೪೨. ದೇಸನಾನಿದ್ದೇಸೋ

ದೇಸನಾತಿ –

೩೮೨. ಚಾಗೋ ಯೋ ಭಿಕ್ಖುಭಾವಸ್ಸ, ಸಾ ಪಾರಾಜಿಕದೇಸನಾ;

ಯಥಾವುತ್ತೇನ ವುಟ್ಠಾನಂ, ಗರುಕಾಪತ್ತಿದೇಸನಾ.

೩೮೩. ಉಕ್ಕುಟಿಕಂ ನಿಸೀದಿತ್ವಾ, ಪಗ್ಗಣ್ಹಿತ್ವಾನ ಅಞ್ಜಲಿಂ;

ಥುಲ್ಲಚ್ಚಯಾದಿಂ ದೇಸೇಯ್ಯ, ಏವಮೇಕಸ್ಸ ಸನ್ತಿಕೇ.

೩೮೪. ‘‘ಅಹಂ, ಭನ್ತೇ, ಏಕಂ ಥುಲ್ಲಚ್ಚಯಾಪತ್ತಿಂ ಆಪಜ್ಜಿಂ, ತಂ ತುಮ್ಹಮೂಲೇ ಪಟಿದೇಸೇಮೀ’’ತಿ ವತ್ವಾ ತೇನ ‘‘ಪಸ್ಸಸಿ, ಆವುಸೋ, ತಂ ಆಪತ್ತಿ’’ನ್ತಿ ವುತ್ತೇ ‘‘ಆಮ, ಭನ್ತೇ, ಪಸ್ಸಾಮೀ’’ತಿ ವತ್ವಾ ಪುನ ತೇನ ‘‘ಆಯತಿಂ, ಆವುಸೋ, ಸಂವರೇಯ್ಯಾಸೀ’’ತಿ ವುತ್ತೇ ‘‘ಸಾಧು ಸುಟ್ಠು, ಭನ್ತೇ, ಸಂವರಿಸ್ಸಾಮೀ’’ತಿ ವತ್ತಬ್ಬಂ. ‘‘ಅಹಂ, ಭನ್ತೇ, ದ್ವೇ ಥುಲ್ಲಚ್ಚಯಾಪತ್ತಿಯೋ ಆಪಜ್ಜಿಂ, ಅಹಂ ಭನ್ತೇ ಸಮ್ಬಹುಲಾ ಥುಲ್ಲಚ್ಚಯಾಪತ್ತಿಯೋ ಆಪಜ್ಜಿಂ, ತಾ ತುಮ್ಹಮೂಲೇ ಪಟಿದೇಸೇಮೀ’’ತಿ ವತ್ತಬ್ಬಂ.

ನಿಸ್ಸಗ್ಗಿಯೇಸು ಪನ ‘‘ಇದಂ ಮೇ, ಭನ್ತೇ, ಚೀವರಂ ದಸಾಹಾತಿಕ್ಕನ್ತಂ ನಿಸ್ಸಗ್ಗಿಯಂ, ಇಮಾಹಂ ಆಯಸ್ಮತೋ ನಿಸ್ಸಜ್ಜಾಮೀ’’ತಿ. ‘‘ಇಮಾನಿ ಮೇ, ಭನ್ತೇ, ಚೀವರಾನಿ…ಪೇ… ಏತಂ ಮೇ, ಭನ್ತೇ, ಚೀವರಂ…ಪೇ… ಏತಾನಿ ಮೇ, ಭನ್ತೇ, ಚೀವರಾನಿ ದಸಾಹಾತಿಕ್ಕನ್ತಾನಿ ನಿಸ್ಸಗ್ಗಿಯಾನಿ, ಏತಾನಾಹಂ ಆಯಸ್ಮತೋ ನಿಸ್ಸಜ್ಜಾಮೀ’’ತಿ.

೩೮೫. ನಿಸ್ಸಜ್ಜಿತ್ವಾನ ದೇಸೇಯ್ಯ, ಆಪತ್ತಿಂ ತೇನ ಭಿಕ್ಖುನಾ;

ಪಟಿಗ್ಗಹೇತ್ವಾ ಆಪತ್ತಿಂ, ದೇಯ್ಯಂ ನಿಸ್ಸಟ್ಠಚೀವರಂ.

‘‘ಇಮಂ, ಇಮಾನಿ, ಏತಂ, ಏತಾನಿ ಚೀವರಾನಿ ಆಯಸ್ಮತೋ ದಮ್ಮೀ’’ತಿ.

