೫. ಪಕಿಣ್ಣಕನಿದ್ದೇಸವಣ್ಣನಾ

೫೩. ಇದಾನಿ ಪಕಿಣ್ಣಕಂ ದಸ್ಸೇತುಂ ‘‘ಸಙ್ಘಿಕ’’ನ್ತ್ಯಾದಿ ಆರದ್ಧಂ. ತತ್ಥ ಯೋ ಭಿಕ್ಖು ಇಸ್ಸರೋ ಹುತ್ವಾ ಸಙ್ಘಿಕಂ ಗರುಭಣ್ಡಂ ಅಞ್ಞಸ್ಸ ದೇತಿ, ತಸ್ಸ ಥುಲ್ಲಚ್ಚಯಂ ಸಿಯಾ. ಥೇಯ್ಯಾಯ ಅಞ್ಞಸ್ಸ ದೇತಿ, ಯಥಾವತ್ಥು ಪಾರಾಜಿಕಾದಿ ಸಿಯಾ, ದುಕ್ಕಟವತ್ಥು ದುಕ್ಕಟಂ, ಥುಲ್ಲಚ್ಚಯವತ್ಥು ಥುಲ್ಲಚ್ಚಯಂ, ಪಾರಾಜಿಕವತ್ಥು ಪಾರಾಜಿಕಂ ಸಿಯಾತಿ ವುತ್ತಂ ಹೋತಿ.

೫೪. ಕುಸಾದಿಮಯಚೀರಾನೀತಿ ಏತ್ಥ ಆದಿ-ಸದ್ದೋ ವಾಕಫಲಕಂ ಸಙ್ಗಣ್ಹಾತಿ, ಕುಸಮಯಚೀರಂ ವಾಕಮಯಚೀರಂ ಫಲಕಮಯಚೀರನ್ತಿ. ತತ್ಥ ಕುಸೇ ಗನ್ಥೇತ್ವಾ ಕತಚೀರಂ ಕುಸಮಯಚೀರಂ. ವಾಕಮಯಚೀರಂ ನಾಮ ತಾಪಸಾನಂ ವಕ್ಕಲಂ. ಫಲಕಮಯಚೀರಂ ನಾಮ ಫಲಕಸಣ್ಠಾನಾನಿ ಫಲಕಾನಿ ಸಿಬ್ಬೇತ್ವಾ ಕತಚೀರಂ. ಕಮ್ಬಲಂ ಕೇಸವಾಲಜನ್ತಿ ಕೇಸಜಂ ಕಮ್ಬಲಂ ವಾಲಜಂ ಕಮ್ಬಲಂ, ಕೇಸಕಮ್ಬಲಂ ವಾಲಕಮ್ಬಲನ್ತಿ ಅತ್ಥೋ. ಕೇಸೇಹಿ ತನ್ತೇ ವಾಯಿತ್ವಾ ಕತಕಮ್ಬಲಂ ಕೇಸಕಮ್ಬಲಂ. ಚಮರಿವಾಲೇಹಿ ವಾಯಿತ್ವಾ ಕತಕಮ್ಬಲಂ ವಾಲಕಮ್ಬಲಂ. ಸಮಯಂ ವಿನಾತಿ ನಟ್ಠಚೀವರಕಾಲಂ ಠಪೇತ್ವಾ. ಧಾರಯತೋ ಧಾರಯನ್ತಸ್ಸ. ಲೂಕಪಕ್ಖಾಜಿನಕ್ಖಿಪನ್ತಿ ಉಲೂಕಪಕ್ಖಿಅಜಿನಕ್ಖಿಪಂ. ತತ್ಥ ಉಲೂಕಪಕ್ಖೀತಿ ಉಲೂಕಸಕುಣಪಕ್ಖೇಹಿ ಕತನಿವಾಸನಂ. ಅಜಿನಕ್ಖಿಪನ್ತಿ ಸಲೋಮಂ ಸಖುರಂ ಅಜಿನಮಿಗಚಮ್ಮಂ. ನಟ್ಠಚೀವರಕಾಲಂ ಠಪೇತ್ವಾ ಇಮೇಸು ಸತ್ತಸು ವತ್ಥೂಸು ಯಂ ಕಿಞ್ಚಿ ಧಾರಯತೋ ಥುಲ್ಲಚ್ಚಯಂ ಸಿಯಾತಿ ಅತ್ಥೋ.

೫೫. ಸತ್ಥಕೇನ ಕತ್ತಬ್ಬಂ ಕಮ್ಮಂ ಸತ್ಥಕಮ್ಮಂ, ತಸ್ಮಿಂ ಸತ್ಥಕಮ್ಮೇ. ವತ್ಥಿಮ್ಹಿ ಕತ್ತಬ್ಬಂ ಕಮ್ಮಂ ವತ್ಥಿಕಮ್ಮಂ, ತಸ್ಮಿಂ ವತ್ಥಿಕಮ್ಮೇ. ಸಂ ನಿಮಿತ್ತನ್ತಿ ಅತ್ತನೋ ಅಙ್ಗಜಾತಂ. ತಂ ಛಿನ್ದತೋ ಥುಲ್ಲಚ್ಚಯಂ ಸಿಯಾತಿ ಸಮ್ಬನ್ಧೋ. ಮಂಸಾದಿಭೋಜನೇತಿ ಏತ್ಥ ಆದಿ-ಸದ್ದೋ ಅಟ್ಠಿಲೋಹಿತಚಮ್ಮಲೋಮಾನಿ ಸಙ್ಗಣ್ಹಾತಿ. ತಸ್ಮಾ ಮನುಸ್ಸಾನಂ ಮಂಸಅಟ್ಠಿಲೋಹಿತಚಮ್ಮಲೋಮಭೋಜನಪಚ್ಚಯಾ ಥುಲ್ಲಚ್ಚಯಂ ಸಿಯಾತಿ ಅತ್ಥೋ.

