೮. ಕಾಲಿಕನಿದ್ದೇಸೋ

ಕಾಲಿಕಾ ಚಾತಿ –

೮೪. ಪಟಿಗ್ಗಹಿತಾ ಚತ್ತಾರೋ, ಕಾಲಿಕಾ ಯಾವಕಾಲಿಕಂ;

ಯಾಮಕಾಲಿಕಂ ಸತ್ತಾಹ-ಕಾಲಿಕಂ ಯಾವಜೀವಿಕಂ.

೮೫. ಪಿಟ್ಠಂ ಮೂಲಂ ಫಲಂ ಖಜ್ಜಂ, ಗೋರಸೋ ಧಞ್ಞಭೋಜನಂ;

ಯಾಗುಸೂಪಪ್ಪಭುತಯೋ, ಹೋನ್ತೇತೇ ಯಾವಕಾಲಿಕಾ.

೮೬. ಮಧುಮುದ್ದಿಕಸಾಲೂಕ-ಚೋಚಮೋಚಮ್ಬಜಮ್ಬುಜಂ;

ಫಾರುಸಂ ನಗ್ಗಿಸನ್ತತ್ತಂ, ಪಾನಕಂ ಯಾಮಕಾಲಿಕಂ.

೮೭. ಸಾನುಲೋಮಾನಿ ಧಞ್ಞಾನಿ, ಠಪೇತ್ವಾ ಫಲಜೋ ರಸೋ;

ಮಧೂಕಪುಪ್ಫಮಞ್ಞತ್ರ, ಸಬ್ಬೋ ಪುಪ್ಫರಸೋಪಿ ಚ.

೮೮. ಸಬ್ಬಪತ್ತರಸೋ ಚೇವ, ಠಪೇತ್ವಾ ಪಕ್ಕಡಾಕಜಂ;

ಸೀತೋದಮದ್ದಿತೋದಿಚ್ಚ-ಪಾಕೋ ವಾ ಯಾಮಕಾಲಿಕೋ.

೮೯. ಸಪ್ಪಿನೋನೀತತೇಲಾನಿ, ಮಧುಫಾಣಿತಮೇವ ಚ;

ಸತ್ತಾಹಕಾಲಿಕಾ ಸಪ್ಪಿ, ಯೇಸಂ ಮಂಸಮವಾರಿತಂ.

೯೦. ತೇಲಂ ತಿಲವಸೇರಣ್ಡ-ಮಧುಸಾಸಪಸಮ್ಭವಂ;

ಖುದ್ದಾಭಮರಮಧುಕರಿ-ಮಕ್ಖಿಕಾಹಿ ಕತಂ ಮಧು;

ರಸಾದಿಉಚ್ಛುವಿಕತಿ, ಪಕ್ಕಾಪಕ್ಕಾ ಚ ಫಾಣಿತಂ.

೯೧. ಸವತ್ಥುಪಕ್ಕಾ ಸಾಮಂ ವಾ, ವಸಾ ಕಾಲೇ ಅಮಾನುಸಾ;

ಅಞ್ಞೇಸಂ ನ ಪಚೇ ವತ್ಥುಂ, ಯಾವಕಾಲಿಕವತ್ಥುನಂ.

೯೨. ಹಲಿದ್ದಿಂ ಸಿಙ್ಗಿವೇರಞ್ಚ, ವಚತ್ತಂ ಲಸುಣಂ ವಚಾ;

ಉಸೀರಂ ಭದ್ದಮುತ್ತಞ್ಚಾತಿವಿಸಾ ಕಟುರೋಹಿಣೀ;

ಪಞ್ಚಮೂಲಾದಿಕಞ್ಚಾಪಿ, ಮೂಲಂ ತಂ ಯಾವಜೀವಿಕಂ.

೯೩. ಬಿಳಙ್ಗಂ ಮರಿಚಂ ಗೋಟ್ಠ-ಫಲಂ ಪಿಪ್ಫಲಿ ರಾಜಿಕಾ;

ತಿಫಲೇರಣ್ಡಕಾದೀನಂ, ಫಲಂ ತಂ ಯಾವಜೀವಿಕಂ.

೯೪. ಕಪ್ಪಾಸನಿಮ್ಬಕುಟಜಪಟೋಲಸುಲಸಾದಿನಂ;

ಸೂಪೇಯ್ಯಪಣ್ಣಂ ವಜ್ಜೇತ್ವಾ, ಪಣ್ಣಂ ತಂ ಯಾವಜೀವಿಕಂ.

