೭. ಸೇಖಿಯಕಣ್ಡಂ

೧. ಪರಿಮಣ್ಡಲವಗ್ಗ-ಅತ್ಥಯೋಜನಾ

ಸಿಕ್ಖಿತಸಿಕ್ಖೇನ ತೀಸು ಸಿಕ್ಖಾಸು ಚತೂಹಿ ಮಗ್ಗೇಹಿ ಸಿಕ್ಖಿತಸಿಕ್ಖೇನ ತಾದಿನಾ ಅಟ್ಠಹಿ ಲೋಕಧಮ್ಮೇಹಿ ಅಕಮ್ಪಿಯಟ್ಠೇನ ತಾದಿನಾ, ಇಟ್ಠಾನಿಟ್ಠೇಸು ವಾ ಅವಿಕಾರಟ್ಠೇನ ತಾದಿನಾ ಭಗವತಾ ಯಾನಿ ಸಿಕ್ಖಾಪದಾನಿ ‘‘ಸೇಖಿಯಾನೀ’’ತಿ ಭಾಸಿತಾನಿ, ದಾನಿ ತೇಸಮ್ಪಿ ಸಿಕ್ಖಾಪದಾನಂ ಅಯಮ್ಪಿ ವಣ್ಣನಾಕ್ಕಮೋ ಭವತೀತಿ ಯೋಜನಾ.

೫೭೬. ತತ್ಥಾತಿ ಸೇಖಿಯಸಿಕ್ಖಾಪದೇಸು, ಅತ್ಥೋ ಏವಂ ವೇದಿತಬ್ಬೋತಿ ಯೋಜನಾ. ‘‘ಸಮನ್ತತೋ’’ತಿಇಮಿನಾ ಪರಿತ್ಯೂಪಸಗ್ಗಸ್ಸತ್ಥಂ ದಸ್ಸೇತಿ. ‘‘ನಾಭಿಮಣ್ಡಲಂ ಜಾಣುಮಣ್ಡಲ’’ನ್ತಿ ಏತ್ಥ ಉದ್ಧಂಸದ್ದೋ ಚ ಅಧೋಸದ್ದೋ ಚ ಅಜ್ಝಾಹರಿತಬ್ಬೋತಿ ಆಹ ‘‘ಉದ್ಧ’’ನ್ತಿಆದಿ. ಅಟ್ಠಙ್ಗುಲಮತ್ತನ್ತಿ ಭಾವನಪುಂಸಕಂ, ನಿವಾಸೇತಬ್ಬನ್ತಿ ಸಮ್ಬನ್ಧೋ. ತತೋತಿ ಅಟ್ಠಙ್ಗುಲಮತ್ತತೋ. ಯಥಾ ಪಟಿಚ್ಛನ್ನಂ ಹೋತಿ, ಏವಂ ನಿವಾಸೇನ್ತಸ್ಸಾತಿ ಯೋಜನಾ. ತತ್ರಿದಂ ಪಮಾಣನ್ತಿ ತಸ್ಸ ನಿವಾಸನಸ್ಸ ಇದಂ ಪಮಾಣಂ. ತಾದಿಸಸ್ಸಾತಿ ದೀಘತೋ ಮುಟ್ಠಿಪಞ್ಚಕಸ್ಸ ತಿರಿಯಂ ಅಡ್ಢತೇಯ್ಯಹತ್ಥಸ್ಸ ನಿವಾಸನಸ್ಸ. ಜಾಣುಮಣ್ಡಲಂ ಪಟಿಚ್ಛಾದನತ್ಥಂ ವಟ್ಟತೀತಿ ಯೋಜನಾ. ತತ್ಥಾತಿ ಚೀವರೇಸು. ನ ತಿಟ್ಠತೀತಿ ವಿರಳತ್ತಾ ನ ತಿಟ್ಠತಿ. ತಿಟ್ಠತೀತಿ ಘನತ್ತಾ ತಿಟ್ಠತಿ.

ನಿವಾಸೇನ್ತಸ್ಸ ಚಾತಿಏತ್ಥ ಚಸದ್ದೋ ಅವಧಾರಣತ್ಥೋ, ನಿವಾಸೇನ್ತಸ್ಸೇವಾತಿ ಅತ್ಥೋ. ಕೇವಲಂ ಏವಂ ನಿವಾಸೇನ್ತಸ್ಸೇವ ದುಕ್ಕಟಂ ನ ಹೋತಿ, ಅಥ ಖೋ ತಥಾ ನಿವಾಸೇನ್ತಸ್ಸಾಪಿ ದುಕ್ಕಟಮೇವಾತಿ ಯೋಜನಾ. ಯೇ ಪನ ನಿವಾಸನದೋಸಾತಿ ಸಮ್ಬನ್ಧೋ. ಅಞ್ಞೇತಿ ಪುರತೋ ಚ ಪಚ್ಛತೋ ಚ ಓಲಮ್ಬೇತ್ವಾ ನಿವಸನತೋ ಅಞ್ಞೇ. ತೇ ಸಬ್ಬೇತಿ ಸಬ್ಬೇ ತೇ ನಿವಾಸನದೋಸಾ. ಏತ್ಥಾತಿ ಇಮಸ್ಮಿಂ ವಿಭಙ್ಗೇ. ತತ್ಥೇವಾತಿ ಖನ್ಧಕೇಯೇವ.

ಅಸಞ್ಚಿಚ್ಚ ನಿವಾಸೇನ್ತಸ್ಸ ಅನಾಪತ್ತೀತಿ ಸಮ್ಬನ್ಧೋ. ಏಸೇವ ನಯೋ ‘‘ಅಸತಿಯಾ’’ತಿ ಏತ್ಥಾಪಿ. ಅಜಾನನ್ತಸ್ಸಾತಿ ಏತ್ಥ ಅಜಾನನಂ ದುವಿಧಂ ನಿವಾಸನವತ್ತಸ್ಸ ಅಜಾನನಂ, ಆರೂಳ್ಹೋರೂಳ್ಹಭಾವಸ್ಸ ಅಜಾನನನ್ತಿ. ತತ್ಥ ಆರೂಳ್ಹೋರೂಳ್ಹಭಾವಸ್ಸ ಅಜಾನನಂ ಸನ್ಧಾಯ ವುತ್ತಂ ‘‘ಅಜಾನನ್ತಸ್ಸಾ’’ತಿ ದಸ್ಸೇನ್ತೋ ಆಹ ‘‘ಅಜಾನನ್ತಸ್ಸಾತಿ ಏತ್ಥಾ’’ತಿಆದಿ. ಹೀತಿ ಸಚ್ಚಂ. ತಸ್ಸಾತಿ ನಿವಾಸನವತ್ತಸ್ಸ. ಅಸ್ಸಾತಿ ಭಿಕ್ಖುನೋ. ತಂ ಪನಾತಿ ಆಪತ್ತಿತೋ ಅಮೋಕ್ಖನಂ ಪನ. ತಸ್ಮಾತಿ ಯಸ್ಮಾ ಯುಜ್ಜತಿ, ತಸ್ಮಾ. ಯೋತಿ ಭಿಕ್ಖು. ಕುರುನ್ದಿಯಂ ವುತ್ತನ್ತಿ ಸಮ್ಬನ್ಧೋ. ಸುಕ್ಖಾ ಜಙ್ಘಾ ಇಮಸ್ಸಾತಿ ಸುಕ್ಖಜಙ್ಘೋ. ಮಹನ್ತಂ ಪಿಣ್ಡಿಕಮಂಸಂ ಇಮಸ್ಸಾತಿ ಮಹಾಪಿಣ್ಡಿಕಮಂಸೋ. ತಸ್ಸಾತಿ ಭಿಕ್ಖುಸ್ಸ.

ವಣೋತಿ ಅರು. ತಞ್ಹಿ ವಣತಿ ಗತ್ತವಿಚುಣ್ಣನಂ ಕರೋತೀತಿ ವಣೋತಿ ವುಚ್ಚತಿ. ವಾಳಮಿಗಾ ವಾ ಚೋರಾ ವಾತಿ ಏತ್ಥ ವಾಸದ್ದೋ ಅವುತ್ತಸಮ್ಪಿಣ್ಡನತ್ಥೋ, ತೇನ ಅಞ್ಞಾಪಿ ಉದಕಚಿಕ್ಖಲ್ಲಾದಯೋ ಆಪದಾ ಸಙ್ಗಯ್ಹನ್ತಿ.

೫೭೭. ಇಧಾತಿ ಇಮಸ್ಮಿಂ ವಿಭಙ್ಗೇ, ಸಿಕ್ಖಾಪದೇ ವಾ. ಉಭೋ ಕಣ್ಣೇತಿ ಪುರತೋ ಚ ಪಚ್ಛತೋ ಚ ನಿಗ್ಗತೇ ದ್ವೇ ಕಣ್ಣೇ. ಅವಿಸೇಸೇನಾತಿ ‘‘ಅನ್ತರಘರೇ’’ತಿ ಚ ‘‘ಆರಾಮೇ’’ತಿ ಚ ವಿಸೇಸಂ ಅಕತ್ವಾ ಸಾಮಞ್ಞೇನ. ವಿಹಾರೇಪೀತಿ ಸಙ್ಘಸನ್ನಿಪಾತಬುದ್ಧುಪಟ್ಠಾನಥೇರುಪಟ್ಠಾನಾದಿಕಾಲಂ ಸನ್ಧಾಯ ವುತ್ತಂ.

೫೭೮. ಕಾಯೇಕದೇಸೇ ಕಾಯಸದ್ದೋ ವತ್ತತೀತಿ ಆಹ ‘‘ಜಾಣುಮ್ಪಿ ಉರಮ್ಪೀ’’ತಿ. ‘‘ನ ಸೀಸಂ ಪಾರುತೇನಾ’’ತಿಇಮಿನಾ ‘‘ಸುಪ್ಪಟಿಚ್ಛನ್ನೇನಾ’’ತಿಪದಸ್ಸ ಅತಿಬ್ಯಾಪಿತದೋಸಂ ಪಟಿಕ್ಖಿಪತಿ. ಗಣ್ಠಿಕನ್ತಿ ಪಾಸೋ. ಸೋ ಹಿ ಗನ್ಥೇತಿ ಬನ್ಧತೀತಿ ವಾ, ಗನ್ಥೇತಿ ಬನ್ಧತಿ ಏತ್ಥಾತಿ ವಾ ಕತ್ವಾ ಗನ್ಥಿಕೋತಿ ವುಚ್ಚತಿ. ನ್ಥಕಾರಸ್ಸ ವಾಣ್ಠಕಾರೇ ಕತೇ ಗಣ್ಠಿಕೋ, ತಂ ಗಣ್ಠಿಕಂ ಪಟಿಮುಞ್ಚಿತ್ವಾ. ಉಭೋ ಕಣ್ಣೇತಿ ಚೀವರಸ್ಸ ದ್ವೇ ಕೋಣೇ. ಗಲವಾಟಕತೋತಿ ಏತ್ಥ ಗಲೋತಿ ಕಣ್ಠೋ. ಸೋ ಹಿ ಖಜ್ಜಭೋಜ್ಜಲೇಯ್ಯಪೇಯ್ಯಸಙ್ಖಾತಂ ಚತುಬ್ಬಿಧಂ ಅಸನಂ ಗಲತಿ ಪನ್ನೋ ಹುತ್ವಾ ಕುಚ್ಛಿಯಂ ಪತತಿ ಇತೋತಿ ಗಲೋತಿ ವುಚ್ಚತಿ. ಆವಾಟೋಯೇವ ಖುದ್ದಕಟ್ಠೇನ ಆವಾಟಕೋ, ಖುದ್ದಕತ್ಥೇ ಕೋ. ಗಲೇ ಠಿತೋ ಆವಾಟಕೋ ಗಲವಾಟಕೋ. ಅಕಾರತೋ ಹಿ ಆಕಾರಸ್ಸ ಲೋಪೋ ‘‘ಪಪ’’ನ್ತಿಆದೀಸು (ಜಾ. ೧.೧.೨) ವಿಯ. ಏತ್ಥ ಹಿ ಪಆಪನ್ತಿ ಪದಚ್ಛೇದೋ, ಅಕಾರತೋ ಆಕಾರಸ್ಸ ಚ ಲೋಪೋ. ಪವದ್ಧಂ ಆಪಂ ಪಪಂ, ಮಹನ್ತಂ ಉದಕನ್ತಿ ಅತ್ಥೋ. ಸೀಸಂ ವಿವರಿತ್ವಾತಿ ಸಮ್ಬನ್ಧೋ.

೫೭೯. ವಾಸಂ ಉಪಗತೋತಿ ವಾ ವಾಸೇನ ಉಪಗತೋತಿ ವಾ ಅತ್ಥಂ ಪಟಿಕ್ಖಿಪನ್ತೋ ಆಹ ‘‘ವಾಸತ್ಥಾಯ ಉಪಗತಸ್ಸಾ’’ತಿ.

೫೮೦. ಹತ್ಥಪಾದೇ ಅಕೀಳನ್ತೋ ಸುಸಂವುತೋ ನಾಮಾತಿ ದಸ್ಸೇನ್ತೋ ಆಹ ‘‘ಹತ್ಥಂ ವಾ ಪಾದಂ ವಾ ಅಕೀಳಾಪೇನ್ತೋ’’ತಿ.

೫೮೨. ಓಕ್ಖಿತ್ತಚಕ್ಖೂತಿ ಏತ್ಥ ಓಸದ್ದೋ ಹೇಟ್ಠಾಪರಿಯಾಯೋತಿ ಆಹ ‘‘ಹೇಟ್ಠಾ ಖಿತ್ತಚಕ್ಖೂ’’ತಿ. ‘‘ಹುತ್ವಾ’’ತಿಇಮಿನಾ ಕಿರಿಯಾವಿಸೇಸನಭಾವಂ ದಸ್ಸೇತಿ. ಯುಗಯುತ್ತಕೋತಿ ಯುಗೇ ಯುತ್ತಕೋ. ದಮಿಯಿತ್ಥಾತಿ ದನ್ತೋ. ಆಭುಸೋ ಜಾನಾತಿ ಕಾರಣಾಕಾರಣನ್ತಿ ಆಜಾನೇಯ್ಯೋ. ಏತ್ತಕನ್ತಿ ಚತುಹತ್ಥಪಮಾಣಂ. ಯೋ ಗಚ್ಛತಿ, ಅಸ್ಸ ಭಿಕ್ಖುನೋ ದುಕ್ಕಟಾ ಆಪತ್ತಿ ಹೋತೀತಿ ಯೋಜನಾ. ‘‘ಪರಿಸ್ಸಯಭಾವ’’ನ್ತಿ ಚ ‘‘ಪರಿಸ್ಸಯಾಭಾವ’’ನ್ತಿ ಚ ದ್ವೇ ಪಾಠಾ ಯುಜ್ಜನ್ತಿಯೇವ.