೫೬. ಕದಲೇರಕಕ್ಕದುಸ್ಸಾನೀತಿ ಏತ್ಥ ಕದಲಿಏರಕಅಕ್ಕವಾಕೇಹಿ ಕತಾನಿ ವತ್ಥಾನಿ ಧಾರಯನ್ತಸ್ಸ ದುಕ್ಕಟಂ. ಪೋತ್ಥಕನ್ತಿ ಮಕಚಿವಾಕೇಹಿ ಕತಂ ಪೋತ್ಥಕದುಸ್ಸಂ. ಸಬ್ಬಪೀತಾದಿಕನ್ತಿ ಏತ್ಥ ಆದಿ-ಸದ್ದೇನ ಸಬ್ಬಲೋಹಿತಕಸಬ್ಬಕಣ್ಹಕಸಬ್ಬಮಞ್ಜೇಟ್ಠಿಕಂ ಸಙ್ಗಣ್ಹಾತಿ. ತತ್ಥ ಸಬ್ಬಮೇವ ನೀಲಕಂ ಸಬ್ಬನೀಲಕಂ. ಏವಂ ಸೇಸೇಸುಪಿ. ನೀಲಂ ಉಮ್ಮಾರಪುಪ್ಫವಣ್ಣಂ. ಪೀತಂ ಕಣಿಕಾರಪುಪ್ಫವಣ್ಣಂ. ಲೋಹಿತಂ ಜಯಸುಮನಪುಪ್ಫವಣ್ಣಂ. ಕಣ್ಹಕಂ ಅದ್ದಾರಿಟ್ಠಕವಣ್ಣಂ. ಮಞ್ಜೇಟ್ಠಿಕಂ ಲಾಖಾರಸವಣ್ಣಂ. ಇಮೇಸು ಅಟ್ಠಸು ವತ್ಥೂಸು ಯಂ ಕಿಞ್ಚಿ ಧಾರಯನ್ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ.

೫೭-೮. ಹತ್ಥಿಸ್ಸುರಗಸೋಣಾನನ್ತಿ ಹತ್ಥಿಅಸ್ಸಉರಗಸೋಣಾನಂ ಮಂಸಂ ಅಟ್ಠಿರುಧಿರಚಮ್ಮಲೋಮಾನಿ. ಸೀಹಬ್ಯಗ್ಘಚ್ಛದೀಪಿನನ್ತಿ ಸೀಹಬ್ಯಗ್ಘಅಚ್ಛದೀಪೀನಂ ಮಂಸಾದೀನಿ. ತರಚ್ಛಸ್ಸ ಚ ಮಂಸಾದಿಂ ಉದ್ದಿಸ್ಸಕತಮಂಸಞ್ಚ ಅನಾಪುಚ್ಛಿತಮಂಸಞ್ಚ ಭುಞ್ಜತೋ ದುಕ್ಕಟಂ ಸಿಯಾ. ದಕತಿತ್ಥಾದಿಕನ್ತಿ ಏತ್ಥ ಆದಿ-ಸದ್ದೋ ವಚ್ಚಪಸ್ಸಾವಕುಟಿಯೋ ಸಙ್ಗಣ್ಹಾತಿ. ತೇನ ಯಾತಾನುಪುಬ್ಬಂ ಆಗತಪ್ಪಟಿಪಾಟಿಂ ಹಿತ್ವಾನ ವಜ್ಜೇತ್ವಾ ನಹಾನತಿತ್ಥಞ್ಚ ವಚ್ಚಕುಟಿಞ್ಚ ಪಸ್ಸಾವಕುಟಿಞ್ಚ ವಜೇ ವಜೇಯ್ಯ ಗಚ್ಛೇಯ್ಯ, ದುಕ್ಕಟಂ ತಸ್ಸ ಸಿಯಾತಿ ಅತ್ಥೋ.

೫೯. ಸಹಸಾತಿ ವೇಗಸಾ ವೇಗೇನ. ವುಬ್ಭಜಿತ್ವಾನಾತಿ ಅನ್ತರವಾಸಕಂ ದೂರತೋವ ಉಕ್ಖಿಪಿತ್ವಾ, ವ-ಕಾರೋ ಸನ್ಧಿವಸೇನಾಗತೋ. ಪವಿಸೇತಿ ಪವಿಸೇಯ್ಯ. ವಚ್ಚಪಸ್ಸಾವಕುಟಿಕನ್ತಿ ವಚ್ಚಕುಟಿಕಂ ಪಸ್ಸಾವಕುಟಿಕಂ. ವಿಸೇತಿ ಪವಿಸೇಯ್ಯ. ಯೋ ಭಿಕ್ಖು ವಚ್ಚಪಸ್ಸಾವಕುಟಿಕಂ ಸಹಸಾ ಪವಿಸೇಯ್ಯ ವಾ ನಿಕ್ಖಮೇಯ್ಯ ವಾ, ಉಬ್ಭಜಿತ್ವಾ ವಾ ಪವಿಸೇಯ್ಯ ವಾ ನಿಕ್ಖಮೇಯ್ಯ ವಾ, ಉಕ್ಕಾಸಿಕಂ ವಜ್ಜೇತ್ವಾ ತಂ ಪವಿಸೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಯೋಜನಾ.

೬೦. ನಿತ್ಥುನನ್ತೋ ವಚ್ಚಂ ಕರೇಯ್ಯ ದನ್ತಕಟ್ಠಞ್ಚ ಖಾದನ್ತೋ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ವಚ್ಚಪಸ್ಸಾವದೋಣೀನಂ ಬಹಿ ವಚ್ಚಾದಿಕಂ ವಚ್ಚಪಸ್ಸಾವಂ ಕರೇಯ್ಯ, ತಸ್ಸ ದುಕ್ಕಟಂ ಸಿಯಾ.

