೨. ಗರುಕಾಪತ್ತಿನಿದ್ದೇಸವಣ್ಣನಾ

೧೦. ಇದಾನಿ ಸಙ್ಘಾದಿಸೇಸಂ ಪಕಾಸೇತುಂ ‘‘ಮೋಚೇತುಕಾಮಚಿತ್ತೇನಾ’’ತಿಆದಿಮಾರದ್ಧಂ. ತತ್ಥ ಮೋಚೇತುಂ ಕಾಮೇತೀತಿ ಮೋಚೇತುಕಾಮಂ, ಮೋಚೇತುಕಾಮಞ್ಚ ತಂ ಚಿತ್ತಞ್ಚಾತಿ ಮೋಚೇತುಕಾಮಚಿತ್ತಂ, ತೇನ, ಮೋಚನಸ್ಸಾದಚಿತ್ತೇನಾತಿ ಅತ್ಥೋ. ಏಕಾದಸನ್ನಞ್ಹಿ ರಾಗಾನಂ ಏಕೇನ ಮೋಚನಸ್ಸಾದೇನ ಆಪತ್ತಿ ಹೋತೀತಿ ವುತ್ತಂ ಹೋತಿ.

ತತ್ರಿಮೇ ಏಕಾದಸ ಅಸ್ಸಾದಾ ಮೋಚನಸ್ಸಾದೋ ಮುಚ್ಚನಸ್ಸಾದೋ ಮುತ್ತಸ್ಸಾದೋ ಮೇಥುನಸ್ಸಾದೋ ಫಸ್ಸಸ್ಸಾದೋ ಕಣ್ಡೂವನಸ್ಸಾದೋ ದಸ್ಸನಸ್ಸಾದೋ ನಿಸಜ್ಜಸ್ಸಾದೋ ವಾಚಸ್ಸಾದೋ ಗೇಹಸಿತಪೇಮಂ ವನಭಙ್ಗಿಯನ್ತಿ. ತತ್ಥ ಮೋಚನಸ್ಸಾದಚೇತನಾಯ ಚೇತೇನ್ತೋ ಚೇವ ಅಸ್ಸಾದೇನ್ತೋ ಚ ಉಪಕ್ಕಮತಿ, ಮುಚ್ಚತಿ, ಸಙ್ಘಾದಿಸೇಸೋ, ನ ಮುಚ್ಚತಿ ಚೇ, ಥುಲ್ಲಚ್ಚಯಂ. ಸಚೇ ಪನ ಸಯನಕಾಲೇ ರಾಗಪರಿಯುಟ್ಠಿತೋ ಹುತ್ವಾ ಊರುನಾ ವಾ ಮುಟ್ಠಿನಾ ವಾ ಅಙ್ಗಜಾತಂ ಗಾಳ್ಹಂ ಪೀಳೇತ್ವಾ ಮೋಚನತ್ಥಾಯ ಸಉಸ್ಸಾಹೋ ಸುಪತಿ, ಸುಪನ್ತಸ್ಸ ಚಸ್ಸ ಅಸುಚಿ ಮುಚ್ಚತಿ, ಸಙ್ಘಾದಿಸೇಸೋ. ಮುಚ್ಚನಸ್ಸಾದೇ ಅತ್ತನೋ ಧಮ್ಮತಾಯ ಮುಚ್ಚಮಾನಂ ಅಸ್ಸಾದೇತಿ, ನ ಉಪಕ್ಕಮತಿ, ಮುಚ್ಚತಿ, ಅನಾಪತ್ತಿ. ಮುತ್ತಸ್ಸಾದೇ ಅತ್ತನೋ ಧಮ್ಮತಾಯ ಮುತ್ತೇ ಠಾನಾ ಚುತೇ ಅಸುಚಿಮ್ಹಿ ಪಚ್ಛಾ ಅಸ್ಸಾದೇನ್ತಸ್ಸ ವಿನಾ ಉಪಕ್ಕಮೇನ ಮುಚ್ಚತಿ, ಅನಾಪತ್ತಿ. ಮೇಥುನಸ್ಸಾದೇ ಮೇಥುನರಾಗೇನ ಮಾತುಗಾಮಂ ಗಣ್ಹಾತಿ, ತೇನ ಅಸುಚಿ ಮುಚ್ಚತಿ, ಅನಾಪತ್ತಿ, ದುಕ್ಕಟಂ ಪನ ಆಪಜ್ಜತಿ. ಫಸ್ಸಸ್ಸಾದೋ ದುವಿಧೋ ಅಜ್ಝತ್ತಿಕೋ ಬಾಹಿರೋ ಚಾತಿ. ತತ್ಥ ಅತ್ತನೋ ನಿಮಿತ್ತಂ ‘‘ಥದ್ಧಂ, ಮುದುಕನ್ತಿ ಜಾನಿಸ್ಸಾಮೀ’’ತಿ ವಾ ಲೋಲಭಾವೇನ ವಾ ಕೀಳಾಪಯತೋ ಅಸುಚಿ ಮುಚ್ಚತಿ, ಅನಾಪತ್ತಿ. ಬಾಹಿರಫಸ್ಸಸ್ಸಾದೇ ಪನ ಕಾಯಸಂಸಗ್ಗರಾಗೇನ ಇತ್ಥಿಂ ಫುಸತೋ, ಆಲಿಙ್ಗತೋ ಚ ಅಸುಚಿ ಮುಚ್ಚತಿ, ಅನಾಪತ್ತಿ, ಕಾಯಸಂಸಗ್ಗಸಙ್ಘಾದಿಸೇಸಂ ಪನ ಆಪಜ್ಜತಿ.

ಕಣ್ಡೂವನಸ್ಸಾದೇ ದದ್ದುಕಚ್ಛುಪಿಳಕಪಾಣಕಾದೀನಂ ಅಞ್ಞತರೇನ ಖಜ್ಜಮಾನಂ ನಿಮಿತ್ತಂ ಕಣ್ಡೂವನಸ್ಸಾದೇನ ಕಣ್ಡೂವತೋ ಅಸುಚಿ ಮುಚ್ಚತಿ, ಅನಾಪತ್ತಿ. ದಸ್ಸನಸ್ಸಾದೇ ಇತ್ಥಿಯಾ ಅನೋಕಾಸಂ ಉಪನಿಜ್ಝಾಯತೋ ಅಸುಚಿ ಮುಚ್ಚತಿ, ಅನಾಪತ್ತಿ, ದುಕ್ಕಟಂ ಪನ ಹೋತಿ. ನಿಸಜ್ಜಸ್ಸಾದೇ ಮಾತುಗಾಮೇನ ಸದ್ಧಿಂ ರಹೋ ನಿಸಿನ್ನಸ್ಸ ಮುತ್ತೇಪಿ ಅನಾಪತ್ತಿ, ರಹೋನಿಸಜ್ಜಾಪತ್ತಿ ಪನ ಹೋತಿ. ವಾಚಸ್ಸಾದೇ ಮಾತುಗಾಮಂ ಮೇಥುನಪ್ಪಟಿಸಂಯುತ್ತಾಹಿ ವಾಚಾಹಿ ಓಭಾಸನ್ತಸ್ಸ ಮುತ್ತೇಪಿ ಅನಾಪತ್ತಿ, ದುಟ್ಠುಲ್ಲವಾಚಾಸಙ್ಘಾದಿಸೇಸಂ ಪನ ಆಪಜ್ಜತಿ. ಗೇಹಸಿತಪೇಮೇ ಮಾತಾದೀನಂ ಮಾತಾದಿಪೇಮೇನ ಆಲಿಙ್ಗನಾದಿಂ ಕರೋನ್ತಸ್ಸ ಮುತ್ತೇಪಿ ಅನಾಪತ್ತಿ. ವನಭಙ್ಗಂ ಸನ್ಥವಕರಣತ್ಥಾಯ ಇತ್ಥಿಯಾ ಪೇಸಿತಪುಪ್ಫಾದಿವನಭಙ್ಗಸಞ್ಞಿತಂ ಪಣ್ಣಾಕಾರಂ ‘‘ಇತ್ಥನ್ನಾಮಾಯ ಇಮಂ ಪೇಸಿತ’’ನ್ತಿ ಅಸ್ಸಾದೇನ ಆಮಸನ್ತಸ್ಸ ಮುತ್ತೇಪಿ ಅನಾಪತ್ತೀತಿ. ಏವಮೇತೇಸು ಮೋಚನಸ್ಸಾದೇನ ಆಪತ್ತಿ ಹೋತೀತಿ ದಸ್ಸೇತುಂ ‘‘ಮೋಚೇತು…ಪೇ… ನಾ’’ತಿ ವುತ್ತಂ. ಅಥ ವಾ ಮೋಚೇತುಕಾಮಂ ಚಿತ್ತಂ ಯಸ್ಸ ಸೋಯಂ ಮೋಚೇತುಕಾಮಚಿತ್ತೋ, ತೇನ, ಇತ್ಥಮ್ಭೂತೇ ಕರಣವಚನಂ, ಮೋಚೇತುಕಾಮಚಿತ್ತೋ ಹುತ್ವಾತಿ ಅತ್ಥೋ.

