೧೦. ಅಕಪ್ಪಿಯಮಂಸನಿದ್ದೇಸವಣ್ಣನಾ

೧೧೩. ಇದಾನಿ ಮಂಸೇಸು ಪಟಿಪಜ್ಜಿತಬ್ಬಾಕಾರಂ ದಸ್ಸೇತುಂ ‘‘ಮಂಸೇಸು ಚ ಅಕಪ್ಪಿಯ’’ನ್ತಿ ಉದ್ಧಟಂ. ಅಕಪ್ಪಿಯಮಂಸಮ್ಹಿ ದಸ್ಸಿತೇ ಕಪ್ಪಿಯಮಂಸಂ ದಸ್ಸಿತಮೇವ ಹೋತಿ ಪಾರಿಸೇಸನಯೇನ. ಉರಗಸ್ಸ ಚಾತಿ ಏತ್ಥ ಸಬ್ಬೋಪಿ ಉರಗೋ ನ ಕಪ್ಪತಿ.

೧೧೪. ಏತ್ತಾವತಾ ಜಾತಿವಸೇನ ದಸವಿಧಮ್ಪಿ ಅಕಪ್ಪಿಯಮಂಸಂ ದಸ್ಸೇತ್ವಾ ಇದಾನಿ ಕಪ್ಪಿಯಮಂಸೇಸುಪಿ ಅಕಪ್ಪಿಯವಿಧಿಂ ದಸ್ಸೇತುಂ ‘‘ಉದ್ದಿಸ್ಸಕತಮಂಸಞ್ಚ, ಯಞ್ಚ ಅಪ್ಪಟಿವೇಕ್ಖಿತ’’ನ್ತಿ ವುತ್ತಂ. ತತ್ಥ ಪಞ್ಚಸು ಸಹಧಮ್ಮಿಕೇಸು ಯಸ್ಸ ಕಸ್ಸಚಿ ಯಂ ಕಿಞ್ಚಿ ಉದ್ದಿಸ್ಸ ಕತಂ ಉದ್ದಿಸ್ಸಕತಂ ನಾಮ, ತಂ ಪನ ಜಾನಿತ್ವಾ ಪರಿಭುಞ್ಜಿತುಂ ಸಬ್ಬೇಸಮ್ಪಿ ನ ವಟ್ಟತಿ, ಅಜಾನನ್ತಾನಂ ಅನಾಪತ್ತಿ. ಮಚ್ಛೇಸುಪಿ ಏಸೇವ ನಯೋ. ಅಪ್ಪಟಿವೇಕ್ಖಿತನ್ತಿ ಅನುಪಪರಿಕ್ಖಿತಂ, ಅನಾಪುಚ್ಛಿತನ್ತಿ ಅತ್ಥೋ. ‘‘ನ ಭಿಕ್ಖವೇ ಅಪ್ಪಟಿವೇಕ್ಖಿತ್ವಾ ಮಂಸಂ ಪರಿಭುಞ್ಜಿತಬ್ಬಂ, ಯೋ ಪರಿಭುಞ್ಜೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ (ಮಹಾವ. ೨೮೧) ವುತ್ತಂ. ಮಚ್ಛೇಸು ಪನ ಆಪುಚ್ಛನಕಿಚ್ಚಂ ನತ್ಥಿ ಅಕಪ್ಪಿಯಮಚ್ಛಾನಂ ನತ್ಥಿತಾಯಾತಿ ವದನ್ತಿ. ಇದಾನಿ ಏತೇಸು ಆಪತ್ತಿಭೇದಂ ದಸ್ಸೇತುಂ ‘‘ಥುಲ್ಲಚ್ಚಯ’’ನ್ತಿಆದಿಮಾಹ. ತಂ ಸಬ್ಬಂ (ಕಙ್ಖಾ. ಅಟ್ಠ. ಸನ್ನಿಧಿಕಾರಕಸಿಕ್ಖಾಪದವಣ್ಣನಾ) ಉತ್ತಾನಮೇವ.

೧೧೫. ಇದಾನಿ ನ ಕೇವಲಂ ಇಮೇಸಂ ಮನುಸ್ಸಾದೀನಂ ಮಂಸಮೇವ ಅಕಪ್ಪಿಯಂ, ಅಟ್ಠಿಆದೀನಿಪಿ ಅಕಪ್ಪಿಯಾನೀತಿ ದಸ್ಸೇತುಂ ‘‘ಅಟ್ಠೀಪೀ’’ತಿಆದಿ ವುತ್ತಂ. ತತ್ಥ (ಮಹಾವ. ಅಟ್ಠ ೨೮೧) ಲೋಮಮ್ಪೇಸನ್ತಿ ಲೋಮಮ್ಪಿ ಏಸಂ ಅಕಪ್ಪಿಯಮಂಸವತ್ಥೂನನ್ತಿ ಅತ್ಥೋ. ಸಚಿತ್ತಕಂ ವಾತಿ ಏತೇಸು ಪನ ಉದ್ದಿಸ್ಸಕತಮೇವ ಸಚಿತ್ತಕಂ, ಸೇಸಾ ಅಚಿತ್ತಕಾತಿ. ಅಕಪ್ಪಿಯಮಂಸವಿನಿಚ್ಛಯೋ.

ಅಕಪ್ಪಿಯಮಂಸನಿದ್ದೇಸವಣ್ಣನಾ ನಿಟ್ಠಿತಾ.