೬೧. ಖರೇನ ಚಾವಲೇಖೇಯ್ಯಾತಿ ಫಾಲಿತಕಟ್ಠೇನ ವಾ ಫರುಸೇನ ವಾ ಗಣ್ಠಿಕೇನ ವಾ ಪೂತಿಕಟ್ಠೇನ ವಾ ಸುಸಿರೇನ ವಾ ಅವಲೇಖೇಯ್ಯಾತಿ ಅತ್ಥೋ. ಕಟ್ಠನ್ತಿ ಅವಲೇಖನಕಟ್ಠಂ. ಕೂಪಕೇತಿ ವಚ್ಚಕೂಪಕೇ. ಊಹತಞ್ಚಾತಿ ಗೂಥಮಕ್ಖಿತಞ್ಚ. ನ ಧೋವೇಯ್ಯಾತಿ ಅತ್ತನಾ ವಾ ನ ಧೋವೇಯ್ಯ ಪರೇನ ವಾ ನ ಧೋವಾಪೇಯ್ಯ. ಉಕ್ಲಾಪಞ್ಚಾತಿ ಕಚವರಞ್ಚ. ನ ಸೋಧಯೇನ ಸಮ್ಮಜ್ಜೇಯ್ಯ.

೬೨. ಚಪುಚಪೂತಿ ಸದ್ದಂ ಕತ್ವಾ ಉದಕಕಿಚ್ಚಂ ಕರೋನ್ತಸ್ಸ ಆಚಮನ್ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಅನಜ್ಝಿಟ್ಠೋವಾತಿ ಅನಾಣತ್ತೋಯೇವ. ಥೇರೇನಾತಿ ಸಙ್ಘತ್ಥೇರೇನ. ಪಾತಿಮೋಕ್ಖನ್ತಿ ಪಾತಿಮೋಕ್ಖುದ್ದೇಸಂ. ಉದ್ದಿಸೇ ಉದ್ದಿಸೇಯ್ಯ, ದುಕ್ಕಟಂ ಸಿಯಾ.

೬೩. ಅನಾಪುಚ್ಛಾಯ ಪಞ್ಹಸ್ಸ ಕಥನೇ, ಅನಾಪುಚ್ಛಾಯ ಪಞ್ಹಸ್ಸ ವಿಸ್ಸಜ್ಜನೇ, ಅನಾಪುಚ್ಛಾಯ ಸಜ್ಝಾಯಕರಣೇ, ಅನಾಪುಚ್ಛಾಯ ಪದೀಪಜಾಲನೇ, ಅನಾಪುಚ್ಛಾಯ ಪದೀಪವಿಜ್ಝಾಪನೇತಿ ಇಮೇಸು ಚತೂಸು ಪಚ್ಚಯೇಸು ತಸ್ಸ ದುಕ್ಕಟಂ ಸಿಯಾ.

೬೪. ಅನಾಪುಚ್ಛಾ ವಾತಪಾನಕವಾಟಾನಿ ವಿವರೇಯ್ಯ ವಾ ಥಕೇಯ್ಯ ವಾ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ವನ್ದನಾದಿನ್ತಿ ಏತ್ಥ ಆದಿ-ಸದ್ದೋ ವನ್ದಾಪನಂ ಸಙ್ಗಣ್ಹಾತಿ. ಯೋ ಭಿಕ್ಖು ನಗ್ಗೋ ವನ್ದನಂ ಕರೇಯ್ಯ, ವನ್ದಾಪನಂ ಕರೇಯ್ಯ, ಗಮನಂ ಕರೇಯ್ಯ, ಭೋಜನಂ ಕರೇಯ್ಯ, ಪಿವನಂ ಕರೇಯ್ಯ, ಖಾದನಂ ಕರೇಯ್ಯ, ಗಹಣಂ ಕರೇಯ್ಯ, ದಾನಂ ಕರೇಯ್ಯ, ತಸ್ಸ ಸಬ್ಬತ್ಥ ದುಕ್ಕಟನ್ತಿ ಸಮ್ಬನ್ಧೋ.

೬೫. ತಿಪಟಿಚ್ಛನ್ನಕಂ ವಿನಾತಿ ‘‘ಅನುಜಾನಾಮಿ, ಭಿಕ್ಖವೇ, ತಿಸ್ಸೋ ಪಟಿಚ್ಛಾದಿಯೋ ಜನ್ತಾಘರಪ್ಪಟಿಚ್ಛಾದಿಂ ಉದಕಪ್ಪಟಿಚ್ಛಾದಿಂ ವತ್ಥಪ್ಪಟಿಚ್ಛಾದಿ’’ನ್ತಿ (ಚೂಳವ. ೨೬೧) ಏವಂ ವುತ್ತಾ ತಿಸ್ಸೋ ಪಟಿಚ್ಛಾದಿಯೋ ಸಮಾಹಟಾತಿ ‘‘ತಿಪಟಿಚ್ಛಾದೀ’’ತಿ ವುತ್ತಂ. ತಿಪಟಿಚ್ಛನ್ನಕಂ ಠಪೇತ್ವಾ ಪರಿಕಮ್ಮಂ ಸಯಂ ಕರೇಯ್ಯ, ಪರಂ ಕಾರಾಪೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಯೋ ಭಿಕ್ಖು ನಹಾಯಂ ನಹಾಯನ್ತೋ ಕುಟ್ಟೇ ವಾ ಥಮ್ಭೇ ವಾ ತರುಮ್ಹಿ ವಾ ಕಾಯಂ ಉಪಘಂಸೇಯ್ಯ, ತಸ್ಸ ದುಕ್ಕಟಂ ಸಿಯಾ.

೬೬. ಯೋ ಭಿಕ್ಖು ನಹಾಯನ್ತೋ ಕುರುವಿನ್ದಕಸುತ್ತೇನ ಕಾಯಂ ಘಂಸೇಯ್ಯ, ಕಾಯತೋ ಕಾಯೇನ ಅಞ್ಞಮಞ್ಞಂ ಘಂಸೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ಯೋ ಅಗಿಲಾನೋ ಸಉಪಾಹನೋ ಬಹಾರಾಮೇ ಬಹಿಆರಾಮೇ ಚರೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ.

