೪. ಪಾಚಿತ್ತಿಯನಿದ್ದೇಸವಣ್ಣನಾ

೩೦. ಇದಾನಿ ಪಾಚಿತ್ತಿಯಂ ದಸ್ಸೇತುಂ ‘‘ಸಮ್ಪಜಾನಮುಸಾವಾದೇ’’ತ್ಯಾದಿ ಆರದ್ಧಂ. ತತ್ಥ ಸಮ್ಪಜಾನಮುಸಾವಾದೇತಿ ನಿಮಿತ್ತತ್ಥೇ ಭುಮ್ಮವಚನಂ, ತಸ್ಮಾ ಯೋ ಭಿಕ್ಖು ಸಮ್ಪಜಾನನ್ತೋ ಮುಸಾ ವದತಿ, ತಸ್ಸ ತನ್ನಿಮಿತ್ತಂ ತಂಹೇತು ತಪ್ಪಚ್ಚಯಾ ಪಾಚಿತ್ತಿಯಂ ಉದೀರಿತನ್ತಿ ಅತ್ಥೋ. ಭಿಕ್ಖುಞ್ಚ ಓಮಸನ್ತಸ್ಸಾತಿ ಜಾತಿನಾಮಗೋತ್ತಕಮ್ಮಸಿಪ್ಪವಯಆಬಾಧಲಿಙ್ಗಕಿಲೇಸಾಪತ್ತಿಅಕ್ಕೋಸೇಸು ಭೂತೇನ ವಾ ಅಭೂತೇನ ವಾ ಯೇನ ಕೇನಚಿ ಮುಖಸತ್ತಿನಾ ಭಿಕ್ಖುಂ ಓವಿಜ್ಝನ್ತಸ್ಸ ಭಿಕ್ಖುನೋ ಪಾಚಿತ್ತಿಯಂ ಉದೀರಿತನ್ತಿ ಅತ್ಥೋ. ಪೇಸುಞ್ಞಹರಣೇಪಿ ಚಾತಿ ಭಿಕ್ಖುಸ್ಸ ಪೇಸುಞ್ಞಹರಣೇ, ಜಾತಿಆದೀಹಿ ಅಕ್ಕೋಸವತ್ಥೂಹಿ ಭಿಕ್ಖುಂ ಅಕ್ಕೋಸನ್ತಸ್ಸ ಭಿಕ್ಖುನೋ ಸುತ್ವಾ ಭಿಕ್ಖುನೋ ಪಿಯಕಮ್ಯತಾಯ ವಾ ಭೇದಾಧಿಪ್ಪಾಯೇನ ವಾ ಯೋ ಅಕ್ಕುದ್ಧೋ, ತಸ್ಸ ಭಿಕ್ಖುಸ್ಸ ಕಾಯೇನ ವಾ ವಾಚಾಯ ವಾ ಪೇಸುಞ್ಞಹರಣವಚನೇ ಪಾಚಿತ್ತಿಯಂ ಉದೀರಿತನ್ತಿ ಅತ್ಥೋ.

೩೧. ಸಙ್ಗೀತಿತ್ತಯಮಾರುಳ್ಹಂ ಪಿಟಕತ್ತಯಂ ಧಮ್ಮಂ ಭಿಕ್ಖುಞ್ಚ ಭಿಕ್ಖುನಿಞ್ಚ ಠಪೇತ್ವಾ ಅಞ್ಞೇನ ಪುಗ್ಗಲೇನ ಸದ್ಧಿಂ ಏಕತೋ ಪದಂ ಪದಂ ಭಣನ್ತಸ್ಸ ಭಿಕ್ಖುನೋ ಪದಗಣನಾಯ ಪಾಚಿತ್ತಿಯಂ ಉದೀರಿತನ್ತಿ ಸಮುದಾಯತ್ಥೋ.

೩೨. ಅನುಪಸಮ್ಪನ್ನೇನೇವಾತಿ ಭಿಕ್ಖುಂ ಠಪೇತ್ವಾ ಅನ್ತಮಸೋ ಪಾರಾಜಿಕವತ್ಥುಭೂತೇನ ತಿರಚ್ಛಾನಗತೇನಾಪಿ ಸಹ ತಿರತ್ತಿಯಂ ಸಯಿತ್ವಾ ಚತುತ್ಥದಿವಸೇ ಅತ್ಥಙ್ಗತೇ ಸೂರಿಯೇ ಪುನ ಸಹಸೇಯ್ಯಾಯ ಪಾಚಿತ್ತಿ ಸಿಯಾತಿ ಸಮ್ಬನ್ಧೋ. ತತ್ಥ ಸಹಸೇಯ್ಯಾಯಾತಿ ಸಬ್ಬಚ್ಛನ್ನಪರಿಚ್ಛಿನ್ನೇ, ಯೇಭುಯ್ಯೇನಚ್ಛನ್ನಪರಿಚ್ಛಿನ್ನೇ ವಾ ಸೇನಾಸನೇ ಪುಬ್ಬಾಪರಿಯೇನ ವಾ ಏಕಕ್ಖಣೇ ವಾ ಏಕತೋ ನಿಸಜ್ಜನಾಯ. ತತ್ಥ ಛದನಂ ಅನಾಹಚ್ಚ ದಿಯಡ್ಢಹತ್ಥುಬ್ಬೇಧೇನ ಪಾಕಾರಾದಿನಾ ಪರಿಚ್ಛಿನ್ನಮ್ಪಿ ಸಬ್ಬಪರಿಚ್ಛಿನ್ನಮಿಚ್ಚೇವ ವೇದಿತಬ್ಬಂ.

