೪೫. ಪವಾರಣಾನಿದ್ದೇಸೋ

ಪವಾರಣಾತಿ –

೪೩೩. ದ್ವಿನ್ನಂ ತಿಣ್ಣಂ ಚತುನ್ನಞ್ಚ, ಅಞ್ಞಮಞ್ಞಪ್ಪವಾರಣಾ;

ಏಕಸ್ಸ ಚ ಅಧಿಟ್ಠಾನಂ, ಸೇಸಾ ಸಙ್ಘಪ್ಪವಾರಣಾ.

೪೩೪. ಪುಬ್ಬಕಿಚ್ಚೇ ಚ ಕರಣೇ, ಪತ್ತಕಲ್ಲೇ ಸಮಾನಿತೇ;

ಠಪೇತ್ವಾ ಞತ್ತಿಂ ಸಙ್ಘೇನ, ಕತ್ತಬ್ಬೇವಂ ಪವಾರಣಾ.

‘‘ಸುಣಾತು ಮೇ ಭನ್ತೇ ಸಙ್ಘೋ, ಅಜ್ಜ ಪವಾರಣಾ ಪನ್ನರಸೀ, ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಪವಾರೇಯ್ಯಾ’’ತಿ.

೪೩೫. ಏಕಂಸಂ ಚೀವರಂ ಕತ್ವಾ, ನಿಸೀದಿತ್ವಾ ಉಕ್ಕುಟಿಕಂ;

ಥೇರೇನ ಅಞ್ಜಲಿಂ ಸಙ್ಘೋ, ಪಗ್ಗಯ್ಹ ಸಮುದೀರಿಯೋ.

೪೩೬. ‘‘ಸಙ್ಘಂ, ಆವುಸೋ, ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮಿ. ದುತಿಯಮ್ಪಿ…ಪೇ… ತತಿಯಮ್ಪಿ, ಆವುಸೋ, ಸಙ್ಘಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ.

೪೩೭. ಪವಾರೇನ್ತೇಸು ಥೇರೇಸು, ನಿಸಜ್ಜುಕ್ಕುಟಿಕಂ ನವೋ;

ಪವಾರೇತಿ ಸಯಂ ಯಾವ, ಉಕ್ಕುಟಿಕೋವ ಅಚ್ಛತು.

೪೩೮. ಪುಬ್ಬಾರಮ್ಭಂ ಸಮಾಪೇತ್ವಾ, ನವೋ ಸಙ್ಘಮುದೀರಯೇ.

೪೩೯. ‘‘ಸಙ್ಘಂ, ಭನ್ತೇ, ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮಿ. ದುತಿಯಮ್ಪಿ…ಪೇ… ತತಿಯಮ್ಪಿ, ಭನ್ತೇ, ಸಙ್ಘಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ.

೪೪೦. ದಾನೇನ ಧಮ್ಮಸಾಕಚ್ಛಾ, ಕಲಹೇಹಿ ಚ ರತ್ತಿಯಾ;

ತೇವಾಚಿಕಾಯ ಓಕಾಸೇ-ಸತಿ ಖೇಪಿತಭಾವತೋ;

ಅನ್ತರಾಯೇ ದಸವಿಧೇ, ಞತ್ತಿಂ ವತ್ವಾನುರೂಪತೋ.

೪೪೧. ‘‘ಸುಣಾತು ಮೇ ಭನ್ತೇ ಸಙ್ಘೋ, ಮನುಸ್ಸೇಹಿ ದಾನಂ ದೇನ್ತೇಹಿ, ದ್ವೀಹಿ ಭಿಕ್ಖೂಹಿ ಧಮ್ಮಂ ಸಾಕಚ್ಛನ್ತೇಹಿ, ಕಲಹಂ ಕರೋನ್ತೇಹಿ ಯೇಭುಯ್ಯೇನ ರತ್ತಿ ಖೇಪಿತಾ. ಸಚೇ ಸಙ್ಘೋ ತೇವಾಚಿಕಂ ಪವಾರೇಸ್ಸತಿ, ಅಪ್ಪವಾರಿತೋವ ಸಙ್ಘೋ ಭವಿಸ್ಸತಿ, ಅಥಾಯಂ ರತ್ತಿ ವಿಭಾಯಿಸ್ಸತಿ. ಅಯಂ ರಾಜನ್ತರಾಯೋ, ಅಯಂ ಚೋರನ್ತರಾಯೋ, ಅಯಂ ಅಗ್ಯನ್ತರಾಯೋ, ಅಯಂ ಉದಕನ್ತರಾಯೋ, ಅಯಂ ಮನುಸ್ಸನ್ತರಾಯೋ, ಅಯಂ ಅಮನುಸ್ಸನ್ತರಾಯೋ, ಅಯಂ ವಾಳನ್ತರಾಯೋ, ಅಯಂ ಸರೀಸಪನ್ತರಾಯೋ, ಅಯಂ ಜೀವಿತನ್ತರಾಯೋ, ಅಯಂ ಬ್ರಹ್ಮಚರಿಯನ್ತರಾಯೋ. ಸಚೇ ಸಙ್ಘೋ ತೇವಾಚಿಕಂ ಪವಾರೇಸ್ಸತಿ, ಅಪ್ಪವಾರಿತೋವ ಸಙ್ಘೋ ಭವಿಸ್ಸತಿ, ಅಥಾಯಂ ಬ್ರಹ್ಮಚರಿಯನ್ತರಾಯೋ ಭವಿಸ್ಸತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ದ್ವೇವಾಚಿಕಂ, ಏಕವಾಚಿಕಂ, ಸಮಾನವಸ್ಸಿಕಂ ಪವಾರೇಯ್ಯಾ’’ತಿ.