೬೭. ಸಬ್ಬನೀಲಾದಿಕಮ್ಪಿ ಚಾತಿ ಏತ್ಥ ಆದಿ-ಸದ್ದೋ ಲೋಹಿತೋದಾತಪೀತಕಣ್ಹಮಞ್ಜೇಟ್ಠಮಹಾರಙ್ಗಮಹಾನಾಮರಙ್ಗರತ್ತಾದಯೋ ಉಪಾಹನಾಯೋ ಸಙ್ಗಣ್ಹಾತಿ. ಯೋ ಭಿಕ್ಖು ಸಬ್ಬನೀಲಸಬ್ಬಲೋಹಿತಾದಿಕಂ ಉಪಾಹನಂ ಧಾರೇತಿ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ಯೋ ಭಿಕ್ಖು ರತ್ತೋ ರತ್ತಚಿತ್ತೋ ತದಹುಜಾತಾಯಪಿ ಇತ್ಥಿಯಾ ನಿಮಿತ್ತಂ ಪಸ್ಸೇಯ್ಯ, ತಸ್ಸ ದುಕ್ಕಟಂ ಸಿಯಾ. ಯೋ ಭಿಕ್ಖು ಭಿಕ್ಖದಾಯಿಯಾ ಭಿಕ್ಖದಾಯಿಕಾಯ ಇತ್ಥಿಯಾ ಮುಖಂ ಪಸ್ಸೇಯ್ಯ, ತಸ್ಸ ದುಕ್ಕಟಂ ಸಿಯಾ.

೬೮-೯. ಯೋ ಭಿಕ್ಖು ಉಜ್ಝಾನಸಞ್ಞೀ ಹುತ್ವಾ ಅಞ್ಞಸ್ಸ ಭಿಕ್ಖುನೋ ಪತ್ತಂ ವಾ ಪಸ್ಸೇಯ್ಯ, ತಸ್ಸ ದುಕ್ಕಟಂ ಸಿಯಾ. ಆದಾಸಾದಿಮ್ಹಿ ಉದಕಪತ್ತೇ ಅತ್ತನೋ ಮುಖಂ ಪಸ್ಸೇಯ್ಯ, ತಸ್ಸ ದುಕ್ಕಟಂ ಸಿಯಾ. ಉಚ್ಚಾಸನಮಹಾಸನೇ ನಿಸಜ್ಜಾದಿಂ ನಿಸೀದನಸಯನಾದಿಂ ಕರೋನ್ತಸ್ಸ ಭಿಕ್ಖುನೋ ದುಕ್ಕಟಂ ಸಿಯಾ. ಉಕ್ಖಿತ್ತಾನುಪಸಮ್ಪನ್ನನಾನಾಸಂವಾಸಕಾದೀನಂ ವನ್ದನೇಪಿ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ತತ್ಥ ಉಕ್ಖಿತ್ತೋತಿ ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ, ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋತಿ ತಿವಿಧೋಪಿ ಇಧಾಧಿಪ್ಪೇತೋ. ಅನುಪಸಮ್ಪನ್ನೋತಿ ಇಮಿನಾ ಭಿಕ್ಖುನಿಸಾಮಣೇರಸಾಮಣೇರಿಸಿಕ್ಖಮಾನಪಣ್ಡಕಇತ್ಥಿಸಿಕ್ಖಾಪಚ್ಚಕ್ಖಾತಕಾ ಗಹಿತಾ. ನಾನಾಸಂವಾಸಕಾತಿ ಲದ್ಧಿನಾನಾಸಂವಾಸಕಾ ಗಹಿತಾ. ಆದಿ-ಸದ್ದೇನ ಛಿನ್ನಮೂಲಕಾ ಗಹಿತಾ.

೭೦-೭೧. ಯೋ ದೀಘಾಸನೇ ಪಣ್ಡಕಿತ್ಥೀಹಿ ಪಣ್ಡಕೇನ ವಾ ಇತ್ಥಿಯಾ ವಾ ಉಭತೋಬ್ಯಞ್ಜನೇನ ವಾ ಏಕತೋ ನಿಸೀದೇಯ್ಯ, ತಸ್ಸ ದುಕ್ಕಟಂ ಸಿಯಾ. ಅದೀಘೇ ಆಸನೇತಿ ರಸ್ಸೇ ಆಸನೇ. ಯೋ ಭಿಕ್ಖು ರಸ್ಸಾಸನೇ ಮಞ್ಚೇ ವಾ ಪೀಠೇ ವಾ ಅಸಮಾನಾಸನಿಕೇನ ಏಕತೋ ಸಯೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಫಲಪುಪ್ಫಾದಿಕನ್ತಿ ಏತ್ಥ ಆದಿ-ಸದ್ದೇನ ವೇಳುಚುಣ್ಣದನ್ತಕಟ್ಠಮತ್ತಿಕಾದಯೋ ಸಙ್ಗಹಿತಾ. ಕುಲಸಙ್ಗಹತ್ಥಾಯ ಫಲಪುಪ್ಫಾದಿಕಂ ದದತೋ ದುಕ್ಕಟಂ ಸಿಯಾತಿ ಸಮ್ಬನ್ಧೋ.

೭೨-೩. ಯೋ ಭಿಕ್ಖು ಗನ್ಥಿಮಾದಿಂ ಸಯಂ ಕರೇಯ್ಯ, ಪರಂ ಕಾರಾಪೇಯ್ಯ, ತಸ್ಸ ದುಕ್ಕಟಂ ಸಿಯಾ. ಯೋ ಭಿಕ್ಖು ಜಿನೇನ ವಾರಿತಪಚ್ಚಯೇ ಪರಿಭುಞ್ಜೇಯ್ಯ, ತಸ್ಸ ದುಕ್ಕಟಂ ಸಿಯಾ. ಅಬ್ಯತ್ತೋ ಬಾಲೋ ಯೋ ಭಿಕ್ಖು ಆಚರಿಯುಪಜ್ಝಾಯೇ ಅನಿಸ್ಸಾಯ ನಿಸ್ಸಯಂ ಅಗ್ಗಹೇತ್ವಾ ವಸೇಯ್ಯ, ತಸ್ಸ ದುಕ್ಕಟಂ ಸಿಯಾ. ಯೋ ಭಿಕ್ಖು ಅನುಞ್ಞಾತೇಹಿ ಮಾತಾಪಿತುಆದೀಹಿ ಪುಗ್ಗಲೇಹಿ ಅಞ್ಞಸ್ಸ ಪುಗ್ಗಲಸ್ಸ ಭೇಸಜ್ಜಂ ಕರೇಯ್ಯ ವಾ ವದೇಯ್ಯ ವಾ, ತಸ್ಸ ದುಕ್ಕಟಂ ಸಿಯಾ. ಸಾಪತ್ತಿಕೋ ಯೋ ಭಿಕ್ಖು ಉಪೋಸಥಪ್ಪವಾರಣಂ ಕರೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ತತ್ಥ ಜಿನೇನ ಭಗವತಾ ವಾರಿತಾ ಜಿನವಾರಿತಾ, ಜಿನವಾರಿತಾ ಚ ತೇ ಪಚ್ಚಯಾ ಚೇತಿ ಜಿನವಾರಿತಪಚ್ಚಯಾ, ತೇ ಜಿನವಾರಿತಪಚ್ಚಯೇ. ದ್ವೇಮಾತಿಕಾಅಪ್ಪಗುಣತಾಯ ಅಬ್ಯತ್ತೋ.