೯೫. ಠಪೇತ್ವಾ ಉಚ್ಛುನಿಯ್ಯಾಸಂ,

ಸರಸಂ ಉಚ್ಛುಜಂ ತಚಂ;

ನಿಯ್ಯಾಸೋ ಚ ತಚೋ ಸಬ್ಬೋ,

ಲೋಣಂ ಲೋಹಂ ಸಿಲಾ ತಥಾ.

೯೬. ಸುದ್ಧಸಿತ್ಥಞ್ಚ ಸೇವಾಲೋ, ಯಞ್ಚ ಕಿಞ್ಚಿ ಸುಝಾಪಿತಂ;

ವಿಕಟಾದಿಪ್ಪಭೇದಞ್ಚ, ಞಾತಬ್ಬಂ ಯಾವಜೀವಿಕಂ.

೯೭. ಮೂಲಂ ಸಾರಂ ತಚೋ ಫೇಗ್ಗು, ಪಣ್ಣಂ ಪುಪ್ಫಂ ಫಲಂ ಲತಾ;

ಆಹಾರತ್ಥ ಮಸಾಧೇನ್ತಂ, ಸಬ್ಬಂ ತಂ ಯಾವಜೀವಿಕಂ.

೯೮. ಸಬ್ಬಕಾಲಿಕಸಮ್ಭೋಗೋ, ಕಾಲೇ ಸಬ್ಬಸ್ಸ ಕಪ್ಪತಿ;

ಸತಿ ಪಚ್ಚಯೇ ವಿಕಾಲೇ, ಕಪ್ಪತೇ ಕಾಲಿಕತ್ತಯಂ.

೯೯. ಕಾಲಯಾಮಮತಿಕ್ಕನ್ತಾ, ಪಾಚಿತ್ತಿಂ ಜನಯನ್ತುಭೋ;

ಜನಯನ್ತಿ ಉಭೋಪೇತೇ, ಅನ್ತೋವುತ್ಥಞ್ಚ ಸನ್ನಿಧಿಂ.

೧೦೦. ಸತ್ತಾಹಕಾಲಿಕೇ ಸತ್ತ, ಅಹಾನಿ ಅತಿನಾಮಿತೇ;

ಪಾಚಿತ್ತಿ ಪಾಳಿನಾರುಳ್ಹೇ, ಸಪ್ಪಿಆದಿಮ್ಹಿ ದುಕ್ಕಟಂ.

೧೦೧. ನಿಸ್ಸಟ್ಠಲದ್ಧಂ ಮಕ್ಖೇಯ್ಯ, ನಙ್ಗಂ ನಜ್ಝೋಹರೇಯ್ಯ ಚ;

ವಿಕಪ್ಪೇನ್ತಸ್ಸ ಸತ್ತಾಹೇ, ಸಾಮಣೇರಸ್ಸಧಿಟ್ಠತೋ;

ಮಕ್ಖನಾದಿಞ್ಚ ನಾಪತ್ತಿ, ಅಞ್ಞಸ್ಸ ದದತೋಪಿ ಚ.

೧೦೨. ಯಾವಕಾಲಿಕಆದೀನಿ, ಸಂಸಟ್ಠಾನಿ ಸಹತ್ತನಾ;

ಗಾಹಾಪಯನ್ತಿ ಸಬ್ಭಾವಂ, ತಸ್ಮಾ ಏವಮುದೀರಿತಂ.

೧೦೩. ಪುರೇ ಪಟಿಗ್ಗಹಿತಞ್ಚ, ಸತ್ತಾಹಂ ಯಾವಜೀವಿಕಂ;

ಸೇಸಕಾಲಿಕಸಮ್ಮಿಸ್ಸಂ, ಪಾಚಿತ್ತಿ ಪರಿಭುಞ್ಜತೋ.

೧೦೪. ಯಾವಕಾಲಿಕಸಮ್ಮಿಸ್ಸಂ, ಇತರಂ ಕಾಲಿಕತ್ತಯಂ;

ಪಟಿಗ್ಗಹಿತಂ ತದಹು, ತದಹೇವ ಚ ಭುಞ್ಜಯೇ.

೧೦೫. ಯಾಮಕಾಲಿಕಸಮ್ಮಿಸ್ಸಂ, ಸೇಸಮೇವಂ ವಿಜಾನಿಯಂ;

ಸತ್ತಾಹಕಾಲಿಕಮಿಸ್ಸಞ್ಚ, ಸತ್ತಾಹಂ ಕಪ್ಪತೇತರನ್ತಿ.