೧೪. ಭೂಮಿನಿದ್ದೇಸೋ

ಭೂಮಿಯೋತಿ –

೧೩೬. ಸಮ್ಮುತುಸ್ಸಾವನನ್ತಾ ಚ, ಗೋನಿಸಾದೀ ಗಹಾಪತಿ;

ಕಪ್ಪಿಯಾ ಭೂಮಿಯೋ ಯಾಸು, ವುತ್ಥಂ ಪಕ್ಕಞ್ಚ ಕಪ್ಪತಿ.

೧೩೭. ವಾಸತ್ಥಾಯ ಕತೇ ಗೇಹೇ, ಸಙ್ಘಿಕೇ ವೇಕಸನ್ತಕೇ;

ಕಪ್ಪಿಯಾ ಕುಟಿ ಲದ್ಧಬ್ಬಾ, ಸಹಸೇಯ್ಯಪ್ಪಹೋನಕೇ.

೧೩೮. ಗೇಹೇ ಸಙ್ಘಸ್ಸ ವೇಕಸ್ಸ, ಕರಮಾನೇವಮೀರಯಂ;

ಪಠಮಿಟ್ಠಕಥಮ್ಭಾದಿಂ, ಠಪೇಯ್ಯುಸ್ಸಾವನನ್ತಿಕಾ;

‘‘ಕಪ್ಪಿಯಕುಟಿಂ ಕರೋಮ, ಕಪ್ಪಿಯಕುಟಿಂ ಕರೋಮಾ’’ತಿ.

೧೩೯. ಯೇಭುಯ್ಯೇನಾಪರಿಕ್ಖಿತ್ತೋ, ಆರಾಮೋ ಸಕಲೋಪಿ ವಾ;

ವುಚ್ಚತೇ ‘‘ಗೋನಿಸಾದೀ’’ತಿ, ಸಮ್ಮುತೀ ಸಙ್ಘಸಮ್ಮತಾ.

೧೪೦. ಭಿಕ್ಖುಂ ಠಪೇತ್ವಾ ಅಞ್ಞೇಹಿ, ದಿನ್ನೋ ತೇಸಂವ ಸನ್ತಕೋ;

ಅತ್ಥಾಯ ಕಪ್ಪಕುಟಿಯಾ, ಗೇಹೋ ಗಹಪತೀ ಮತೋ.

೧೪೧. ಅಕಪ್ಪಕುಟಿಯಾ ವುತ್ಥಸಪ್ಪಿಆದೀಹಿ ಮಿಸ್ಸಿತಂ;

ವಜೇಯ್ಯ ಅನ್ತೋವುತ್ಥತ್ತಂ, ಪುರಿಮಂ ಕಾಲಿಕದ್ವಯಂ.

೧೪೨. ತೇಹೇವ ಭಿಕ್ಖುನಾ ಪಕ್ಕಂ, ಕಪ್ಪತೇ ಯಾವಜೀವಿಕಂ;

ನಿರಾಮಿಸಂವ ಸತ್ತಾಹಂ, ಸಾಮಿಸೇ ಸಾಮಪಾಕತಾ.

೧೪೩. ಉಸ್ಸಾವನನ್ತಿಕಾ ಯೇಹಿ, ಥಮ್ಭಾದೀಹಿ ಅಧಿಟ್ಠಿತಾ;

ತೇಸುಯೇವಾಪನೀತೇಸು, ತದಞ್ಞೇಸುಪಿ ತಿಟ್ಠತಿ.

೧೪೪. ಸಬ್ಬೇಸು ಅಪನೀತೇಸು, ಭವೇ ಜಹಿತವತ್ಥುಕಾ;

ಗೋನಿಸಾದೀ ಪರಿಕ್ಖಿತ್ತೇ, ಸೇಸಾ ಛದನವಿಬ್ಭಮಾತಿ.