೩೩. ಏಕರತ್ತಮ್ಪಿ ಇತ್ಥಿಯಾ ಸದ್ಧಿಂ ಸೇಯ್ಯಂ ಕಪ್ಪಯತೋ ತಸ್ಸ ಭಿಕ್ಖುನೋಪಿ ಪಾಚಿತ್ತಿ ಸಿಯಾತಿ ಅತ್ಥೋ. ತತ್ಥ ಇತ್ಥಿಯಾತಿ ಅನ್ತಮಸೋ ತದಹುಜಾತಾಯಪಿ ಮನುಸ್ಸಿತ್ಥಿಯಾ. ದೇಸೇನ್ತಸ್ಸ ವಿನಾ ವಿಞ್ಞುಂ, ಧಮ್ಮಞ್ಚ ಛಪ್ಪದುತ್ತರಿನ್ತಿ ವಿಞ್ಞುಂ ಪುರಿಸಂ ವಿನಾ ಇತ್ಥಿಯಾ ಛಪ್ಪದತೋ ಉತ್ತರಿಂ ಧಮ್ಮಂ ದೇಸೇನ್ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಅತ್ಥೋ. ತತ್ಥ ‘‘ಛಪ್ಪದುತ್ತರಿ’’ನ್ತಿ ಏತ್ಥ ಏಕೋ ಗಾಥಾಪಾದೋ ಏಕಂ ಪದನ್ತಿ ಏವಂ ಸಬ್ಬತ್ಥ ಪದಪ್ಪಮಾಣಂ ವೇದಿತಬ್ಬಂ. ಛ ಪದಾನಿ ಛಪ್ಪದಂ, ಛಪ್ಪದತೋ ಉತ್ತರಿಂ ಛಪ್ಪದುತ್ತರಿಂ.

೩೪. ಭಿಕ್ಖುಸಮ್ಮುತಿಂ ಠಪೇತ್ವಾ ಭಿಕ್ಖುನೋ ದುಟ್ಠುಲ್ಲಂ ವಜ್ಜಂ ಅಭಿಕ್ಖುನೋ ವದನ್ತಸ್ಸ ಪಾಚಿತ್ತಿಯಂ ಉದೀರಿತನ್ತಿ ಅತ್ಥೋ. ತತ್ಥ ದುಟ್ಠುಲ್ಲನ್ತಿ ಇಧ ಸಙ್ಘಾದಿಸೇಸಂ ಅಧಿಪ್ಪೇತಂ. ಭಿಕ್ಖುಸಮ್ಮುತಿಯಾತಿ ಯಂ ಸಙ್ಘೋ ಅಭಿಣ್ಹಾಪತ್ತಿಕಸ್ಸ ಭಿಕ್ಖುನೋ ಆಯತಿಂ ಸಂವರತ್ಥಾಯ ಆಪತ್ತೀನಞ್ಚ ಕುಲಾನಞ್ಚ ಪರಿಯನ್ತಂ ಕತ್ವಾ ವಾ ಅಕತ್ವಾ ವಾ ತಿಕ್ಖತ್ತುಂ ಅಪಲೋಕೇತ್ವಾ ಕತಿಕಂ ಕರೋತಿ, ತಂ ಠಪೇತ್ವಾ. ಅಭಿಕ್ಖುನೋತಿ ಅನುಪಸಮ್ಪನ್ನಸ್ಸ. ವದನ್ತಸ್ಸಾತಿ ಆರೋಚೇನ್ತಸ್ಸ.

