೭. ಪವಾರಣಾನಿದ್ದೇಸೋ

ಪವಾರಣಾತಿ –

೭೩. ಯೇನೀರಿಯಾಪಥೇನಾಯಂ, ಭುಞ್ಜಮಾನೋ ಪವಾರಿತೋ;

ತತೋ ಅಞ್ಞೇನ ಭುಞ್ಜೇಯ್ಯ, ಪಾಚಿತ್ತಿನತಿರಿತ್ತಕಂ.

೭೪. ಅಸನಂ ಭೋಜನಞ್ಚೇವ, ಅಭಿಹಾರೋ ಸಮೀಪತಾ;

ಕಾಯವಾಚಾಪಟಿಕ್ಖೇಪೋ, ಪಞ್ಚಅಙ್ಗಾ ಪವಾರಣಾ.

೭೫. ಓದನೋ ಸತ್ತು ಕುಮ್ಮಾಸೋ, ಮಚ್ಛೋ ಮಂಸಞ್ಚ ಭೋಜನಂ;

ಸಾಲಿ ವೀಹಿ ಯವೋ ಕಙ್ಗು, ಕುದ್ರೂಸವರಗೋಧುಮಾ;

ಸತ್ತನ್ನಮೇಸಂ ಧಞ್ಞಾನಂ, ಓದನೋ ಭೋಜ್ಜಯಾಗು ಚ.

೭೬. ಸಾಮಾಕಾದಿತಿಣಂ ಕುದ್ರೂಸಕೇ ವರಕಚೋರಕೋ;

ವರಕೇ ಸಾಲಿಯಞ್ಚೇವ, ನೀವಾರೋ ಸಙ್ಗಹಂ ಗತೋ.

೭೭. ಭಟ್ಠಧಞ್ಞಮಯೋ ಸತ್ತು, ಕುಮ್ಮಾಸೋ ಯವಸಮ್ಭವೋ;

ಮಂಸೋ ಚ ಕಪ್ಪಿಯೋ ವುತ್ತೋ, ಮಚ್ಛೋ ಉದಕಸಮ್ಭವೋ.

೭೮. ಭುಞ್ಜನ್ತೋ ಭೋಜನಂ ಕಪ್ಪ-ಮಕಪ್ಪಂ ವಾ ನಿಸೇಧಯಂ;

ಪವಾರೇಯ್ಯಾಭಿಹಟಂ ಕಪ್ಪಂ, ತನ್ನಾಮೇನ ಇಮನ್ತಿ ವಾ.

೭೯. ಲಾಜಾ ತಂಸತ್ತುಭತ್ತಾನಿ, ಗೋರಸೋ ಸುದ್ಧಖಜ್ಜಕೋ;

ತಣ್ಡುಲಾ ಭಟ್ಠಪಿಟ್ಠಞ್ಚ, ಪುಥುಕಾ ವೇಳುಆದಿನಂ.

೮೦. ಭತ್ತಂ ವುತ್ತಾವಸೇಸಾನಂ, ರಸಯಾಗು ರಸೋಪಿ ಚ;

ಸುದ್ಧಯಾಗುಫಲಾದೀನಿ, ನ ಜನೇನ್ತಿ ಪವಾರಣಂ.

೮೧. ಪವಾರಿತೇನ ವುಟ್ಠಾಯ, ಅಭುತ್ತೇನ ಚ ಭೋಜನಂ;

ಅತಿರಿತ್ತಂ ನ ಕಾತಬ್ಬಂ, ಯೇನ ಯಂ ವಾ ಪುರೇ ಕತಂ.

೮೨. ಕಪ್ಪಿಯಂ ಗಹಿತಞ್ಚೇವು-ಚ್ಚಾರಿತಂ ಹತ್ಥಪಾಸಗಂ;

ಅತಿರಿತ್ತಂ ಕರೋನ್ತೇವಂ, ‘‘ಅಲಮೇತ’’ನ್ತಿ ಭಾಸತು.

೮೩. ನ ಕರೇನುಪಸಮ್ಪನ್ನ-ಹತ್ಥಗಂ ಪೇಸಯಿತ್ವಾಪಿ;

ಕಾರೇತುಂ ಲಬ್ಭತೇ ಸಬ್ಬೋ, ಭುಞ್ಜಿತುಂ ತಮಕಾರಕೋತಿ.