೩೮೬. (ಕ) ಇದಂ ಮೇ, ಭನ್ತೇ, ಚೀವರಂ ರತ್ತಿವಿಪ್ಪವುತ್ಥಂ ಅಞ್ಞತ್ರ ಭಿಕ್ಖುಸಮ್ಮುತಿಯಾ ನಿಸ್ಸಗ್ಗಿಯಂ.

(ಖ) ಇದಂ ಮೇ, ಭನ್ತೇ, ಅಕಾಲಚೀವರಂ ಮಾಸಾತಿಕ್ಕನ್ತಂ ನಿಸ್ಸಗ್ಗಿಯಂ.

(ಗ) ಇದಂ ಮೇ, ಭನ್ತೇ, ಪುರಾಣಚೀವರಂ ಅಞ್ಞಾತಿಕಾಯ ಭಿಕ್ಖುನಿಯಾ ಧೋವಾಪಿತಂ ನಿಸ್ಸಗ್ಗಿಯಂ.

(ಘ) ಇದಂ ಮೇ, ಭನ್ತೇ, ಚೀವರಂ ಅಞ್ಞಾತಿಕಾಯ ಭಿಕ್ಖುನಿಯಾ ಹತ್ಥತೋ ಪಟಿಗ್ಗಹಿತಂ ಅಞ್ಞತ್ರ ಪಾರಿವತ್ತಕಾ ನಿಸ್ಸಗ್ಗಿಯಂ.

(ಙ) ಇದಂ ಮೇ, ಭನ್ತೇ, ಚೀವರಂ ಅಞ್ಞಾತಕಂ ಗಹಪತಿಕಂ ಅಞ್ಞತ್ರ ಸಮಯಾ ವಿಞ್ಞಾಪಿತಂ ನಿಸ್ಸಗ್ಗಿಯಂ.

(ಚ) ಇದಂ ಮೇ, ಭನ್ತೇ, ಚೀವರಂ ಅಞ್ಞಾತಕಂ ಗಹಪತಿಕಂ ತತುತ್ತರಿ ವಿಞ್ಞಾಪಿತಂ ನಿಸ್ಸಗ್ಗಿಯಂ.

(ಛ) ಇದಂ ಮೇ, ಭನ್ತೇ, ಚೀವರಂ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕಂ ಗಹಪತಿಕಂ ಉಪಸಙ್ಕಮಿತ್ವಾ ವಿಕಪ್ಪಂ ಆಪನ್ನಂ ನಿಸ್ಸಗ್ಗಿಯಂ.

(ಜ) ಇದಂ ಮೇ, ಭನ್ತೇ, ಚೀವರಂ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕೇ ಗಹಪತಿಕೇ ಉಪಸಙ್ಕಮಿತ್ವಾ ವಿಕಪ್ಪಂ ಆಪನ್ನಂ ನಿಸ್ಸಗ್ಗಿಯಂ.

(ಝ) ಇದಂ ಮೇ, ಭನ್ತೇ, ಚೀವರಂ ಅತಿರೇಕತಿಕ್ಖತ್ತುಂ ಚೋದನಾಯ ಅತಿರೇಕಛಕ್ಖತ್ತುಂ ಠಾನೇನ ಅಭಿನಿಪ್ಫಾದಿತಂ ನಿಸ್ಸಗ್ಗಿಯಂ.

(ಞ) ಇದಂ ಮೇ, ಭನ್ತೇ, ಕೋಸಿಯಮಿಸ್ಸಕಂ ಸನ್ಥತಂ ಕಾರಾಪಿತಂ ನಿಸ್ಸಗ್ಗಿಯಂ.

(ಟ) ಇದಂ ಮೇ, ಭನ್ತೇ, ಸುದ್ಧಕಾಳಕಾನಂ ಏಳಕಲೋಮಾನಂ ಸನ್ಥತಂ ಕಾರಾಪಿತಂ ನಿಸ್ಸಗ್ಗಿಯಂ.

(ಠ) ಇದಂ ಮೇ, ಭನ್ತೇ, ಸನ್ಥತಂ ಅನಾದಿಯಿತ್ವಾ ತುಲಂ ಓದಾತಾನಂ ತುಲಂ ಗೋಚರಿಯಾನಂ ಕಾರಾಪಿತಂ ನಿಸ್ಸಗ್ಗಿಯಂ.