೩೫. ಯೋ ಅಕಪ್ಪಿಯಂ ಪಥವಿಂ ಖಣೇಯ್ಯ ವಾ ಖಣಾಪೇಯ್ಯ ವಾ, ತಸ್ಸ ಪಾಚಿತ್ತಿಯಂ ಸಿಯಾ. ತತ್ಥ ಅಕಪ್ಪಿಯನ್ತಿ ಉದ್ಧನಪಚನಾದಿವಸೇನ ವಾ ತಥಾ ತಥಾ ಅದಡ್ಢಾ ವಾ ಜಾತಪಥವೀ ವುಚ್ಚತಿ. ಸಾ ತಿವಿಧಾ ಸುದ್ಧಮಿಸ್ಸಪುಞ್ಜವಸೇನ. ತತ್ಥ ಸುದ್ಧಪಥವೀ ನಾಮ ಪಕತಿಯಾ ಸುದ್ಧಪಂಸು ವಾ ಸುದ್ಧಮತ್ತಿಕಾ ವಾ. ಮಿಸ್ಸಪಥವೀ ನಾಮ ಯತ್ಥ ಪಂಸುತೋ ವಾ ಮತ್ತಿಕತೋ ವಾ ಪಾಸಾಣಸಕ್ಖರಕಥಲಮರುಮ್ಬವಾಲುಕಾಸು ಅಞ್ಞತರಸ್ಸ ತತಿಯಭಾಗೋ ಹೋತಿ. ಪುಞ್ಜಪಥವೀ ನಾಮ ಅತಿರೇಕಚಾತುಮಾಸಂ ಓವಟ್ಠೋ ಪಂಸುಪುಞ್ಜೋ ವಾ ಮತ್ತಿಕಾಪುಞ್ಜೋ ವಾ ಹೋತಿ. ವುತ್ತಲಕ್ಖಣೇನ ಪನ ಮಿಸ್ಸಕಪುಞ್ಜೋಪಿ ಪಿಟ್ಠಿಪಾಸಾಣೇ ಠಿತಸುಖುಮರಜಮ್ಪಿ ಚ ದೇವೇ ಫುಸಯನ್ತೇ ಸಕಿಂ ಚೇ ತಿನ್ತಂ, ಚಾತುಮಾಸಚ್ಚಯೇನ ತಿನ್ತೋಕಾಸೋ ಪುಞ್ಜಪಥವೀಸಙ್ಖಮೇವ ಗಚ್ಛತಿ. ಯೋ ಭಿಕ್ಖು ಭೂತಗಾಮಂ ವಿಕೋಪೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾತಿ ಸಮ್ಬನ್ಧೋ. ತತ್ಥ ಭೂತಗಾಮನ್ತಿ ಭವನ್ತಿ, ಅಭವುಂ ಚಾತಿ ಭೂತಾ, ಜಾಯನ್ತಿ ವಡ್ಢನ್ತಿ ಜಾತಾ ವಡ್ಢಿತಾ ಚಾತಿ ಅತ್ಥೋ, ಗಾಮೋತಿ ರಾಸಿ, ಭೂತಾನಂ ಗಾಮೋ, ಭೂತಾ ಏವ ವಾ ಗಾಮೋತಿ ಭೂತಗಾಮೋ, ಪತಿಟ್ಠಿತಹರಿತತಿಣರುಕ್ಖಾದೀನಮೇತಂ ಅಧಿವಚನಂ. ತಂ ಭೂತಗಾಮಂ. ವಿಕೋಪೇಯ್ಯಾತಿ ಛೇದನಭೇದನಾದೀನಿ ಕರೇಯ್ಯ.

೩೬. ಯೋ ಭಿಕ್ಖು ಸಙ್ಘಿಕಂ ಮಞ್ಚಾದಿಂ ಅಜ್ಝೋಕಾಸೇ ಸನ್ಥರಣಾದಿಕಂ ಕತ್ವಾ ಆಪುಚ್ಛನಾದಿಕಂ ಅಕತ್ವಾ ಯಾತಿ, ತಸ್ಸ ಪಾಚಿತ್ತಿ ಸಿಯಾತಿ ಅತ್ಥೋ. ತತ್ಥ ಸಙ್ಘಿಕನ್ತಿ ಸಙ್ಘಸ್ಸ ಸನ್ತಕಂ. ಮಞ್ಚಾದಿನ್ತಿ ಏತ್ಥ ಆದಿ-ಸದ್ದೇನ ಪೀಠಭಿಸಿಕೋಚ್ಛಾದಿಂ ಸಙ್ಗಣ್ಹಾತಿ. ಸನ್ಥರಣಾದಿಕನ್ತಿ ಸನ್ಥರಣಾದಿಂ ಕತ್ವಾ ವಾ ಕಾರಾಪೇತ್ವಾ ವಾ. ಆಪುಚ್ಛನಾದಿಕನ್ತಿ ಆಪುಚ್ಛನಂ ವಾ ಉದ್ಧರಣಂ ವಾ ಉದ್ಧರಾಪನಂ ವಾತಿ ಅತ್ಥೋ. ಯಾತೀತಿ ಗಚ್ಛತಿ.