೫೮೪. ಇತ್ಥಮ್ಭೂತಲಕ್ಖಣೇತಿ ಇಮಂ ಪಕಾರಂ ಇತ್ಥಂ ಚೀವರುಕ್ಖಿಪನಂ, ಭವತಿ ಗಚ್ಛತೀತಿ ಭೂತೋ, ಭಿಕ್ಖು. ಲಕ್ಖೀಯತಿ ಅನೇನಾತಿ ಲಕ್ಖಣಂ, ಚೀವರಂ. ಇತ್ಥಂ ಭೂತೋ ಇತ್ಥಮ್ಭೂತೋ, ತಸ್ಸ ಲಕ್ಖಣಂ ಇತ್ಥಮ್ಭೂತಲಕ್ಖಣಂ, ತಸ್ಮಿಂ. ಕರಣವಚನಂ ದಟ್ಠಬ್ಬನ್ತಿ ಯೋಜನಾ. ಇತ್ಥಮ್ಭೂತಲಕ್ಖಣಂ ನಾಮ ಕಿರಿಯಾವಿಸೇಸನಸ್ಸ ಸಭಾವೋತಿ ಆಹ ‘‘ಏಕತೋ ವಾ…ಪೇ… ಹುತ್ವಾತಿ ಅತ್ಥೋ’’ತಿ. ಅನ್ತೋಇನ್ದಖೀಲತೋತಿ ಗಾಮಸ್ಸ ಅನ್ತೋಇನ್ದಖೀಲತೋತಿ. ಪಠಮೋ ವಗ್ಗೋ.

೨. ಉಜ್ಜಗ್ಘಿಕವಗ್ಗ-ಅತ್ಥಯೋಜನಾ

೫೮೬. ಉಚ್ಚಾಸದ್ದಂ ಕತ್ವಾ ಜಗ್ಘನಂ ಹಸನಂ ಉಜ್ಜಗ್ಘೋ, ಸೋಯೇವ ಉಜ್ಜಗ್ಘಿಕಾ, ತಾಯ. ಇತಿ ಇಮಮತ್ಥಂ ದಸ್ಸೇನ್ತೋ ಆಹ ‘‘ಮಹಾಹಸಿತಂ ಹಸನ್ತೋ’’ತಿ. ಏತ್ಥಾತಿ ‘‘ಉಜ್ಜಗ್ಘಿಕಾಯಾ’’ತಿಪದೇ.

೫೮೮. ಕಿತ್ತಾವತಾತಿ ಕಿತ್ತಕೇನ ಪಮಾಣೇನ, ಏವಂ ನಿಸಿನ್ನೇಸು ಥೇರೇಸೂತಿ ಸಮ್ಬನ್ಧೋ, ನಿದ್ಧಾರಣೇ ಚೇತಂ ಭುಮ್ಮವಚನಂ. ವವತ್ಥಪೇತೀತಿ ಇದಞ್ಚೀದಞ್ಚ ಕಥೇತೀತಿ ವವತ್ಥಪೇತಿ. ಏತ್ತಾವತಾತಿ ಏತ್ತಕೇನ ಪಮಾಣೇನ.

೫೯೦. ನಿಚ್ಚಲಂ ಕತ್ವಾ ಕಾಯಸ್ಸ ಉಜುಟ್ಠಪನಂ ಕಾಯಪಗ್ಗಹೋ ನಾಮಾತಿ ಆಹ ‘‘ನಿಚ್ಚಲಂ ಕತ್ವಾ’’ತಿಆದಿ. ಏಸೇವ ನಯೋ ಬಾಹುಪಗ್ಗಹಸೀಸಪಗ್ಗಹೇಸುಪೀತಿ. ದುತಿಯೋ ವಗ್ಗೋ.

೩. ಖಮ್ಭಕತವಗ್ಗ-ಅತ್ಥಯೋಜನಾ

೫೯೬. ಖಮ್ಭೋ ಕತೋ ಯೇನಾತಿ ಖಮ್ಭಕತೋ. ಖಮ್ಭೋತಿ ಚ ಪಟಿಬದ್ಧೋ. ಕತ್ಥ ಪಟಿಬದ್ಧೋತಿ ಆಹ ‘‘ಕಟಿಯಂ ಹತ್ಥಂ ಠಪೇತ್ವಾ’’ತಿ. ಸಸೀಸಂ ಅವಗುಣ್ಠಯತಿ ಪರಿವೇಠತೀತಿ ಓಗುಣ್ಠಿತೋತಿ ಆಹ ‘‘ಸಸೀಸಂ ಪಾರುತೋ’’ತಿ.

೬೦೦. ಉದ್ಧಂ ಏಕಾ ಕೋಟಿ ಇಮಿಸ್ಸಾ ಗಮನಾಯಾತಿ ಉಕ್ಕುಟಿಕಾತಿ ದಸ್ಸೇನ್ತೋ ಆಹ ‘‘ಉಕ್ಕುಟಿಕಾ ವುಚ್ಚತೀ’’ತಿಆದಿ. ಏತ್ಥಾತಿ ‘‘ಉಕ್ಕುಟಿಕಾಯಾ’’ತಿಪದೇ.

೬೦೧. ಹತ್ಥಪಲ್ಲತ್ಥೀಕದುಸ್ಸಪಲ್ಲತ್ಥೀಕೇಸು ದ್ವೀಸು ದುಸ್ಸಪಲ್ಲತ್ಥಿಕೇ ಆಯೋಗಪಲ್ಲತ್ಥೀಕಾಪಿ ಸಙ್ಗಹಂ ಗಚ್ಛತೀತಿ ಆಹ ‘‘ಆಯೋಗಪಲ್ಲತ್ಥಿಕಾಪಿ ದುಸ್ಸಪಲ್ಲತ್ಥಿಕಾ ಏವಾ’’ತಿ.

೬೦೨. ಸತಿಯಾ ಉಪಟ್ಠಾನಂ ಸಕ್ಕಚ್ಚನ್ತಿ ಆಹ ‘‘ಸತಿಂಉಪಟ್ಠಪೇತ್ವಾ’’ತಿ.

೬೦೩. ಪಿಣ್ಡಪಾತಂ ದೇನ್ತೇಪೀತಿ ಪಿಣ್ಡಪಾತಂ ಪತ್ತೇ ಪಕ್ಖಿಪನ್ತೇಪಿ. ಪತ್ತೇ ಸಞ್ಞಾ ಪತ್ತಸಞ್ಞಾ, ಸಾ ಅಸ್ಸತ್ಥೀತಿ ಪತ್ತಸಞ್ಞೀ. ‘‘ಕತ್ವಾ’’ ತಿಇಮಿನಾ ಕಿರಿಯಾವಿಸೇಸನಭಾವಂ ದಸ್ಸೇತಿ.