೭೪. ಯೋ ಭಿಕ್ಖು ಆಭೋಗಂ ವಾ ನಿಯೋಗಂ ವಾ ವಜ್ಜೇತ್ವಾ ದ್ವಾರಬನ್ಧಾದಿಕೇ ಠಾನೇ ಪರಿವತ್ತಕವಾಟಕಂ ಅಪಿಧಾಯ ದಿವಾ ಸಯೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ದ್ವಾರಬನ್ಧಾದಿಕೇತಿ ಯೇನ ಕೇನಚಿ ಪರಿಕ್ಖಿತ್ತೇ ಅಬ್ಭೋಕಾಸೇಪಿ ರುಕ್ಖಮೂಲೇಪಿ ಅನ್ತಮಸೋ ಇಮಿನಾ ಲಕ್ಖಣೇನ ಯುತ್ತಆಕಾಸಙ್ಗಣೇಪಿ. ಅಪಿಧಾಯಾತಿ ಅಪಿದಹಿತ್ವಾ. ವಿನಾಭೋಗನ್ತಿ ‘‘ಏಸ ದ್ವಾರಂ ಜಗ್ಗಿಸ್ಸತೀ’’ತಿ ಆಭೋಗಂ ಠಪೇತ್ವಾತಿ ಅತ್ಥೋ. ನಿಯೋಗನ್ತಿ ಅವಸಟ್ಠಾನಂ, ಅತ್ತನೋ ಅವಸಂ ಬಹುಸಾಧಾರಣಟ್ಠಾನಂ ಠಪೇತ್ವಾ. ‘‘ಸವಸೋ’’ತಿ ವಾ ಪಾಠೋ, ಸವಸೋ ಹುತ್ವಾತಿ ಅತ್ಥೋ. ದಿವಾತಿ ದಿವಾಕಾಲೇ.

೭೫. ಧಞ್ಞನ್ತಿ ಸಾಲಿ ವೀಹಿ ಯವೋ ಗೋಧುಮೋ ಕಙ್ಗು ವರಕೋ ಕುದ್ರೂಸಕೋತಿ ಸತ್ತವಿಧಂ ಧಞ್ಞಂ. ಇತ್ಥಿರೂಪನ್ತಿ ದಾರುಲೋಹಮಯಾದಿಇತ್ಥಿರೂಪಂ. ರತನನ್ತಿ ಮುತ್ತಾದಿದಸವಿಧಂ ರತನಂ. ಆವುಧನ್ತಿ ಸತ್ತಿತೋಮರಾದಿಸಬ್ಬಾವುಧಭಣ್ಡಂ. ಇತ್ಥಿಪಸಾಧನನ್ತಿ ಇತ್ಥಿಯಾ ಸೀಸಾದಿಅಲಙ್ಕಾರಂ. ತೂರಿಯಭಣ್ಡನ್ತಿ ಧಮನಸಙ್ಖಾದಿಸಬ್ಬಂ ತೂರಿಯಭಣ್ಡಂ. ಫಲರುಕ್ಖೇತಿ ಫಲಿತರುಕ್ಖೇ. ಪುಬ್ಬಣ್ಣಾದಿಕನ್ತಿ ಮುಗ್ಗಮಾಸಾದಿಕಂ. ಆದಿ-ಸದ್ದೇನ ವಾಕುರಕುಮಿನಾದಯೋ ಗಹಿತಾ. ಏತೇಸು ಯಂ ಕಿಞ್ಚಿ ಆಮಸೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ.

೭೬. ಸಸಿತ್ಥೋದಕತೇಲೇಹೀತಿ ಯೋ ಪನ ಮಧುಸಿತ್ಥಕತೇಲೇನ ವಾ ಉದಕಮಿಸ್ಸಕತೇಲೇನ ವಾ ಯೇನ ಕೇನಚಿ ಚಿಕ್ಖಲ್ಲೇನ ವಾ. ಫಣಹತ್ಥಫಣೇಹಿ ವಾತಿ ದನ್ತಮಯಾದಿಫಣೇನ ವಾ ಫಣಕಿಚ್ಚಸಾಧಕೇಹಿ ಹತ್ಥಙ್ಗುಲೀಹಿ ವಾ ಕೋಚ್ಛೇನ ವಾ ಕೇಸಮೋಸಣ್ಠನೇ ದುಕ್ಕಟಂ ಸಿಯಾತಿ ಅತ್ಥೋ. ಏಕಸ್ಮಿಂ ಭಾಜನೇ ಭೋಜನನಿಮಿತ್ತೇ ದುಕ್ಕಟಂ ಸಿಯಾತಿ ಅತ್ಥೋ.