೩೭. ಯೋ ಭಿಕ್ಖು ಸಙ್ಘಿಕಾವಸಥೇ ಸೇಯ್ಯಂ ಸನ್ಥರಣಾದಿಕಂ ಕತ್ವಾ ಆಪುಚ್ಛನಾದಿಕಂ ಅಕತ್ವಾ ಯಾತಿ, ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಅತ್ಥೋ. ತತ್ಥ ಸಙ್ಘಿಕಾವಸಥೇತಿ ಸಙ್ಘಸ್ಸ ಸನ್ತಕೇ ಆವಸಥೇ ವಿಹಾರೇ ಗಬ್ಭೇ ವಾ ಅಞ್ಞಸ್ಮಿಂ ವಾ ಸಬ್ಬಪರಿಚ್ಛಿನ್ನೇ ಗುತ್ತಸೇನಾಸನೇ. ಸೇಯ್ಯನ್ತಿ ಭಿಸಿ ಚಿಮಿಲಿಕಾ ಪಾವುರಣಂ ಉತ್ತರತ್ಥರಣಂ ಭೂಮತ್ಥರಣಂ ತಟ್ಟಿಕಾ ಚಮ್ಮಕ್ಖಣ್ಡಂ ನಿಸೀದನಂ ಪಚ್ಚತ್ಥರಣಂ ತಿಣಸನ್ಥಾರೋ ಪಣ್ಣಸನ್ಥಾರೋತಿ ಏವಮಾದಿಕಂ. ಸನ್ಥರಣಾದಿಕನ್ತಿ ತೇಸು ಯೇನ ಕೇನಚಿ ಅತ್ಥರಣಾದಿಕಂ ಕತ್ವಾ ವಾ ಕಾರಾಪೇತ್ವಾ ವಾ.

೩೮-೯. ಯೋ ಪನ ಭಿಕ್ಖು ಜಾನಂ ಸಪ್ಪಾಣಕಂ ತೋಯಂ ಪರಿಭುಞ್ಜಯೇ, ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಯೋಜನಾ. ತತ್ಥ ಜಾನಂ ಸಪ್ಪಾಣಕನ್ತಿ ‘‘ಸಪ್ಪಾಣಕಮಿದ’’ನ್ತಿ ದಿಸ್ವಾ ವಾ ಸುತ್ವಾ ವಾ ಯೇನ ಕೇನಚಿ ಆಕಾರೇನ ಜಾನನ್ತೋ. ತೋಯನ್ತಿ ಉದಕಂ. ಪರಿಭುಞ್ಜಯೇತಿ ಪರಿಭುಞ್ಜೇಯ್ಯ. ಯೋ ಭಿಕ್ಖು ಪಾರಿವತ್ತಕಂ ಠಪೇತ್ವಾ ಅಞ್ಞಾತಿಕಾಯ ಭಿಕ್ಖುನಿಯಾ ಚೀವರಂ ದೇತಿ, ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾ. ಚೀವರಪ್ಪಟಿಗ್ಗಹಣಸಿಕ್ಖಾಪದೇ ಭಿಕ್ಖು ಪಟಿಗ್ಗಾಹಕೋ ಇಧ ಭಿಕ್ಖುನೀ, ಅಯಂ ವಿಸೇಸೋ. ಅಞ್ಞಾತಿಕಾಯ ಭಿಕ್ಖುನಿಯಾ ಚೀವರಂ ಸಿಬ್ಬತೋಪಿ ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಅತ್ಥೋ. ಚೀವರನ್ತಿ ನಿವಾಸನಪಾರುಪನೂಪಗಂ. ಸಿಬ್ಬತೋತಿ ಸಯಂ ಸಿಬ್ಬನ್ತಸ್ಸ ಸೂಚಿಂ ಪವೇಸೇತ್ವಾ ನೀಹರಣೇ ಪಯೋಗಗಣನಾಯ ಪಾಚಿತ್ತಿ. ಸಿಬ್ಬಾಪೇನ್ತಸ್ಸ ಪನ ‘‘ಸಿಬ್ಬಾ’’ತಿ ವುತ್ತೋ ಸಚೇಪಿ ಸಬ್ಬಂ ಸೂಚಿಕಮ್ಮಂ ನಿಟ್ಠಾಪೇಸಿ, ಏಕಮೇವ ಪಾಚಿತ್ತಿ, ಆಣತ್ತಸ್ಸ ಪಯೋಗಗಣನಾಯ ಪಾಚಿತ್ತಿ ಹೋತಿ. ಪವಾರೇತ್ವಾನ ಅತಿರಿತ್ತಂ ಅಕಾರೇತ್ವಾ ಭುಞ್ಜತೋ ಪಾಚಿತ್ತಿ ಸಿಯಾತಿ ಅತ್ಥೋ. ತತ್ರಾಯಂ ವಿನಿಚ್ಛಯೋ – ಓದನೋ ಸತ್ತು ಕುಮ್ಮಾಸೋ ಮಚ್ಛೋ ಮಂಸನ್ತಿ ಪಞ್ಚನ್ನಂ ಭೋಜನಾನಂ ಅಞ್ಞತರಂ ಸಾಸಪಮತ್ತಮ್ಪಿ ಅಜ್ಝೋಹರಿತ್ವಾ ಭೋಜನಂ ಪಟಿಕ್ಖೇಪಂ ಕತ್ವಾ ಅಞ್ಞೇನ ಇರಿಯಾಪಥೇನ ‘‘ಅಲಮೇತಂ ಸಬ್ಬ’’ನ್ತಿ ಅತಿರಿತ್ತಂ ಅಕಾರೇತ್ವಾ ಪರಿಭುಞ್ಜತೋ ಪಾಚಿತ್ತಿ ಹೋತೀತಿ.

