್ಥಾತಿ ಸಭಿಕ್ಖುಕೇ ಆವಾಸೇ. ಉಪಗಚ್ಛನ್ತೀಹಿ ಭಿಕ್ಖುನೀಹಿ ಯಾಚಿತಬ್ಬಾತಿ ಯೋಜನಾ. ಪಕ್ಖಸ್ಸಾತಿ ಆಸಳ್ಹೀಮಾಸಸ್ಸ ಜುಣ್ಹಪಕ್ಖಸ್ಸ. ‘‘ತೇರಸಿಯ’’ನ್ತಿಪದೇನ ಅವಯವಿಅವಯವಭಾವೇನ ಯೋಜೇತಬ್ಬಂ. ಮಯನ್ತಿ ಅಮ್ಹೇ. ಯತೋತಿ ಯೇನ ಉಜುನಾ ಮಗ್ಗೇನಾತಿ ಸಮ್ಬನ್ಧೋ. ತೇನಾಹ ‘‘ತೇನ ಮಗ್ಗೇನಾ’’ತಿ. ಅಞ್ಞೇನ ಮಗ್ಗೇನಾತಿ ಉಜುಮಗ್ಗತೋ ಅಞ್ಞೇನ ಜಿಮ್ಹಮಗ್ಗೇನ. ಅಯನ್ತಿ ಅಯಂ ಆವಾಸೋ. ತತೋತಿ ಭಿಕ್ಖೂನಂ ಆವಾಸತೋ, ಭಿಕ್ಖುನಿಉಪಸ್ಸಯತೋ ವಾ, ಇದಮೇವ ಯುತ್ತತರಂ. ವಕ್ಖತಿ ಹಿ ‘‘ಅಮ್ಹಾಕಂ ಉಪಸ್ಸಯತೋ ಗಾವುತಮತ್ತೇ’’ತಿ. ಖೇಮಟ್ಠಾನೇತಿ ಅಭಯಟ್ಠಾನೇ. ತಞ್ಹಿ ಖೀಯನ್ತಿ ಭಯಾ ಏತ್ಥಾತಿ ಖೇಮಂ, ಖೇಮಞ್ಚ ತಂ ಠಾನಞ್ಚೇತಿ ಖೇಮಟ್ಠಾನನ್ತಿ ಕತ್ವಾ ‘‘ಖೇಮಟ್ಠಾನ’’ನ್ತಿ ವುಚ್ಚತಿ. ತಾಹಿ ಭಿಕ್ಖುನೀಹೀತಿ ಅಡ್ಢಯೋಜನಮತ್ತೇ ಠಾನೇ ವಸನ್ತೀಹಿ. ತಾ ಭಿಕ್ಖುನಿಯೋತಿ ಗಾವುತಮತ್ತೇ ಠಾನೇ ವಸನ್ತಿಯೋ. ಅನ್ತರಾತಿ ತುಮ್ಹಾಕಂ, ಅಮ್ಹಾಕಞ್ಚ ನಿವಾಸನಟ್ಠಾನಸ್ಸ, ನಿವಾಸನಟ್ಠಾನತೋ ವಾ ಅನ್ತರೇ ವೇಮಜ್ಝೇ. ಭುಮ್ಮತ್ಥೇ ಚೇತಂ ನಿಸ್ಸಕ್ಕವಚನಂ. ಠಿತೇ ಮಗ್ಗೇತಿ ಸಮ್ಬನ್ಧೋ ‘‘ಸನ್ತಿಕಾ’’ತಿಪದಂ ‘‘ಆಗತ’’ಇತಿಪದೇ ಅಪಾದಾನಂ. ತತ್ಥಾತಿ ಅಞ್ಞಾಸಂ ಭಿಕ್ಖುನೀನಂ ಉಪಸ್ಸಯೇ. ಇತಿ ಯಾಚಿತಬ್ಬಾತಿ ಯೋಜನಾ. ತತೋತಿ ಭಿಕ್ಖೂನಂ ಯಾಚಿತಬ್ಬತೋ, ಪರನ್ತಿ ಸಮ್ಬನ್ಧೋ.

ಚಾತುದ್ದಸೇತಿ ಆಸಳ್ಹೀಮಾಸಸ್ಸ ಜುಣ್ಹಪಕ್ಖಸ್ಸ ಚತುದ್ದಸನ್ನಂ ದಿವಸಾನಂ ಪೂರಣೇ ದಿವಸೇ. ಇಧಾತಿ ಇಮಸ್ಮಿಂ ವಿಹಾರೇ. ‘‘ಓವಾದ’’ನ್ತಿಪದಂ ‘‘ಅನು’’ಇತಿಪದೇ ಕಮ್ಮಂ. ಅನುಜೀವನ್ತಿಯೋತಿ ಅನುಗನ್ತ್ವಾ ಜೀವನಂ ವುತ್ತಿಂ ಕರೋನ್ತಿಯೋ. ವುತ್ತಾ ಭಿಕ್ಖೂತಿ ಸಮ್ಬನ್ಧೋ. ದುತಿಯದಿವಸೇತಿ ಆಸಳ್ಹೀಪುಣ್ಣಮಿಯಂ. ಅಥಾತಿ ಪಕ್ಕಮನಾನನ್ತರಂ. ಏತ್ಥಾತಿ ಭಿಕ್ಖೂನಂ ಪಕ್ಕನ್ತತ್ತಾ ಅಪಸ್ಸನೇ. ‘‘ಆಭೋಗಂ ಕತ್ವಾ’’ತಿಇಮಿನಾ ಆಭೋಗಂ ಅಕತ್ವಾ ವಸಿತುಂ ನ ವಟ್ಟತೀತಿ ದೀಪೇತಿ. ಸಭಿಕ್ಖುಕಾವಾಸಂ ಗನ್ತಬ್ಬಮೇವಾತಿ ಅಧಿಪ್ಪಾಯೋ. ಸಾತಿ ವಸ್ಸಚ್ಛೇದಾಪತ್ತಿ. ಹೀತಿ ಸಚ್ಚಂ, ಯಸ್ಮಾ ವಾ. ಕೇನಚಿ ಕಾರಣೇನಾತಿ ಭಿಕ್ಖಾಚಾರಸ್ಸ ಅಸಮ್ಪದಾದಿನಾ ಕೇನಚಿ ನಿಮಿತ್ತೇನ. ಹೀತಿ ಸಚ್ಚಂ. ಭಿಕ್ಖೂನಂ ಪಕ್ಕನ್ತಾದಿಕಾರಣಾ ಅಭಿಕ್ಖುಕಾವಾಸೇ ವಸನ್ತಿಯಾ ಕಿಂ ಅಭಿಕ್ಖುಕಾವಾಸೇವ ಪವಾರೇತಬ್ಬನ್ತಿ ಆಹ ‘‘ಪವಾರೇನ್ತಿಯಾ ಪನಾ’’ತಿಆದಿ.

ಅನ್ವದ್ಧಮಾಸನ್ತಿ ಏತ್ಥ ಅನುಸದ್ದೋ ವಿಚ್ಛತ್ಥವಾಚಕೋ ಕಮ್ಮಪ್ಪವಚನೀಯೋ, ತೇನ ಪಯೋಗತ್ತಾ ಭುಮ್ಮತ್ಥೇ ಉಪಯೋಗವಚನನ್ತಿ ಆಹ ‘‘ಅದ್ಧಮಾಸೇ ಅದ್ಧಮಾಸೇ’’ತಿ. ಪಚ್ಚಾಸೀಸಿತಬ್ಬಾತಿ ಏತ್ಥ ಪತಿಪುಬ್ಬೋ ಚ ಆಪುಬ್ಬೋ ಚ ಸಿಧಾತು ಇಚ್ಛತ್ಥೇತಿ ಆಹ ‘‘ಇಚ್ಛಿತಬ್ಬಾ’’ತಿ. ಸಿಧಾತುಯಾ ದ್ವೇಭಾವೋ ಹೋತಿ. ಆಪುಬ್ಬೋ ಸಿಸಿ ಇಚ್ಛಾಯನ್ತಿಪಿ ಧಾತುಪಾಠೇಸು ವುತ್ತಂ. ತತ್ಥಾತಿ ‘‘ಉಪೋಸಥಪುಚ್ಛಕ’’ನ್ತಿವಚನೇ. ಪಕ್ಖಸ್ಸಾತಿ ಯಸ್ಸ ಕಸ್ಸಚಿ ಪಕ್ಖಸ್ಸ. ಮಹಾಪಚ್ಚರಿಯಂ ಪನ ವುತ್ತನ್ತಿ ಸಮ್ಬನ್ಧೋ. ಓವಾದಸ್ಸ ಯಾಚನಂ ಓವಾದೋ ಉತ್ತರಪದಲೋಪೇನ, ಸೋಯೇವ ಅತ್ಥೋ ಪಯೋಜನಂ ಓವಾದತ್ಥೋ, ತದತ್ಥಾಯ. ಪಾಟಿಪದದಿವಸತೋತಿ ದುತಿಯದಿವಸತೋ. ಸೋ ಹಿ ಚನ್ದೋ ವುದ್ಧಿಞ್ಚ ಹಾನಿಞ್ಚ ಪಟಿಮುಖಂ ಪಜ್ಜತಿ ಏತ್ಥ, ಏತೇನಾತಿ ವಾ ಪಾಟಿಪದೋತಿ ವುಚ್ಚತಿ. ಇತೀತಿ ಏವಂ ವುತ್ತನಯೇನ. ಭಗವಾ ಪಞ್ಞಪೇತೀತಿ ಯೋಜನಾ. ಅಞ್ಞಸ್ಸಾತಿ ಧಮ್ಮಸ್ಸವನಕಮ್ಮತೋ ಅಞ್ಞಸ್ಸ. ನಿರನ್ತರನ್ತಿ ಅಭಿಕ್ಖಣಂ, ‘‘ಪಞ್ಞಪೇತೀ’’ತಿಪದೇ ಭಾವನಪುಂಸಕಂ. ಹೀತಿ ವಿತ್ಥಾರೋ. ಏವಞ್ಚ ಸತೀತಿ ಏವಂ ಬಹೂಪಕಾರೇ ಸತಿ ಚ. ಯನ್ತಿ ಯಂ ಧಮ್ಮಂ. ಸಾತ್ಥಿಕನ್ತಿ ಸಪಯೋಜನಂ. ಯಥಾನುಸಿಟ್ಠನ್ತಿ ಅನುಸಿಟ್ಠಿಯಾ ಅನುರೂಪಂ. ಸಬ್ಬಾಯೇವ ಭಿಕ್ಖುನಿಯೋಪೀತಿ ಯೋಜನಾ. ಹೀತಿ ಸಚ್ಚಂ.