ಉಪಕ್ಕಮ್ಮಾತಿ ಹತ್ಥಾದೀಸು ಯೇನ ಕೇನಚಿ ನಿಮಿತ್ತೇ ಉಪಕ್ಕಮಿತ್ವಾತಿ ಅತ್ಥೋ. ವಿಮೋಚಯನ್ತಿ ಯಂ ಅನ್ತಮಸೋ ಏಕಾ ಖುದ್ದಕಮಕ್ಖಿಕಾ ಪಿವೇಯ್ಯ, ತತ್ತಕಮ್ಪಿ ವಿಮೋಚೇನ್ತೋತಿ ಅತ್ಥೋ. ಸುಕ್ಕನ್ತಿ ನೀಲಪೀತಲೋಹಿತೋದಾತತಕ್ಕತೇಲದಕಖೀರದಧಿಸಪ್ಪಿವಣ್ಣಸಙ್ಖಾತೇಸು ದಸವಿಧೇಸು ಸುಕ್ಕೇಸು ಯಂ ಕಿಞ್ಚಿ ಸುಕ್ಕಂ. ಅಞ್ಞತ್ರ ಸುಪಿನಾತಿ ಯಾ ಸುಪಿನನ್ತೇ ಸುಕ್ಕವಿಸ್ಸಟ್ಠಿ ಹೋತಿ, ತಂ ಠಪೇತ್ವಾತಿ ಅತ್ಥೋ. ಸಮಣೋತಿ ಯೋ ಕೋಚಿ ಉಪಸಮ್ಪನ್ನೋ. ಗರುಕನ್ತಿ ಸಙ್ಘಾದಿಸೇಸಂ. ಫುಸೇತಿ ಆಪಜ್ಜೇಯ್ಯಾತಿ ಅತ್ಥೋ. ಚೇತನಾ ಉಪಕ್ಕಮೋ ಮುಚ್ಚನನ್ತಿ ಇಮಾನೇತ್ಥ ತೀಣಿ ಅಙ್ಗಾನೀತಿ. ಸುಕ್ಕವಿಸ್ಸಟ್ಠಿಸಿಕ್ಖಾಪದಂ.

೧೧. ಇದಾನಿ ಕಾಯಸಂಸಗ್ಗಂ ದಸ್ಸೇತುಂ ‘‘ಕಾಯಸಂಸಗ್ಗರಾಗೇನಾ’’ತಿಆದಿಮಾರದ್ಧಂ. ಭಿಕ್ಖು ಮನುಸ್ಸಿತ್ಥಿಯಾ ಮನುಸ್ಸಿತ್ಥಿಸಞ್ಞೀ ಹುತ್ವಾ ಕಾಯಸಂಸಗ್ಗರಾಗೇನ ಉಪಕ್ಕಮಿತ್ವಾ ಮನುಸ್ಸಿತ್ಥಿಂ ಪರಾಮಸನ್ತೋ ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ ಯೋಜನಾ. ತತ್ಥ ಕಾಯಸಂಸಗ್ಗರಾಗೇನಾತಿ ಹತ್ಥಗ್ಗಹಣಾದಿಕಾಯಸಮ್ಫಸ್ಸೇನ ರಾಗೇನ ಕಾಯಮಿಸ್ಸರಾಗೇನ. ಮನುಸ್ಸಿತ್ಥಿನ್ತಿ ತದಹುಜಾತಮ್ಪಿ ಜೀವಮಾನಕಮನುಸ್ಸಿತ್ಥಿಂ. ಪರಾಮಸನ್ತಿ ಪರಾಮಸನ್ತೋ, ಇತ್ಥೀತಿ ಸಞ್ಞಾ ಇತ್ಥಿಸಞ್ಞಾ, ಸಾ ಅಸ್ಸ ಅತ್ಥೀತಿ ಇತ್ಥಿಸಞ್ಞೀ, ಇತ್ಥಿಸಞ್ಞೀ ಹುತ್ವಾತಿ ಅತ್ಥೋ. ಮನುಸ್ಸಿತ್ಥೀ, ಇತ್ಥಿಸಞ್ಞಿತಾ, ಕಾಯಸಂಸಗ್ಗರಾಗೋ, ತೇನ ರಾಗೇನ ವಾಯಾಮೋ, ಹತ್ಥಗ್ಗಾಹಾದಿಸಮಾಪಜ್ಜನನ್ತಿ ಇಮಾನೇತ್ಥ ಪಞ್ಚ ಅಙ್ಗಾನಿ. ಕಾಯಸಂಸಗ್ಗಸಿಕ್ಖಾಪದಂ.