೪೦. ಯೋ ಭಿಕ್ಖು ಆಸಾದನಾಪೇಕ್ಖೋ ಭುತ್ತಾವಿಂ ಪವಾರಿತಂ ಭಿಕ್ಖುಂ ‘‘ಹನ್ದ, ಭಿಕ್ಖು, ಖಾದ ವಾ ಭುಞ್ಜ ವಾ’’ತಿ ಅನತಿರಿತ್ತೇನ ಪವಾರೇತಿ, ಭೋಜನೇ ಭುತ್ತೇ ತಸ್ಸ ಪಾಚಿತ್ತಿಯಂ ಉದೀರಿತನ್ತಿ ಅತ್ಥೋ. ತತ್ಥ ಆಸಾದನಾಪೇಕ್ಖೋತಿ ಆಸಾದನಂ ಚೋದನಂ ಮಙ್ಕುಕರಣಭಾವಂ ಅಪೇಕ್ಖಮಾನೋ.

೪೧-೨. ಯೋ ಭಿಕ್ಖು ಸನ್ನಿಧಿಭೋಜನಂ ಭುಞ್ಜೇಯ್ಯ, ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಅತ್ಥೋ. ತತ್ಥ ಸನ್ನಿಧಿಭೋಜನನ್ತಿ ಪಟಿಗ್ಗಹೇತ್ವಾ ಏಕರತ್ತಂ ವೀತಿನಾಮಿತಭೋಜನಂ. ವಿಕಾಲೇ ಯಾವಕಾಲಿಕಂ ಭುಞ್ಜತೋ ವಾಪಿ ಪಾಚಿತ್ತಿ ಸಿಯಾತಿ ಯೋಜನಾ. ತತ್ಥ ವಿಕಾಲೇತಿ ವಿಗತಕಾಲೇ, ಮಜ್ಝನ್ಹಿಕಾತಿಕ್ಕಮತೋ ಪಟ್ಠಾಯ ಯಾವ ಅರುಣುಗ್ಗಮನಾತಿ ಅತ್ಥೋ. ಯಾವಕಾಲಿಕನ್ತಿ ವನಮೂಲಫಲಾದಿಕಂ ಆಮಿಸಭೋಜನಂ. ಅಗಿಲಾನೋ ಭಿಕ್ಖು ಪಣೀತಕಂ ಸಪ್ಪಿಭತ್ತಾದಿಕಮ್ಪಿ ವಿಞ್ಞಾಪೇತ್ವಾನ ಭುಞ್ಜೇಯ್ಯ, ತಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಯೋಜನಾ. ತತ್ಥ ಅಗಿಲಾನೋತಿ ಕಲ್ಲಕೋ. ಪಣೀತಕನ್ತಿ ಸಪ್ಪಿತೇಲಮಧುಫಾಣಿತಮಚ್ಛಮಂಸಖೀರದಧಿಸಙ್ಖಾತೇಹಿ ಸಂಸಟ್ಠಂ ಸತ್ತಧಞ್ಞನಿಬ್ಬತ್ತಂ ಪಣೀತಭೋಜನಂ. ಯೋ ಭಿಕ್ಖು ದನ್ತಕಟ್ಠೋದಕಂ ವಜ್ಜೇತ್ವಾ ಅಪ್ಪಟಿಗ್ಗಹಿತಕಂ ಭುಞ್ಜೇಯ್ಯ, ಪಾಚಿತ್ತಿ ಸಿಯಾತಿ ಅತ್ಥೋ. ತತ್ಥ ಅಪ್ಪಟಿಗ್ಗಹಿತನ್ತಿ ಕಾಯೇನ ವಾ ಕಾಯಪ್ಪಟಿಬದ್ಧೇನ ವಾ ಗಣ್ಹನ್ತಸ್ಸ ಹತ್ಥಪಾಸೇ ಠತ್ವಾ ಕಾಯಕಾಯಪ್ಪಟಿಬದ್ಧನಿಸ್ಸಗ್ಗಿಯಾನಂ ಅಞ್ಞತರೇನ ನ ದಿನ್ನಂ ಅಪ್ಪಟಿಗ್ಗಹಿತಂ ನಾಮ.