೬೦೪. ಸಮಸೂಪಕಂ ಪಿಣ್ಡಪಾತನ್ತಿ ಏತ್ಥ ಸೂಪಪಿಣ್ಡಪಾತಾನಂ ಸಮಉಪಡ್ಢಭಾವಂ ಆಸಙ್ಕಾ ಭವೇಯ್ಯಾತಿ ಆಹ ‘‘ಸಮಸೂಪಕೋ ನಾಮಾ’’ತಿಆದಿ. ಯತ್ಥಾತಿ ಪಿಣ್ಡಪಾತೇ. ಭತ್ತಸ್ಸ ಚತುತ್ಥಭಾಗಪಮಾಣೋ ಸೂಪೋ ಹೋತಿ, ಸೋ ಪಿಣ್ಡಪಾತೋ ಸಮಸೂಪಕೋ ನಾಮಾತಿ ಯೋಜನಾ. ಓಲೋಣೀ ಚ ಸಾಕಸೂಪೇಯ್ಯಞ್ಚ ಮಚ್ಛರಸೋ ಚ ಮಂಸರಸೋ ಚಾತಿ ದ್ವನ್ದೋ. ತತ್ಥ ಓಲೋಣೀತಿ ಏಕಾ ಬ್ಯಞ್ಜನವಿಕತಿ. ಸಾಕಸೂಪೇಯ್ಯನ್ತಿ ಸೂಪಸ್ಸ ಹಿತಂ ಸೂಪೇಯ್ಯಂ, ಸಾಕಮೇವ ಸೂಪೇಯ್ಯಂ ಸಾಕಸೂಪೇಯ್ಯಂ. ಇಮಿನಾ ಸಬ್ಬಾಪಿ ಸಾಕಸೂಪೇಯ್ಯಬ್ಯಞ್ಜನವಿಕತಿ ಗಹಿತಾ. ಮಚ್ಛರಸಮಂಸರಸಾದೀನೀತಿ ಏತ್ಥ ಆದಿಸದ್ದೇನ ಅವಸೇಸಾ ಸಬ್ಬಾಪಿ ಬ್ಯಞ್ಜನವಿಕತಿ ಸಙ್ಗಹಿತಾ. ತಂ ಸಬ್ಬಂ ರಸಾನಂ ರಸೋ ರಸರಸೋತಿ ಕತ್ವಾ ‘‘ರಸರಸೋ’’ತಿ ವುಚ್ಚತಿ.

೬೦೫. ಸಮಪುಣ್ಣಂ ಸಮಭರಿತನ್ತಿ ವೇವಚನಮೇವ. ಥೂಪಂ ಕತೋ ಥೂಪೀಕತೋತಿ ಅತ್ಥಂ ದಸ್ಸೇನ್ತೋ ಆಹ ‘‘ಥೂಪೀಕತೋ ನಾಮಾ’’ತಿಆದಿ.

ತತ್ಥಾತಿ ‘‘ಥೂಪೀಕತ’’ನ್ತಿಆದಿವಚನೇ. ತೇಸನ್ತಿ ಅಭಯತ್ಥೇರತಿಪಿಟಕಚೂಳನಾಗತ್ಥೇರಾನಂ. ಇತಿ ಪುಚ್ಛಿಂಸು, ತೇಸಞ್ಚ ಥೇರಾನಂ ವಾದಂ ಆರೋಚೇಸುನ್ತಿ ಯೋಜನಾ. ಥೇರೋತಿ ಚೂಳಸುಮನತ್ಥೇರೋ. ಏತಸ್ಸಾತಿ ತಿಪಿಟಕಚೂಳನಾಗತ್ಥೇರಸ್ಸ. ಸತ್ತಕ್ಖತ್ತುನ್ತಿ ಸತ್ತ ವಾರೇ. ಕುತೋತಿ ಕಸ್ಸಾಚರಿಯಸ್ಸ ಸನ್ತಿಕಾ. ತಸ್ಮಾತಿ ಯಸ್ಮಾ ಯಾವಕಾಲಿಕೇನ ಪರಿಚ್ಛಿನ್ನೋ, ತಸ್ಮಾ. ಆಮಿಸಜಾತಿಕಂ ಯಾಗುಭತ್ತಂ ವಾ ಫಲಾಫಲಂ ವಾತಿ ಯೋಜನಾ. ತಞ್ಚ ಖೋತಿ ತಞ್ಚ ಸಮತಿತ್ಥಿಕಂ. ಇತರೇನ ಪನಾತಿ ನಾಧಿಟ್ಠಾನುಪಗೇನ ಪತ್ತೇನ ಪನ. ಯಂ ಪೂವಉಚ್ಛುಖಣ್ಡಫಲಾಫಲಾದಿ ಹೇಟ್ಠಾ ಓರೋಹತಿ, ತಂ ಪೂವಉಚ್ಛುಖಣ್ಡಫಲಾಫಲಾದೀತಿ ಯೋಜನಾ. ಪೂವವಟಂಸಕೋತಿ ಏತ್ಥ ವಟಂಸಕೋತಿ ಉತ್ತಂಸೋ. ಸೋ ಹಿ ಉದ್ಧಂ ತಸೀಯತೇ ಅಲಙ್ಕರೀಯತೇತಿ ವಟಂಸೋತಿ ವುಚ್ಚತಿ ಉಕಾರಸ್ಸ ವಕಾರಂ, ತಕಾರಸ್ಸ ಚ ಟಕಾರಂ ಕತ್ವಾ, ಸೋಯೇವ ವಟಂಸಕೋ, ಮುದ್ಧನಿ ಪಿಲನ್ಧಿತೋ ಏಕೋ ಅಲಙ್ಕಾರವಿಸೇಸೋ. ಪೂವಮೇವ ತಂಸದಿಸತ್ತಾ ಪೂವವಟಂಸಕೋ, ತಂ. ಪುಪ್ಫವಟಂಸಕೋ ಚ ತಕ್ಕೋಲಕಟುಕಫಲಾದಿವಟಂಸಕೋ ಚಾತಿ ದ್ವನ್ದೋ, ತೇ.

ಇಧಾತಿ ಇಮಸ್ಮಿಂ ಸಿಕ್ಖಾಪದೇ. ನನು ಸಬ್ಬಥೂಪೀಕತೇಸು ಪಟಿಗ್ಗಹಣಸ್ಸ ಅಕಪ್ಪಿಯತ್ತಾ ಪರಿಭುಞ್ಜನಮ್ಪಿ ನ ವಟ್ಟತೀತಿ ಆಹ ‘‘ಸಬ್ಬತ್ಥ ಪನಾ’’ತಿಆದಿ. ತತ್ಥ ಸಬ್ಬತ್ಥಾತಿ ಸಬ್ಬೇಸು ಥೂಪೀಕತೇಸೂತಿ. ತತಿಯೋ ವಗ್ಗೋ.

೪. ಸಕ್ಕಚ್ಚವಗ್ಗ-ಅತ್ಥಯೋಜನಾ

೬೦೮. ತತ್ಥ ತತ್ಥಾತಿ ತಸ್ಮಿಂ ತಸ್ಮಿಂ ಠಾನೇ. ಓಧಿನ್ತಿ ಅವಧಿಂ ಮರಿಯಾದಂ.

