೫೦. ವಿಪಸ್ಸನಾನಿದ್ದೇಸೋ

ವಿಪಸ್ಸನಾತಿ –

೪೭೧. ನಾಮರೂಪಂ ಪರಿಗ್ಗಯ್ಹ, ತತೋ ತಸ್ಸ ಚ ಪಚ್ಚಯಂ;

ಹುತ್ವಾ ಅಭಾವತೋನಿಚ್ಚಾ, ಉದಯಬ್ಬಯಪೀಳನಾ.

೪೭೨. ದುಕ್ಖಾ ಅವಸವತ್ತಿತ್ತಾ, ಅನತ್ತಾತಿ ತಿಲಕ್ಖಣಂ;

ಆರೋಪೇತ್ವಾನ ಸಙ್ಖಾರೇ, ಸಮ್ಮಸನ್ತೋ ಪುನಪ್ಪುನಂ;

ಪಾಪುಣೇಯ್ಯಾನುಪುಬ್ಬೇನ, ಸಬ್ಬಸಂಯೋಜನಕ್ಖಯನ್ತಿ.

ನಿಗಮನಕಥಾ

೪೭೩. ಅಧಿಸೀಲಾಧಿಚಿತ್ತಾನಂ, ಅಧಿಪಞ್ಞಾಯ ಸಿಕ್ಖನಾ;

ಭಿಕ್ಖುಕಿಚ್ಚಮತೋ ಖುದ್ದಸಿಕ್ಖಾಯಂ ಸಮುದಾಹಟಾ.

೪೭೪. ಮಹತೋ ಕಿತ್ತಿಸದ್ದಸ್ಸ, ಯಸ್ಸ ಲೋಕವಿಚಾರಿನೋ;

ಪರಿಸ್ಸಮೋ ನ ಸಮ್ಭೋತಿ, ಮಾಲುತಸ್ಸೇವ ನಿಚ್ಚಸೋ.

೪೭೫. ತೇನ ಧಮ್ಮಸಿರೀಕೇನ, ತಮ್ಬಪಣ್ಣಿಯಕೇತುನಾ;

ಥೇರೇನ ರಚಿತಾ ಧಮ್ಮವಿನಯಞ್ಞುಪಸಂಸಿತಾ.

೪೭೬. ಏತ್ತಾವತಾಯಂ ನಿಟ್ಠಾನಂ, ಖುದ್ದಸಿಕ್ಖಾ ಉಪಾಗತಾ;

ಪಞ್ಚಮತ್ತೇಹಿ ಗಾಥಾನಂ, ಸತೇಹಿ ಪರಿಮಾಣತೋತಿ.

ಖುದ್ದಸಿಕ್ಖಾ ನಿಟ್ಠಿತಾ.

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