ಓವಾದಂ ಗಚ್ಛತೀತಿ ಓವಾದಂ ಯಾಚಿತುಂ ಭಿಕ್ಖುಸಙ್ಘಸ್ಸ ಆರಾಮಂ ಗಚ್ಛತಿ. ನ ಓವಾದೋ ಗನ್ತಬ್ಬೋತಿ ಓವಾದಂ ಯಾಚಿತುಂ ಭಿಕ್ಖುಸಙ್ಘಸ್ಸ ಆರಾಮೋ ನ ಗನ್ತಬ್ಬೋ. ಓವಾದೋತಿ ಚ ಉಪಯೋಗತ್ಥೇ ಪಚ್ಚತ್ತವಚನನ್ತಿ ದಟ್ಠಬ್ಬಂ. ಇತರಥಾ ಹಿ ಸದ್ದಪಯೋಗೋ ವಿರುಜ್ಝೇಯ್ಯ. ಓವಾದಂ ಗನ್ತುನ್ತಿ ಓವಾದಂ ಯಾಚನತ್ಥಾಯ ಭಿಕ್ಖುಸಙ್ಘಸ್ಸ ಆರಾಮಂ ಗನ್ತುಂ.

‘‘ದ್ವೇ ತಿಸ್ಸೋ ಭಿಕ್ಖುನಿಯೋ’’ತಿಪದಂ ‘‘ಯಾಚಿತ್ವಾ’’ತಿಪದೇ ದುತಿಯಾಕಮ್ಮಂ. ‘‘ಪೇಸೇತಬ್ಬಾ’’ತಿಪದೇ ಪಠಮಾಕಮ್ಮಂ. ಓವಾದೂಪಸಙ್ಕಮನನ್ತಿ ಓವಾದಸ್ಸ ಗಹಣತ್ಥಾಯ ಉಪಸಙ್ಕಮನಂ. ಆರಾಮನ್ತಿ ಭಿಕ್ಖುಸಙ್ಘಸ್ಸ ಆರಾಮಂ. ತತೋತಿ ಗಮನತೋ ಪರನ್ತಿ ಸಮ್ಬನ್ಧೋ. ತೇನ ಭಿಕ್ಖುನಾತಿ ಓವಾದಪಟಿಗ್ಗಾಹಕೇನ ಭಿಕ್ಖುನಾ. ತನ್ತಿ ಸಮ್ಮತಂ ಭಿಕ್ಖುಂ.

ಉಸ್ಸಹತೀತಿ ಸಕ್ಕೋತಿ. ಪಾಸಾದಿಕೇನಾತಿ ಪಸಾದಂ ಆವಹೇನ ಪಸಾದಜನಕೇನ ಕಾಯವಚೀಮನೋಕಮ್ಮೇನಾತಿ ಅತ್ಥೋ. ಸಮ್ಪಾದೇತೂತಿ ತಿವಿಧಂ ಸಿಕ್ಖಂ ಸಮ್ಪಾದೇತು. ಏತ್ತಾವತಾತಿ ಏತ್ತಕೇನ ‘‘ಪಾಸಾದಿಕೇನ ಸಮ್ಪಾದೇತೂ’’ತಿ ವಚನಮತ್ತೇನ. ಹೀತಿ ಫಲಜೋತಕೋ. ಏತನ್ತಿ ‘‘ತಾಹೀ’’ತಿವಚನಂ.

ಏತ್ಥ ಚ ಭಿಕ್ಖೂನಂ ಸಙ್ಘಗಣಪುಗ್ಗಲವಸೇನ ವಚನವಾರೋ ತಿವಿಧೋ ಹೋತಿ, ತಂ ತಿವಿಧಂ ವಚನವಾರಂ ಭಿಕ್ಖುನೀನಂ ಸಙ್ಘಗಣಪುಗ್ಗಲವಸೇನ ತೀಹಿ ವಚನವಾರೇಹಿ ಗುಣಿತಂ ಕತ್ವಾ ನವ ವಚನವಾರಾ ಹೋನ್ತಿ, ತಂ ಆಕಾರಂ ದಸ್ಸೇನ್ತೋ ಆಹ ‘‘ತತ್ರಾಯಂ ವಚನಕ್ಕಮೋ’’ತಿ. ತತ್ರಾತಿ ಪುರಿಮವಚನಾಪೇಕ್ಖಂ. ವಚನಾಕಾರೋ ಪಾಕಟೋವ.

ಏಕಾ ಭಿಕ್ಖುನೀ ವಾ ಬಹೂಹಿ ಭಿಕ್ಖುನೀಉಪಸ್ಸಯೇಹಿ ಓವಾದತ್ಥಾಯ ಪೇಸಿತೇ ವಚನಾಕಾರಂ ದಸ್ಸೇನ್ತೋ ಆಹ ‘‘ಭಿಕ್ಖುನಿಸಙ್ಘೋ ಚ ಅಯ್ಯಾ’’ತಿಆದಿ.

ತೇನಾಪೀತಿ ಓವಾದಪಟಿಗ್ಗಾಹಕೇನಾಪಿ ‘‘ಓವಾದ’’ನ್ತಿಪದಂ ‘‘ಪಟಿಗ್ಗಾಹಕೇನಾ’’ತಿ ಪದೇ ಕಮ್ಮಂ. ಪುನ ‘‘ಓವಾದ’’ನ್ತಿಪದಂ ‘‘ಅಪಟಿಗ್ಗಹೇತು’’ನ್ತಿಪದೇ ಕಮ್ಮಂ. ಬಲತಿ ಅಸ್ಸಾಸಪಸ್ಸಾಸಮತ್ತೇನ ಜೀವತಿ, ನ ಪಞ್ಞಾಜೀವಿತೇನಾತಿ ಬಾಲೋ. ಗಿಲಾಯತಿ ರುಜತೀತಿ ಗಿಲಾನೋ. ಗಮಿಸ್ಸತಿ ಗನ್ತುಂ ಭಬ್ಬೋತಿ ಗಮಿಕೋ. ಅಯಂ ಪನೇತ್ಥ ಯೋಜನಾ – ಗನ್ತುಂ ಭಬ್ಬೋ ಯೋ ಭಿಕ್ಖು ಗಮಿಸ್ಸತಿ ಗಮನಂ ಕರಿಸ್ಸತಿ, ಇತಿ ತಸ್ಮಾ ಸೋ ಭಿಕ್ಖು ಗಮಿಕೋ ನಾಮ. ಅಥ ವಾ ಯೋ ಭಿಕ್ಖು ಗನ್ತುಂ ಭಬ್ಬತ್ತಾ ಗಮಿಸ್ಸತಿ ಗಮನಂ ಕರಿಸ್ಸತಿ, ಇತಿ ತಸ್ಮಾ ಸೋ ಭಿಕ್ಖು ಗಮಿಕೋ ನಾಮಾತಿ. ‘‘ಭಬ್ಬೋ’’ತಿ ಚ ಹೇತುಅನ್ತೋಗಧವಿಸೇಸನಂ.

ತತ್ಥಾತಿ ಬಾಲಾದೀಸು ತೀಸು ಪುಗ್ಗಲೇಸು. ದುತಿಯಪಕ್ಖದಿವಸೇತಿ ಪಾಟಿಪದತೋ ದುತಿಯಪಕ್ಖದಿವಸೇ. ಉಪೋಸಥಗ್ಗೇತಿ ಉಪೋಸಥಗೇಹೇ. ತಞ್ಹಿ ಉಪೋಸಥಂ ಗಣ್ಹನ್ತಿ, ಉಪೋಸಥೋ ವಾ ಗಯ್ಹತಿ ಅಸ್ಮಿನ್ತಿ ‘‘ಉಪೋಸಥಗ್ಗ’’ನ್ತಿ ವುಚ್ಚತಿ. ತಸ್ಮಿಂ ಉಪೋಸಥಗ್ಗೇ. ‘‘ಅನಾರೋಚೇತು’’ನ್ತಿ ವಚನಸ್ಸ ಞಾಪಕಂ ದಸ್ಸೇತ್ವಾ ‘‘ಅಪಚ್ಚಾಹರಿತು’’ನ್ತಿ ವಚನಸ್ಸ ತಮೇವ ದಸ್ಸೇನ್ತೋ ಆಹ ‘‘ಅಪರಮ್ಪಿ ವುತ್ತ’’ನ್ತಿಆದಿ.