೧೨. ಇದಾನಿ ದುಟ್ಠುಲ್ಲಂ ದಸ್ಸೇತುಂ ‘‘ದುಟ್ಠುಲ್ಲವಾಚಸ್ಸಾದೇನಾ’’ತಿಆದಿ ಆರದ್ಧಂ. ತತ್ಥ ದುಟ್ಠುಲ್ಲವಾಚಸ್ಸಾದೇನಾತಿ ವಚ್ಚಮಗ್ಗಪಸ್ಸಾವಮಗ್ಗಮೇಥುನಧಮ್ಮಪ್ಪಟಿಸಂಯುತ್ತವಾಚಸ್ಸಾದರಾಗೇನ. ಮಗ್ಗಂ ವಾರಬ್ಭ ಮೇಥುನನ್ತಿ ವಚ್ಚಮಗ್ಗಪಸ್ಸಾವಮಗ್ಗಾನಂ ಅಞ್ಞತರಂ ಮಗ್ಗಂ ವಾ ಮೇಥುನಂ ವಾ ಆರಬ್ಭಾತಿ ಅತ್ಥೋ. ಓಭಾಸನ್ತೋತಿ ಅವಭಾಸನ್ತೋ. ಮನುಸ್ಸಿತ್ಥಿನ್ತಿ ವಿಞ್ಞುಂ ಪಟಿಬಲಂ ಸುಭಾಸಿತದುಬ್ಭಾಸಿತಂ ದುಟ್ಠುಲ್ಲಾದುಟ್ಠುಲ್ಲಂ ಸಲ್ಲಕ್ಖಣಸಮತ್ಥಂ ಮನುಸ್ಸಿತ್ಥಿಂ. ಸುಣಮಾನನ್ತಿ ಸುಣನ್ತಿಂ. ಇಮಿನಾ ಪಟಿಬಲಾಯಪಿ ಇತ್ಥಿಯಾ ಅವಿಞ್ಞತ್ತಿಪಥೇ ಠಿತಾಯ ದೂತೇನ ವಾ ಪಣ್ಣೇನ ವಾ ಆರೋಚೇನ್ತಸ್ಸ ದುಟ್ಠುಲ್ಲವಾಚಾಪತ್ತಿ ನ ಹೋತೀತಿ ದೀಪಿತಂ ಹೋತಿ. ಮನುಸ್ಸಿತ್ಥೀ, ಇತ್ಥಿಸಞ್ಞಿತಾ, ದುಟ್ಠುಲ್ಲವಾಚಸ್ಸಾದರಾಗೋ, ತೇನ ರಾಗೇನ ಓಭಾಸನಂ, ತಙ್ಖಣವಿಜಾನನನ್ತಿ ಇಮಾನೇತ್ಥ ಪಞ್ಚ ಅಙ್ಗಾನಿ. ದುಟ್ಠುಲ್ಲವಾಚಸ್ಸಾದಸಿಕ್ಖಾಪದಂ.