(ಡ) ಇದಂ ಮೇ, ಭನ್ತೇ, ಸನ್ಥತಂ ಊನಕಛಬ್ಬಸ್ಸಾನಿ ಕಾರಾಪಿತಂ ಅಞ್ಞತ್ರ ಭಿಕ್ಖುಸಮ್ಮುತಿಯಾ ನಿಸ್ಸಗ್ಗಿಯಂ.

(ಢ) ಇದಂ ಮೇ, ಭನ್ತೇ, ನಿಸೀದನಸನ್ಥತಂ ಅನಾದಿಯಿತ್ವಾ ಪುರಾಣಸನ್ಥತಸ್ಸ ಸಾಮನ್ತಾ ಸುಗತವಿದತ್ಥಿಂ ಕಾರಾಪಿತಂ ನಿಸ್ಸಗ್ಗಿಯಂ.

(ಣ) ಇಮಾನಿ ಮೇ, ಭನ್ತೇ, ಏಳಕಲೋಮಾನಿ ತಿಯೋಜನಪರಮಂ ಅತಿಕ್ಕಾಮಿತಾನಿ ನಿಸ್ಸಗ್ಗಿಯಾನಿ.

(ತ) ಇಮಾನಿ ಮೇ, ಭನ್ತೇ, ಏಳಕಲೋಮಾನಿ ಅಞ್ಞಾತಿಕಾಯ ಭಿಕ್ಖುನಿಯಾ ಧೋವಾಪಿತಾನಿ ನಿಸ್ಸಗ್ಗಿಯಾನಿ.

(ಥ) ಅಹಂ, ಭನ್ತೇ, ರೂಪಿಯಂ ಪಟಿಗ್ಗಹೇಸಿಂ, ಇದಂ ಮೇ, ಭನ್ತೇ, ನಿಸ್ಸಗ್ಗಿಯಂ, ಇಮಾಹಂ ಸಙ್ಘಸ್ಸ ನಿಸ್ಸಜ್ಜಾಮಿ.

(ದ) ಅಹಂ, ಭನ್ತೇ, ನಾನಪ್ಪಕಾರಕಂ ರೂಪಿಯಸಂವೋಹಾರಂ ಸಮಾಪಜ್ಜಿಂ, ಇದಂ ಮೇ, ಭನ್ತೇ, ನಿಸ್ಸಗ್ಗಿಯಂ, ಇಮಾಹಂ ಸಙ್ಘಸ್ಸ ನಿಸ್ಸಜ್ಜಾಮೀತಿ.

೩೮೭. ನಿಸ್ಸಜ್ಜಿತ್ವಾನ ಆಪತ್ತಿಂ, ದೇಸೇಯ್ಯಾಥ ಗಿಹಿಂ ವದೇ;

‘‘ಜಾನಾಹಿಮ’’ನ್ತಿ ಇಮಿನಾ, ಸೋ ವದೇಯ್ಯಾಹರಾಮಿ ಕಿಂ.

೩೮೮. ಅವತ್ವಾಮನ್ತಿ ತೇಲಾದಿಂ, ವದೇ ಭಿಕ್ಖೂನ ಕಪ್ಪಿಯಂ;

ಯಂ ಆಹರತಿ ಸೋ ತೇನ, ಪರಿವತ್ತೇತ್ವಾನ ಕಪ್ಪಿಯಂ.

೩೮೯. ಲಬ್ಭಂ ಠಪೇತ್ವಾ ದ್ವೇಪೇತೇ, ಸೇಸೇಹಿ ಪರಿಭುಞ್ಜಿತುಂ;

ತತೋ ಅಞ್ಞೇನ ಲದ್ಧೋಪಿ, ಭಾಗೋ ತೇಸಂ ನ ಕಪ್ಪತಿ.

೩೯೦. ರುಕ್ಖಚ್ಛಾಯಾಪ್ಯನ್ತಮಸೋ, ತನ್ನಿಬ್ಬತ್ತಾ ನ ಕಪ್ಪತಿ;

ನಿಸ್ಸಟ್ಠಂ ಪಟಿಲದ್ಧಮ್ಪಿ, ಆದಿತೋ ಸನ್ಥತತ್ತಯಂ.

೩೯೧. ನೋ ಚೇ ಲಭೇಥ ಏವಂ ಸೋ, ಇಮಂ ಛಡ್ಡೇಹಿ ಸಂಸಿಯೋ;

ಏವಮ್ಪಿ ಭಿಕ್ಖು ಛಡ್ಡೇಯ್ಯ, ನೋ ಚೇ ಲಭೇಥ ಸಮ್ಮತೋ.