೭೭. ದ್ವೇ ಭಿಕ್ಖೂ ಏಕತ್ಥರಣಾ ಸಯೇಯ್ಯೂಂ, ದ್ವೇ ಭಿಕ್ಖೂ ಏಕಪಾವುರಣಾ ಸಯೇಯ್ಯುಂ, ದ್ವೇ ಭಿಕ್ಖೂ ಏಕಮಞ್ಚಕೇ ಸಯೇಯ್ಯುಂ, ತೇಸಂ ದುಕ್ಕಟಾನಿ ಹೋನ್ತೀತಿ ಸಮ್ಬನ್ಧೋ. ಪಮಾಣತೋ ಅಧಿಕಂ ವಾ ಊನಂ ವಾ ದನ್ತಕಟ್ಠಂ ಖಾದೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಯೋಜನಾ. ತತ್ಥ ಅಧಿಕನ್ತಿ ಅಟ್ಠಙ್ಗುಲತೋ ಅಧಿಕಂ. ಊನನ್ತಿ ಚತುರಙ್ಗುಲತೋ ಊನಂ.

೭೮. ಯೋ ಭಿಕ್ಖು ನಚ್ಚಞ್ಚ ಗೀತಞ್ಚ ವಾದಿತಞ್ಚ ಯೋಜೇತಿ ವಾ ಯೋಜಾಪೇತಿ ವಾ, ತಸ್ಸ ದುಕ್ಕಟಂ ಸಿಯಾ. ತೇಸಂ ನಚ್ಚಾನಂ ದಸ್ಸನಂ, ತೇಸಂ ಗೀತಾನಂ ಸವನಂ, ತೇಸಂ ವಾದಿತಾನಂ ಸವನಞ್ಚ ಕರೋನ್ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ.

೭೯. ವೀಹಾದಿರೋಪಿಮೇತಿ ವೀಹಿಆದೀನಂ ರುಹನಟ್ಠಾನೇ. ಬಹಿಪಾಕಾರಕುಟ್ಟಕೇತಿ ಪಾಕಾರಕುಟ್ಟಾನಂ ಬಹಿ. ವಚ್ಚಾದಿಛಡ್ಡನಾದಿಮ್ಹೀತಿ ವಚ್ಚಪಸ್ಸಾವಸಙ್ಕಾರಚಲಕಾದೀನಂ ಛಡ್ಡನವಿಸ್ಸಜ್ಜನಪಚ್ಚಯಾ ದುಕ್ಕಟಂ ಸಿಯಾತಿ ಅತ್ಥೋ. ದೀಘಕೇಸಾದಿಧಾರಣೇತಿ ದೀಘಕೇಸಧಾರಣೇ ದೀಘನಖಧಾರಣೇ ದುಕ್ಕಟಂ ಸಿಯಾತಿ ಅತ್ಥೋ.

೮೦. ನಖಮಟ್ಠಕರಣಾದಿಮ್ಹೀತಿ ಏತ್ಥ ಆದಿ-ಸದ್ದೇನ ರಜನಕರಣಂ ಗಹಿತಂ. ಸಮ್ಬಾಧೇ ಲೋಮಹಾರಣೇತಿ ಸಮ್ಬಾಧೇ ಉಪಕಚ್ಛಕಮುತ್ತಕರಣಟ್ಠಾನೇ ಲೋಮುದ್ಧರಣೇ. ಸಉಪಾಹನೋ ಭಿಕ್ಖು ಪರಿಕಮ್ಮಕತಂ ಭೂಮಿಂ ಅಕ್ಕಮೇಯ್ಯಾತಿ ಸಮ್ಬನ್ಧೋ.

೮೧. ಅಧೋತಅಲ್ಲಪಾದೇಹೀತಿ ಯೋ ಭಿಕ್ಖು ಅಧೋತಪಾದೇಹಿ ವಾ ಅಲ್ಲಪಾದೇಹಿ ವಾ ಸಙ್ಘಿಕಂ ಮಞ್ಚಂ ವಾ ಪೀಠಂ ವಾ ಅಕ್ಕಮೇಯ್ಯ, ಪರಿಕಮ್ಮಕತಂ ಭಿತ್ತಿಂ ವಾ ಕಾಯತೋ ಆಮಸನ್ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ.

೮೨-೩. ಸಙ್ಘಾಟಿಯಾಪಿ ಪಲ್ಲತ್ಥೇತಿ ಅಧಿಟ್ಠಿತಚೀವರೇನ ವಿಹಾರೇ ವಾ ಅನ್ತರಘರೇ ವಾ ಪಲ್ಲತ್ಥಿಕಂ ಕರೇಯ್ಯ, ತಸ್ಸ ದುಕ್ಕಟಂ. ದುಪ್ಪರಿಭುಞ್ಜೇಯ್ಯ ಚೀವರನ್ತಿ ತಿಣ್ಣಂ ಚೀವರಾನಂ ಅಞ್ಞತರಂ ಚೀವರಂ ದುಪ್ಪರಿಭೋಗೇನ ಪರಿಭುಞ್ಜೇಯ್ಯ. ಅಕಾಯಬನ್ಧನೋತಿ ಕಾಯಬನ್ಧನವಿರಹಿತೋ ಭಿಕ್ಖು ಗಾಮಂ ವಜೇಯ್ಯ ಗಚ್ಛೇಯ್ಯ. ಯೋ ಭಿಕ್ಖು ವಚ್ಚಕಂ ಉಚ್ಚಾರಂ ಕತ್ವಾನ ಉದಕೇ ಸನ್ತೇ ನಾಚಮೇಯ್ಯ ಉದಕಸುದ್ಧಿಂ ನ ಕರೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಸಮಾದೇಯ್ಯ ಅಕಪ್ಪಿಯೇತಿ ಭಿಕ್ಖುಂ ವಾ ಸಾಮಣೇರಾದಿಕೇ ಸೇಸಸಹಧಮ್ಮಿಕೇ ವಾ ಅಕಪ್ಪಿಯೇ ನಿಯೋಜೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಸಭಾಗಾಪತ್ತಿಯಾ ದೇಸನಾರೋಚನಪಚ್ಚಯಾ ದುಕ್ಕಟಂ ಸಿಯಾತಿ ಅತ್ಥೋ. ಸಭಾಗಾತಿ ಏತ್ಥ ವತ್ಥುಸಭಾಗತಾವ ಇಧಾಧಿಪ್ಪೇತಾ, ನ ಆಪತ್ತಿಸಭಾಗತಾ.

