೪೪. ಉಪೋಸಥನಿದ್ದೇಸೋ

ಉಪೋಸಥೋತಿ –

೪೧೦. ದುವೇ ಉಪೋಸಥಾ ಚಾತು-ದ್ದಸೋ ಪನ್ನರಸೋ ಇತಿ;

ಸುತ್ತುದ್ದೇಸಮಧಿಟ್ಠಾನ-ಪಾರಿಸುದ್ಧಿವಸಾ ತಯೋ.

೪೧೧. ಸುತ್ತುದ್ದೇಸೋವ ಸಙ್ಘಸ್ಸ, ಅಧಿಟ್ಠಾನಉಪೋಸಥೋ;

ಪುಗ್ಗಲಸ್ಸೇವ ಸೇಸಾನಂ, ಪಾರಿಸುದ್ಧಿಉಪೋಸಥೋ.

೪೧೨. ಪುಬ್ಬಕಿಚ್ಚೇ ಚ ಕರಣೇ, ಪತ್ತಕಲ್ಲೇ ಸಮಾನಿತೇ;

ಸುತ್ತಂ ಉದ್ದಿಸತಿ ಸಙ್ಘೋ, ಪಞ್ಚಧಾ ಸೋ ವಿಭಾವಿತೋ.

೪೧೩. ವಿನಾನ್ತರಾಯಂ ಸಙ್ಖೇಪೇ-ನುದ್ದೇಸೋ ವಿನಿವಾರಿತೋ;

‘‘ಥೇರೋವ ಇಸ್ಸರೋ ದ್ವೀಸು, ಉದ್ದೇಸೇಸ್ವೇತ್ಥ ತೀಸು ವಾ;

ವಿಸದೇಸೂ’’ತಿ ವುತ್ತತ್ತಾ, ಅವತ್ತನ್ತೇಪಿ ವಟ್ಟತಿ.

೪೧೪. ಆಗಚ್ಛೇಯ್ಯುಂ ಯದಿ ಸಮಾ, ಉದ್ದಿಸನ್ತೇ ವ ಥೋಕಿಕಾ;

ಉದ್ದಿಟ್ಠಂ ಯಂ ಸುಉದ್ದಿಟ್ಠಂ, ಸೋತಬ್ಬಮವಸೇಸಕಂ.

೪೧೫. ಉದ್ದಿಟ್ಠಮತ್ತೇ ಸಕಲಾ-ಯೇಕಚ್ಚಾಯುಟ್ಠಿತಾಯ ವಾ;

ಪಾರಿಸುದ್ಧಿಂ ಕರೇಯ್ಯೇಸಂ, ಸನ್ತಿಕೇ ಬಹುಕಾಥ ಚೇ;

ಕತ್ವಾ ಸಬ್ಬವಿಕಪ್ಪೇಸು, ಪುಬ್ಬಕಿಚ್ಚಂ ಪುನುದ್ದಿಸೇ.

೪೧೬. ಪನ್ನರಸೋವಾಸಿಕಾನಂ, ಇತರಾನಂ ಸಚೇತರೋ;

ಸಮಾನೇತರೇನುವತ್ತನ್ತು, ಪುರಿಮಾನಂ ಸಚೇಧಿಕಾ;

ಪುರಿಮಾ ಅನುವತ್ತನ್ತು, ತೇಸಂ ಸೇಸೇಪ್ಯಯಂ ನಯೋ.

೪೧೭. ಪಾಟಿಪದೋವಾಸಿಕಾನಂ, ಇತರಾನಂ ಉಪೋಸಥೋ;

ಸಮಥೋಕಾನಂ ಸಾಮಗ್ಗಿಂ, ಮೂಲಟ್ಠಾ ದೇನ್ತು ಕಾಮತೋ.

೪೧೮. ಬಹಿ ಗನ್ತ್ವಾನ ಕಾತಬ್ಬೋ, ನೋ ಚೇ ದೇನ್ತಿ ಉಪೋಸಥೋ;

ದೇಯ್ಯಾನಿಚ್ಛಾಯ ಸಾಮಗ್ಗೀ, ಬಹೂಸು ಬಹಿ ವಾ ವಜೇ.

೪೧೯. ಪಾಟಿಪದೇಗನ್ತುಕಾನಂ, ಏವಮೇವ ಅಯಂ ನಯೋ;

ಸಾವೇಯ್ಯ ಸುತ್ತಂ ಸಞ್ಚಿಚ್ಚ, ಅಸ್ಸಾವೇನ್ತಸ್ಸ ದುಕ್ಕಟಂ.

೪೨೦. ಸಮ್ಮಜ್ಜಿತುಂ ಪದೀಪೇತುಂ, ಪಞ್ಞಾಪೇತುಂ ದಕಾಸನಂ;

ನ ಕರೇಯ್ಯ ತಥಾ ಕಲ್ಲೋ, ಮಹಾಥೇರೇನ ಪೇಸಿತೋ.

೪೨೧. ಸಮ್ಮಜ್ಜಿತ್ವಾ ಪದೀಪೇತ್ವಾ, ಪಟ್ಠಪೇತ್ವಾ ದಕಾಸನಂ. ಗಣಞತ್ತಿಂ ಠಪೇತ್ವೇವಂ, ಕತ್ತಬ್ಬೋ ತೀಹುಪೋಸಥೋ. ‘‘ಸುಣನ್ತು ಮೇ ಆಯಸ್ಮನ್ತಾ, ಅಜ್ಜುಪೋಸಥೋ ಪನ್ನರಸೋ, ಯದಾಯಸ್ಮನ್ತಾನಂ ಪತ್ತಕಲ್ಲಂ, ಮಯಂ ಅಞ್ಞಮಞ್ಞಂ ಪಾರಿಸುದ್ಧಿಉಪೋಸಥಂ ಕರೇಯ್ಯಾಮಾ’’ತಿ.

