೨೪. ಅಞ್ಜನೀನಿದ್ದೇಸೋ

ಅಞ್ಜನೀತಿ –

೧೮೨. ವಟ್ಟಾಟ್ಠಸೋಳಸಂಸಾ ವಾ, ಮಟ್ಠಾ ವಟ್ಟತಿ ಅಞ್ಜನೀ;

ತಿಸ್ಸೋಪಿ ಮೂಲೇ ಗೀವಾಯಂ, ಲೇಖಾ ಏಕಾವ ಬನ್ಧಿತುಂ.

೧೮೩. ಯಂ ಕಿಞ್ಚಿ ರೂಪಂ ಮಾಲಾದಿಕಮ್ಮಂ ಮಕರದನ್ತಕಂ;

ಗೋಮುತ್ತಕಡ್ಢಚನ್ದಾದಿ-ವಿಕಾರಂ ನೇತ್ಥ ವಟ್ಟತಿ.

೧೮೪. ಲಬ್ಭೇಕವಣ್ಣಸುತ್ತೇನ, ಸಿಬ್ಬಿತುಂ ಥವಿಕಾ ತಥಾ;

ಸಿಪಾಟಿ ಕುಞ್ಚಿಕಾಕೋಸೋ, ಸಲಾಕಾಪಿ ಅಚಿತ್ತಕಾ.

೧೮೫. ಸಙ್ಖನಾಭಿವಿಸಾಣಟ್ಠಿ-ನಳದನ್ತಮಯಾ ತಥಾ;

ಫಲಕಟ್ಠಮಯಾ ವೇಳು-ಲಾಖಾಲೋಹಮಯಾಪಿ ಚ.

೧೮೬. ಅಞ್ಜನಿಯೋ ಸಲಾಕಾಯೋ, ಧೂಮನೇತ್ತಾ ಚ ಲಬ್ಭರೇ;

ತಥಾ ಸತ್ಥಕದಣ್ಡಾನಿ, ನತ್ಥುದಾನಾ ಚ ತಮ್ಮಯಾತಿ.