೨೫. ಅಕಪ್ಪಿಯಸಯನನಿದ್ದೇಸೋ

ಅಕಪ್ಪಿಯಸಯನಾನೀತಿ –

೧೮೭. ಆಸನ್ದೀ ತೂಲೀ ಪಲ್ಲಙ್ಕೋ, ಪಟಿಕಂ ಗೋನಚಿತ್ತಕಂ;

ಪಟಲೀ ವಿಕತೀ ಉದ್ದ-ಲೋಮೀ ಏಕನ್ತಲೋಮಿಕಾ.

೧೮೮. ಕುತ್ತಂ ಕೋಸೇಯ್ಯಂ ಕಟ್ಟಿಸ್ಸಂ, ಹತ್ಥಿಅಸ್ಸರಥತ್ಥರಾ;

ಜಿನಪ್ಪವೇಣಿಕದಲೀ-ಮಿಗಪ್ಪವರಅತ್ಥರಾ.

೧೮೯. ಸಲೋಹಿತವಿತಾನಞ್ಚು-ಭತೋರತ್ತೂಪಧಾನಕಂ;

ಅಕಪ್ಪಿಯಾನಿ ಏತಾನಿ, ದುಕ್ಕಟಂ ಪರಿಭುಞ್ಜತೋ.

೧೯೦. ಆಸನ್ದಾದಿತ್ತಯಾ ಸೇಸೇ, ಲಬ್ಭತೇ ಗಿಹಿಸನ್ತಕೇ;

ಧಮ್ಮಾಸನೇ ಚ ಭತ್ತಗ್ಗೇ, ಘರೇ ಚಾಪಿ ನಿಸೀದಿತುಂ;

ಭೂಮತ್ಥರಣಸಙ್ಖೇಪೇ, ಸಯಿತುಞ್ಚಾಪಿ ಕಪ್ಪತಿ.

೧೯೧. ಚತುರಂಸಪೀಠಾ ಸತ್ತಙ್ಗಾ, ಪಞ್ಚಙ್ಗಾ ಉಚ್ಚಪಾದಕಾ;

ತೂಲೋನದ್ಧಾ ಘರೇಯೇವ, ಮಞ್ಚಪೀಠಾ ನಿಸೀದಿತುಂ.

೧೯೨. ಚೋಳವಾಕುಣ್ಣಪಣ್ಣಾನಂ, ತಿಣಾನಞ್ಚೇವ ಪೂರಿತಾ;

ಚೀವರಚ್ಛವಿಯೋ ಪಞ್ಚ, ಭಿಸೀ ಸಬ್ಬತ್ಥ ಕಪ್ಪಿಯಾ.

೧೯೩. ತೂಲತ್ತಯಂ ಭಿಸಿಗಬ್ಭೋ, ಲೋಮಾನಿ ಮಿಗಪಕ್ಖಿನಂ;

ಬಿಮ್ಬೋಹನೇ ಅನುಞ್ಞಾತಂ, ತೂಲವಜ್ಜಾ ಮಸೂರಕೇ.

೧೯೪. ಮನುಸ್ಸಲೋಮಮುಣ್ಣಾಯಂ, ಪಣ್ಣೇ ಪುಪ್ಫಂ ತಮಾಲಕಂ;

ಸುದ್ಧಂ ನ ಆಸನಞ್ಚೇವ, ಲಬ್ಭಮಪ್ಪಟಿವೇಕ್ಖಿತನ್ತಿ.