೪೪೨. ಪವಾರೇಯ್ಯಾನುರೂಪೇನ, ಯಥಾಠಪಿತಞತ್ತಿಯಾ;

ಆಗಚ್ಛೇಯ್ಯುಂ ಯದಿ ಸಮಾ, ಆದಿಕಾ ಚೇತ್ಥ ಆಹರೇ.

೪೪೩. ಏವಂ ತಿಚತುವಗ್ಗೋ ಚ, ಞತ್ತಿಂ ವತ್ವಾ ಪವಾರಯೇ. ‘‘ಸುಣನ್ತು ಮೇ ಆಯಸ್ಮನ್ತಾ, ಅಜ್ಜ ಪವಾರಣಾ ಪನ್ನರಸೀ, ಯದಾಯಸ್ಮನ್ತಾನಂ ಪತ್ತಕಲ್ಲಂ, ಮಯಂ ಅಞ್ಞಮಞ್ಞಂ ಪವಾರೇಯ್ಯಾಮಾ’’ತಿ.

೪೪೪. ಏಕಂಸಂ ಚೀವರಂ ಕತ್ವಾ, ನಿಸೀದಿತ್ವಾ ಉಕ್ಕುಟಿಕಂ;

ಥೇರೇನ ಅಞ್ಜಲಿಂ ತೇವಂ, ಪಗ್ಗಯ್ಹ ಸಮುದೀರಿಯಾ.

೪೪೫. ‘‘ಅಹಂ, ಆವುಸೋ, ಆಯಸ್ಮನ್ತೇ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮಿ. ದುತಿಯಮ್ಪಿ…ಪೇ… ತತಿಯಮ್ಪಿ ಅಹಂ, ಆವುಸೋ, ಆಯಸ್ಮನ್ತೇ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ.

ನವೇನಾಪಿ ‘‘ಅಹಂ, ಭನ್ತೇ, ಆಯಸ್ಮನ್ತೇ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮಿ. ದುತಿಯಮ್ಪಿ…ಪೇ… ತತಿಯಮ್ಪಿ ಅಹಂ, ಭನ್ತೇ, ಆಯಸ್ಮನ್ತೇ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದನ್ತು ಮಂ ಆಯಸ್ಮನ್ತಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ.

೪೪೬. ದ್ವೀಸು ಥೇರೇನ ಕತ್ತಬ್ಬಂ, ನವೋ ಕತ್ವೇವಮೀರಿಯೋ.

೪೪೭. ‘‘ಅಹಂ, ಆವುಸೋ, ಆಯಸ್ಮನ್ತಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದತು ಮಂ ಆಯಸ್ಮಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮಿ. ದುತಿಯಮ್ಪಿ…ಪೇ… ತತಿಯಮ್ಪಿ ಅಹಂ, ಆವುಸೋ, ಆಯಸ್ಮನ್ತಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದತು ಮಂ ಆಯಸ್ಮಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ.

ನವೇನಾಪಿ ‘‘ಅಹಂ, ಭನ್ತೇ, ಆಯಸ್ಮನ್ತಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದತು ಮಂ ಆಯಸ್ಮಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮಿ. ದುತಿಯಮ್ಪಿ…ಪೇ… ತತಿಯಮ್ಪಿ ಅಹಂ, ಭನ್ತೇ, ಆಯಸ್ಮನ್ತಂ ಪವಾರೇಮಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದತು ಮಂ ಆಯಸ್ಮಾ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸಾಮೀ’’ತಿ.

೪೪೮. ಪುಬ್ಬಕಿಚ್ಚಂ ಸಮಾಪೇತ್ವಾ, ಅಧಿಟ್ಠೇಯ್ಯೇವಮೇಕಕೋ. ‘‘ಅಜ್ಜ ಮೇ ಪವಾರಣಾ ಚಾತುದ್ದಸೀತಿ ವಾ ಪನ್ನರಸೀತಿ ವಾ ಅಧಿಟ್ಠಾಮೀ’’ತಿ ವತ್ತಬ್ಬಂ.

೪೪೯. ಯಸ್ಮಿಂ ವಸನ್ತಿ ವಾ ಪಞ್ಚ, ಚತ್ತಾರೋ ವಾ ತಯೋ ದುವೇ;

ಪವಾರಣಂ ಹರಿತ್ವಾನ, ಏಕೇಕಸ್ಸಿತರೀತರೇ.

೪೫೦. ತಂ ತಂ ಪವಾರಣಂ ಕಯಿರುಂ,

ಸಿಯಾ ಆಪತ್ತಿ ದುಕ್ಕಟಂ;

ಸೇಸಾ ಉಪೋಸಥೇ ವುತ್ತಾ,

ಗಾಥಾಯೋ ಚೇತ್ಥ ಆಹರೇ.

೪೫೧. ಪವಾರಿತೇವ ಸಙ್ಘಮ್ಹಿ, ಪಾರಿಸುದ್ಧಿಉಪೋಸಥಂ;

ಕರೇಯ್ಯ ಛಿನ್ನವಸ್ಸೋ ವಾ, ಅವುತ್ಥೋ ವಾನುಪಗತೋ.

೪೫೨. ಚಾತುಮಾಸಿನಿಯಾ ಚಾಪಿ, ಕತೇ ಸಙ್ಘೇನುಪೋಸಥೇ;

ವುತ್ಥವಸ್ಸಾ ಪವಾರೇಯ್ಯುಂ, ಸಚೇ ಅಪ್ಪತರಾ ಸಿಯುನ್ತಿ.