೨೩. ಅನೋಲೋಕಿಯನಿದ್ದೇಸವಣ್ಣನಾ

೧೮೧. ಸಾರತ್ತೋತಿ ಸಂರತ್ತೋ, ಸಞ್ಜಾತರಾಗಚಿತ್ತೋತಿ ಅತ್ಥೋ. ಇತ್ಥಿಯಾತಿ ತದಹುಜಾತಾಯಪಿ ಪಟಸತನಿವತ್ಥಾಯ ಅನೋಕಾಸುಪನಿಜ್ಝಾಯನೇ ಅನ್ತಮಸೋ ತಿರಚ್ಛಾನಗತಾನಮ್ಪಿ ದುಕ್ಕಟಮೇವ. ಭಿಕ್ಖಾದಾಯಿಯಾತಿ ಉಪಲಕ್ಖಣಮತ್ತಂ, ಇತ್ಥೀ ವಾ ಹೋತು ಪುರಿಸೋ ವಾ, ಭಿಕ್ಖಾದಾನಸಮಯೇ ಅಸಾರತ್ತೇನಾಪಿ ಮುಖಂ ನ ಉಲ್ಲೋಕೇತಬ್ಬಂ. ಉಜ್ಝಾನಂ ಲಾಮಕತೋ ಸಂಚಿನ್ತನಂ, ಕೋಪೋ, ತತ್ಥ ಸಞ್ಞಾ ಅಸ್ಸಾತಿ ಉಜ್ಝಾನಸಞ್ಞೀ. ಇಧ ಪನ ಗಿಲಾನೋಪಿ ನ ಮುಚ್ಚತಿ. ಆದಾಸೇ ಉದಕಪತ್ತೇತಿ ಇಮಿನಾ ಸೇಸೇಸು ಕಂಸಪತ್ತಾದೀಸು ಕಞ್ಜಿಯಾದೀಸು ಚ ಮುಖನಿಮಿತ್ತಂ ಪಞ್ಞಾಯತಿ, ತೇಸಂ ಸಙ್ಗಹೋ. ‘‘ಸಞ್ಛವಿ ನು ಖೋ ಮೇ ವಣ್ಣೋ, ನೋ, ಜಿಣ್ಣೋ ನು ಖೋಮ್ಹಿ, ನೋ’’ತಿ ಪನ ಓಲೋಕೇತುಂ ವಟ್ಟತಿ. ಅಸ್ಸಾತಿ ಭಿಕ್ಖುನೋ.

ಅನೋಲೋಕಿಯನಿದ್ದೇಸವಣ್ಣನಾ ನಿಟ್ಠಿತಾ.