೪೨೨. ಏಕಂಸಂ ಚೀವರಂ ಕತ್ವಾ, ನಿಸೀದಿತ್ವಾ ಉಕ್ಕುಟಿಕಂ,. ಥೇರೇನ ಅಞ್ಜಲಿಂ ತೇವಂ, ಪಗ್ಗಯ್ಹ ಸಮುದೀರಿಯಾ. ‘‘ಪರಿಸುದ್ಧೋ ಅಹಂ ಆವುಸೋ, ಪರಿಸುದ್ಧೋತಿ ಮಂ ಧಾರೇಥಾ’’ತಿ, ವದೇ ಯಾವತತೀಯಕಂ.

೪೨೩. ಸಮತ್ತಪುಬ್ಬಾರಮ್ಭೇನ, ತೇ ನವೇನೇವಮೀರಿಯಾ. ‘‘ಪರಿಸುದ್ಧೋ ಅಹಂ ಭನ್ತೇ, ಪರಿಸುದ್ಧೋತಿ ಮಂ ಧಾರೇಥಾ’’ತಿ, ವದೇ ಯಾವತತೀಯಕಂ.

೪೨೪. ದ್ವೀಸು ಥೇರೇನ ಕತ್ತಬ್ಬಂ, ಕತ್ವೇವಮೀರಿಯೋ ನವೋ. ‘‘ಪರಿಸುದ್ಧೋ ಅಹಂ ಆವುಸೋ, ಪರಿಸುದ್ಧೋತಿ ಮಂ ಧಾರೇಹೀ’’ತಿ ತಿಕ್ಖತ್ತುಂ ವತ್ತಬ್ಬೋ.

೪೨೫. ನವೇನ ಥೇರೋ ತಿಕ್ಖತ್ತುಂ, ಏವಮಸ್ಸ ಉದೀರಿಯೋ;

‘‘ಪರಿಸುದ್ಧೋ ಅಹಂ ಭನ್ತೇ, ಪರಿಸುದ್ಧೋತಿ ಮಂ ಧಾರೇಥಾ’’ತಿ.

೪೨೬. ಪುಬ್ಬಕಿಚ್ಚಂ ಸಮಾಪೇತ್ವಾ, ಅಧಿಟ್ಠೇಯ್ಯೇವಮೇಕಕೋ. ‘‘ಅಜ್ಜ ಮೇ ಉಪೋಸಥೋ ಪನ್ನರಸೋತಿ ವಾ ಚಾತುದ್ದಸೋತಿ ವಾ ಅಧಿಟ್ಠಾಮೀ’’ತಿ ವತ್ತಬ್ಬಂ, ನೋ ಚೇಧಿಟ್ಠೇಯ್ಯ ದುಕ್ಕಟಂ.

೪೨೭. ಯತ್ಥ ವಸನ್ತಿ ಚತ್ತಾರೋ, ತಯೋ ವಾ ಯದಿ ವಾ ದುವೇ;

ಪಾರಿಸುದ್ಧಿಂ ಹರಿತ್ವಾನ, ಏಕೇಕಸ್ಸಿತರೀತರೇ;

ತಂ ತಂ ಉಪೋಸಥಂ ಕಯಿರುಂ, ಸಿಯಾ ಆಪತ್ತಿ ದುಕ್ಕಟಂ.

೪೨೮. ವಗ್ಗೇ ಸಮಗ್ಗೇ ವಗ್ಗೋತಿ, ಸಞ್ಞಿನೋ ವಿಮತಿಸ್ಸ ವಾ;

ದುಕ್ಕಟಂ ಕರೋತೋ ಭೇದಾ-ಧಿಪ್ಪಾಯೇನ ಥುಲ್ಲಚ್ಚಯಂ;

ವಗ್ಗೇ ಸಮಗ್ಗೇನಾಪತ್ತಿ, ಸಮಗ್ಗೋ ಇತಿ ಸಞ್ಞಿನೋ.

೪೨೯. ಉಕ್ಖಿತ್ತಸ್ಸ ಗಹಟ್ಠಸ್ಸ, ಸೇಸಾನಂ ಸಹಧಮ್ಮಿನಂ;

ಪಾರಾಜಿಕಸ್ಸಾಭಬ್ಬಸ್ಸ, ಸಿಕ್ಖಾನಿಕ್ಖಿತ್ತಕಸ್ಸ ಚ.

೪೩೦. ನಿಸಿನ್ನಪರಿಸಾಯಞ್ಚ, ಸಭಾಗಾಪತ್ತಿಕೋ ತಥಾ;

ಛನ್ದೇನ ಪರಿವುತ್ಥೇನ, ಪಾತಿಮೋಕ್ಖಂ ನ ಉದ್ದಿಸೇ.

೪೩೧. ಅದೇಸಯಿತ್ವಾನಾಪನ್ನಂ, ನಾವಿಕತ್ವಾನ ವೇಮತಿಂ;

ನುಪೋಸಥೇಪಿ ವಾ ಕಾತುಂ, ಪೋಸಥೋ ನ ಚ ಕಪ್ಪತಿ.

೪೩೨. ಅಟ್ಠಿತೋಪೋಸಥಾವಾಸಾ, ನ ವಜೇ ತದಹೂ ವಿನಾ;

ಅನ್ತರಾಯಂ ವ ಸಙ್ಘಂ ವಾ-ಧಿಟ್ಠಾತುಂ ಸೀಮಮೇವ ವಾತಿ.