೩೯೨. ಏತಾನಿ ದುತಿಯೋ ಪತ್ತೋ, ಸಙ್ಘೇ ಸೇಸಾನಿ ಲಬ್ಭರೇ;

ಸಙ್ಘೇಕಸ್ಮಿಂ ಗಣೇ ವತ್ತುಂ, ಲಬ್ಭಂ ಭಾಸನ್ತರೇನಪಿ.

೩೯೩. (ಕ) ಅಹಂ, ಭನ್ತೇ, ನಾನಪ್ಪಕಾರಕಂ ಕಯವಿಕ್ಕಯಂ ಸಮಾಪಜ್ಜಿಂ, ಇದಂ ಮೇ, ಭನ್ತೇ, ನಿಸ್ಸಗ್ಗಿಯಂ.

(ಖ) ಅಯಂ ಮೇ, ಭನ್ತೇ, ಪತ್ತೋ ದಸಾಹಾತಿಕ್ಕನ್ತೋ ನಿಸ್ಸಗ್ಗಿಯೋ.

(ಗ) ಅಯಂ ಮೇ, ಭನ್ತೇ, ಪತ್ತೋ ಊನಪಞ್ಚಬನ್ಧನೇನ ಪತ್ತೇನ ಚೇತಾಪಿತೋ ನಿಸ್ಸಗ್ಗಿಯೋ, ಇಮಾಹಂ ಸಙ್ಘಸ್ಸ ನಿಸ್ಸಜ್ಜಾಮೀತಿ.

೩೯೪. ನಿಸ್ಸಜ್ಜಿತ್ವಾನ ದೇಸೇಯ್ಯ, ಆಪತ್ತಿಂ ಪತ್ತಗಾಹಕಂ;

ಸಮ್ಮನ್ನಿತ್ವಾನ ಸಙ್ಘಸ್ಸ, ಪತ್ತನ್ತಂ ತಸ್ಸ ದಾಪಯೇ.

೩೯೫. (ಕ) ಇದಂ ಮೇ, ಭನ್ತೇ, ಭೇಸಜ್ಜಂ ಸತ್ತಾಹಾತಿಕ್ಕನ್ತಂ ನಿಸ್ಸಗ್ಗಿಯಂ.

(ಖ) ಇದಂ ಮೇ, ಭನ್ತೇ, ವಸ್ಸಿಕಸಾಟಿಕಚೀವರಂ ಅತಿರೇಕಮಾಸೇ ಸೇಸೇ ಗಿಮ್ಹಾನೇ ಪರಿಯಿಟ್ಠಂ, ಅತಿರೇಕಡ್ಢಮಾಸೇ ಸೇಸೇ ಗಿಮ್ಹಾನೇ ಕತ್ವಾ ಪರಿದಹಿತಂ ನಿಸ್ಸಗ್ಗಿಯಂ.

(ಗ) ಇದಂ ಮೇ, ಭನ್ತೇ, ಚೀವರಂ ಭಿಕ್ಖುಸ್ಸ ಸಾಮಂ ದತ್ವಾ ಅಚ್ಛಿನ್ನಂ ನಿಸ್ಸಗ್ಗಿಯಂ.

(ಘ) ಇದಂ ಮೇ, ಭನ್ತೇ, ಚೀವರಂ ಸಾಮಂ ಸುತ್ತಂ ವಿಞ್ಞಾಪೇತ್ವಾ ತನ್ತವಾಯೇಹಿ ವಾಯಾಪಿತಂ ನಿಸ್ಸಗ್ಗಿಯಂ.

(ಙ) ಇದಂ ಮೇ, ಭನ್ತೇ, ಚೀವರಂ ಪುಬ್ಬೇ ಅಪ್ಪವಾರಿತೋ ಅಞ್ಞಾತಕಸ್ಸ ಗಹಪತಿಕಸ್ಸ ತನ್ತವಾಯೇ ಉಪಸಙ್ಕಮಿತ್ವಾ ವಿಕಪ್ಪಂ ಆಪನ್ನಂ ನಿಸ್ಸಗ್ಗಿಯಂ.

(ಚ) ಇದಂ ಮೇ, ಭನ್ತೇ, ಅಚ್ಚೇಕಚೀವರಂ ಚೀವರಕಾಲಸಮಯಂ ಅತಿಕ್ಕಾಮಿತಂ ನಿಸ್ಸಗ್ಗಿಯಂ.