ತತ್ಥಾತಿ ಓವಾದಪಟಿಗ್ಗಾಹಕೇಸು ಭಿಕ್ಖೂಸು. ನೋ ಚಸ್ಸಾತಿ ನೋ ಚೇ ಅಸ್ಸ. ಸಭಂ ವಾತಿ ಸಮಜ್ಜಂ ವಾ. ಸಾ ಹಿ ಸಹ ಭಾಸನ್ತಿ ಏತ್ಥ, ಸನ್ತೇಹಿ ವಾ ಭಾತಿ ದಿಬ್ಬತೀತಿ ‘‘ಸಭಾ’’ತಿ ವುಚ್ಚತಿ, ತಂ ಸಭಂ ವಾ ಉಪಸಙ್ಕಮಿಸ್ಸಾಮೀತಿ ಯೋಜನಾ. ತತ್ರಾತಿ ತಸ್ಮಿಂ ಸಭಾದಿಕೇ. ಏವಂ ‘‘ತತ್ಥಾ’’ತಿಪದೇಪಿ.

ಚತುದ್ದಸನ್ನಂ ಪೂರಣೋ ಚಾತುದ್ದಸೋ, ತಸ್ಮಿಂ ಪವಾರೇತ್ವಾತಿ ಸಮ್ಬನ್ಧೋ. ಭಿಕ್ಖುಸಙ್ಘೇತಿ ಭಿಕ್ಖುಸಙ್ಘಸ್ಸ ಸನ್ತಿಕೇ, ಸಮೀಪತ್ಥೇ ಚೇತಂ ಭುಮ್ಮವಚನಂ. ಅಜ್ಜತನಾತಿ ಏತ್ಥ ಅಸ್ಮಿಂ ಅಹನಿ ಅಜ್ಜ, ಇಮಸದ್ದತೋ ಅಹನೀತಿ ಅತ್ಥೇ ಜ್ಜಪಚ್ಚಯೋ, ಇಮಸದ್ದಸ್ಸ ಚ ಅಕಾರೋ, ಅಜ್ಜ ಏವ ಅಜ್ಜತನಾ, ಸ್ವತ್ಥೋ ಹಿ ತನಪಚ್ಚಯೋ. ಅಪರಸ್ಮಿಂ ಅಹನಿ ಅಪರಜ್ಜ, ಅಪರಸದ್ದತೋ ಅಹನೀತಿ ಅತ್ಥೇ ಜ್ಜಪಚ್ಚಯೋ ಸತ್ತಮ್ಯನ್ತೋಯೇವ. ಏತ್ಥಾತಿ ಪವಾರಣೇ, ‘‘ಅನುಜಾನಾಮೀ’’ತಿಆದಿವಚನೇ ವಾ. ಹೀತಿ ಸಚ್ಚಂ.

ಕೋಲಾಹಲನ್ತಿ ಕೋತೂಹಲಂ. ಪಠಮಂ ಭಿಕ್ಖುನೀ ಯಾಚಿತಬ್ಬಾತಿ ಸಙ್ಘೇನ ಪಠಮಂ ಭಿಕ್ಖುನೀ ಯಾಚಿತಬ್ಬಾ.

ತಾಯ ಭಿಕ್ಖುನಿಯಾ ವಚನೀಯೋ ಅಸ್ಸಾತಿ ಯೋಜನಾ. ಪಸ್ಸನ್ತೋ ಪಟಿಕರಿಸ್ಸತೀತಿ ವಜ್ಜಾವಜ್ಜಂ ಪಸ್ಸನ್ತೋ ಹುತ್ವಾ ಪಟಿಕರಿಸ್ಸತಿ.

ಉಭಿನ್ನನ್ತಿ ಭಿಕ್ಖುಭಿಕ್ಖುನೀನಂ. ಯಥಾಠಾನೇಯೇವಾತಿ ಯಂ ಯಂ ಠಾನಂ ಯಥಾಠಾನಂ, ತಸ್ಮಿಂ ಯಥಾಠಾನೇಯೇವ. ಕೇನಚಿ ಪರಿಯಾಯೇನಾತಿ ಕೇನಚಿ ಕಾರಣೇನ. ಅವಪುಬ್ಬೋ ವರಸದ್ದೋ ಪಿಹಿತತ್ಥೋತಿ ಆಹ ‘‘ಪಿಹಿತೋ’’ತಿ. ವಚನಂಯೇವಾತಿ ಓವಾದವಚನಂಯೇವ. ಪಥೋತಿ ಜೇಟ್ಠಕಟ್ಠಾನೇ ಠಾನಸ್ಸ ಕಾರಣತ್ತಾ ಪಥೋ. ದೋಸಂ ಪನಾತಿ ಅಭಿಕ್ಕಮನಾದೀಸು ಆದೀನವಂ ಪನ. ಅಞ್ಜೇನ್ತೀತಿ ಮಕ್ಖೇನ್ತಿ. ಭಿಕ್ಖೂಹಿ ಪನ ಓವದಿತುಂ ಅನುಸಾಸಿತುಂ ವಟ್ಟತೀತಿ ಯೋಜನಾ.

ಅಞ್ಞನ್ತಿ ಓವಾದತೋ ಅಞ್ಞಂ. ಏಸೋತಿ ಗರುಧಮ್ಮೋ.

೧೫೦. ‘‘ಅಧಮ್ಮಕಮ್ಮೇ’’ತಿ ಏತ್ಥ ಕತಮಂ ಕಮ್ಮಂ ನಾಮಾತಿ ಆಹ ‘‘ಅಧಮ್ಮಕಮ್ಮೇತಿಆದೀಸೂ’’ತಿಆದಿ. ತತ್ಥಾತಿ ಅಧಮ್ಮಕಮ್ಮಧಮ್ಮಕಮ್ಮೇಸು.

೧೫೨. ಉದ್ದೇಸಂ ದೇನ್ತೋ ಭಣತಿ, ಅನಾಪತ್ತೀತಿ ಯೋಜನಾ. ಓಸಾರೇತೀತಿ ಕಥೇತಿ. ಚತುಪರಿಸತೀತಿ ಚತುಪರಿಸಸ್ಮಿಂ. ತತ್ರಾಪೀತಿ ತೇನ ಭಿಕ್ಖುನೀನಂ ಸುಣನಕಾರಣೇನಾತಿ. ಪಠಮಂ.

೨. ಅತ್ಥಙ್ಗತಸಿಕ್ಖಾಪದಂ

೧೫೩. ದುತಿಯೇ ಪರಿಯಾಯಸದ್ದೋ ವಾರತ್ಥೋತಿ ಆಹ ‘‘ವಾರೇನಾ’’ತಿ. ವಾರೋತಿ ಚ ಅನುಕ್ಕಮೋಯೇವಾತಿ ಆಹ ‘‘ಪಟಿಪಾಟಿಯಾತಿ ಅತ್ಥೋ’’ತಿ. ಅಧಿಕಂ ಚಿತ್ತಂ ಇಮಸ್ಸಾತಿ ಅಧಿಚೇತೋತಿ ದಸ್ಸೇನ್ತೋ ಆಹ ‘‘ಅಧಿಚಿತ್ತವತೋ’’ತಿಆದಿ. ಅಧಿಚಿತ್ತಂ ನಾಮ ಇಧ ಅರಹತ್ತಫಲಚಿತ್ತಮೇವ, ನ ವಿಪಸ್ಸನಾಪಾದಕಭೂತಂ ಅಟ್ಠಸಮಾಪತ್ತಿಚಿತ್ತನ್ತಿ ಆಹ ‘‘ಅರಹತ್ತಫಲಚಿತ್ತೇನಾ’’ತಿ. ‘‘ಅಧಿಚಿತ್ತಸಿಕ್ಖಾ’’ತಿಆದೀಸು (ಪಾರಾ. ೪೫; ದೀ. ನಿ. ೩.೩೦೫; ಮ. ನಿ. ೧.೪೯೭; ಅ. ನಿ. ೬.೧೦೫; ಮಹಾನಿ. ೧೦) ಹಿ ವಿಪಸ್ಸನಾಪಾದಕಭೂತಂ ಅಟ್ಠಸಮಾಪತ್ತಿಚಿತ್ತಂ ‘‘ಅಧಿಚಿತ್ತ’’ನ್ತಿ ವುಚ್ಚತಿ. ನ ಪಮಜ್ಜತೋತಿ ನ ಪಮಜ್ಜನ್ತಸ್ಸ. ಸಾತಚ್ಚಕಿರಿಯಾಯಾತಿ ಸತತಕರಣೇನ. ಉಭೋ ಲೋಕೇ ಮುನತಿ ಜಾನಾತೀತಿ ಮುನೀತಿ ಚ, ಮೋನಂ ವುಚ್ಚತಿ ಞಾಣಂ ಮುನನಟ್ಠೇನ ಜಾನನತ್ಥೇನ, ತಮಸ್ಸತ್ಥೀತಿ ಮುನೀತಿ ಚ ದಸ್ಸೇನ್ತೋ ಆಹ ‘‘ಮುನಿನೋತೀ’’ತಿಆದಿ. ತತ್ಥ ‘‘ಯೋ ಮುನತಿ…ಪೇ… ಮುನನೇನ ವಾ’’ತಿಇಮಿನಾ ಪಠಮತ್ಥಂ ದಸ್ಸೇತಿ, ‘‘ಮೋನಂ ವುಚ್ಚತಿ…ಪೇ… ವುಚ್ಚತೀ’’ತಿಇಮಿನಾ ದುತಿಯತ್ಥಂ ದಸ್ಸೇತಿ. ಮುನ ಗತಿಯನ್ತಿ ಧಾತುಪಾಠೇಸು (ಸದ್ದನೀತಿಧಾತುಮಾಲಾಯಂ ೧೫ ಪಕಾರನ್ತಧಾತು) ವುತ್ತತ್ತಾ ‘‘ಯೋ ಮುನತೀ’’ತಿ ಏತ್ಥ ಭೂವಾದಿಗಣಿಕೋ ಮುನಧಾತುಯೇವ, ನ ಕೀಯಾದಿಗಣಿಕೋ ಮುಧಾತೂತಿ ದಟ್ಠಬ್ಬಂ. ಅಥ ವಾ ಮುನ ಞಾಣೇತಿ ಧಾತುಪಾಠೇಸು (ಸದ್ದನೀತಿಧಾತುಮಾಲಾಯಂ ೧೭ ಕಿಯಾದಿಗಣಿಕ) ವುತ್ತತ್ತಾ ‘‘ಮುನಾತೀ’’ತಿ ಕೀಯಾದಿಗಣಿಕೋವ. ಧಾತ್ವನ್ತನಕಾರಲೋಪೋತಿ ದಟ್ಠಬ್ಬಂ. ‘‘ಮೋನಂ ವುಚ್ಚತಿ ಞಾಣ’’ನ್ತಿ ಚೇತ್ಥ ಞಾಣಂ ನಾಮ ಅರಹತ್ತಞಾಣಮೇವ. ಮೋನಸ್ಸ ಪಥೋ ಮೋನಪಥೋತಿ ವುತ್ತೇ ಸತ್ತತಿಂಸ ಬೋಧಿಪಕ್ಖಿಯಧಮ್ಮಾವ ಅಧಿಪ್ಪೇತಾತಿ ಆಹ ‘‘ಸತ್ತತಿಂಸಬೋಧಿಪಕ್ಖಿಯಧಮ್ಮೇಸೂ’’ತಿ. ಅಥ ವಾ ಅಧಿಸೀಲಸಿಕ್ಖಾದಯೋ ಅಧಿಪ್ಪೇತಾತಿ ಆಹ ‘‘ತೀಸು ವಾ ಸಿಕ್ಖಾಸೂ’’ತಿ. ಪುಬ್ಬಭಾಗಪಟಿಪದನ್ತಿ ಅರಹತ್ತಞಾಣಸ್ಸ ಪುಬ್ಬಭಾಗೇ ಪವತ್ತಂ ಸೀಲಸಮಥವಿಪಸ್ಸನಾಸಙ್ಖಾತಂ ಪಟಿಪದಂ. ಪುಬ್ಬಭಾಗೇತಿ ಅರಹತ್ತಞಾಣಸ್ಸ ಪುಬ್ಬಭಾಗೇ. ಏತ್ಥಾತಿ ‘‘ಅಧಿಚೇತಸೋ…ಪೇ… ಸಿಕ್ಖತೋ’’ತಿ ವಚನೇ. ‘‘ತಾದಿನೋ’’ತಿಪದಂ ‘‘ಮುನಿನೋ’’ತಿಪದೇನ ಯೋಜೇತಬ್ಬನ್ತಿ ಆಹ ‘‘ತಾದಿಸಸ್ಸ ಖೀಣಾಸವಮುನಿನೋ’’ತಿ. ಏತ್ಥಾತಿ ‘‘ಸೋಕಾ ನ ಭವನ್ತಿ ತಾದಿನೋ’’ತಿ ವಚನೇ. ರಾಗಾದಯೋ ಉಪಸಮೇತೀತಿ ಉಪಸನ್ತೋತಿ ದಸ್ಸೇತುಂ ವುತ್ತಂ ‘‘ರಾಗಾದೀನ’’ನ್ತಿ. ಸತಿ ಅಸ್ಸತ್ಥೀತಿ ಸತಿಮಾತಿ ಕತ್ವಾ ಮನ್ತುಸದ್ದೋ ನಿಚ್ಚಯೋಗತ್ಥೋತಿ ಆಹ ‘‘ಸತಿಯಾ ಅವಿರಹಿತಸ್ಸಾ’’ತಿ.

