೧೩. ಸಮಣಕಪ್ಪನಿದ್ದೇಸೋ

ಸಮಣಕಪ್ಪಾತಿ –

೧೨೫. ಭೂತಗಾಮಸಮಾರಮ್ಭೇ, ಪಾಚಿತ್ತಿ ಕತಕಪ್ಪಿಯಂ;

ನಖೇನ ವಾಗ್ಗಿಸತ್ಥೇಹಿ, ಭವೇ ಸಮಣಕಪ್ಪಿಯಂ.

೧೨೬. ಸ ಮೂಲಖನ್ಧಬೀಜಗ್ಗ-ಫಳುಬೀಜಪ್ಪಭಾವಿತೋ;

ಆರಮ್ಭೇ ದುಕ್ಕಟಂ ಬೀಜಂ, ಭೂತಗಾಮವಿಯೋಜಿತಂ.

೧೨೭. ನಿಬ್ಬಟ್ಟಬೀಜಂ ನೋಬೀಜ-ಮಕತಞ್ಚಾಪಿ ಕಪ್ಪತಿ;

ಕಟಾಹಬದ್ಧಬೀಜಾನಿ, ಬಹಿದ್ಧಾ ವಾಪಿ ಕಾರಯೇ.

೧೨೮. ಏಕಾಬದ್ಧೇಸು ಬೀಜೇಸು, ಭಾಜನೇ ವಾಪಿ ಭೂಮಿಯಂ;

ಕತೇ ಚ ಕಪ್ಪಿಯೇಕಸ್ಮಿಂ, ಸಬ್ಬೇಸ್ವೇವ ಕತಂ ಭವೇ.

೧೨೯. ನಿಕ್ಖಿತ್ತೇ ಕಪ್ಪಿಯಂ ಕತ್ವಾ, ಮೂಲಪಣ್ಣಾನಿ ಜಾಯರುಂ;

ಕಪ್ಪಿಯಂ ಪುನ ಕಾರೇಯ್ಯ, ಭೂತಗಾಮೋ ಹಿ ಸೋ ತದಾ.

೧೩೦. ಸಪಣ್ಣೋ ವಾ ಅಪಣ್ಣೋ ವಾ, ಸೇವಾಲೋದಕಸಮ್ಭವೋ;

ಚೇತಿಯಾದೀಸು ಸೇವಾಲೋ, ನಿಬ್ಬಟ್ಟದ್ವತ್ತಿಪತ್ತಕೋ;

ಭೂತಗಾಮೋವ ಬೀಜಮ್ಪಿ, ಮೂಲಪಣ್ಣೇ ವಿನಿಗ್ಗತೇ.

೧೩೧. ಘಟಾದಿಪಿಟ್ಠೇ ಸೇವಾಲೋ, ಮಕುಳಂ ಅಹಿಛತ್ತಕಂ;

ದುಕ್ಕಟಸ್ಸೇವ ವತ್ಥೂನಿ, ಫುಲ್ಲಮಬ್ಯವಹಾರಿಕಂ.

೧೩೨. ಲಾಖಾನಿಯ್ಯಾಸಛತ್ತಾನಿ, ಅಲ್ಲರುಕ್ಖೇ ವಿಕೋಪಿಯ;

ಗಣ್ಹತೋ ತತ್ಥ ಪಾಚಿತ್ತಿ, ಛಿನ್ದತೋ ವಾಪಿ ಅಕ್ಖರಂ.

೧೩೩. ಪೀಳೇತುಂ ನಾಳಿಕೇರಾದಿಂ, ದಾರುಮಕ್ಕಟಕಾದಿನಾ;

ಛಿನ್ದಿತುಂ ಗಣ್ಠಿಕಂ ಕಾತುಂ, ತಿಣಾದಿಂ ನ ಚ ಕಪ್ಪತಿ.

೧೩೪. ಭೂತಗಾಮಂ ವ ಬೀಜಂ ವಾ, ಛಿನ್ದ ಭಿನ್ದೋಚಿನಾಹಿ ವಾ;

ಫಾಲೇಹಿ ವಿಜ್ಝ ಪಚ ವಾ, ನಿಯಮೇತ್ವಾ ನ ಭಾಸಯೇ.

೧೩೫. ಇಮಂ ಕರೋಹಿ ಕಪ್ಪಿಯಂ, ಇಮಂ ಗಣ್ಹೇದಮಾಹರ;

ಇಮಂ ದೇಹಿ ಇಮಂ ಸೋಧೇಹೇವಂ ವಟ್ಟತಿ ಭಾಸಿತುನ್ತಿ.