೮೪. ನ ವಸೇ ವಸ್ಸನ್ತಿ ಯೋ ಭಿಕ್ಖು ವಸ್ಸಂ ನ ವಸೇಯ್ಯ ನ ಉಪಗಚ್ಛೇಯ್ಯ, ತಸ್ಸ ದುಕ್ಕಟಂ ಸಿಯಾ. ವಿಸಂವಾದೇ ಸುದ್ಧಚಿತ್ತೇತಿ ಏತ್ಥ ಸಮ್ಪದಾನತ್ಥೇ ಭುಮ್ಮವಚನಂ, ಪಟಿಸ್ಸವಂ ವಿಸಂವಾದೇನ್ತಸ್ಸ ಸುದ್ಧಚಿತ್ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ವಸ್ಸಂ ವಸಿತ್ವಾ ಅನನುಞ್ಞಾತಕಿಚ್ಚತೋ ಅನನುಞ್ಞಾತಕಿಚ್ಚೇನ ಭಿಕ್ಖುನೋ ಗಮನೇ ದುಕ್ಕಟಂ ಸಿಯಾತಿ ಯೋಜನಾ.

೮೫. ಆಪದಂ ವಜ್ಜೇತ್ವಾ ತರುಸ್ಸ ಉದ್ಧಂ ಪೋರಿಸಮ್ಹಾ ಅಭಿರುಹಣೇ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ಆಪದನ್ತಿ ಅನ್ತರಾಯಂ. ತರುಸ್ಸಾತಿ ರುಕ್ಖಸ್ಸ. ಪೋರಿಸಮ್ಹಾತಿ ಏಕಪೋರಿಸಪ್ಪಮಾಣಾ ಮಜ್ಝಿಮಸ್ಸ ಪುರಿಸಸ್ಸ ಪಞ್ಚಹತ್ಥಾ. ಅಪರಿಸ್ಸಾವನೋ ಯೋ ಭಿಕ್ಖು ಅದ್ಧಾನಂ ಗಚ್ಛೇಯ್ಯ, ಯೋ ಚ ಭಿಕ್ಖು ತಂ ಪರಿಸ್ಸಾವನಂ ಯಾಚತೋ ನ ದದೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಯೋಜನಾ. ಅದ್ಧಾನನ್ತಿ ಅದ್ಧಯೋಜನಮೇವ ಅನ್ತಿಮಮದ್ಧಾನಂ.

೮೬. ಅತ್ತನೋ ಘಾತನೇ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ಯೋ ಭಿಕ್ಖು ಇತ್ಥಿರೂಪಾದಿರೂಪಂ ಕರೇಯ್ಯ ವಾ ಕಾರಾಪೇಯ್ಯ ವಾ, ತಸ್ಸ ದುಕ್ಕಟಂ ಸಿಯಾ. ಮಾಲಾದಿಕಂ ವಿಚಿತ್ತಂ ಠಪೇತ್ವಾ ಜಾತಕಾದಿವತ್ಥುಂ ಸಯಂ ಕರೇಯ್ಯ, ದುಕ್ಕಟಂ ಸಿಯಾತಿ ಸಮ್ಬನ್ಧೋ.

೮೭. ಭುಞ್ಜನ್ತಮುಟ್ಠಪೇತಿ ಯೋ ಭಿಕ್ಖು ಭುಞ್ಜನ್ತಂ ಉಟ್ಠಾಪೇಯ್ಯ, ತಸ್ಸ ದುಕ್ಕಟಂ ಸಿಯಾ. ಭತ್ತಸಾಲಾದೀಸು ವುಡ್ಢಾನಂ ಓಕಾಸಂ ಅದತ್ವಾ ನಿಸೀದತೋ ದುಕ್ಕಟಂ ಸಿಯಾತಿ ಯೋಜನಾ.

೮೮. ಯಾನಾನೀತಿ ವಯ್ಹಂ ರಥೋ ಸಕಟಂ ಸನ್ದಮಾನಿಕಾದೀನಿ. ಕಲ್ಲಕೋತಿ ಅಗಿಲಾನೋ. ಅಗಿಲಾನೋ ಯೋ ಭಿಕ್ಖು ಯಾನಾನಿ ಅಭಿರುಹೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ವದೇ ದವನ್ತಿ ಕೇಳಿಂ ವದೇಯ್ಯ, ರತನತ್ತಯಂ ಆರಬ್ಭ ಕೇಳಿಂ ವದೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಅಞ್ಞಪರಿಸಾಯ ಉಪಲಾಲನೇ ದುಕ್ಕಟಂ ಹೋತಿ.

೮೯. ಕಾಯಾದಿನ್ತಿ ಏತ್ಥ ಆದಿ-ಸದ್ದೋ ಊರುನಿಮಿತ್ತಂ ಸಙ್ಗಣ್ಹಾತಿ. ಕಾಯಂ ವಾ ಊರುಂ ವಾ ನಿಮಿತ್ತಂ ವಾ ವಿವರಿತ್ವಾ ಭಿಕ್ಖುನೀನಂ ನ ದಸ್ಸಯೇ ನ ದಸ್ಸೇಯ್ಯಾತಿ ಅತ್ಥೋ. ಲೋಕಾಯತಂ ತಿರಚ್ಛಾನಾದಿವಿಜ್ಜಂ ನ ಚ ಸಯಂ ವಾಚೇಯ್ಯ, ಪರಞ್ಚ ನ ವಾಚಾಪೇಯ್ಯ. ಪಲಿತಂ ಗಣ್ಹೇಯ್ಯ ವಾ ಗಣ್ಹಾಪೇಯ್ಯ ವಾ, ತಸ್ಸ ದುಕ್ಕಟಂ ಸಿಯಾತಿ ಯೋಜನಾ.