ನ ಕಸೀಯತಿ ನ ವಿಲೇಖೀಯತೀತಿ ಅಕಾಸೋ, ಸೋಯೇವ ಆಕಾಸೋ. ಅನ್ತರೇನ ಛಿದ್ದೇನ ಇಕ್ಖಿತಬ್ಬೋತಿ ಅನ್ತಲಿಕ್ಖೋ. ಆಕಾಸೋ ಹಿ ಚತುಬ್ಬಿಧೋ ಅಜಟಾಕಾಸೋ, ಕಸಿಣುಗ್ಘಾಟಿಮಾಕಾಸೋ, ಪರಿಚ್ಛಿನ್ನಾಕಾಸೋ, ರೂಪಪರಿಚ್ಛೇದಾಕಾಸೋತಿ. ತತ್ಥ ಅಜಟಾಕಾಸೋವ ಇಧಾಧಿಪ್ಪೇತೋ ‘‘ಅನ್ತಲಿಕ್ಖೇ’’ತಿ ವಿಸೇಸಿತತ್ತಾ. ತೇನಾಹ ‘‘ನ ಕಸಿಣುಗ್ಘಾಟಿಮೇ, ನ ಪನ ರೂಪಪರಿಚ್ಛೇದೇ’’ತಿ. ಪರಿಚ್ಛಿನ್ನಾಕಾಸೋಪಿ ರೂಪಪರಿಚ್ಛೇದಾಕಾಸೇನ ಸಙ್ಗಹಿತೋ. ‘‘ಮ’’ನ್ತಿ ಪದಂ ‘‘ಅವಮಞ್ಞನ್ತೀ’’ತಿ ಪದೇ ಕಮ್ಮಂ. ಏತ್ತಕಮೇವಾತಿ ಏತಪ್ಪಮಾಣಂ ‘‘ಅಧಿಚೇತಸೋ’’ತಿಆದಿಸಙ್ಖಾತಂ ವಚನಮೇವ, ನ ಅಞ್ಞಂ ಬುದ್ಧವಚನನ್ತಿ ಅತ್ಥೋ. ಅಯನ್ತಿ ಚೂಳಪನ್ಥಕೋ ಥೇರೋ. ಹನ್ದಾತಿ ವಸ್ಸಗ್ಗತ್ಥೇ ನಿಪಾತೋ. ಮಮ ಆನುಭಾವಂ ದಸ್ಸೇಮಿ, ತುಮ್ಹೇ ಪಸ್ಸಥ ಗಣ್ಹಥಾತಿ ಅಧಿಪ್ಪಾಯೋ. ವುಟ್ಠಾಯಾತಿ ತತೋ ಚತುತ್ಥಜ್ಝಾನತೋ ವುಟ್ಠಹಿತ್ವಾ. ಅನ್ತರಾಪಿ ಧಾಯತೀತಿ ಏತ್ಥ ಪಿಸದ್ದಸ್ಸ ಅಟ್ಠಾನತ್ಥಂ ದಸ್ಸೇನ್ತೋ ಆಹ ‘‘ಅನ್ತರಧಾಯತಿಪೀ’’ತಿ. ಏಸೇವ ನಯೋ ‘‘ಸೇಯ್ಯಮ್ಪಿ ಕಪ್ಪೇತೀ’’ತಿ ಏತ್ಥಪಿ. ಥೇರೋತಿ ಚೂಳಪನ್ಥಕೋ ಥೇರೋ. ಇದಂ ಪದಂ ಅನ್ತರನ್ತರಾ ಯುತ್ತಟ್ಠಾನೇಸು ಸಮ್ಬನ್ಧಿತ್ವಾ ‘‘ತಞ್ಚೇವ ಭಣತೀ’’ತಿಇಮಿನಾ ಸಮ್ಬನ್ಧಿತಬ್ಬಂ. ಭಾತುಥೇರಸ್ಸಾತಿ ಜೇಟ್ಠಕಭಾತುಭೂತಸ್ಸ ಮಹಾಪನ್ಥಕಥೇರಸ್ಸ.

ಪದ್ಮನ್ತಿ ಗಾಥಾಯಂ ತಯೋ ಪಾದಾ ಇನ್ದವಜಿರಾ, ಚತುತ್ಥಪಾದೋ ಉಪೇನ್ದವಜಿರೋ. ತಸ್ಮಾ ಪದ್ಮನ್ತಿ ಏತ್ಥ ಮಕಾರೇ ಪರೇ ದುಕಾರುಕಾರಸ್ಸ ಲೋಪಂ ಕತ್ವಾ ಪರಕ್ಖರಂ ನೇತ್ವಾ ‘‘ಪದ್ಮ’’ನ್ತಿ ದ್ವಿಭಾವೇನ ಲಿಖಿತಬ್ಬಂ. ಅವೀತಗನ್ಧನ್ತಿ ಏತ್ಥ ವೀತಿ ದೀಘುಚ್ಚಾರಣಮೇವ ಯುತ್ತಂ. ಪಙ್ಕೇ ದವತಿ ಗಚ್ಛತೀತಿ ಪದುಮಂ. ಕೋಕಂ ದುಗ್ಗನ್ಧಸ್ಸ ಆದಾನಂ ನುದತಿ ಅಪನೇತೀತಿ ಕೋಕನುದಂ. ಸುನ್ದರೋ ಗನ್ಧೋ ಇಮಸ್ಸಾತಿ ಸುಗನ್ಧಂ. ಅಯಂ ಪನೇತ್ಥ ಯೋಜನಾ – ಯಥಾ ಕೋಕನುದಸಙ್ಖಾತಂ ಸುಗನ್ಧಂ ಪಾತೋ ಪಗೇವ ಬಾಲಾತಪೇನ ಫುಲ್ಲಂ ವಿಕಸಿತಂ ಅವೀತಗನ್ಧಂ ಹುತ್ವಾ ವಿರೋಚಮಾನಂ ಪದುಮಂ ಸಿಯಾ, ತಥಾ ಅಙ್ಗೀರಸಂ ಅಙ್ಗಿತೋ ಸರೀರತೋ ನಿಚ್ಛರಣಪಭಸ್ಸರರಸಂ ಹುತ್ವಾ ವಿರೋಚಮಾನಭೂತಂ ಅನ್ತಲಿಕ್ಖೇ ತಪನ್ತಂ ಆದಿಚ್ಚಂ ಇವ ತೇಧಾತುಕೇ ತಪನ್ತಂ ಸಮ್ಮಾಸಮ್ಬುದ್ಧಂ ಪಸ್ಸಾತಿ.