೬೧೦. ಥೂಪಕತೋತಿ ಥೂಪಮೇವ ಥೂಪಕಂ, ತತೋ ಥೂಪಕತೋತಿ ದಸ್ಸೇನ್ತೋ ಆಹ ‘‘ಮತ್ಥಕತೋ’’ತಿ.

೬೧೧. ಮಾಘಾತಸಮಯಾದೀಸೂತಿ ‘‘ಪಾಣೇ ಮಾ ಘಾತೇಥಾ’’ತಿ ರಾಜಾನೋ ಭೇರಿಂ ಚರಾಪೇನ್ತಿ ಏತ್ಥಾತಿ ಮಾಘಾತೋ, ಸೋಯೇವ ಸಮಯೋ ಮಾಘಾತಸಮಯೋ. ಆದಿಸದ್ದೇನ ಅಞ್ಞಂ ಪಟಿಚ್ಛನ್ನಕಾರಣಂ ಗಹೇತಬ್ಬಂ.

೬೧೫. ತೇಸನ್ತಿ ಮಯೂರಣ್ಡಕುಕ್ಕುಟಣ್ಡಾನನ್ತಿ. ಚತುತ್ಥೋ ವಗ್ಗೋ.

೫. ಕಬಳವಗ್ಗ-ಅತ್ಥಯೋಜನಾ

೬೧೭. ‘‘ಮುಖದ್ವಾರ’’ನ್ತಿ ಕಮ್ಮಸ್ಸ ‘‘ಅನಾಹಟೇ’’ತಿ ಚ ‘‘ವಿವರಿಸ್ಸಾಮೀ’’ತಿ ಚ ದ್ವೀಸು ಕಿರಿಯಾಸು ಸಮ್ಬನ್ಧಭಾವಂ ದಸ್ಸೇತುಂ ವುತ್ತಂ ‘‘ಅನಾಹರಿತೇ ಮುಖದ್ವಾರ’’ನ್ತಿ.

೬೧೮. ಸಕಲಂ ಹತ್ಥನ್ತಿ ಪಞ್ಚಙ್ಗುಲಿಂ ಸನ್ಧಾಯ ವುತ್ತಂ.

೬೧೯. ಸಕಬಳೇನಾತಿ ಏತ್ಥ ಕಬಳಸದ್ದೇನ ವಚನಸ್ಸ ಅಪರಿಪುಣ್ಣಕಾರಣಂ ಸಬ್ಬಮ್ಪಿ ಗಹೇತಬ್ಬಂ.

೬೨೦. ಪಿಣ್ಡುಕ್ಖೇಪಕನ್ತಿಆದೀಸು ವಿಚ್ಛತ್ಥೇ ಕಪಚ್ಚಯೋತಿ ಆಹ ‘‘ಪಿಣ್ಡಂ ಉಕ್ಖಿಪಿತ್ವಾ ಉಕ್ಖಿಪಿತ್ವಾ’’ತಿ. ತ್ವಾಸದ್ದೇನ ಕಿರಿಯಾವಿಸೇಸನಭಾವಂ ದಸ್ಸೇತಿ.

೬೨೪. ‘‘ಅವಕಿರಿತ್ವಾ’’ತಿ ಇಮಿನಾ ಸಿತ್ಥಾವಕಾರಕನ್ತಿ ಏತ್ಥ ಅವಪುಬ್ಬೋ ಕಿರಧಾತುಯೇವ, ನ ಕರಧಾತೂತಿ ದಸ್ಸೇತಿ.

೬೨೬. ‘‘ಚಪುಚಪೂ’’ತಿ ಏವಂ ಸದ್ದನ್ತಿ ‘‘ಚಪುಚಪೂ’’ತಿ ಏವಂ ಅನುಕರಣರವನ್ತಿ. ಪಞ್ಚಮೋ ವಗ್ಗೋ.

೬. ಸುರುಸುರುವಗ್ಗ-ಅತ್ಥಯೋಜನಾ

೬೨೭. ‘‘ಸುರುಸುರೂ’’ತಿ ಏವಂ ಸದ್ದನ್ತಿ ‘‘ಸುರುಸುರೂ’’ತಿ ಏವಂ ಅನುಕರಣರವಂ. ದವನಂ ಕೀಳನನ್ತಿ ಇಮಿನಾ ವಚನತ್ಥೇನ ಪರಿಹಾಸೋ ದವೋ ನಾಮಾತಿ ಆಹ ‘‘ದವೋತಿ ಪರಿಹಾಸವಚನ’’ನ್ತಿ. ತನ್ತಿ ಸೋ ದವೋ. ಲಿಙ್ಗವಿಪಲ್ಲಾಸೋ ಹೇಸ. ನ ಕಾತಬ್ಬಂ ನ ಕಾತಬ್ಬೋತಿ ಸಮ್ಬನ್ಧೋ. ಸಿಲಕಬುದ್ಧೋತಿ ಸಿಲಾಯ ಕತೋ, ಸಿಲೇನ ನಿಯುತ್ತೋ ವಾ ಬುದ್ಧೋ. ಅಪಟಿಬುದ್ಧೋತಿ ಅಪಟಿವಿದ್ಧೋ ಬುದ್ಧೋ, ಪರಿಹಾಸವಚನಮೇತಂ. ಗೋಧಮ್ಮೋತಿ ಗುನ್ನಂ ಧಮ್ಮೋ. ಅಜಧಮ್ಮೋತಿ ಅಜಾನಂ ಧಮ್ಮೋ. ಮಿಗಸಙ್ಘೋತಿ ಮಿಗಾನಂ ಸಙ್ಘೋ. ಪಸುಸಙ್ಘೋತಿ ಪಸೂನಂ ಸಙ್ಘೋ.

೬೨೮. ‘‘ಭುಞ್ಜನ್ತೇನಾ’’ತಿ ಪದಂ ‘‘ನಿಲ್ಲೇಹಿತು’’ನ್ತಿ ಪದೇ ಭಾವಕತ್ತಾ.

೬೩೧. ಏವಂನಾಮಕೇತಿ ‘‘ಕೋಕನುದ’’ನ್ತಿ ಏವಂ ನಾಮಂ ಅಸ್ಸ ಪಾಸಾದಸ್ಸಾತಿ ಏವಂನಾಮಕೋ, ಪಾಸಾದೋ, ತಸ್ಮಿಂ. ‘‘ಪದುಮಸಣ್ಠಾನೋ’’ತಿ ಇಮಿನಾ ಪಾಸಾದಸ್ಸ ಸದಿಸೂಪಚಾರೇನ ‘‘ಕೋಕನುದೋ’’ತಿ ನಾಮಲಭನಂ ದಸ್ಸೇತಿ. ತೇನಾತಿ ಪದುಮಸಣ್ಠಾನತ್ತಾ. ಅಸ್ಸಾತಿ ಪಾಸಾದಸ್ಸ. ಪುಗ್ಗಲಿಕಮ್ಪೀತಿ ಪರಪುಗ್ಗಲಸನ್ತಕಂ ಗಹೇತಬ್ಬಂ ‘‘ಅತ್ತನೋ ಸನ್ತಕಮ್ಪೀ’’ತಿ ಅತ್ತಪುಗ್ಗಲಸನ್ತಕಸ್ಸ ವಿಸುಂ ಗಯ್ಹಮಾನತ್ತಾ. ಸಙ್ಖಮ್ಪೀತಿ ಪಾನೀಯಸಙ್ಖಮ್ಪಿ. ಸರಾವಮ್ಪೀತಿ ಪಾನೀಯಸರಾವಮ್ಪಿ. ಥಾಲಕಮ್ಪೀತಿ ಪಾನೀಯಥಾಲಕಮ್ಪಿ.

