೪೩. ಛನ್ದದಾನನಿದ್ದೇಸೋ

ಛನ್ದದಾನಾದೀತಿ –

೩೯೯. ಭೇರಿಂ ಘಣ್ಟಿಂ ಪತಾಳೇತ್ವಾ, ಕಮ್ಮಪ್ಪತ್ತೇ ಸಮಾಗತೇ;

ಸಙ್ಘೇ ಹರೇಯ್ಯ ಛನ್ದಂ ವಾ, ಪಾರಿಸುದ್ಧಿಂ ಪವಾರಣಂ.

೪೦೦. ಏಕಂ ಭಿಕ್ಖುಂ ಉಪಗ್ಗಮ್ಮ, ನಿಸೀದಿತ್ವಾ ಉಕ್ಕುಟಿಕಂ;

ಅಞ್ಜಲಿಂ ಪಗ್ಗಣ್ಹಿತ್ವಾನ, ದದೇ ಛನ್ದಂ ವಿಚಕ್ಖಣೋ.

೪೦೧. (ಕ) ‘‘ಛನ್ದಂ ದಮ್ಮಿ, ಛನ್ದಂ ಮೇ ಹರ, ಛನ್ದಂ ಮೇ ಆರೋಚೇಹೀ’’ತಿ ವತ್ತಬ್ಬಂ.

(ಖ) ಪಾರಿಸುದ್ಧಿಂ ದೇನ್ತೇನ ‘‘ಪಾರಿಸುದ್ಧಿಂ ದಮ್ಮಿ, ಪಾರಿಸುದ್ಧಿಂ ಮೇ ಹರ, ಪಾರಿಸುದ್ಧಿಂ ಮೇ ಆರೋಚೇಹೀ’’ತಿ ವತ್ತಬ್ಬಂ.

೪೦೨. ಪಾರಿಸುದ್ಧಿಪ್ಪದಾನೇನ, ಸಮ್ಪಾದೇತಿ ಉಪೋಸಥಂ;

ಸಙ್ಘಸ್ಸ ಅತ್ತನೋ ಚಾಪಿ, ಸೇಸಕಮ್ಮಂ ವಿಬಾಧತಿ.

೪೦೩. ಛನ್ದದಾನೇನ ಸಙ್ಘಸ್ಸ, ದ್ವಯಂ ಸಾಧೇತಿ ನತ್ತನೋ;

ತಸ್ಮಾ ಛನ್ದಂ ದದನ್ತೇನ, ದಾತಬ್ಬಾ ಪಾರಿಸುದ್ಧಿಪಿ.

೪೦೪. ಹರೇಯ್ಯೇಕೋ ಬಹೂನಮ್ಪಿ, ಪರಮ್ಪರಾ ನ ಹಾರಯೇ;

ಪರಮ್ಪರಾಹಟಾ ಛನ್ದ-ಪಾರಿಸುದ್ಧಿ ನ ಗಚ್ಛತಿ.

೪೦೫. ಸಬ್ಬೂಪಚಾರಂ ಕತ್ವಾನ, ಏವಂ ದೇಯ್ಯಾ ಪವಾರಣಾ. ‘‘ಪವಾರಣಂ ದಮ್ಮಿ, ಪವಾರಣಂ ಮೇ ಹರ, ಪವಾರಣಂ ಮೇ ಆರೋಚೇಹಿ, ಮಮತ್ಥಾಯ ಪವಾರೇಹೀ’’ತಿ.

೪೦೬. ಆರೋಚೇತ್ವಾಥ ಸೋ ಸಙ್ಘಂ, ಪವಾರೇಯ್ಯೇವಮಾಗತೋ. ‘‘ಇತ್ಥನ್ನಾಮೋ, ಭನ್ತೇ, ಸಙ್ಘಂ ಪವಾರೇತಿ ದಿಟ್ಠೇನ ವಾ ಸುತೇನ ವಾ ಪರಿಸಙ್ಕಾಯ ವಾ, ವದತು ತಂ ಸಙ್ಘೋ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸತೀ’’ತಿ.

೪೦೭. ಗಹೇತ್ವಾ ಪಾರಿಸುದ್ಧಿಂ ವಾ, ಛನ್ದಂ ವಾಪಿ ಪವಾರಣಂ;

ಹಾರಕೋ ಸಙ್ಘಮಪ್ಪತ್ವಾ, ವಿಬ್ಭಮೇಯ್ಯ ಮರೇಯ್ಯ ವಾ.

೪೦೮. ಸಾಮಣೇರಾದಿಭಾವಂ ವಾ,

ಪಟಿಜಾನೇಯ್ಯ ನಾಹಟಾ;

ಪತ್ವಾ ಸಙ್ಘಂ ತಥಾ ಹೇಯ್ಯ,

ಆಹಟಾ ಹೋತಿ ಹಾರಕೋ.

೪೦೯. ಸಙ್ಘಪ್ಪತ್ತೋ ಪಮತ್ತೋ ವಾ, ಸುತ್ತೋ ನಾರೋಚಯೇಯ್ಯ ವಾ;

ಅನಾಪತ್ತಿವ ಸಞ್ಚಿಚ್ಚ, ನಾರೋಚೇನ್ತಸ್ಸ ದುಕ್ಕಟನ್ತಿ.