ಪಗುಣನ್ತಿ ವಾಚುಗ್ಗತಂ. ತತೋತಿ ಅಸಕ್ಕುಣೇಯ್ಯತೋ. ನನ್ತಿ ಚೂಳಪನ್ಥಕಂ. ಥೇರೋತಿ ಮಹಾಪನ್ಥಕೋ ಥೇರೋ ನಿಕ್ಕಡ್ಢಾಪೇಸೀತಿ ಸಮ್ಬನ್ಧೋ. ಸೋತಿ ಚೂಳಪನ್ಥಕೋ. ಅಥಾತಿ ತಸ್ಮಿಂ ಕಾಲೇ. ಭಗವಾ ಆಹಾತಿ ಯೋಜನಾ. ಬುದ್ಧಚಕ್ಖುನಾತಿ ಆಸಯಾನುಸಯಇನ್ದ್ರಿಯಪರೋಪರಿಯತ್ತಞಾಣಸಙ್ಖಾತೇನ ಸಬ್ಬಞ್ಞುಬುದ್ಧಾನಂ ಚಕ್ಖುನಾ. ತನ್ತಿ ಚೂಳಪನ್ಥಕಂ. ತಸ್ಸಾತಿ ಚೂಳಪನ್ಥಕಸ್ಸ. ಅಥಾತಿ ತಸ್ಮಿಂ ಆರೋಚನಕಾಲೇ. ಅಸ್ಸಾತಿ ಚೂಳಪನ್ಥಕಸ್ಸ, ದತ್ವಾತಿ ಸಮ್ಬನ್ಧೋ. ರಜಂ ಮಲಂ ಹರತಿ ಅಪನೇತೀತಿ ರಜೋಹರಣಂ, ಪಿಲೋತಿಕಖಣ್ಡಂ. ಸೋತಿ ಚೂಳಪನ್ಥಕೋ. ತಸ್ಸಾತಿ ಪಿಲೋತಿಕಖಣ್ಡಸ್ಸ, ‘‘ಅನ್ತ’’ನ್ತಿಪದೇ ಅವಯವಿಸಮ್ಬನ್ಧೋ. ಪರಿಸುದ್ಧಮ್ಪೀತಿ ಪಿಸದ್ದೋ ಅಪರಿಸುದ್ಧೇ ಪಿಲೋತಿಕಖಣ್ಡೇ ಕಾ ನಾಮ ಕಥಾತಿ ದಸ್ಸೇತಿ. ಸಂವೇಗನ್ತಿ ಸನ್ತಾಸಂ ಭಯನ್ತಿ ಅತ್ಥೋ. ಅಥಾತಿ ತಸ್ಮಿಂ ಆರಮ್ಭಕಾಲೇ. ಅಸ್ಸಾತಿ ಚೂಳಪನ್ಥಕಸ್ಸ. ‘‘ತ’’ನ್ತಿಪದಂ ‘‘ಮಮಾಯನಭಾವ’’ನ್ತಿಪದೇನ ಸಮ್ಬನ್ಧಂ ಕತ್ವಾ ಯೋಜನಾ ಕಾತಬ್ಬಾತಿ. ದುತಿಯಂ.

೩. ಭಿಕ್ಖುನುಪಸ್ಸಯಸಿಕ್ಖಾಪದಂ

೧೬೨. ತತಿಯೇ ‘‘ಓವದತಿ ಪಾಚಿತ್ತಿಯಸ್ಸಾ’’ತಿ ಸಾಮಞ್ಞತೋ ವುತ್ತೇಪಿ ವಿಸೇಸತೋ ಅತ್ಥೋ ಗಹೇತಬ್ಬೋತಿ ಆಹ ‘‘ಅಟ್ಠಹಿ ಗರುಧಮ್ಮೇಹಿ ಓವದನ್ತಸ್ಸೇವ ಪಾಚಿತ್ತಿಯ’’ನ್ತಿ. ಇತೋತಿ ಇಮಸ್ಮಾ ಸಿಕ್ಖಾಪದಮ್ಹಾ. ಯತ್ಥ ಯತ್ಥಾತಿ ಯಸ್ಮಿಂ ಯಸ್ಮಿಂ ಸಿಕ್ಖಾಪದೇ. ಸಬ್ಬತ್ಥ ತತ್ಥ ತತ್ಥಾತಿ ಯೋಜನಾತಿ. ತತಿಯಂ.

ಪಕಿಣ್ಣಕಕಥಾ

ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ. ಇದಂ ಪಕಿಣ್ಣಕಂ ವುತ್ತನ್ತಿ ಸಮ್ಬನ್ಧೋ. ತೀಣಿ ಪಾಚಿತ್ತಿಯಾನೀತಿ ಭಿಕ್ಖುನೋ ಅಸಮ್ಮತತ್ತಾ ಏಕಂ ಪಾಚಿತ್ತಿಯಂ, ಸೂರಿಯಸ್ಸ ಅತ್ಥಙ್ಗತತ್ತಾ ಏಕಂ, ಭಿಕ್ಖುನುಪಸ್ಸಯಂ ಉಪಸಙ್ಕಮಿತತ್ತಾ ಏಕನ್ತಿ ತೀಣಿ ಪಾಚಿತ್ತಿಯಾನಿ. ಕಥನ್ತಿ ಕೇನ ಕಾರಣೇನ ಹೋತೀತಿ ಯೋಜನಾ. ತತ್ಥಾತಿ ಭಿಕ್ಖುನುಪಸ್ಸಯಂ. ತಸ್ಸೇವಾತಿ ಸಮ್ಮತಸ್ಸೇವ ಭಿಕ್ಖುನೋ. ಅಞ್ಞೇನ ಧಮ್ಮೇನಾತಿ ಗರುಧಮ್ಮೇಹಿ ಅಞ್ಞೇನ ಧಮ್ಮೇನ. ದಿವಾ ಪನಾತಿ ಸೂರಿಯುಗ್ಗಮನತೋ ತಸ್ಸ ಅನತ್ಥಙ್ಗತೇಯೇವಾತಿ.

೪. ಆಮಿಸಸಿಕ್ಖಾಪದಂ

೧೬೪. ಚತುತ್ಥೇ ಬಹುಂ ಮಾನಂ ಕತಂ ಯೇಹೀತಿ ಬಹುಕತಾ. ಬಹುಕತಾ ಹುತ್ವಾ ನ ಓವದನ್ತೀತಿ ಅತ್ಥಂ ದಸ್ಸೇನ್ತೋ ಆಹ ‘‘ನ ಬಹುಕತಾ’’ತಿಆದಿ. ಧಮ್ಮೇತಿ ಸೀಲಾದಿಧಮ್ಮೇ. ಅಧಿಪ್ಪಾಯೋತಿ ‘‘ನ ಬಹುಕತಾ’’ತಿಪದಸ್ಸ, ಛಬ್ಬಗ್ಗಿಯಾನಂ ವಾ ಅಧಿಪ್ಪಾಯೋತಿ ಯೋಜನಾ. ‘‘ಕತ್ತುಕಾಮೋತಿ ಆದೀನ’’ನ್ತಿಪದಂ ‘‘ಅತ್ಥೋ’’ತಿಪದೇ ವಾಚಕಸಮ್ಬನ್ಧೋ.

ಅಸಮ್ಮತೋ ನಾಮ ಠಪಿತೋ ವೇದಿತಬ್ಬೋತಿ ಯೋಜನಾ. ಸಮ್ಮುತಿನ್ತಿ ಭಿಕ್ಖುನೋವಾದಕಸಮ್ಮುತಿಂ. ಪಚ್ಛಾ ಸಾಮಣೇರಭೂಮಿಯಂ ಠಿತೋತಿ ಯೋಜನಾತಿ. ಚತುತ್ಥಂ.

೫. ಚೀವರದಾನಸಿಕ್ಖಾಪದಂ

೧೬೯. ಪಞ್ಚಮೇ ರಥಿಕಾಯಾತಿ ರಚ್ಛಾಯ. ಸಾ ಹಿ ರಥಸ್ಸ ಹಿತತ್ತಾ ರಥಿಕಾತಿ ವುಚ್ಚತಿ. ಸನ್ದಿಟ್ಠಾತಿ ಸಮೋಧಾನವಸೇನ ದಸ್ಸೀಯಿತ್ಥಾತಿ ಸನ್ದಿಟ್ಠಾ. ದಿಟ್ಠಮತ್ತಕಾ ಮಿತ್ತಾತಿ ಆಹ ‘‘ಮಿತ್ತಾ’’ತಿ. ಸೇಸನ್ತಿ ವುತ್ತವಚನತೋ ಸೇಸಂ ವಚನಂ. ತತ್ರಾತಿ ಚೀವರಪಟಿಗ್ಗಹಣಸಿಕ್ಖಾಪದೇ. ಹೀತಿ ವಿಸೇಸಜೋತಕಂ. ಇಧಾತಿ ಇಮಸ್ಮಿಂ ಚೀವರದಾನಸಿಕ್ಖಾಪದೇತಿ. ಪಞ್ಚಮಂ.