೧೩. ಇದಾನಿ ಅತ್ತಕಾಮಪಾರಿಚರಿಯಂ ದಸ್ಸೇತುಂ ‘‘ವಣ್ಣ’’ನ್ತ್ಯಾದಿ ವುತ್ತಂ. ತತ್ಥ ಯೋ ಭಿಕ್ಖು ಅತ್ತನೋ ಕಾಮಪಾರಿಚರಿಯಾಯ ವಣ್ಣಂ ವತ್ವಾ ಮೇಥುನರಾಗೇನ ಇತ್ಥಿಂ ಮೇಥುನಂ ಯಾಚಮಾನೋ ಗರುಂ ಫುಸೇತಿ ಸಮ್ಬನ್ಧೋ. ವಣ್ಣಂ ವತ್ವಾತಿ ಗುಣಂ ಆನಿಸಂಸಂ ಪಕಾಸೇತ್ವಾ. ಅತ್ತನೋಕಾಮಪಾರಿಚರಿಯಾಯಾತಿ ಮೇಥುನಧಮ್ಮಸಙ್ಖಾತೇನ ಕಾಮೇನ ಪಾರಿಚರಿಯಾ ಕಾಮಪಾರಿಚರಿಯಾ, ಅತ್ತನೋ ಅತ್ಥಾಯ ಕಾಮಪಾರಿಚರಿಯಾ ಅತ್ತನೋಕಾಮಪಾರಿಚರಿಯಾ, ಅಲುತ್ತಸಮಾಸೋಯಂ. ಅಥ ವಾ ಅತ್ತನೋತಿ ಕತ್ವತ್ಥೇ ಸಾಮಿವಚನಂ, ಅತ್ತನೋ ಕಾಮಿತಾ ಇಚ್ಛಿತಾತಿ ಅತ್ತನೋಕಾಮಾ, ಸಯಂ ಮೇಥುನರಾಗವಸೇನ ಪತ್ಥಿತಾತಿ ಅತ್ಥೋ, ಅತ್ತನೋಕಾಮಾ ಚ ಸಾ ಪಾರಿಚರಿಯಾ ಚಾತಿ ಅತ್ತನೋಕಾಮಪಾರಿಚರಿಯಾ, ತಾಯ ಅತ್ತನೋಕಾಮಪಾರಿಚರಿಯಾಯ, ‘‘ಏತದಗ್ಗಂ, ಭಗಿನಿ, ಪಾರಿಚರಿಯಾನಂ, ಯಾ ಮಾದಿಸಂ ಸೀಲವನ್ತಂ ಕಲ್ಯಾಣಧಮ್ಮಂ ಬ್ರಹ್ಮಚಾರಿಂ ಏತೇನ ಧಮ್ಮೇನ ಪರಿಚರೇಯ್ಯಾ’’ತಿ ಏವಂ ವಣ್ಣಂ ವತ್ವಾತಿ ಅತ್ಥೋ. ಯಾಚಧಾತುನೋ ದ್ವಿಕಮ್ಮಿಕತ್ತಾ ‘‘ಇತ್ಥಿಂ ಮೇಥುನಂ ಯಾಚಮಾನೋ’’ತಿ ವುತ್ತಂ. ತತ್ಥ ಇತ್ಥಿನ್ತಿ ದುಟ್ಠುಲ್ಲೋಭಾಸನೇ ವುತ್ತಪ್ಪಕಾರಂ ಇತ್ಥಿಂ. ಮನುಸ್ಸಿತ್ಥೀ, ಇತ್ಥಿಸಞ್ಞಿತಾ, ಅತ್ತಕಾಮಪಾರಿಚರಿಯಾಯ ರಾಗೋ, ತೇನ ರಾಗೇನ ವಣ್ಣಭಣನಂ, ತಙ್ಖಣವಿಜಾನನನ್ತಿ ಇಮಾನೇತ್ಥ ಪಞ್ಚ ಅಙ್ಗಾನಿ. ಅತ್ತಕಾಮಪಾರಿಚರಿಯಸಿಕ್ಖಾಪದಂ.