೪೩. ಯೋ ಭಿಕ್ಖು ತಿತ್ಥಿಯಸ್ಸ ಸಹತ್ಥತೋ ಕಿಞ್ಚಿ ಭುಞ್ಜಿತಬ್ಬಂ ದದೇಯ್ಯ, ತಸ್ಸ ಪಾಚಿತ್ತಿ ಸಿಯಾತಿ ಸಮ್ಬನ್ಧೋ. ತತ್ಥ ತಿತ್ಥಿಯಸ್ಸಾತಿ ಅಞ್ಞತಿತ್ಥಿಯಸ್ಸ. ಕಿಞ್ಚಿ ಭುಞ್ಜಿತಬ್ಬನ್ತಿ ಯಂ ಕಿಞ್ಚಿ ಭೋಜನೀಯಂ. ಸಹತ್ಥತೋತಿ ಸಹತ್ಥಾ. ಯೋ ಭಿಕ್ಖು ಮಾತುಗಾಮೇನ ಏಕತೋ ರಹೋ ನಿಸಜ್ಜಂ ಕಪ್ಪೇಯ್ಯ, ತಸ್ಸ ಪಾಚಿತ್ತಿ ಸಿಯಾತಿ ಸಮ್ಬನ್ಧೋ. ತತ್ಥ ರಹೋತಿ ಪಟಿಚ್ಛನ್ನೇ. ಕಪ್ಪೇತಿ ಕಪ್ಪೇಯ್ಯ. ಏಕತೋತಿ ಸದ್ಧಿಂ.

೪೪. ಸುರಾಮೇರಯಪಾನೇಪೀತಿ ಏತ್ಥ ಪಿಟ್ಠಾದೀಹಿ ಕತಂ ಮಜ್ಜಂ ಸುರಾ. ಪುಪ್ಫಾದೀಹಿ ಕತೋ ಆಸವೋ ಮೇರಯಂ. ಯೋ ಭಿಕ್ಖು ತದುಭಯಮ್ಪಿ ಬೀಜತೋ ಪಟ್ಠಾಯ ಕುಸಗ್ಗೇನಾಪಿ ಪಿವತಿ, ತಸ್ಸ ತಪ್ಪಾನಪಚ್ಚಯಾ ಪಾಚಿತ್ತಿಯಂ ಉದೀರಿತನ್ತಿ ಅತ್ಥೋ. ಅಙ್ಗುಲಿಪತೋದಕೇ ಚಾಪೀತಿ ಅಙ್ಗುಲೀಹಿ ಉಪಕಚ್ಛಕಾದೀನಂ ಘಟ್ಟನಪಚ್ಚಯಾ ಪಾಚಿತ್ತಿ ಸಿಯಾತಿ ಅತ್ಥೋ. ಹಸಧಮ್ಮೇಪಿ ಚೋದಕೇತಿ ಉಪರಿಗೋಪ್ಫಕೇ ಉದಕೇ ಹಸಧಮ್ಮೇ ಕೀಳಾನಿಮಿತ್ತಂ ತಸ್ಸ ಪಾಚಿತ್ತಿ ಸಿಯಾತಿ ಅತ್ಥೋ.

೪೫. ಅನಾದರೇಪಿ ಪಾಚಿತ್ತೀತಿ ಪುಗ್ಗಲಸ್ಸ ವಾ ಧಮ್ಮಸ್ಸ ವಾ ಅನಾದರಕರಣೇಪಿ ಪಾಚಿತ್ತಿ ಸಿಯಾತಿ ಅತ್ಥೋ. ಯೋ ಭಿಕ್ಖು ಉಪಸಮ್ಪನ್ನೇನ ಪಞ್ಞತ್ತೇನ ವುಚ್ಚಮಾನೋ ತಸ್ಸ ವಾ ವಚನಂ ಅಕತ್ತುಕಾಮತಾಯ, ತಂ ವಾ ಧಮ್ಮಂ ಅಸಿಕ್ಖಿತುಕಾಮತಾಯ ಅನಾದರಿಯಂ ಕರೋತಿ, ತಸ್ಸ ತಸ್ಮಿಂ ಅನಾದರಿಯೇ ಪಾಚಿತ್ತಿ ಸಿಯಾತಿ ಅತ್ಥೋ. ಭಯಾನಕಂ ಕಥಂ ಕತ್ವಾ ವಾ ಭಯಾನಕಂ ರೂಪಂ ದಸ್ಸೇತ್ವಾ ವಾ ಭಿಕ್ಖುಂ ಭೀಸಯತೋಪಿ ಪಾಚಿತ್ತಿ ಸಿಯಾತಿ ಅತ್ಥೋ.

