೪೦. ಅವೇಭಙ್ಗಿಯನಿದ್ದೇಸೋ

ಅವೇಭಙ್ಗಿಯನ್ತಿ –

೩೨೨. ಆರಾಮಾರಾಮವತ್ಥೂನಿ, ವಿಹಾರೋ ತಸ್ಸ ವತ್ಥು ಚ;

ಮಞ್ಚೋ ಪೀಠಂ ಭಿಸಿ ಬಿಬ್ಬೋ-ಹನಾದಿಸಯನಾಸನಂ.

೩೨೩. ಲೋಹಕುಮ್ಭೀ ಕಟಾಹೋ ಚ,

ಲೋಹಭಾಣಕವಾರಕೋ;

ಕುಠಾರೀ ವಾಸಿ ಫರಸು,

ಕುದ್ದಾಲೋ ಚ ನಿಖಾದನಂ.

೩೨೪. ವಲ್ಲಿ ವೇಳು ತಿಣಂ ಪಣ್ಣಂ, ಮುಞ್ಜಪಬ್ಬಜಮತ್ತಿಕಾ;

ದಾರುಮತ್ತಿಕಭಣ್ಡಾನಿ, ಪಞ್ಚೇತೇ ಅವಿಭಾಜಿಯಾ.

೩೨೫. ಥುಲ್ಲಚ್ಚಯಂ ಭಾಜಯತೋ, ಭಾಜಿತಾಪಿ ಅಭಾಜಿತಾ;

ಗರುಭಣ್ಡಾನಿ ವುಚ್ಚನ್ತಿ, ಏತೇವಿಸ್ಸಜ್ಜಿಯಾನಿ ಚ.

೩೨೬. ವಲ್ಲಿಡ್ಢಬಾಹುಮತ್ತಾಪಿ, ವೇಳು ಅಟ್ಠಙ್ಗುಲಾಯತೋ;

ತಿಣಾದಿ ಮುಟ್ಠಿಮತ್ತಮ್ಪಿ, ಪಣ್ಣಂ ಏಕಮ್ಪಿ ಮತ್ತಿಕಾ.

೩೨೭. ಪಾಕತಾ ಪಞ್ಚವಣ್ಣಾ ವಾ, ಸುಧಾಕಙ್ಗುಟ್ಠ ಆದಿಕಾ;

ತಾಲಪಕ್ಕಪ್ಪಮಾಣಾಪಿ, ದಿನ್ನಾ ವಾ ತತ್ಥಜಾತಕಾ.

೩೨೮. ರಕ್ಖಿತಾ ಸಙ್ಘಿಕಾ ರಜ್ಜು-ಯೋತ್ತಾದೀಪಿ ಅಭಾಜಿಯಾ;

ನಿಟ್ಠಿತೇ ಭಾಜಿಯಾ ಕಮ್ಮೇ, ಸಙ್ಘಿಕೇ ಚೇತಿಯಸ್ಸ ವಾ.

೩೨೯. ಪತ್ತಾದಿ ಭಿಕ್ಖುಸಾರುಪ್ಪಂ, ತಥಾ ವಿಪ್ಪಕತಾಕತಂ;

ಭಾಜಿಯಂ ಲೋಹಭಣ್ಡೇಸು, ವಾರಕಂ ಪಾದಗಣ್ಹಕಂ.

೩೩೦. ವೇಳುಮ್ಹಿ ಭಾಜಿಯಾ ತೇಲ-ನಾಳಿ ಕತ್ತರದಣ್ಡಕೋ;

ಛತ್ತದಣ್ಡಸಲಾಕಾಯೋ, ತಥೋಪಾಹನದಣ್ಡಕೋ.

೩೩೧. ಅನುಞ್ಞಾತವಾಸಿದಣ್ಡೋ, ಕರಣ್ಡೋ ಪಾದಗಣ್ಹಕೋ;

ಅರಣಞ್ಜನಿಸಿಙ್ಗಾದಿ, ಭಿಕ್ಖೂಪಕರಣಂ ತಥಾ.

೩೩೨. ತಚ್ಛಿತಾನಿಟ್ಠಿತಂ ದಾರುಭಣ್ಡಂ ದನ್ತಞ್ಚ ಭಾಜಿಯಂ;

ಭಿಕ್ಖೂಪಕರಣೇ ಪಾದಘಟಕೋ ಮತ್ತಿಕಾಮಯೋ.

೩೩೩. ಭಾಜಿಯಂ ಕಪ್ಪಿಯಂ ಚಮ್ಮಂ, ಏಳಚಮ್ಮಮಭಾಜಿಯಂ;

ಗರುನಾ ಗರುಭಣ್ಡಞ್ಚ, ಥಾವರಂ ಥಾವರೇನ ಚ.

೩೩೪. ಥಾವರಂ ಪರಿವತ್ತೇಯ್ಯ, ತಥಾ ಕತ್ವಾ ಚ ಭುಞ್ಜತು;

ವಲ್ಲಾದಿಂ ಫಾತಿಕಮ್ಮೇನ, ಗಣ್ಹೇ ಸೇಸಮಭಾಜಿಯನ್ತಿ.