೩೯. ವಸ್ಸೂಪನಾಯಿಕನಿದ್ದೇಸೋ

ವಸ್ಸೂಪನಾಯಿಕಾ ಚೇವಾತಿ –

೩೦೯. ಪುರಿಮಿಕಾ ಪಚ್ಛಿಮಿಕಾ, ದುವೇ ವಸ್ಸೂಪನಾಯಿಕಾ;

ತತ್ಥಾಲಯಪರಿಗ್ಗಾಹೋ, ವಚೀಭೇದೋ ಚ ಏದಿಸೋ.

೩೧೦. ‘‘ಇಮಸ್ಮಿಂ ವಿಹಾರೇ ಇಮಂ, ತೇಮಾಸಂ ವಸ್ಸಂ ಉಪೇಮಿ;

ಇಧ ವಸ್ಸಂ ಉಪೇಮೀ’’ತಿ, ಚಿತ್ತುಪ್ಪಾದೇತ್ಥ ಆಲಯೋ.

೩೧೧. ನೋಪೇತುಕಾಮೋ ಆವಾಸಂ, ತದಹೂತಿಕ್ಕಮೇಯ್ಯ ವಾ;

ಭವೇಯ್ಯ ದುಕ್ಕಟಾಪತ್ತಿ, ಜಾನಂ ವಾನುಪಗಚ್ಛತೋ.

೩೧೨. ದುತಿಯಂ ಉಪಗಚ್ಛೇಯ್ಯ, ಛಿನ್ನವಸ್ಸೋನುಪಾಗತೋ;

ನ ಪಕ್ಕಮೇಯ್ಯ ತೇಮಾಸಂ, ಅವಸಿತ್ವಾನ ಚಾರಿಕಂ.

೩೧೩. ಮಾತಾಪಿತೂನಮತ್ಥಾಯ, ಪಞ್ಚನ್ನಂ ಸಹಧಮ್ಮಿನಂ;

ಗಿಲಾನತದುಪಟ್ಠಾಕ-ಭತ್ತಮೇಸಿಸ್ಸಮೋಸಧಂ.

೩೧೪. ಪುಚ್ಛಿಸ್ಸಾಮಿ ಉಪಟ್ಠಿಸ್ಸಂ, ಗನ್ತ್ವಾನಭಿರತಂ ಅಹಂ;

ವೂಪಕಾಸಿಸ್ಸಂ ಕುಕ್ಕುಚ್ಚಂ, ದಿಟ್ಠಿಂ ಗರುಕಮಾದಿಕಂ.

೩೧೫. ಕರಿಸ್ಸಂ ವಾಪಿ ಕಾರೇಸ್ಸಂ, ವಿನೋದನಂ ವಿವೇಚನಂ;

ವುಟ್ಠಾನಂ ವಾಪಿ ಉಸ್ಸುಕ್ಕಂ, ಗನ್ತುಮಿಚ್ಚೇವಮಾದಿನಾ;

ಲಬ್ಭಂ ಸತ್ತಾಹಕಿಚ್ಚೇನ, ಪಹಿತಾಪಹಿತೇಪಿ ವಾ.

೩೧೬. ಸಙ್ಘಕಮ್ಮೇ ವಜೇ ಧಮ್ಮ-ಸ್ಸವನತ್ಥಂ ನಿಮನ್ತಿತೋ;

ಗರೂಹಿ ಪಹಿತೋ ವಾಪಿ, ಗರೂನಂ ವಾಪಿ ಪಸ್ಸಿತುಂ.

೩೧೭. ನ ಭಣ್ಡಧೋವನುದ್ದೇಸ-ಞಾತುಪಟ್ಠಾಕದಸ್ಸನೇ;

ಲಬ್ಭಂ ನ ಪಾಪುಣೇಯ್ಯಜ್ಜೇ-ವಾಗಮಿಸ್ಸನ್ತುದೂರಗೋ.

೩೧೮. ಸೇಸಞಾತೀಹಿ ಪಹಿತೇ, ಭಿಕ್ಖುನಿಸ್ಸಿತಕೇನ ಚ;

ಉಪಾಸಕೋಪಾಸಿಕಾಹಿ, ನಿದ್ದಿಸಿತ್ವಾವ ಪೇಸಿತೇ.

೩೧೯. ವಸ್ಸಚ್ಛೇದೇ ಅನಾಪತ್ತಿ, ಅನ್ತರಾಯೇ ಸತತ್ತನೋ;

ಸಙ್ಘಸಾಮಗ್ಗಿಯಾ ವಾ ನೋ, ಛಿನ್ನವಸ್ಸೋ ಪವಾರಯೇ.

೩೨೦. ಅಜ್ಝೋಕಾಸೇ ಚ ರುಕ್ಖಸ್ಸ, ಸುಸಿರೇ ವಿಟಪೇಪಿ ವಾ;

ಛವಕುಟಿಛತ್ತಚಾಟೀ-ಸೂಪಗನ್ತುಂ ನ ವಟ್ಟತಿ.

೩೨೧. ಅಸೇನಾಸನಿಕೇನಾಪಿ, ಉಪಗನ್ತುಂ ನ ಲಬ್ಭತಿ;

ಪವಾರೇತುಞ್ಚ ಲಬ್ಭತಿ, ನಾವಾಸತ್ಥವಜೂಪಗೋತಿ.