೩೨. ನಿಸ್ಸಯನಿದ್ದೇಸೋ

ನಿಸ್ಸಯೋತಿ –

೨೩೦. ಬ್ಯತ್ತಸ್ಸ ಪಞ್ಚವಸ್ಸಸ್ಸ, ನತ್ಥಿ ನಿಸ್ಸಯ ಕಾರಿಯಂ;

ಯಾವಜೀವಮ್ಪಿ ಅಬ್ಯತ್ತೋ, ನಿಸ್ಸಿತೋಯೇವ ಜೀವತಿ.

೨೩೧. ಏಕಂಸಂ ಚೀವರಂ ಕತ್ವಾ, ಪಗ್ಗಣ್ಹಿತ್ವಾನ ಅಞ್ಜಲಿಂ;

ಉಕ್ಕುಟಿಕಂ ನಿಸೀದಿತ್ವಾ, ವದೇ ಯಾವತತೀಯಕಂ;

‘‘ಆಚರಿಯೋ ಮೇ, ಭನ್ತೇ, ಹೋಹಿ,

ಆಯಸ್ಮತೋ ನಿಸ್ಸಾಯ ವಚ್ಛಾಮೀ’’ತಿ.

೨೩೨. ಪಕ್ಕನ್ತೇ ಪಕ್ಖಸಙ್ಕನ್ತೇ, ವಿಬ್ಭನ್ತೇ ವಾಪಿ ನಿಸ್ಸಯೋ;

ಮರಣಾಣತ್ತುಪಜ್ಝಾಯ-ಸಮೋಧಾನೇಹಿ ಸಮ್ಮತಿ.

೨೩೩. ನಿಸ್ಸಾಯ ನ ವಸೇಲಜ್ಜಿಂ, ಅಪುಬ್ಬಂ ಠಾನಮಾಗತೋ;

ಆಗಮೇ ಚತುಪಞ್ಚಾಹಂ, ಞಾತುಂ ಭಿಕ್ಖುಸಭಾಗತಂ.

೨೩೪. ಅದ್ಧಿಕಸ್ಸ ಗಿಲಾನಸ್ಸ, ಗಿಲಾನುಪಟ್ಠಕಸ್ಸ ಚ;

ಯಾಚಿತಸ್ಸ ಅರಞ್ಞೇ ವಾ, ಸಲ್ಲಕ್ಖನ್ತೇನ ಫಾಸುಕಂ;

ಸಭಾಗೇ ದಾಯಕೇಸನ್ತೇ, ವಸಿತುಂ ತಾವ ಲಬ್ಭತೀತಿ.