೯೦-೯೨. ಯತ್ಥ ಕತ್ಥಚಿ ಪೇಳಾಯಂ ಪಕ್ಖಿಪಿತ್ವಾ ಭತ್ತಂ ಭುಞ್ಜನ್ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ಪತ್ತಹತ್ಥಕೋ ಯೋ ಭಿಕ್ಖು ವಾತಪಾನಂ ವಾ ಕವಾಟಂ ವಾ ಪಣಾಮೇ ಪಣಾಮೇಯ್ಯ, ಸೋದಕಂ ಪತ್ತಂ ಉಣ್ಹೇಯ್ಯ ಉಣ್ಹೇ ಓತಾಪೇಯ್ಯ ವಾ ಪಟಿಸಾಮೇಯ್ಯ ವಾ, ವೋದಕಂ ಪತ್ತಂ ಅತಿಉಣ್ಹೇಯ್ಯ ಅತಿಠಪೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಯೋ ಭಿಕ್ಖು ಪತ್ತಂ ಭೂಮಿಯಂ ವಾ ಅಙ್ಕೇ ವಾ ಮಞ್ಚೇ ವಾ ಪೀಠೇ ವಾ ಮಿಡ್ಢನ್ತೇ ವಾ ಪರಿಭಣ್ಡನ್ತೇ ವಾ ಪಾದೇ ವಾ ಛತ್ತೇ ವಾ ಠಪೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ. ಭೂಮಿಯನ್ತಿ ಯೇನ ಕೇನಚಿ ಅನತ್ಥತಾಯ ಪಂಸುಸಕ್ಖರಮಿಸ್ಸಾಯ. ಅಙ್ಕೇತಿ ದ್ವಿನ್ನಂ ಊರೂನಂ ಮಜ್ಝೇ. ಮಿಡ್ಢನ್ತೇತಿ ಮಿಡ್ಢಪರಿಯನ್ತೇ. ಪರಿಭಣ್ಡನ್ತೇತಿ ಬಾಹಿರಪಸ್ಸೇ ಕತಾಯ ತನುಕಮಿಡ್ಢಿಯಾ ಅನ್ತೇ. ಯೋ ಭಿಕ್ಖು ಚಲಕಾದಿಂ ವಾ ಪತ್ತೇ ಠಪೇಯ್ಯ, ಪತ್ತೇ ವಾ ಹತ್ಥಧೋವನೇ ಹತ್ಥಸ್ಸ ಧೋವನಪ್ಪಚ್ಚಯಾ ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ.

೯೩. ಉಚ್ಛಿಟ್ಠಂ ಮುಖಧೋವನಂ ಉದಕಮ್ಪಿ ಪತ್ತೇನ ನೀಹರನ್ತಸ್ಸ ಭಿಕ್ಖುನೋ ದುಕ್ಕಟಂ ಸಿಯಾ. ಯೋ ಭಿಕ್ಖು ಅಕಪ್ಪಿಯಂ ಪತ್ತಂ ಪರಿಭುಞ್ಜೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ತತ್ಥ ಅಕಪ್ಪಿಯಂ ಪತ್ತನ್ತಿ ದಾರುಮಯಪತ್ತಾದಿಂ.

೯೪. ಯೋ ಭಿಕ್ಖು ಖಿಪಿತೇ ‘‘ಜೀವಾ’’ತಿ ವದೇ ವದೇಯ್ಯ, ತಸ್ಸ ದುಕ್ಕಟಂ ಸಿಯಾತಿ ಅತ್ಥೋ. ಯೋ ಭಿಕ್ಖು ಪರಿಮಣ್ಡಲಕಾದಿಮ್ಹಿ ಪಞ್ಚಸತ್ತತಿ ಸೇಖಿಯೇ ಅನಾದರೋ ಹುತ್ವಾ ನ ಸಿಕ್ಖತಿ, ತಸ್ಸ ದುಕ್ಕಟಂ ಸಿಯಾತಿ ಸಮ್ಬನ್ಧೋ.

೯೫. ಯೋ ಭಿಕ್ಖು ಭಣ್ಡಾಗಾರೇ ಪಯುತೋ ಮಾತುಯಾ ಪಿತುನೋ ಚ ಭಣ್ಡಕಂ ಗೋಪೇಯ್ಯ, ಅಸ್ಸ ಭಿಕ್ಖುನೋ ಪಾಚಿತ್ತಿಯಂ ಸಿಯಾತಿ ಸಮ್ಬನ್ಧೋ. ತತ್ಥ ಪಯುತೋತಿ ಭಣ್ಡಾಗಾರೇ ಬ್ಯಾಪಾರವಸೇನ ಯುತ್ತಪ್ಪಯುತ್ತೋ. ಗೋಪಯೇತಿ ಗೋಪೇಯ್ಯ. ಯೋ ಭಿಕ್ಖು ದವಾಯ ಹೀನೇನ ಜಾತಿಆದಿನಾ ಉತ್ತಮಮ್ಪಿ ವದೇಯ್ಯ, ದುಬ್ಭಾಸಿತಂ ಸಿಯಾತಿ ಸಮ್ಬನ್ಧೋ. ತತ್ಥ ಹೀನೇಹಿ ವಾ ಉಕ್ಕಟ್ಠೇಹಿ ವಾ ಜಾತಿಆದೀಹಿ ಏವಂ ಉಕ್ಕಟ್ಠಂ ವಾ ಹೀನಂ ವಾ ‘‘ಚಣ್ಡಾಲೋಸೀ’’ತಿಆದಿನಾ ನಯೇನ ಉಜುಂ ವಾ ‘‘ಸನ್ತಿ ಇಧೇಕಚ್ಚೇ ಚಣ್ಡಾಲವೇನನೇಸಾದಾ’’ತಿಆದಿನಾ ನಯೇನ ಅಞ್ಞಾಪದೇಸೇನ ವಾ ಉಪಸಮ್ಪನ್ನಂ ವಾ ಅನುಪಸಮ್ಪನ್ನಂ ವಾ ಅಕ್ಕೋಸಾಧಿಪ್ಪಾಯಂ ವಿನಾ ಕೇವಲಂ ಕೀಳಾಧಿಪ್ಪಾಯೇನ ವದೇಯ್ಯ, ದುಬ್ಭಾಸಿತಂ ಸಿಯಾತಿ.

ಪಕಿಣ್ಣಕನಿದ್ದೇಸವಣ್ಣನಾ ನಿಟ್ಠಿತಾ.