೬. ಚೀವರಸಿಬ್ಬನಸಿಕ್ಖಾಪದಂ

೧೭೫. ಛಟ್ಠೇ ಉದಾಯೀತಿ ಏತ್ಥ ಮಹಾಉದಾಯೀ, ಕಾಳುದಾಯೀ, ಲಾಳುದಾಯೀತಿ ತಯೋ ಉದಾಯೀ ಹೋನ್ತಿ. ತೇಸು ತತಿಯೋವಾಧಿಪ್ಪೇತೋತಿ ಆಹ ‘‘ಲಾಳುದಾಯೀ’’ತಿ. ಪಭಾವೇನ ಠಾತಿ ಪವತ್ತತೀತಿ ಪಟ್ಠೋತಿ ಕತೇ ಪಟಿಬಲೋವ ಲಬ್ಭತಿ. ತೇನಾಹ ‘‘ಪಟಿಬಲೋ’’ತಿ. ನಿಪುಣೋತಿ ಕುಸಲೋ. ‘‘ಪಟಿಭಾನೇನ ಕತಚಿತ್ತ’’ನ್ತಿಇಮಿನಾ ‘‘ಪಟಿಭಾನಚಿತ್ತ’’ನ್ತಿ ಪದಸ್ಸ ಮಜ್ಝೇ ಪದಲೋಪಂ ದಸ್ಸೇತಿ. ಸೋತಿ ಲಾಳುದಾಯೀ ಅಕಾಸೀತಿ ಸಮ್ಬನ್ಧೋ. ತಸ್ಸಾತಿ ಚೀವರಸ್ಸ. ‘‘ಯಥಾಸಂಹಟ’’ನ್ತಿ ಏತ್ಥ ಏವಸದ್ದೋ ಅಜ್ಝಾಹರಿತಬ್ಬೋತಿ ಆಹ ‘‘ಯಥಾಸಂಹಟಮೇವಾ’’ತಿ.

೧೭೬. ಯಂ ಚೀವರಂ ನಿವಾಸಿತುಂ ವಾ ಪಾರುಪಿತುಂ ವಾ ಸಕ್ಕಾ ಹೋತಿ, ತಂ ಚೀವರಂ ನಾಮಾತಿ ಯೋಜನಾ. ಏವಂ ಹೀತಿ ಏವಮೇವ. ‘‘ದುಕ್ಕಟ’’ನ್ತಿಇಮಿನಾ ‘‘ಸಯಂ ಸಿಬ್ಬತಿ, ಆಪತ್ತಿ ಪಾಚಿತ್ತಿಯಸ್ಸಾ’’ತಿ ಏತ್ಥ ಅನ್ತರಾಪತ್ತಿಂ ದಸ್ಸೇತಿ. ಆರಾತಿ ಸೂಚಿ. ಸಾ ಹಿ ಅರತಿ ನಿಸ್ಸಙ್ಗವಸೇನ ಗಚ್ಛತಿ ಪವಿಸತೀತಿ ‘‘ಆರಾ’’ತಿ ವುಚ್ಚತಿ, ತಸ್ಸಾ ಪಥೋ ಗಮನಂ ಆರಾಪಥೋ, ತಸ್ಮಿಂ, ಆರಾಪಥಸ್ಸ ನೀಹರಣಾವಸಾನತ್ತಾ ‘‘ನೀಹರಣೇ’’ತಿ ವುತ್ತಂ. ಸತಕ್ಖತ್ತುಮ್ಪೀತಿ ಅನೇಕಕ್ಖತ್ತುಮ್ಪಿ. ಆಣತ್ತೋತಿ ಆಣಾಪೀಯತೀತಿ ಆಣತ್ತೋ. ‘‘ಆಣಾಪಿತೋ’’ತಿ ವತ್ತಬ್ಬೇ ಣಾಪೇಸದ್ದಸ್ಸ ಲೋಪಂ, ಇಕಾರಸ್ಸ ಚ ಅಕಾರಂ ಕತ್ವಾ, ‘‘ಆದತ್ತೇ’’ತಿ ಆಖ್ಯಾತಪದೇ ತೇವಿಭತ್ತಿಯಾ ವಿಯ ತಪಚ್ಚಯಸ್ಸ ಚ ದ್ವಿಭಾವಂ ಕತ್ವಾ ಏವಂ ವುತ್ತಂ. ತೇನಾಹ ‘‘ಸಕಿಂ ಚೀವರಂ ಸಿಬ್ಬಾತಿ ವುತ್ತೋ’’ತಿ. ಅಥ ಪನಾತಿ ತತೋ ಅಞ್ಞಥಾ ಪನ. ಆಣತ್ತಸ್ಸಾತಿ ಆಣಾಪಿತಸ್ಸ. ಸಮ್ಬಹುಲಾನಿಪಿ ಪಾಚಿತ್ತಿಯಾನಿ ಹೋನ್ತೀತಿ ಸಮ್ಬನ್ಧೋ.

ಯೇಪಿ ನಿಸ್ಸಿತಕಾ ಸಿಬ್ಬನ್ತೀತಿ ಯೋಜನಾ, ಆಚರಿಯುಪಜ್ಝಾಯೇಸು ಸಿಬ್ಬನ್ತೇಸೂತಿ ಸಮ್ಬನ್ಧೋ. ತೇಸನ್ತಿ ಆಚರಿಯುಪಜ್ಝಾಯಾನಂ. ತೇಸಮ್ಪೀತಿ ನಿಸ್ಸಿತಕಾನಮ್ಪಿ. ಞಾತಿಕಾನಂ ಭಿಕ್ಖುನೀನಂ ಚೀವರನ್ತಿ ಸಮ್ಬನ್ಧೋ. ‘‘ಅನ್ತೇವಾಸಿಕೇಹೀ’’ತಿಪದಂ ‘‘ಸಿಬ್ಬಾಪೇನ್ತೀ’’ತಿಪದೇ ಕಾರಿತಕಮ್ಮಂ. ತತ್ರಾಪೀತಿ ಆಚರಿಯುಪಜ್ಝಾಯೇಹಿ ಸಿಬ್ಬಾಪನೇಪಿ. ‘‘ಅನ್ತೇವಾಸಿಕೇ’’ತಿಪದಂ ‘‘ವಞ್ಚೇತ್ವಾ’’ತಿಪದೇ ಸುದ್ಧಕಮ್ಮಂ, ‘‘ಸಿಬ್ಬಾಪೇನ್ತೀ’’ತಿಪದೇ ಕಾರಿತಕಮ್ಮಂ. ಇತರೇಸನ್ತಿ ಆಚರಿಯುಪಜ್ಝಾಯಾನನ್ತಿ. ಛಟ್ಠಂ.

೭. ಸಂವಿಧಾನಸಿಕ್ಖಾಪದಂ

೧೮೧. ಸತ್ತಮೇ ‘‘ತಾಸಂ ಭಿಕ್ಖುನೀನಂ ಪಚ್ಛಾ ಗಚ್ಛನ್ತೀನ’’ನ್ತಿ ಪದಾನಿ ‘‘ಪತ್ತಚೀವರ’’ನ್ತಿ ಪಾಠಸೇಸೇನ ಯೋಜೇತಬ್ಬಾನೀತಿ ಆಹ ‘‘ಪಚ್ಛಾ ಗಚ್ಛನ್ತೀನಂ ಪತ್ತಚೀವರ’’ನ್ತಿ. ತಾ ಭಿಕ್ಖುನಿಯೋ ಪಚ್ಛಾ ಗಚ್ಛನ್ತಿಯೋತಿ ವಿಭತ್ತಿವಿಪಲ್ಲಾಸಂ ಕತ್ವಾ ‘‘ದೂಸೇಸು’’ನ್ತಿಪದೇನ ಯೋಜೇತಬ್ಬಾನೀತಿ ಆಹ ‘‘ತಾ ಭಿಕ್ಖುನಿಯೋ ಚೋರಾ ದೂಸಯಿಂಸೂ’’ತಿ. ಅಥ ವಾ ವಿಭತ್ತಿವಿಪಲ್ಲಾಸಮಕತ್ವಾ ‘‘ಅಚ್ಛಿನ್ದಿಂಸೂ’’ತಿ ಪದೇ ‘‘ಪತ್ತಚೀವರ’’ನ್ತಿಪದಂ ಅಜ್ಝಾಹರಿತ್ವಾ ‘‘ದೂಸೇಸು’’ನ್ತಿಪದೇ ‘‘ಸೀಲ’’ನ್ತಿ ಪಾಠಂ ಅಜ್ಝಾಹರಿತ್ವಾ ಯೋಜೇತಬ್ಬನ್ತಿ ದಟ್ಠಬ್ಬಂ.