೪೬. ಯೋ ಭಿಕ್ಖು ಅಗಿಲಾನೋ ಕಿಞ್ಚಿ ಪಚ್ಚಯಂ ಠಪೇತ್ವಾ ಜೋತಿಂ ಜಲೇಯ್ಯ ವಾ ಜಲಾಪೇಯ್ಯ ವಾ, ತಸ್ಸ ಪಾಚಿತ್ತಿಯಂ ಸಿಯಾತಿ ಸಮ್ಬನ್ಧೋ. ತತ್ಥ ಕಿಞ್ಚಿ ಪಚ್ಚಯನ್ತಿ ಪದೀಪುಜ್ಜಲನಂ ವಾ ಪತ್ತಪಚನಾದೀಸು ಜೋತಿಕರಣಂ ವಾತಿ ಏವರೂಪಂ ಪಚ್ಚಯಂ ಠಪೇತ್ವಾ. ಜೋತಿನ್ತಿ ಅಗ್ಗಿಂ.

೪೭-೮. ಕಪ್ಪಬಿನ್ದುಂ ಅನಾದಾಯ ನವಚೀವರಭೋಗಿನೋ ನವಂ ಚೀವರಂ ಭುಞ್ಜನ್ತಸ್ಸ ಪಾಚಿತ್ತಿ ಸಿಯಾತಿ ಅತ್ಥೋ. ಕಪ್ಪಬಿನ್ದುನ್ತಿ ಮೋರಕ್ಖಿಮಣ್ಡಲಮಙ್ಗುಲಪಿಟ್ಠೀನಂ ಅಞ್ಞತರಪ್ಪಮಾಣಂ ಕಪ್ಪಬಿನ್ದುಂ. ಅನಾದಾಯಾತಿ ಅನಾದಿಯಿತ್ವಾ. ಭಿಕ್ಖುನೋ ಚೀವರಾದಿಕಂ ಪರಿಕ್ಖಾರಂ ಅಪನೇತ್ವಾ ನಿಧೇನ್ತಸ್ಸ ವಾ ನಿಧಾಪೇನ್ತಸ್ಸ ವಾ ಹಸಾಪೇಕ್ಖಸ್ಸ ಭಿಕ್ಖುನೋ ಪಾಚಿತ್ತಿ ಸಿಯಾತಿ ಅತ್ಥೋ. ಚೀವರಾದಿಕನ್ತಿ ಆದಿ-ಸದ್ದೇನ ಪತ್ತನಿಸೀದನಸೂಚಿಘರಕಾಯಬನ್ಧನಾದಿಂ ಸಙ್ಗಣ್ಹಾತಿ. ನಿಧೇನ್ತಸ್ಸಾತಿ ನಿದಹನ್ತಸ್ಸ. ಹಸಾಪೇಕ್ಖಸ್ಸಾತಿ ಹಸಾಧಿಪ್ಪಾಯಸ್ಸ. ಜಾನಂ ಪಾಣಂ ಹನೇ ಭಿಕ್ಖು, ತಿರಚ್ಛಾನಗತಮ್ಪಿ ಚಾತಿ ಯೋ ಭಿಕ್ಖು ‘‘ಪಾಣೋ’’ತಿ ಜಾನನ್ತೋ ತಿರಚ್ಛಾನಗತಂ ಪಾಣಂ ಖುದ್ದಕಮ್ಪಿ ಮಹನ್ತಮ್ಪಿ ಹನೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾತಿ ಅತ್ಥೋ.

೪೯. ಛಾದೇತುಕಾಮೋ ಛಾದೇತಿ, ದುಟ್ಠುಲ್ಲಂ ಭಿಕ್ಖುನೋಪಿ ಚಾತಿ ಯೋ ಭಿಕ್ಖು ಭಿಕ್ಖುನೋ ದುಟ್ಠುಲ್ಲಸಙ್ಖಾತಂ ಸಙ್ಘಾದಿಸೇಸಂ ಛಾದೇತುಕಾಮೋ ಹುತ್ವಾ ಛಾದೇತಿ, ತಸ್ಸ ಪಾಚಿತ್ತಿಯಂ ಸಿಯಾತಿ ಅತ್ಥೋ. ಇತ್ಥಿಯಾ ಸಹ ಸಂವಿಧಾಯ ಗಾಮನ್ತರಗತಸ್ಸ ಭಿಕ್ಖುನೋ ಪಾಚಿತ್ತಿಯಂ ಸಿಯಾತಿ ಯೋಜನಾ.

