೩೧. ವಿಕಪ್ಪನಾನಿದ್ದೇಸೋ

ವಿಕಪ್ಪನಾ ಚೇವಾತಿ –

೨೨೧. ಸಮ್ಮುಖಾ ಪರಮ್ಮುಖಾತಿ, ದುವೇ ವುತ್ತಾ ವಿಕಪ್ಪನಾ;

ಸಮ್ಮುಖಾಯ ವಿಕಪ್ಪೇನ್ತೋ, ಬ್ಯತ್ತಸ್ಸೇಕಸ್ಸ ಸನ್ತಿಕೇ;

‘‘ಇಮಂ ಚೀವರಂ ತುಯ್ಹಂ, ವಿಕಪ್ಪೇಮೀ’’ತಿ ಭಾಸಯೇ.

೨೨೨. ಏತ್ತಾವತಾ ನಿಧೇತುಂವ, ಕಪ್ಪತೀ ನ ಚ ಕಪ್ಪತಿ;

ಪರಿಭೋಗಾದಿಕಂ ತೇನ, ಅಪ್ಪಚ್ಚುದ್ಧಟಭಾವತೋ.

೨೨೩. ‘‘ಮಯ್ಹಂ ಸನ್ತಕಂ ಪರಿಭುಞ್ಜ ವಾ ವಿಸ್ಸಜ್ಜೇಹಿ ವಾ ಯಥಾಪಚ್ಚಯಂ ವಾ ಕರೋಹೀ’’ತಿ –

ತೇನ ಪಚ್ಚುದ್ಧಟೇಯೇವ, ಪರಿಭೋಗಾದಿ ಕಪ್ಪತಿ.

೨೨೪. ಅಪರಾ ಸಮ್ಮುಖಾವೇಕಾ, ಭಿಕ್ಖುಸ್ಸೇಕಸ್ಸ ಸನ್ತಿಕೇ;

ಗಹೇತ್ವಾ ನಾಮಮೇಕಸ್ಸ, ಪಞ್ಚನ್ನಂ ಸಹಧಮ್ಮಿನಂ.

೨೨೫. ‘‘ಇಮಂ ಚೀವರಂ ತಿಸ್ಸಸ್ಸ ಭಿಕ್ಖುನೋ, ತಿಸ್ಸಾಯ ಭಿಕ್ಖುನಿಯಾ, ತಿಸ್ಸಸ್ಸ ಸಾಮಣೇರಸ್ಸ, ತಿಸ್ಸಾಯ ಸಾಮಣೇರಿಯಾ, ತಿಸ್ಸಾಯ ಸಿಕ್ಖಮಾನಾಯ ವಿಕಪ್ಪೇಮೀ’’ತಿ ವತ್ತಬ್ಬಂ.

ತೇನ ಭಿಕ್ಖುನಾ ‘‘ತಿಸ್ಸಸ್ಸ ಭಿಕ್ಖುನೋ, ತಿಸ್ಸಾಯ ಭಿಕ್ಖುನಿಯಾ, ತಿಸ್ಸಸ್ಸ ಸಾಮಣೇರಸ್ಸ, ತಿಸ್ಸಾಯ ಸಾಮಣೇರಿಯಾ, ತಿಸ್ಸಾಯ ಸಿಕ್ಖಮಾನಾಯ ಸನ್ತಕಂ ಪರಿಭುಞ್ಜ ವಾ ವಿಸ್ಸಜ್ಜೇಹಿ ವಾ ಯಥಾಪಚ್ಚಯಂ ವಾ ಕರೋಹೀ’’ತಿ ವತ್ತಬ್ಬಂ.

೨೨೬. ಪರಮ್ಮುಖಾವಿಕಪ್ಪನೇ-ಕಸ್ಸನ್ತಿಕೇವಮೀರಯೇ;

‘‘ಇಮಂ ಚೀವರಂ ತುಯ್ಹಂ ವಿಕಪ್ಪನತ್ಥಾಯ ದಮ್ಮೀ’’ತಿ.

೨೨೭. ತೇನ ವತ್ತಬ್ಬೋ ‘‘ಕೋ ತೇ ಮಿತ್ತೋ ವಾ ಸನ್ದಿಟ್ಠೋ ವಾ’’ತಿ. ಇತರೇನ ಚೇವಂ ವತ್ತಬ್ಬಂ ‘‘ತಿಸ್ಸೋ ಭಿಕ್ಖೂ’’ತಿ ವಾ ‘‘ತಿಸ್ಸಾ ಭಿಕ್ಖುನೀ’’ತಿ ವಾ ‘‘ತಿಸ್ಸೋ ಸಾಮಣೇರೋ’’ತಿ ವಾ ‘‘ತಿಸ್ಸಾ ಸಾಮಣೇರೀ’’ತಿ ವಾ ‘‘ತಿಸ್ಸಾ ಸಿಕ್ಖಮಾನಾ’’ತಿ ವಾ.

ಪುನ ತೇನ ‘‘ಅಹಂ ತಿಸ್ಸಸ್ಸ ತಿಸ್ಸಾಯ ವಾ ದಮ್ಮೀ’’ತಿ ವಿಕಪ್ಪೇತ್ವಾ ತೇನೇವ ‘‘ತಿಸ್ಸಸ್ಸ ಭಿಕ್ಖುನೋ, ತಿಸ್ಸಾಯ ಭಿಕ್ಖುನಿಯಾ, ತಿಸ್ಸಸ್ಸ ಸಾಮಣೇರಸ್ಸ, ತಿಸ್ಸಾಯ ಸಾಮಣೇರಿಯಾ, ತಿಸ್ಸಾಯ ಸಿಕ್ಖಮಾನಾಯ ಸನ್ತಕಂ ಪರಿಭುಞ್ಜ ವಾ ವಿಸ್ಸಜ್ಜೇಹಿ ವಾ ಯಥಾಪಚ್ಚಯಂ ವಾ ಕರೋಹೀ’’ತಿ ಪಚ್ಚುದ್ಧರಿತಬ್ಬಂ.

೨೨೮. ದೂರಸನ್ತಿಕತ್ತೇಕತ್ತಬಹುಭಾವಂ ವಿಜಾನಿಯ;

‘‘ಏತಂ ಇಮ’’ನ್ತಿ ‘‘ಏತಾನಿ, ಇಮಾನೀ’’ತೇತ್ಥ ಯೋಜಯೇ.

೨೨೯. ದಸಾಹಂ ಮಾಸಮೇಕಂ ವಾ, ಪಞ್ಚ ವಾ ಕಥಿನತ್ಥತೇ;

ಪಾರಿಪೂರತ್ಥಮೂನಸ್ಸ, ಪಚ್ಚಾಸಾ ಸತಿ ಮಾಸಕಂ;

ನುಪ್ಪಾದಯತಿ ನಿಸ್ಸಗ್ಗಿಂ, ನಾಧಿಟ್ಠಿತವಿಕಪ್ಪಿತನ್ತಿ.