೬೩೨. ‘‘ಉದ್ಧರಿತ್ವಾ’’ತಿ ಸಾಮಞ್ಞತೋ ವುತ್ತವಚನಸ್ಸ ಕಮ್ಮಾಪಾದಾನಾನಿ ದಸ್ಸೇತುಂ ವುತ್ತಂ ‘‘ಸಿತ್ಥಾನಿ ಉದಕತೋ’’ತಿ. ಭಿನ್ದಿತ್ವಾತಿ ಚುಣ್ಣವಿಚುಣ್ಣಾನಿ ಕತ್ವಾ. ಬಹೀತಿ ಅನ್ತರಘರತೋ ಬಹಿ.

೬೩೪. ಸೇತಚ್ಛತ್ತನ್ತಿ ಏತ್ಥ ಸೇತಸದ್ದೋ ಪಣ್ಡರಪರಿಯಾಯೋತಿ ಆಹ ‘‘ಪಣ್ಡರಚ್ಛತ್ತ’’ನ್ತಿ. ವತ್ಥಪಲಿಗುಣ್ಠಿತನ್ತಿ ವತ್ಥೇಹಿ ಸಮನ್ತತೋ ವೇಠಿತಂ. ಸೇತಂ ಛತ್ತಂ ಸೇತಚ್ಛತ್ತಂ. ಕಿಳಞ್ಜೇಹಿ ಕತಂ ಛತ್ತಂ ಕಿಳಞ್ಜಚ್ಛತ್ತಂ. ಪಣ್ಣೇಹಿ ಕತಂ ಛತ್ತಂ ಪಣ್ಣಚ್ಛತ್ತಂ. ಮಣ್ಡಲೇನ ಬದ್ಧಂ ಮಣ್ಡಲಬದ್ಧಂ. ಸಲಾಕಾಹಿ ಬದ್ಧಂ ಸಲಾಕಬದ್ಧಂ. ತಾನೀತಿ ತೀಣಿ ಛತ್ತಾನಿ. ಹೀತಿ ಸಚ್ಚಂ. ಯಮ್ಪಿ ಏಕಪಣ್ಣಚ್ಛತ್ತನ್ತಿ ಯೋಜನಾ. ಏತೇಸೂತಿ ತೀಸು ಛತ್ತೇಸು. ಅಸ್ಸಾತಿ ಯಸ್ಸ ಕಸ್ಸಚಿ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ. ಸೋತಿ ಯೋ ಕೋಚಿ ಗಹಟ್ಠೋ ವಾ ಪಬ್ಬಜಿತೋ ವಾ. ಛತ್ತಪಾದುಕಾಯ ವಾತಿ ಛತ್ತದಣ್ಡನಿಕ್ಖೇಪನಾಯ ಪಾದುಕಾಯ ವಾ. ಏತ್ಥಾತಿ ಇಮಸ್ಮಿಂ ಸಿಕ್ಖಾಪದೇ.

೬೩೫. ಮಜ್ಝಿಮಸ್ಸಾತಿ ಪಮಾಣಮಜ್ಝಿಮಸ್ಸ. ‘‘ಚತುಹತ್ಥಪ್ಪಮಾಣೋ’’ತಿಇಮಿನಾ ಚತುಹತ್ಥತೋ ಊನಾತಿರೇಕೋ ದಣ್ಡೋ ನ ದಣ್ಡೋ ನಾಮಾತಿ ದಸ್ಸೇತಿ. ದಣ್ಡೋ ಪಾಣಿಮ್ಹಿ ಅಸ್ಸಾತಿ ವಚನತ್ಥಂ ಅತಿದಿಸನ್ತೋ ಆಹ ‘‘ವುತ್ತನಯೇನೇವಾ’’ತಿ.

೬೩೬. ‘‘ಸತ್ಥಪಾಣಿಮ್ಹೀ’’ತಿ ಏತ್ಥ ಅಸಿ ಏವ ಅಧಿಪ್ಪೇತೋತಿ ಆಹ ‘‘ಅಸಿ’’ನ್ತಿ. ಅಸಿನ್ತಿ ಖಗ್ಗಂ.

೬೩೭. ‘‘ಆವುಧಂ ನಾಮ ಚಾಪೋ ಕೋದಣ್ಡೋ’’ತಿ ಪಾಳಿಯಂ ವುತ್ತವಚನಂ ಉಪಲಕ್ಖಣಮೇವಾತಿ ದಸ್ಸೇನ್ತೋ ಆಹ ‘‘ಆವುಧಪಾಣಿಸ್ಸಾತಿ ಏತ್ಥಾ’’ತಿಆದಿ. ಸಬ್ಬಾಪಿ ಧನುವಿಕತಿ ಆವುಧನ್ತಿ ವೇದಿತಬ್ಬಾತಿ ಯೋಜನಾ. ಯಥಾ ಅಸಿಂ ಸನ್ನಹಿತ್ವಾ ಠಿತೋ ಸತ್ಥಪಾಣೀತಿ ಸಙ್ಖ್ಯಂ ನ ಗಚ್ಛತಿ, ಏವಂ ಧನುಂ ಕಣ್ಠೇ ಪಟಿಮುಕ್ಕೋ ಆವುಧಪಾಣೀತಿ ಆಹ ‘‘ಸಚೇ ಪನಾ’’ತಿಆದಿ, ಇಮಿನಾ ಆವುಧೋ ಪಾಣಿನಾ ಗಹಿತೋಯೇವ ಆವುಧಪಾಣಿ ನಾಮಾತಿ ದಸ್ಸೇತೀತಿ. ಛಟ್ಠೋ ವಗ್ಗೋ.

೭. ಪಾದುಕವಗ್ಗ-ಅತ್ಥಯೋಜನಾ

೬೩೮. ಅಙ್ಗುಲನ್ತರನ್ತಿ ಪಾದಙ್ಗುಲವಿವರಂ. ಪಾದುಕನ್ತಿ ಉಪಾಹನವಿಸೇಸೋ. ಸೋ ಹಿ ಪಜ್ಜತೇ ಇಮಾಯಾತಿ ಪಾದುಕಾತಿ ವುಚ್ಚತಿ, ಸಾ ಬಹುಪಟಲಾ ಚಮ್ಮಮಯಾ ವಾ ಹೋತಿ ಕಟ್ಠಮಯಾ ವಾ. ಪಟಿಮುಞ್ಚಿತ್ವಾತಿ ಪಾದುಕಂ ಪಟಿಮುಞ್ಚೀತ್ವಾ.

೬೪೦. ದ್ವೀಹಿ ಜನೇಹಿ ಗಹಿತೋತಿ ಸಮ್ಬನ್ಧೋ. ವಂಸೇನಾತಿ ವೇಣುನಾ, ಯಾನೇ ನಿಸಿನ್ನೋತಿ ಸಮ್ಬನ್ಧೋ. ವಿಸಙ್ಖರಿತ್ವಾತಿ ವಿಪತ್ತಿಂ ಕರಿತ್ವಾ. ದ್ವೇಪೀತಿ ಧಮ್ಮಕಥಿಕಧಮ್ಮಪಟಿಗ್ಗಾಹಕಸಙ್ಖಾತಾ ಉಭೋಪಿ ಜನಾ. ವಟ್ಟತೀತಿ ದೇಸೇತುಂ ವಟ್ಟತಿ.