೧೮೨-೩. ಸಂಪುಬ್ಬೋ, ವಿಪುಬ್ಬೋ ಚ ಧಾಧಾತು ತ್ವಾಪಚ್ಚಯೋ ಹೋತೀತಿ ಆಹ ‘‘ಸಂವಿದಹಿತ್ವಾ’’ತಿ. ಕುಕ್ಕುಟೋತಿ ತಮ್ಬಚೂಳೋ. ಸೋ ಹಿ ಕುಕತಿ ಆಹಾರತ್ಥಂ ಪಾಣಕಾದಯೋ ಆದದಾತೀತಿ ಕುಕ್ಕುಟೋ. ಅಯನ್ತಿ ಗಾಮೋ. ಅಧಿಕರಣೇ ಣೋತಿ ಆಹ ‘‘ಸಮ್ಪದನ್ತಿ ಏತ್ಥಾ’’ತಿ. ಏತ್ಥಾತಿ ಚ ಏತಸ್ಮಿಂ ಗಾಮೇ. ಉತ್ತರಪದಸ್ಸ ಅಧಿಕರಣತ್ಥತ್ತಾ ಪುಬ್ಬಪದೇನ ಛಟ್ಠೀಸಮಾಸೋತಿ ಆಹ ‘‘ಕುಕ್ಕುಟಾನ’’ನ್ತಿಆದಿ. ಏವಂ ಣಸದ್ದಸ್ಸ ಅಧಿಕರಣತ್ಥಂ, ಪುಬ್ಬಪದೇನ ಛಟ್ಠೀಸಮಾಸಞ್ಚ ದಸ್ಸೇತ್ವಾ ಇದಾನಿ ಣಸದ್ದಸ್ಸ ಭಾವತ್ಥಂ, ಪುಬ್ಬಪದೇನ ಬಾಹಿರತ್ಥಸಮಾಸಞ್ಚ ದಸ್ಸೇತುಂ ವುತ್ತಂ ‘‘ಅಥ ವಾ’’ತಿ. ತತ್ಥಾತಿ ಪಚ್ಛಿಮಪಾಠೇ. ಉಪ್ಪತಿತ್ವಾತಿ ಉಡ್ಡಿತ್ವಾ ಉದ್ಧಂ ಆಕಾಸಂ ಲಙ್ಗಿತ್ವಾತಿ ಅತ್ಥೋ. ಏತ್ಥಾತಿ ಪಚ್ಛಿಮಪಾಠೇ. ದ್ವಿಧಾತಿ ಪದಗಮನಪಕ್ಖಗಮನವಸೇನ ದ್ವಿಪಕಾರೇನ. ‘‘ಉಪಚಾರೋ ನ ಲಬ್ಭತೀ’’ತಿಇಮಿನಾ ಗಾಮನ್ತರೋ ನ ಹೋತಿ, ಏಕಗಾಮೋಯೇವ ಪನ ಹೋತಿ, ತಸ್ಮಾ ಆಪತ್ತಿಪಿ ಏಕಾಯೇವ ಹೋತೀತಿ ದಸ್ಸೇತಿ. ಪಚ್ಚೂಸೇತಿ ಪಭಾತೇ. ಸೋ ಹಿ ಪಟಿವಿರುದ್ಧಂ ತಿಮಿರಂ ಉಸೇತಿ ನಾಸೇತೀತಿ ಪಚ್ಚೂಸೋತಿ ವುಚ್ಚತಿ. ವಸ್ಸನ್ತಸ್ಸಾತಿ ರವನ್ತಸ್ಸ. ‘‘ವಚನತೋ’’ತಿಪದಂ ‘‘ಆಪತ್ತಿಯೇವಾ’’ತಿಪದೇ ಞಾಪಕಹೇತು. ರತನಮತ್ತನ್ತರೋತಿ ಕುಕ್ಕುಪಮಾಣೇನ ಬ್ಯವಧಾನೋ.

ತತ್ರಾತಿ ‘‘ಗಾಮನ್ತರೇ ಗಾಮನ್ತರೇ’’ತಿ ವಚನೇ. ಹೀತಿ ವಿತ್ಥಾರೋ. ಉಭೋಪೀತಿ ಭಿಕ್ಖುಭಿಕ್ಖುನಿಯೋಪಿ ಸಂವಿದಹನ್ತೀತಿ ಸಮ್ಬನ್ಧೋ. ನ ವದನ್ತೀತಿ ಅಟ್ಠಕಥಾಚರಿಯಾ ನ ಕಥಯನ್ತಿ. ಚತುನ್ನಂ ಮಗ್ಗಾನಂ ಸಮಾಗಮಟ್ಠಾನಂ ಚತುಕ್ಕಂ, ದ್ವಿನ್ನಂ, ತಿಣ್ಣಂ, ಚತುಕ್ಕತೋ ಅತಿರೇಕಾನಂ ವಾ ಮಗ್ಗಾನಂ ಸಮ್ಬದ್ಧಟ್ಠಾನಂ ಸಿಙ್ಘಾಟಕಂ. ತತ್ರಾಪೀತಿ ಉಪಚಾರೋಕ್ಕಮನೇಪಿ. ಗಾಮತೋತಿ ಅತ್ತನೋ ಗಾಮತೋ. ಯಾವ ನ ಓಕ್ಕಮನ್ತಿ, ತಾವಾತಿ ಯೋಜನಾ. ಸನ್ಧಾಯಾತಿ ಆರಬ್ಭ. ಅಥಾತಿ ತಸ್ಮಿಂ ನಿಕ್ಖಮನಕಾಲೇ. ದ್ವೇಪೀತಿ ಭಿಕ್ಖುಭಿಕ್ಖುನಿಯೋಪಿ ಗಚ್ಛನ್ತೀತಿ ಸಮ್ಬನ್ಧೋ. ತನ್ತಿ ವಚನಂ.

ಹೀತಿ ವಿಸೇಸೋ. ‘‘ಗಾಮನ್ತರೇ ಗಾಮನ್ತರೇ’’ತಿ ಪುರಿಮಸ್ಮಿಂ ನಯೇ ಅತಿಕ್ಕಮೇ ಅನಾಪತ್ತಿ, ಓಕ್ಕಮನೇ ಆಪತ್ತೀತಿ ಅಯಂ ವಿಸೇಸೋ.

೧೮೪. ಗತಪುಬ್ಬತ್ಥಾತಿ ಗತಪುಬ್ಬಾ ಅತ್ಥ ಭವಥಾತಿ ಅತ್ಥೋ. ಏಹಿ ಗಚ್ಛಾಮಾತಿ ವಾ ಆಗಚ್ಛೇಯ್ಯಾಸೀತಿ ವಾ ವದತೀತಿ ಯೋಜನಾ. ಚೇತಿಯವನ್ದನತ್ಥನ್ತಿ ಥೂಪಸ್ಸ ವನ್ದಿತುಂ.

೧೮೫. ವಿಸಙ್ಕೇತೇನಾತಿ ಏತ್ಥ ಕಾಲವಿಸಙ್ಕೇತೋ, ದ್ವಾರವಿಸಙ್ಕೇತೋ, ಮಗ್ಗವಿಸಙ್ಕೇತೋತಿ ತಿವಿಧೋ. ತತ್ಥ ಕಾಲವಿಸಙ್ಕೇತೇನೇವ ಅನಾಪತ್ತಿಂ ಸನ್ಧಾಯ ‘‘ವಿಸಙ್ಕೇತೇನ ಗಚ್ಛನ್ತಿ, ಅನಾಪತ್ತೀ’’ತಿ ಆಹ. ದ್ವಾರವಿಸಙ್ಕೇತೇನ ವಾ ಮಗ್ಗವಿಸಙ್ಕೇತೇನ ವಾ ಆಪತ್ತಿಮೋಕ್ಖೋ ನತ್ಥಿ. ತಮತ್ಥಂ ದಸ್ಸೇನ್ತೋ ಆಹ ‘‘ಪುರೇಭತ್ತ’’ನ್ತಿಆದಿ. ಚಕ್ಕಸಮಾರುಳ್ಹಾತಿ ಇರಿಯಾಪಥಚಕ್ಕಂ ವಾ ಸಕಟಚಕ್ಕಂ ವಾ ಸಮ್ಮಾ ಆರುಳ್ಹಾ. ಜನಪದಾತಿ ಜನಕೋಟ್ಠಾಸಾ. ಪರಿಯಾಯನ್ತೀತಿ ಪರಿ ಪುನಪ್ಪುನಂ ಯನ್ತಿ ಚ ಆಯನ್ತಿ ಚಾತಿ. ಸತ್ತಮಂ.

೮. ನಾವಾಭಿರುಹನಸಿಕ್ಖಾಪದಂ

೧೮೮. ಅಟ್ಠಮೇ ಸಹ ಅಞ್ಞಮಞ್ಞಂ ಥವನಂ ಅಭಿತ್ಥವನಂ ಸನ್ಥವೋ, ಸಙ್ಗಮೋತಿ ವುತ್ತಂ ಹೋತಿ. ಮಿತ್ತಭಾವೇನ ಸನ್ಥವೋ ಮಿತ್ತಸನ್ಥವೋ, ಲೋಕೇಹಿ ಅಸ್ಸಾದೇತಬ್ಬೋ ಚ ಸೋ ಮಿತ್ತಸನ್ಥವೋ ಚೇತಿ ಲೋಕಸ್ಸಾದಮಿತ್ತಸನ್ಥವೋ, ತಸ್ಸ ವಸೋ ಪಭೂ, ತೇನ ವಾ ಆಯತ್ತೋತಿ ಲೋಕಸ್ಸಾದಮಿತ್ತಸನ್ಥವವಸೋ, ತೇನ. ಉದ್ಧಂ ಗಚ್ಛತೀತಿ ಉದ್ಧಂಗಾಮಿನೀತಿ ದಸ್ಸೇನ್ತೋ ಆಹ ‘‘ಉದ್ಧ’’ನ್ತಿಆದಿ. ಉದ್ಧನ್ತಿ ಚ ಇಧ ಪಟಿಸೋತೋ. ತೇನಾಹ ‘‘ನದಿಯಾ ಪಟಿಸೋತ’’ನ್ತಿ. ‘‘ಉದ್ಧಂಗಾಮಿನಿ’’ನ್ತಿಮಾತಿಕಾಪದಂ ‘‘ಉಜ್ಜವನಿಕಾಯಾ’’ತಿಪದಭಾಜನಿಯಾ ಸಂಸನ್ದೇನ್ತೋ ಆಹ ‘‘ಯಸ್ಮಾ ಪನಾ’’ತಿಆದಿ. ಯೋತಿ ಭಿಕ್ಖು. ಉದ್ಧಂ ಜವನತೋತಿ ಪಟಿಸೋತಂ ಗಮನತೋ. ತೇನಾತಿ ತೇನ ಹೇತುನಾ. ಅಸ್ಸಾತಿ ‘‘ಉದ್ಧಂಗಾಮಿನಿ’’ನ್ತಿಪದಸ್ಸ. ಅನುಸೋತಂ ಇಧ ಅಧೋ ನಾಮಾತಿ ಆಹ ‘‘ಅನುಸೋತ’’ನ್ತಿ. ಅಸ್ಸಪೀತಿ ಪಿಸದ್ದೋ ಪುರಿಮಾಪೇಕ್ಖೋ. ತತ್ಥಾತಿ ‘‘ಉದ್ಧಂಗಾಮಿನಿಂ ವಾ ಅಧೋಗಾಮಿನಿಂ ವಾ’’ತಿವಚನೇ. ಯನ್ತಿ ನಾವಂ ಹರನ್ತೀತಿ ಸಮ್ಬನ್ಧೋ. ಸಮ್ಪಟಿಪಾದನತ್ಥನ್ತಿ ಸಮ್ಮಾ ಪಟಿಮುಖಂ ಪಾದನತ್ಥಂ, ಉಜುಪಜ್ಜಾಪನತ್ಥನ್ತಿ ಅತ್ಥೋ. ಏತ್ಥಾತಿ ನಾವಾಯಂ. ‘‘ಠಪೇತ್ವಾ’’ತಿಪದಭಾಜನಿಮಪೇಕ್ಖಿತ್ವಾ ‘‘ಉಪಯೋಗತ್ಥೇ ನಿಸ್ಸಕ್ಕವಚನ’’ನ್ತಿ ಆಹ. ‘‘ಅಞ್ಞತ್ರಾ’’ತಿ ಮಾತಿಕಾಪದೇ ಅಪೇಕ್ಖಿತೇ ನಿಸ್ಸಕ್ಕತ್ಥೇ ನಿಸ್ಸಕ್ಕವಚನಮ್ಪಿ ಯುಜ್ಜತೇವ.

