೩೦. ವತ್ತನಿದ್ದೇಸೋ

ವತ್ತನ್ತಿ –

೨೧೩. ಆಗನ್ತುಕೋ ನ ಆರಾಮಂ, ಪವಿಸೇ ಸಉಪಾಹನೋ;

ಸಛತ್ತೋಗುಣ್ಠಿತೋ ಸೀಸೇ, ಕರಿತ್ವಾ ವಾಪಿ ಚೀವರಂ.

೨೧೪. ಪಾನೀಯೇನ ನ ಧೋವೇಯ್ಯ, ಪಾದೇ ವುಡ್ಢತರೇಪಿ ಚ;

ಆವಾಸಿಕೇಭಿವಾದೇಯ್ಯ, ಪುಚ್ಛೇಯ್ಯ ಸಯನಾಸನಂ.

೨೧೫. ಗಮಿಕೋ ಪಟಿಸಾಮೇತ್ವಾ, ದಾರುಮತ್ತಿಕಭಣ್ಡಕಂ;

ವಿಹಾರಞ್ಚ ಥಕೇತ್ವಾನ, ಆಪುಚ್ಛ ಸಯನಾಸನಂ.

೨೧೬. ಆಪುಚ್ಛಿತಬ್ಬೇ ಅಸತಿ, ಸಂಗೋಪೇತ್ವಾನ ಸಾಧುಕಂ;

ಪಕ್ಕಮೇಯ್ಯಞ್ಞಥಾ ತಸ್ಸ, ಪಕ್ಕನ್ತುಂ ನ ಚ ಕಪ್ಪತಿ.

೨೧೭. ಆವಾಸಿಕೋ ಪಞ್ಞಾಪೇಯ್ಯ, ವುಡ್ಢಾಗನ್ತುಸ್ಸ ಆಸನಂ;

ಉಪನಿಕ್ಖಿಪೇ ಪಾದೋದ-ಪ್ಪಭುತಿಂ ಪತ್ತಚೀವರಂ.

೨೧೮. ಪಚ್ಚುಗ್ಗನ್ತ್ವಾನ ಗಣ್ಹೇಯ್ಯ, ಪಾನೀಯೇನ ಚ ಪುಚ್ಛಯೇ;

ಆಗನ್ತುಕೇಭಿವಾದೇಯ್ಯ, ಪಞ್ಞಪೇ ಸಯನಾಸನಂ.

೨೧೯. ಅಜ್ಝಾವುತ್ಥಮವುತ್ಥಂ ವಾ, ಗೋಚರಾಗೋಚರಂ ವದೇ;

ವಚ್ಚಪಸ್ಸಾವಠಾನಾನಿ, ಕತಿಕಂ ಸೇಕ್ಖಸಮ್ಮುತಿಂ.

೨೨೦. ಪವೇಸನಿಕ್ಖಮೇ ಕಾಲಂ, ಪರಿಭೋಜಿಯಪಾನಿಯಂ;

ನಿಸಿನ್ನೋವ ನವಕಸ್ಸ, ಏತಂ ಸಬ್ಬಂ ಸಮುದ್ದಿಸೇತಿ.