೧೪. ಇದಾನಿ ಸಞ್ಚರಿತ್ತಂ ದಸ್ಸೇತುಂ ‘‘ಸನ್ದೇಸ’’ನ್ತ್ಯಾದಿಮಾರದ್ಧಂ. ತತ್ಥ ಭಿಕ್ಖು ಪುರಿಸಸ್ಸ ವಾ ಸನ್ದೇಸಂ, ಇತ್ಥಿಯಾ ವಾ ಸನ್ದೇಸಂ ಪಟಿಗ್ಗಹೇತ್ವಾ ವೀಮಂಸಿತ್ವಾ ಪಚ್ಚಾಹರನ್ತೋ ಗರುಕಂ ಫುಸೇತಿ ಸಮ್ಬನ್ಧೋ. ತತ್ಥ ಸನ್ದೇಸನ್ತಿ ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಮಾತುರಕ್ಖಿತಂ ಬ್ರೂಹಿ ‘ಹೋಹಿ ಕಿರ ಇತ್ಥನ್ನಾಮಸ್ಸ ಭರಿಯಾ ಧನಕ್ಕೀತಾ’’ತಿ (ಪಾರಾ. ೩೦೫) ಏವಂ ವುತ್ತಂ ಪುರಿಸಸ್ಸ ಸಾಸನಂ, ‘‘ಗಚ್ಛ, ಭನ್ತೇ, ಇತ್ಥನ್ನಾಮಂ ಪುರಿಸಂ ಬ್ರೂಹಿ ‘ಅಹಂ ತಸ್ಸ ಭರಿಯಾ ಭವಿಸ್ಸಾಮೀ’’ತಿ (ಪಾರಾ. ೩೨೬-೩೨೭ ಥೋಕಂ ವಿಸದಿಸಂ) ಏವಂ ವುತ್ತಂ ಇತ್ಥಿಯಾ ಸಾಸನಂ. ಪಟಿಗ್ಗಣ್ಹಿತ್ವಾತಿ ‘‘ಸಾಧು ಉಪಾಸಕಾ’’ತಿ ವಾ ‘‘ಹೋತೂ’’ತಿ ವಾ ‘‘ಆರೋಚೇಸ್ಸಾಮೀ’’ತಿ ವಾ ಯೇನ ಕೇನಚಿ ಆಕಾರೇನ ವಚೀಭೇದಂ ಕತ್ವಾ ವಾ ಸೀಸಕಮ್ಪನಾದೀಹಿ ವಾ ಪಟಿಗ್ಗಣ್ಹಿತ್ವಾ ಸಮ್ಪಟಿಚ್ಛಿತ್ವಾತಿ ಅತ್ಥೋ. ವೀಮಂಸಿತ್ವಾತಿ ವುತ್ತಪ್ಪಕಾರೇನ ಸಾಸನಂ ಗಹೇತ್ವಾ ಪುರಿಸಸ್ಸ ವಾ ಇತ್ಥಿಯಾ ವಾ ತೇಸಂ ಅವಸ್ಸಾರೋಚನಕಾನಂ ಮಾತಾಪಿತಾಭಾತಾಭಗಿನಿಆದೀನಂ ವಾ ಆರೋಚೇತ್ವಾತಿ ಅತ್ಥೋ. ಹರಂಪಚ್ಚಾತಿ ಏತ್ಥ ‘‘ಪಚ್ಚಾಹರ’’ನ್ತಿ ವತ್ತಬ್ಬೇ ಛನ್ದಹಾನಿಭಯಾ ಹರ-ಸದ್ದಂ ಪುಬ್ಬನಿಪಾತಂ ಕತ್ವಾ ವುತ್ತನ್ತಿ ದಟ್ಠಬ್ಬಂ. ಯತ್ಥ ಪಹಿತೇನ ತತ್ಥ ಗನ್ತ್ವಾ ತೇನ ಆರೋಚಿತಾ ಸಾ ಇತ್ಥೀ ‘‘ಸಾಧೂ’’ತಿ ಸಮ್ಪಟಿಚ್ಛತು ವಾ ಪಟಿಕ್ಖಿಪತು ವಾ ಲಜ್ಜಾಯ ವಾ ತುಣ್ಹೀ ಹೋತು, ಪುನ ಆಗನ್ತ್ವಾ ತಸ್ಸ ಪುರಿಸಸ್ಸ ಹರನ್ತೋ ಏತ್ತಾವತಾ ಇಮಾಯ ಪಟಿಗ್ಗಹಣಾರೋಚನಪ್ಪಚ್ಚಾಹರಣಸಙ್ಖಾತಾಯ ತಿವಙ್ಗಸಮ್ಪತ್ತಿಯಾ ಸೋ ಭಿಕ್ಖು ಸಙ್ಘಾದಿಸೇಸಂ ಆಪಜ್ಜೇಯ್ಯಾತಿ ಅತ್ಥೋ. ತೇಸಂ ಮನುಸ್ಸಜಾತಿಕತಾ, ಅಲಂವಚನೀಯತಾ, ಪಟಿಗ್ಗಣ್ಹನವೀಮಂಸನಪ್ಪಚ್ಚಾಹರಣಾನೀತಿ ಇಮಾನೇತ್ಥ ಪಞ್ಚ ಅಙ್ಗಾನಿ. ಸಞ್ಚರಿತ್ತಸಿಕ್ಖಾಪದಂ.