೧೮೯. ಏಕಂ ತೀರಂ ಅಗಾಮಕಂ ಅರಞ್ಞಂ ಹೋತೀತಿ ಯೋಜನಾ. ಅದ್ಧಯೋಜನಗಣನಾಯ ಪಾಚಿತ್ತಿಯಾನಿ ಹೋನ್ತೀತಿ ಸಮ್ಬನ್ಧೋ. ಮಜ್ಝೇನ ಗಮನೇಪೀತಿ ಪಿಸದ್ದೋ ಅಗಾಮಕಅರಞ್ಞತೀರಪಸ್ಸೇನ ಗಮನೇ ಕಾ ನಾಮ ಕಥಾತಿ ದಸ್ಸೇತಿ. ನ ಕೇವಲಂ ನದಿಯಾತಿ ಕೇವಲಂ ನದಿಯಾ ಏವ ಅನಾಪತ್ತಿ ನಾತಿ ಯೋಜನಾ, ಅಞ್ಞೇಸುಪಿ ಸಮುದ್ದಾದೀಸು ಅನಾಪತ್ತೀತಿ ಅಧಿಪ್ಪಾಯೋ. ಯೋಪಿ ಭಿಕ್ಖು ಗಚ್ಛತೀತಿ ಸಮ್ಬನ್ಧೋ. ಹೀತಿ ಸಚ್ಚಂ, ಯಸ್ಮಾ ವಾ.

೧೯೧. ಕಾಲವಿಸಙ್ಕೇತೋ, ತಿತ್ಥವಿಸಙ್ಕೇತೋ, ನಾವಾವಿಸಙ್ಕೇತೋತಿ ತಿವಿಧೋ ವಿಸಙ್ಕೇತೋ. ತತ್ಥ ಕಾಲವಿಸಙ್ಕೇತೇನ ಅನಾಪತ್ತಿಂ ಸನ್ಧಾಯ ‘‘ವಿಸಙ್ಕೇತೇನ ಅಭಿರುಹನ್ತೀ’’ತಿ ವುತ್ತಂ. ಅಞ್ಞೇನ ವಿಸಙ್ಕೇತೇನ ಆಪತ್ತಿಯೇವ, ತಮತ್ಥಂ ದಸ್ಸೇನ್ತೋ ಆಹ ‘‘ಇಧಾಪೀ’’ತಿಆದೀತಿ. ಅಟ್ಠಮಂ.

೯. ಪರಿಪಾಚಿತಸಿಕ್ಖಾಪದಂ

೧೯೨. ನವಮೇ ಮಹಾನಾಗೇಸೂತಿ ಮಹಾಅರಹನ್ತೇಸು ತಿಟ್ಠಮಾನೇಸು ಸನ್ತೇಸು, ಚೇತಕೇ ಪೇಸ್ಸಭೂತೇ ನವಕೇ ಭಿಕ್ಖೂ ನಿಮನ್ತೇತೀತಿ ಅಧಿಪ್ಪಾಯೋ. ಇತರಥಾತಿ ವಿಭತ್ತಿವಿಪಲ್ಲಾಸತೋ ವಾ ಪಾಠಸೇಸತೋ ವಾ ಅಞ್ಞೇನ ಪಕಾರೇನ. ಅನ್ತರಂ ಮಜ್ಝಂ ಪತ್ತಾ ಕಥಾ ಅನ್ತರಕಥಾತಿ ದಸ್ಸೇನ್ತೋ ಆಹ ‘‘ಅವಸಾನ’’ನ್ತಿಆದಿ. ಪಕಿರೀಯಿತ್ಥಾತಿ ಪಕತಾ, ನ ಪಕತಾ ವಿಪ್ಪಕತಾತಿ ವುತ್ತೇ ಕರಿಯಮಾನಕಥಾವಾತಿ ಆಹ ‘‘ಕರಿಯಮಾನಾ ಹೋತೀ’’ತಿ. ಅದ್ಧಚ್ಛಿಕೇನಾತಿ ಉಪಡ್ಢಚಕ್ಖುನಾ. ತೇಹೀತಿ ಥೇರೇಹಿ.

೧೯೪. ಲದ್ಧಬ್ಬನ್ತಿ ಲದ್ಧಾರಹಂ. ಅಸ್ಸಾತಿ ‘‘ಭಿಕ್ಖುನಿಪರಿಪಾಚಿತ’’ನ್ತಿಪದಸ್ಸ. ಸಮ್ಮಾ ಆರಭಿತಬ್ಬೋತಿ ಸಮಾರಮ್ಭೋತಿ ದಸ್ಸೇನ್ತೋ ಆಹ ‘‘ಸಮಾರದ್ಧಂ ವುಚ್ಚತೀ’’ತಿ. ಪಟಿಯಾದಿತಸ್ಸಾತಿ ಪರಿಪಾಚಿತಸ್ಸ ಭತ್ತಸ್ಸ. ಗಿಹೀನಂ ಸಮಾರಮ್ಭೋತಿ ಗಿಹಿಸಮಾರಮ್ಭೋ, ಕತ್ವತ್ಥೇ ಚೇತಂ ಸಾಮಿವಚನಂ. ತತೋತಿ ತತೋ ಭತ್ತತೋ. ಅಞ್ಞತ್ರಾತಿ ವಿನಾ. ತಮತ್ಥಂ ವಿವರನ್ತೋ ಆಹ ‘‘ತಂ ಪಿಣ್ಡಪಾತಂ ಠಪೇತ್ವಾ’’ತಿ. ಪದಭಾಜನೇ ಪನ ವುತ್ತನ್ತಿ ಸಮ್ಬನ್ಧೋ. ‘‘ಞಾತಕಪವಾರಿತೇಹೀ’’ತಿಪದಂ ‘‘ಅಸಮಾರದ್ಧೋ’’ತಿಪದೇ ಕತ್ತಾ. ಅತ್ಥತೋತಿ ಭಿಕ್ಖುನಿಅಪರಿಪಾಚಿತಅತ್ಥತೋ. ತಸ್ಮಾತಿ ಯಸ್ಮಾ ಅತ್ಥತೋ ಸಮಾರದ್ಧೋವ ಹೋತಿ, ತಸ್ಮಾ.

೧೯೫. ಪಟಿಯಾದಿತನ್ತಿ ಪಟಿಯತ್ತಂ. ಪಕತಿಯಾ ಪಟಿಯತ್ತಂ ಪಕತಿಪಟಿಯತ್ತನ್ತಿ ದಸ್ಸೇನ್ತೋ ಆಹ ‘‘ಪಕತಿಯಾ’’ತಿಆದಿ. ಮಹಾಪಚ್ಚರಿಯಂ ಪನ ವುತ್ತನ್ತಿ ಸಮ್ಬನ್ಧೋ. ತಸ್ಸಾತಿ ತಸ್ಸೇವ ಭಿಕ್ಖುನೋ. ಅಞ್ಞಸ್ಸಾತಿ ತತೋ ಅಞ್ಞಸ್ಸ ಭಿಕ್ಖುನೋ.

೧೯೭. ಭಿಕ್ಖುನಿಪರಿಪಾಚಿತೇಪೀತಿ ಪಿಸದ್ದೋ ಭಿಕ್ಖುನಿಅಪರಿಪಾಚಿತೇ ಕಾ ನಾಮ ಕಥಾತಿ ದಸ್ಸೇತೀತಿ. ನವಮಂ.

೧೦. ರಹೋನಿಸಜ್ಜಸಿಕ್ಖಾಪದಂ

೧೯೮. ದಸಮೇ ಪಾಳಿಅತ್ಥೋ ಚಾತಿ ಏತ್ಥ ಪಾಳಿಸದ್ದೋ ವಿನಿಚ್ಛಿಯಸದ್ದೇ ಚ ಯೋಜೇತಬ್ಬೋ ‘‘ಪಾಳಿವಿನಿಚ್ಛಯೋ’’ತಿ. ಹೀತಿ ಸಚ್ಚಂ, ಯಸ್ಮಾ ವಾ. ‘‘ಇದಂ ಸಿಕ್ಖಾಪದ’’ನ್ತಿಪದಂ ‘‘ಏಕಪರಿಚ್ಛೇದ’’ನ್ತಿಪದೇ ತುಲ್ಯತ್ಥಕತ್ತಾ, ‘‘ಪಞ್ಞತ್ತ’’ನ್ತಿಪದೇ ಕಮ್ಮಂ. ಉಪರೀತಿ ಅಚೇಲಕವಗ್ಗೇತಿ. ದಸಮಂ.

ಓವಾದವಗ್ಗೋ ತತಿಯೋ.