೬೪೧. ಸಯನಗತಸ್ಸಾತಿ ಸಯನಂ ಗತಸ್ಸ, ಸಯನೇ ನಿಪನ್ನಸ್ಸಾತಿ ಅತ್ಥೋ. ನಿಪನ್ನಸ್ಸ ದೇಸೇತುಂ ನ ವಟ್ಟತೀತಿ ಸಮ್ಬನ್ಧೋ.

೬೪೨. ತೀಸು ಪಲ್ಲತ್ಥಿಕಾಸು ಯಾಯ ಕಾಯಚಿ ಪಲ್ಲತ್ಥಿಕಾಯ ನಿಸಿನ್ನಸ್ಸ ಧಮ್ಮಂ ದೇಸೇತುಂ ನ ವಟ್ಟತೀತಿ ದಸ್ಸೇನ್ತೋ ಆಹ ‘‘ಪಲ್ಲತ್ಥಿಕಾಯಾ’’ತಿಆದಿ.

೬೪೩. ಯಥಾ ವೇಠಿಯಮಾನೇ ಕೇಸನ್ತೋ ನ ದಿಸ್ಸತಿ, ಏವಂ ವೇಠಿತಸೀಸಸ್ಸಾತಿ ಯೋಜನಾ.

೬೪೭. ಛಪಕಸದ್ದಸ್ಸ ಚ ಚಣ್ಡಾಲಸದ್ದಸ್ಸ ಚ ವೇವಚನತ್ತಾ ವುತ್ತಂ ‘‘ಚಣ್ಡಾಲಸ್ಸಾ’’ತಿ. ಚಣ್ಡಾಲೋ ಹಿ ಸಂ ಸುನಖಂ ಪಚತೀತಿ ಛಪಕೋತಿ ವುಚ್ಚತಿ ಸಕಾರಸ್ಸ ಛಕಾರಂ ಕತ್ವಾ. ಛಪಕಸ್ಸ ಏಸಾ ಛಪಕೀ, ಚಣ್ಡಾಲಭರಿಯಾ. ಯತ್ರಾತಿ ಏತ್ಥ ತ್ರಪಚ್ಚಯೋ ಪಚ್ಚತ್ತೇ ಹೋತೀತಿ ಆಹ ‘‘ಯೋ ಹಿ ನಾಮಾ’’ತಿ. ಯೋ ರಾಜಾ ಉಚ್ಚೇ ಆಸನೇ ನಿಸೀದಿತ್ವಾ ಮನ್ತಂ ಪರಿಯಾಪುಣಿಸ್ಸತಿ ನಾಮ, ಅಯಂ ರಾಜಾ ಯಾವ ಅತಿವಿಯ ಅಧಮ್ಮಿಕೋತಿ ವುತ್ತಂ ಹೋತಿ. ‘‘ಸಬ್ಬಮಿದ’’ನ್ತಿ ಅಯಂ ಸದ್ದೋ ಲಿಙ್ಗವಿಪಲ್ಲಾಸೋತಿ ಆಹ ‘‘ಸಬ್ಬೋ ಅಯ’’ನ್ತಿ. ‘‘ಲೋಕೋ’’ತಿ ಇಮಿನಾ ಇಧಸದ್ದಸ್ಸ ವಿಸಯಂ ದಸ್ಸೇತಿ. ಚರಿಮಸದ್ದೋ ಅನ್ತಿಮಪರಿಯಾಯೋ. ಅನ್ತಿಮೋತಿ ಚ ಲಾಮಕೋ. ಲಾಮಕೋತಿ ಚ ನಾಮ ಇಧ ವಿಪತ್ತೀತಿ ಆಹ ‘‘ಸಙ್ಕರ’’ನ್ತಿ. ಸಙ್ಕರನ್ತಿ ವಿಪತ್ತಿಂ. ‘‘ನಿಮ್ಮರಿಯಾದೋ’’ತಿ ಇಮಿನಾ ‘‘ಸಙ್ಕರಂ ಗತೋ’’ತಿ ಪದಾನಂ ಅಧಿಪ್ಪಾಯತ್ಥಂ ದಸ್ಸೇತಿ. ಚರಿಮಂ ಗತಂ ಚರಿಮಗತಂ, ಸಬ್ಬೋ ಅಯಂ ಲೋಕೋ ಚರಿಮಗತೋತಿ ಅತ್ಥೋ. ಇಧ ಚ ಜಾತಕೇ (ಜಾ. ೧.೪.೩೩) ಚ ಕೇಸುಚಿ ಪೋತ್ಥಕೇಸು ‘‘ಚಮರಿಕತ’’ನ್ತಿ ಪಾಠೋ ಅತ್ಥಿ, ಸೋ ಅಯುತ್ತೋಯೇವ. ತತ್ಥೇವಾತಿ ಅಮ್ಬರುಕ್ಖಮೂಲೇಯೇವ. ತೇಸನ್ತಿ ರಾಜಬ್ರಾಹ್ಮಣಾನಂ.

ತತ್ಥಾತಿ ತಿಸ್ಸಂ ಗಾಥಾಯಂ. ಪಾಳಿಯಾತಿ ಅತ್ತನೋ ಆಚಾರಪಕಾಸಕಗನ್ಥಸಙ್ಖಾತಾಯ ಪಾಳಿಯಾ. ನ ಪಸ್ಸರೇತಿ ಏತ್ಥ ರೇಸದ್ದೋ ಅನ್ತಿಸ್ಸ ಕಾರಿಯೋತಿ ಆಹ ‘‘ನ ಪಸ್ಸನ್ತೀ’’ತಿ. ಯೋ ಚಾಯನ್ತಿ ಯೋ ಚ ಅಯಂ. ಅಯಂಸದ್ದೋ ಪದಾಲಙ್ಕಾರಮತ್ತೋ, ಬ್ರಾಹ್ಮಣೋತಿ ಅತ್ಥೋ. ಅಧೀಯತೀತಿ ಅಜ್ಝಾಯತಿ, ಸಿಕ್ಖತೀತಿ ಅತ್ಥೋ.

ತತೋತಿ ಬೋಧಿಸತ್ತೇನ ವುತ್ತಗಾಥಾತೋ ಪರನ್ತಿ ಸಮ್ಬನ್ಧೋ. ತಸ್ಸಾತಿ ಗಾಥಾಯ. ಭೋತಿ ಬೋಧಿಸತ್ತಂ ಆಮನ್ತೇತಿ. ‘‘ಭುತ್ತೋ’’ತಿ ಪದಸ್ಸ ಕಮ್ಮವಾಚಕಭಾವಮಾವಿಕಾತುಂ ವುತ್ತಂ ‘‘ಮಯಾ’’ತಿ. ಅಸ್ಸಾತಿ ಓದನಸ್ಸ. ಇಮಿನಾ ಸುಚಿ ಪರಿಸುದ್ಧಂ ಮಂಸಂ ಸುಚಿಮಂಸಂ, ತೇನ ಉಪಸೇಚನಮಸ್ಸಾತಿ ಸುಚಿಮಂಸೂಪಸೇಚನೋತಿ ಬಾಹಿರತ್ಥಸಮಾಸಂ ದಸ್ಸೇತಿ. ಧಮ್ಮೇತಿ ಆಚಾರಧಮ್ಮೇ. ಬದ್ಧೋ ಹುತ್ವಾತಿ ಥದ್ಧೋ ಹುತ್ವಾ, ಅಯಮೇವ ವಾ ಪಾಠೋ. ವಣ್ಣಸದ್ದಸ್ಸ ಸಣ್ಠಾನಾದಿಕೇ ಅಞ್ಞೇ ಅತ್ಥೇ ಪಟಿಕ್ಖಿಪಿತುಂ ವುತ್ತಂ ‘‘ಪಸತ್ಥೋ’’ತಿ. ಥೋಮಿತೋತಿ ತಸ್ಸೇವ ವೇವಚನಂ.