೧೫. ಇದಾನಿ ಅಮೂಲಕಂ ಪಕಾಸೇತುಂ ‘‘ಚಾವೇತುಕಾಮೋ’’ತಿಆದಿಮಾರದ್ಧಂ. ಚಾವೇತುಕಾಮೋ ಭಿಕ್ಖು ಅಮೂಲನ್ತಿಮವತ್ಥುನಾ ಅಞ್ಞಂ ಸುಣಮಾನಂ ಭಿಕ್ಖುಂ ಚೋದೇನ್ತೋ ವಾ ಚೋದಾಪೇನ್ತೋ ವಾ ಗರುಂ ಫುಸೇತಿ ಸಮ್ಬನ್ಧೋ. ತತ್ಥ ಚಾವೇತುಕಾಮೋತಿ ಬ್ರಹ್ಮಚರಿಯಾ ಚಾವೇತುಕಾಮೋ. ಚೋದೇನ್ತೋತಿ ‘‘ತ್ವಂ ಪಾರಾಜಿಕಂ ಧಮ್ಮಂ ಆಪನ್ನೋಸಿ, ಅಸ್ಸಮಣೋಸಿ, ಅಸಕ್ಯಪುತ್ತಿಯೋಸೀ’’ತಿಆದೀಹಿ ವಚನೇಹಿ ಸಯಂ ಚೋದೇನ್ತೋತಿ ಅತ್ಥೋ. ಏವಂ ಚೋದೇನ್ತಸ್ಸ ವಾಚಾಯ ವಾಚಾಯ ಸಙ್ಘಾದಿಸೇಸೋ. ಅಮೂಲನ್ತಿಮವತ್ಥುನಾತಿ ಯಂ ಚೋದಕೇನ ಚುದಿತಕಮ್ಹಿ ಪುಗ್ಗಲೇ ಅದಿಟ್ಠಂ ಅಸುತಂ ಅಪರಿಸಙ್ಕಿತಂ, ಇದಂ ಏತೇಸಂ ದಸ್ಸನಸವನಪರಿಸಙ್ಕಿತಸಙ್ಖಾತಾನಂ ಮೂಲಾನಂ ಅಭಾವತೋ ನಾಸ್ಸ ಮೂಲನ್ತಿ ಅಮೂಲಂ, ಅನ್ತಿಮಂ ವತ್ಥು ಯಸ್ಸ ಪಾರಾಜಿಕಸ್ಸ ತದಿದಂ ಅನ್ತಿಮವತ್ಥು, ಅಮೂಲಞ್ಚ ತಂ ಅನ್ತಿಮವತ್ಥು ಚೇತಿ ಅಮೂಲನ್ತಿಮವತ್ಥು, ತೇನ ಅಮೂಲನ್ತಿಮವತ್ಥುನಾ, ಭಿಕ್ಖುನೋ ಅನುರೂಪೇಸು ಏಕೂನವೀಸತಿಯಾ ಪಾರಾಜಿಕೇಸು ಅಞ್ಞತರೇನಾತಿ ಅತ್ಥೋ. ಚೋದಾಪಯನ್ತಿ ಚೋದಾಪಯನ್ತೋ, ತಸ್ಸ ಸಮೀಪೇ ಠತ್ವಾ ಅಞ್ಞಂ ಭಿಕ್ಖುಂ ಆಣಾಪೇತ್ವಾ ಚೋದಾಪೇನ್ತೋ ತಸ್ಸ ಆಣತ್ತಸ್ಸ ವಾಚಾಯ ವಾಚಾಯ ಗರುಂ ಫುಸೇತಿ ಅತ್ಥೋ. ಸುಣಮಾನನ್ತಿ ಇಮಿನಾ ಪರಮ್ಮುಖಾ ದೂತೇನ ವಾ ಪಣ್ಣೇನ ವಾ ಚೋದೇನ್ತಸ್ಸ ನ ರುಹತೀತಿ ದೀಪಿತಂ ಹೋತಿ. ಪರಮ್ಮುಖಾ ಪನ ಸತ್ತಹಿ ಆಪತ್ತಿಕ್ಖನ್ಧೇಹಿ ವದನ್ತಸ್ಸ ದುಕ್ಕಟಂ. ಯಂ ಚೋದೇತಿ, ತಸ್ಸ ಉಪಸಮ್ಪನ್ನೋತಿ ಸಙ್ಖ್ಯೂಪಗಮನಂ, ತಸ್ಮಿಂ ಸುದ್ಧಸಞ್ಞಿತಾ, ಯೇನ ಪಾರಾಜಿಕೇನ ಚೋದೇತಿ, ತಸ್ಸ ದಿಟ್ಠಾದಿವಸೇನ ಅಮೂಲಕತಾ, ಚಾವನಾಧಿಪ್ಪಾಯೇನ ಸಮ್ಮುಖಾ ಚೋದನಾ, ತಸ್ಸ ತಙ್ಖಣವಿಜಾನನನ್ತಿ ಇಮಾನೇತ್ಥ ಪಞ್ಚ ಅಙ್ಗಾನಿ. ಅಮೂಲಕಸಿಕ್ಖಾಪದಂ.