(ಛ) ಇದಂ ಮೇ, ಭನ್ತೇ, ಚೀವರಂ ಅತಿರೇಕಛಾರತ್ತಂ ವಿಪ್ಪವುತ್ಥಂ ಅಞ್ಞತ್ರ ಭಿಕ್ಖುಸಮ್ಮುತಿಯಾ ನಿಸ್ಸಗ್ಗಿಯಂ.

(ಜ) ಇದಂ ಮೇ, ಭನ್ತೇ, ಜಾನಂ ಸಙ್ಘಿಕಂ ಲಾಭಂ ಪರಿಣತಂ ಅತ್ತನೋ ಪರಿಣಾಮಿತಂ ನಿಸ್ಸಗ್ಗಿಯಂ, ಇಮಾಹಂ ಆಯಸ್ಮತೋ ನಿಸ್ಸಜ್ಜಾಮೀತಿ.

೩೯೬. ಸೇಸಂ ಸಬ್ಬಂ ಯಥಾಯೋಗಂ, ಆದಿಮ್ಹಿ ವಿಯ ಯೋಜಯೇ.

೩೯೭. (ಕ) ಅಹಂ, ಭನ್ತೇ, ಏಕಂ ಪಾಚಿತ್ತಿಯಾಪತ್ತಿಂ ಆಪಜ್ಜಿಂ. ದ್ವೇ ಸಮ್ಬಹುಲಾ ಪಾಚಿತ್ತಿಯಾಪತ್ತಿಯೋ ಆಪಜ್ಜಿಂ.

(ಖ) ಗಾರಯ್ಹಂ, ಭನ್ತೇ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀತಿ. ತೇನ ‘‘ಪಸ್ಸಸಿ, ಆವುಸೋ, ತಂ ಧಮ್ಮ’’ನ್ತಿ ವತ್ತಬ್ಬಂ.

(ಗ) ಅಹಂ, ಭನ್ತೇ, ಏಕಂ ದುಕ್ಕಟಾಪತ್ತಿಂ ಆಪಜ್ಜಿಂ. ದ್ವೇ ಸಮ್ಬಹುಲಾ ದುಕ್ಕಟಾಪತ್ತಿಯೋ ಆಪಜ್ಜಿಂ.

(ಘ) ಅಹಂ, ಭನ್ತೇ, ಏಕಂ ದುಬ್ಭಾಸಿತಾಪತ್ತಿಂ ಆಪಜ್ಜಿಂ. ದ್ವೇ ಸಮ್ಬಹುಲಾ ದುಬ್ಭಾಸಿತಾಪತ್ತಿಯೋ ಆಪಜ್ಜಿಂ. ತಾ ತುಮ್ಹಮೂಲೇ ಪಟಿದೇಸೇಮೀತಿ.

(ಙ) ‘‘ಅಹಂ, ಭನ್ತೇ, ದ್ವೇ ನಾನಾವತ್ಥುಕಾ ಥುಲ್ಲಚ್ಚಯಾಪತ್ತಿಯೋ ಆಪಜ್ಜಿಂ. ಸಮ್ಬಹುಲಾ ನಾನಾವತ್ಥುಕಾ ಥುಲ್ಲಚ್ಚಯಾಪತ್ತಿಯೋ ಆಪಜ್ಜಿಂ, ತಾ ತುಮ್ಹಮೂಲೇ ಪಟಿದೇಸೇಮೀ’’ತಿ ವತ್ವಾ ತೇನ ‘‘ಪಸ್ಸಸಿ, ಆವುಸೋ, ತಾ ಆಪತ್ತಿಯೋ’’ತಿ ವುತ್ತೇ ‘‘ಆಮ, ಭನ್ತೇ, ಪಸ್ಸಾಮೀ’’ತಿ ವತ್ವಾ ಪುನ ತೇನ ‘‘ಆಯತಿಂ, ಆವುಸೋ, ಸಂವರೇಯ್ಯಾಸೀ’’ತಿ ವುತ್ತೇ ‘‘ಸಾಧು ಸುಟ್ಠು, ಭನ್ತೇ, ಸಂವರಿಸ್ಸಾಮೀ’’ತಿ ವತ್ತಬ್ಬಂ.

೩೯೮. ಅದೇಸನಾಗಾಮಿನಿಯಂ, ಅನಾಪತ್ತಿಞ್ಚ ದೇಸಿತಂ;

ನಾನಾ ಸಂವಾಸನಿಸ್ಸೀಮಟ್ಠಿತಾನಂ ಚತುಪಞ್ಚಹಿ;

ಮನಸಾ ಪಕತತ್ತಾನಂ, ನಾನೇಕಾತಿ ನ ದೇಸಯೇತಿ.