ಅಥಾತಿ ಅನನ್ತರೇ. ನನ್ತಿ ಬ್ರಾಹ್ಮಣಂ. ತಸ್ಸಾತಿ ಗಾಥಾದ್ವಯಸ್ಸ. ಬ್ರಾಹ್ಮಣಾತಿ ಪುರೋಹಿತಂ ಆಲಪತಿ. ಸಮ್ಪತೀತಿ ಸನ್ದೀಟ್ಠಿಕೇ. ‘‘ಯಾ ವುತ್ತಿ ವಿನಿಪಾತೇನ, ಅಧಮ್ಮಚರಣೇನ ವಾ’’ತಿ ಪದಾನಂ ಸಮ್ಬನ್ಧಂ ದಸ್ಸೇತುಂ ವುತ್ತಂ ‘‘ನಿಪ್ಪಜ್ಜತೀ’’ತಿ.

ಮಹಾಬ್ರಹ್ಮೇತಿ ಏತ್ಥ ಬ್ರಹ್ಮಸದ್ದೋ ಬ್ರಾಹ್ಮಣವಾಚಕೋತಿ ಆಹ ‘‘ಮಹಾಬ್ರಾಹ್ಮಣಾ’’ತಿ. ಅಞ್ಞೇಪೀತಿ ರಾಜಬ್ರಾಹ್ಮಣೇಹಿ ಅಪರೇಪಿ. ‘‘ಪಚನ್ತೀ’’ತಿ ವುತ್ತೇ ಅವಿನಾಭಾವತೋ ‘‘ಭುಞ್ಜನ್ತೀ’’ತಿ ಅತ್ಥೋಪಿ ಗಹೇತಬ್ಬೋತಿ ಆಹ ‘‘ಪಚನ್ತಿ ಚೇವ ಭುಞ್ಜನ್ತಿ ಚಾ’’ತಿ. ‘‘ನ ಕೇವಲ’’ನ್ತಿಆದಿನಾ ಅಞ್ಞೇಪೀತಿ ಏತ್ಥ ಪಿಸದ್ದಸ್ಸ ಸಮ್ಪಿಣ್ಡನತ್ಥಂ ದಸ್ಸೇತಿ, ತ್ವಂ ಆಚರಿಸ್ಸಸೀತಿ ಸಮ್ಬನ್ಧೋ. ಪುನ ತ್ವನ್ತಿ ತಂ, ಉಪಯೋಗತ್ಥೇ ಚೇತಂ ಪಚ್ಚತ್ತವಚನಂ, ‘‘ಮಾ ಭಿದಾ’’ತಿಇಮಿನಾ ಸಮ್ಬನ್ಧಿತಬ್ಬಂ. ‘‘ಪಾಸಾಣೋ’’ತಿಇಮಿನಾ ಅಸ್ಮಸದ್ದೋ ಪಾಸಾಣಪರಿಯಾಯೋತಿ ದಸ್ಸೇತಿ. ತೇನಾತಿ ಭಿನ್ದನಹೇತುನಾ.

೬೪೮. ಅತ್ತನೋ ಕಙ್ಖಾಠಾನಸ್ಸ ಪುಚ್ಛನಂ ಸನ್ಧಾಯ ವುತ್ತಂ ‘‘ನ ಕಥೇತಬ್ಬ’’ನ್ತಿ.

೬೪೯. ಸಮಧುರೇನಾತಿ ಸಮಂ ಧುರೇನ, ಸಮಂ ಮುಖೇನಾತಿ ಅತ್ಥೋ.

೬೫೨. ಯಂ ಮೂಲಂ ವಾ ಯಾ ಸಾಖಾ ವಾ ಗಚ್ಛತೀತಿ ಯೋಜನಾ. ಖನ್ಧೇತಿ ರುಕ್ಖಸ್ಸ ಖನ್ಧೇ. ನಿಕ್ಖಮತೀತಿ ಉಚ್ಚಾರಪಸ್ಸಾವೋ ನಿಕ್ಖಮತಿ. ತಿಣಣ್ಡುಪಕನ್ತಿ ತಿಣೇನ ಕತಂ, ತಿಣಮಯಂ ವಾ ಅಣ್ಡುಪಕಂ. ಏತ್ಥಾತಿ ಉಚ್ಚಾರಪಸ್ಸಾವಖೇಳೇಸು.

೬೫೩. ಅಧಿಪ್ಪೇತಉದಕಂ ದಸ್ಸೇತುಂ ವುತ್ತಂ ‘‘ಪರಿಭೋಗಉದಕಮೇವಾ’’ತಿ. ಸತ್ತಮೋ ವಗ್ಗೋ.

ಏತ್ಥಾತಿ ಸೇಖಿಯೇಸು. ಸೂಪಬ್ಯಞ್ಜನಪಟಿಚ್ಛಾದನೇತಿ ಸೂಪಬ್ಯಞ್ಜನೇ ಓದನೇನ ಪಟಿಚ್ಛಾದೇತಿ. ಸಮತ್ತಾ ಸೇಖಿಯಾ.

೮. ಸತ್ತಾಧಿಕರಣಸಮಥ-ಅತ್ಥಯೋಜನಾ

೬೫೫. ಸಙ್ಖ್ಯಂ ಪರಿಚ್ಛಿಜ್ಜತೀತಿ ಸಙ್ಖ್ಯಾಪರಿಚ್ಛೇದೋ. ತೇಸನ್ತಿ ಚತುಬ್ಬಿಧಾನಮಧಿಕರಣಾನಂ. ತಸ್ಸಾತಿ ತೇಸಂ ಖನ್ಧಕಪರಿವಾರಾನಂ. ತತ್ಥೇವಾತಿ ತೇಸು ಏವ ಖನ್ಧಕಪರಿವಾರೇಸು. ಸಬ್ಬತ್ಥಾತಿ ಸಬ್ಬೇಸು ಸಿಕ್ಖಾಪದೇಸೂತಿ.

ಇತಿ ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ

ಭಿಕ್ಖುವಿಭಙ್ಗವಣ್ಣನಾಯ ಯೋಜನಾ ಸಮತ್ತಾ.

ಜಾದಿಲಞ್ಛಿತನಾಮೇನ ನೇಕಾನಂ ವಾಚಿತೋ ಮಯಾ.

ಸಾಧುಂ ಮಹಾವಿಭಙ್ಗಸ್ಸ, ಸಮತ್ತೋ ಯೋಜನಾನಯೋತಿ.