೧೬. ಇದಾನಿ ಅಞ್ಞಭಾಗಿಯಂ ದಸ್ಸೇತುಂ ‘‘ಲೇಸಮತ್ತ’’ನ್ತಿಆದಿಮಾಹ. ತತ್ಥ ಲೇಸಮತ್ತಮುಪಾದಾಯಾತಿ ಜಾತಿನಾಮಗೋತ್ತಲಿಙ್ಗಾಪತ್ತಿಪತ್ತಚೀವರೂಪಜ್ಝಾಯಾಚರಿಯಸೇನಾಸನಲೇಸಸಙ್ಖಾತೇಸು ದಸಸು ಲೇಸೇಸು ಯೋ ತಸ್ಮಿಂ ಪುಗ್ಗಲೇ ದಿಸ್ಸತಿ, ತಂ ಲೇಸಮತ್ತಂ ಉಪಾದಾಯ ನಿಸ್ಸಾಯ ಭಿಕ್ಖುಂ ಬ್ರಹ್ಮಚರಿಯಾ ಚಾವೇತುಕಾಮೋ ಅಮೂಲನ್ತಿಮವತ್ಥುನಾ ಸುಣಮಾನಂ ಭಿಕ್ಖುಂ ಚೋದೇನ್ತೋ ಗರುಂ ಫುಸೇತಿ ಅತ್ಥೋ. ಕಥಂ? ಅಞ್ಞೋ ಖತ್ತಿಯಜಾತಿಕೋ ಇಮಿನಾ ಚೋದಕೇನ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ ದಿಟ್ಠೋ ಹೋತಿ, ಸೋ ಅಞ್ಞಂ ಅತ್ತನೋ ವೇರಿಂ ಖತ್ತಿಯಜಾತಿಕಂ ಭಿಕ್ಖುಂ ಪಸ್ಸಿತ್ವಾ ತಂ ಖತ್ತಿಯಜಾತಿಲೇಸಂ ಗಹೇತ್ವಾ ಏವಂ ‘‘ಖತ್ತಿಯೋ ಮಯಾ ದಿಟ್ಠೋ ಪಾರಾಜಿಕಂ ಧಮ್ಮಂ ಅಜ್ಝಾಪಜ್ಜನ್ತೋ, ತ್ವಂ ಖತ್ತಿಯೋ ಪಾರಾಜಿಕಂ ಧಮ್ಮಂ ಆಪನ್ನೋಸೀ’’ತಿ ವಾ ‘‘ತ್ವಂ ಸೋ ಖತ್ತಿಯೋ, ನಾಞ್ಞೋ, ಪಾರಾಜಿಕಂ ಧಮ್ಮಂ ಅಜ್ಝಾಪನ್ನೋಸೀ’’ತಿ ವಾ ಚೋದೇತಿ, ಏವಂ ನಾಮಲೇಸಾದಯೋಪಿ ವೇದಿತಬ್ಬಾ. ಅಙ್ಗಾನಿ ಪನೇತ್ಥ ಅನನ್ತರಸದಿಸಾನಿ. ಅಞ್ಞಭಾಗಿಯಸಿಕ್ಖಾಪದಂ.

ಗರುಕಾಪತ್ತಿನಿದ್ದೇಸವಣ್ಣನಾ ನಿಟ್ಠಿತಾ.