೫೦. ಭಿಕ್ಖುಂ ವಾ ಪಹರೇಯ್ಯಾಥಾತಿ ಯೋ ಭಿಕ್ಖು ಭಿಕ್ಖುಂ ಪಹರೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾತಿ ಯೋಜನಾ. ತಲಸತ್ತಿಕಮುಗ್ಗಿರೇತಿ ಯೋ ಭಿಕ್ಖು ಪಹರಣಾಕಾರಂ ದಸ್ಸೇನ್ತೋ ಕಾಯಂ ವಾ ಕಾಯಪ್ಪಟಿಬದ್ಧಂ ವಾ ಉಗ್ಗಿರೇಯ್ಯ, ತಸ್ಸ ಪಾಚಿತ್ತಿಯಂ ಸಿಯಾತಿ ಅತ್ಥೋ. ಚೋದೇಯ್ಯ ವಾ ಚೋದಾಪೇಯ್ಯ, ಭಿಕ್ಖುಂ ಅಮೂಲಕೇನ ಚಾತಿ ಯೋ ಭಿಕ್ಖು ಭಿಕ್ಖುಂ ಅಮೂಲಕೇನ ಸಙ್ಘಾದಿಸೇಸೇನ ಚೋದೇಯ್ಯ ವಾ ಚೋದಾಪೇಯ್ಯ ವಾ, ತಸ್ಸ ಪಾಚಿತ್ತಿಯಂ ಸಿಯಾತಿ ಅತ್ಥೋ. ತತ್ಥ ಅಮೂಲಕೇನಾತಿ ದಿಟ್ಠಾದಿಮೂಲವಿರಹಿತೇನ.

೫೧. ಕುಕ್ಕುಚ್ಚುಪ್ಪಾದನೇ ಚಾಪೀತಿ ‘‘ಊನವೀಸತಿವಸ್ಸೋ ತ್ವಂ ಮಞ್ಞೇ’’ತಿಆದೀನಿ ಭಣನ್ತೋ ಕುಕ್ಕುಚ್ಚಂ ಉಪ್ಪಾದೇಯ್ಯ, ತಸ್ಸ ಕುಕ್ಕುಚ್ಚುಪ್ಪಾದನಪಚ್ಚಯಾ ಪಾಚಿತ್ತಿಯಂ ಹೋತಿ. ಯೋ ಭಿಕ್ಖು ಭಣ್ಡನತ್ಥಾಯ ಭಣ್ಡನಜಾತಾನಂ ವಚನಂ ಸೋತುಂ ಉಪಸ್ಸುತಿಂ ಯಾತಿ, ತಸ್ಸ ಪಾಚಿತ್ತಿಯಂ ಸಿಯಾತಿ ಸಮ್ಬನ್ಧೋ. ತತ್ಥ ಭಣ್ಡನತ್ಥಾಯಾತಿ ಕಲಹತ್ಥಾಯ. ಭಣ್ಡನಜಾತಾನನ್ತಿ ಕಲಹಜಾತಾನಂ. ಉಪಸ್ಸುತಿನ್ತಿ ಸುತಿಸಮೀಪಂ.

೫೨. ಯೋ ಭಿಕ್ಖು ಸಙ್ಘಸ್ಸ ಪರಿಣಾಮಿತಂ ಯಂ ಲಾಭಂ, ತಂ ಪರಪುಗ್ಗಲಸ್ಸ ನಾಮೇತಿ, ತಸ್ಸ ಪಾಚಿತ್ತಿಯಂ ಸಿಯಾತಿ ಸಮ್ಬನ್ಧೋ. ತತ್ಥ ನಾಮೇತೀತಿ ಪರಿಣಾಮೇತಿ. ಪುಚ್ಛಂ ಅಕತ್ವಾತಿ ‘‘ವಿಕಾಲೇ ಗಾಮಪ್ಪವೇಸನಂ ಆಪುಚ್ಛಾಮೀ’’ತಿ ವಾ ‘‘ಗಾಮಂ ಪವಿಸಿಸ್ಸಾಮೀ’’ತಿ ವಾ ಅನಾಪುಚ್ಛಿತ್ವಾ. ಸನ್ತಭಿಕ್ಖುನ್ತಿ ಅನ್ತೋಉಪಚಾರಸೀಮಾಯ ದಸ್ಸನೂಪಚಾರೇ ಭಿಕ್ಖುಂ ದಿಸ್ವಾ ಯಂ ಸಕ್ಕಾ ಹೋತಿ ಪಕತಿವಚನೇನ ಆಪುಚ್ಛಿತುಂ, ತಾದಿಸಂ ವಿಜ್ಜಮಾನಂ ಭಿಕ್ಖುಂ. ಗಾಮಸ್ಸಾತಿ ಗಾಮಂ, ಕಮ್ಮತ್ಥೇ ಸಾಮಿವಚನಂ. ಗತೇತಿ ಸಮ್ಪದಾನತ್ಥೇ ಭುಮ್ಮವಚನಂ, ಗತಸ್ಸಾತಿ ಅತ್ಥೋ. ಸನ್ತಂ ಭಿಕ್ಖುಂ ಅನಾಪುಚ್ಛಿತ್ವಾ ವಿಕಾಲೇ ಗಾಮಂ ಗತಸ್ಸ ಭಿಕ್ಖುನೋ ಪಾಚಿತ್ತಿಯಂ ಸಿಯಾತಿ ಅತ್ಥೋ. ಸೇಸಂ ಉತ್ತಾನಮೇವಾತಿ.

ಪಾಚಿತ್ತಿಯನಿದ್ದೇಸವಣ್ಣನಾ ನಿಟ್ಠಿತಾ.